C. C. A. Christensen (1831–1912), Tolauapiga a Siona, c. 1878, atavali i luga o le ie lalaga, 78 × 114 inisi. Falemataaga o Faatufugaga a le Iunivesite a Polika Iaga, meaalofa a le fanau a fanau a C. C. A. Christensen, 1970

13–19 Setema

Mataupu Faavae ma Feagaiga 102–105

“A Mavae Puapuaga e Tele … ona Oo Mai Lea o le Faamanuiaga”

O a ni mataupu faavae mai le Mataupu Faavae ma Feagaiga 102–5 e anoa ia te oe? Mafaufau e tusifaamaumau ou manatu ma uunaiga e uiga i nei mataupu faavae.

Tusifaamaumau Ou Lagona Uunai

Sa nutimomoia loto o le Au Paia i Katelani i le faalogo atu o tutuliese o latou uso ma tuafafine i le Itumalo o Siakisone, Misuri, mai o latou fale. Atonu la ai sa avea ma faamalosiauga ina ua folafola atu e le Alii e faapea, “o le laveaiina o Siona” o le a “oo mai e ala i le mana” (Mataupu Faavae ma Feagaiga 103:15). Faatasi ai ma lena folafolaga i o latou loto, e silia ma le 200 alii, ma le pe tusa ma le 25 tamaitai ma tamaiti, sa auai i le mea na latou ta’ua o le Tolauapiga a Isaraelu, lea na ta’ua mulimuli ane o le Tolauapiga a Siona. O lana misiona sa i ai, ia savavali atu i Misuri e laveai Siona.

I sui auai o le tolauapiga, o le laveaiina o Siona sa faauigaina o le toeaumaiga o le Au Paia i o latou laueleele. Peitai, a o le’i taunuu le tolauapiga i le Itumalo o Siakisone, sa ta‘u mai e le Alii ia Iosefa Samita e taofi ma faataape le Tolauapiga a Siona. Sa le mautonu ma lē fiafia nisi o sui o le tolauapiga i lenei faatonuga fou; ia i latou, o lona uiga ua toilalo le malaga ma sa le’i faataunuuina folafolaga a le Alii. Ae peitai, o isi sa ese so latou manatu i ai. E ui ina sa le’i toe foi atu lava le Au Paia na faateaina i le Itumalo o Siakisone, ae o le aafiaga na aumaia ai se tulaga o le “laveaiga” ia Siona, ma sa “oo mai [lava] e ala i le mana.” O sui faamaoni o le Tolauapiga a Siona, o le toatele o i latou na avea mulimuli ane o ni taitai o le Ekalesia, sa molimauina o le aafiaga na faalolotoina ai o latou faatuatua i le mana o le Atua, i le valaauga faalelagi o Iosefa Samita, ma i Siona—e le na’o Siona le nofoaga ae o Siona le nuu o le Atua. Nai lo le fesiligia o le taua o lenei galuega e foliga mai sa le faamanuiaina, sa latou aoaoina o le galuega moni lava o le mulimuli i le Faaola, e tusa lava pe tatou te le malamalama i mea uma. O le iuga la, o le ala lenei o le a laveaiina ai Siona.

Tagai Au Paia, 1:194–206; “The Acceptable Offering of Zion’s Camp,” Revelations in Context, 213–18.

Sa nonofo le Tolauapiga a Siona i auvai o le Vaitafe Laitiiti o Fagotaga, o loo faaalia atu iinei lona ata.

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 102:12–23

O le a le faamoemoega o faatonuga o loo i nei fuaiupu?

O le vaega 102 o loo i ai minute o le fonotaga i Katelani, Ohaio, lea na faatulagaina ai le au fautua maualuga muamua lava a le Ekalesia. O fuaiupu 12–23 ua faamatala ai aiaiga e mulimuli ai fautua maualuga pe a faia fono aoai mo i latou o e ua solia ni agasala matuia.

Ua aoao mai Peresitene M. Russell Ballarad, “O nisi taimi e fesili ai tagata o le Ekalesia pe aisea e faia ai fono aoai a le Ekalesia. O le faamoemoega e tafatolu: ia laveai le agaga o le tagata solitulafono, ia puipuia le e ta’umamaina, ma ia malupuipuia le mama a’ia’i, amiotonu, ma le igoa lelei o le Ekalesia” (“A Chance to Start Over: Church Disciplinary Councils and the Restoration of Blessings,” Ensign, Sept. 1990,15).

Tagai foi i Autu o le Talalelei, “Church Disciplinary Councils,” topics.ChurchofJesusChrist.org.

Mataupu Faavae ma Feagaiga 103:1–12, 36; 105:1–19

E mafai ona faatuina Siona i luga o mataupu faavae o le amiotonu.

Aisea na le toe i ai ai i le Au Paia lo latou laueleele o le folafolaga i Misuri? Ma aisea na le faatagaina ai e le Alii le Tolauapiga a Siona e toe aumai i latou i o latou laeleele? E mautinoa lava na i ai se matafaioi a amioga faalealofa o tagata leaga o Misuri, ma sa folafola mai e le kovana o Misuri le lagolago mo le Au Paia peitai sa le’i tuuina mai lava se mea. Ae sa fetalai mai le Alii e faapea, “a na leai solitulafono a loʼu nuu, po ua laveaiina” Siona (Mataupu Faavae ma Feagaiga 105:2). A o e faitau i le Mataupu Faavae ma Feagaiga 103:1–12, 36; 105:1–19, e mafai ona e maitaua ai nisi o mea na taotaomia ai le faatuina o Siona i Misuri ma isi na semanu e mafai ona fesoasoani ai. O le a se mea na e aoaoina e mafai ona fesoasoani ia te oe e faatu ai Siona i lou loto ma lou aiga?

Mataupu Faavae ma Feagaiga 103:12–13; 105:1–6, 13–19

E oo mai faamanuiaga pe a mavae puapuaga ma tofotofoga o le faatuatua.

I le tele o itu, o le auai i le Tolauapiga a Siona sa o se tofotofoga o le faatuatua. Sa umi le malaga, sa vevela le tau, ma sa le lava meaai ma vaiinu i nisi o taimi. I le mavae ai o mea uma na latou onosaia, sa le’i mafai lava e le Au Paia ona toe foi atu i lo latou laueleele. Mafaufau pe ono mafai faapefea ona fesoasoani mataupu faavae o loo i le Mataupu Faavae ma Feagaiga 103:12–13 ma le 105:1–6, 13–19 i tagata o le Tolauapiga a Siona o e sa taumanatunatu pe na oo moni mai le Atua le poloaiga e faatulaga ai. E mafai faapefea e nei mataupu faavae ona fesoasoani ia te oe i a oe lava tofotofoga o le faatuatua?

E mafai foi ona e faitau e uiga i aafiaga o tagata o le Tolauapiga a Siona i le “O Leo o le Toefuataiga” i le faaiuga o le otoootoga lenei. O le a se mea ua faagaeetia ai oe e uiga i o latou uiga faaalia? O le a se mea e mafai ona e aoaoina mai i a latou faataitaiga?

Tagai foi David A. Bednar, “I Le Itu a le Alii: O Lesona mai le Tolauapiga a Siona,” Ensign, Iulai 2017, 26–35.

Mataupu Faavae ma Feagaiga 104:11–18, 78–83

O a’u o se “tausimea i luga o faamanuiaga faaletino.”

E faaopoopo atu i tofotofoga i Misuri, i le 1834 sa fetaiai ai le Ekalesia ma faigata tautupe, e aofia ai le tetele o aitalafu ma tupe faaalu. I le vaega 104 na tuuina mai ai e le Alii se fautuaga i tulaga tautupe o le Ekalesia. E mafai faapefea ona e faatataua mataupu faavae o loo i fuaiupu 11–18 ma le 78–83 i au lava faaiuga tautupe?

Ina ia aoao e uiga i se tasi o auala sa saunia ai e le Alii le Ekalesia ina ia laveaiina mai le pologa o aitalafu, matamata i le “Treasure in Heaven: The John Tanner Story” (vitio, ChurchofJesusChrist.org).

Ina ia aoao atili e uiga i le “ala [a le Alii lava ia” (fuaiupu 16) e tausi ai Lana Au Paia, atonu e te suesue i le savali a Peresitene Dieter F. Uchtdorf “O Le Faia i le Ala a le Alii” (Ensign po o le Liahona, Nov. 2011, 53–56).

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 103:12, 36; 105:9–13.Pe ua talosagaina lou aiga (po o se tasi o ou tuaa) e fai se mea lea sa faapea ona i’u ane i se ala e te le’i faamoemoeina? O le a se mea e mafai ona e aoao mai i tali atu a sui auai o le Tolauapiga a Siona ina ua le tau lau o le latou malaga i le mea e pei ona sa latou faamoemoeina? (tagai “O Leo o le Toefuataiga” o loo i le faaiuga o le otootoga lenei).

Mataupu Faavae ma Feagaiga 104:13–18.O le a le mea ua tuuina mai e le Alii ia i tatou? O le a se mea ua Ia faamoemoe tatou te faia i nei mea?

Mataupu Faavae ma Feagaiga 104:23–46.E mafai e lou aiga ona sailiili i nei fuaiupu e su’e ai pe faafia ona folafola mai le Alii e “faateleina faamanuiaga” (fuaiupu 23) mo i latou o e faamaoni. Atonu o se taimi lelei lenei e “faitau ai ou manuia” (“Faitau Ou Manuia,” Viiga, nu. 151) ma talanoa pe faapefea ona fesoasoani le faia o lea mea ia i tatou i taimi faigata. Atonu o le a fiafia tamaiti laiti e tusi ni ata o faamanuiaga e faapitoa ona latou faafetai ai.

Mataupu Faavae ma Feagaiga 105:38–41.E mafai faapefea ona tatou fai “atu ni manatu faatu mo le filemu” (fuaiupu 40) pe a faalealofa pe le tutusa ona fai e isi i tatou? O le a se mea e mafai ona tatou faia e avea ai ma “se tagavai o le filemu” (fuaiupu 39) i totonu o o tatou aiga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Faitau Ou Manuia,” Viiga, nu. 151.

O Leo o le Toefuataiga

Tolauapiga a Siona

Talu ai sa le’i toe aumaia e le Tolauapiga a Siona le Au Paia i o latou laueleele i le Itumalo o Siakisone, e toatele tagata sa i ai lagona e faapea, o a latou taumafaiga o se toilalo. Ae peitai, e toatele tagata auai o le Tolauapiga a Siona sa toe tetepa i tua i lo latou aafiaga ma vaaia ai le faataunuuina e le Alii o se faamoemoega maualuga atu i o latou olaga ma i Lona malo. O nisi nei o a latou molimau.

Iosefa Samita

E silia ma le 40 tausaga talu ona uma le Tolauapiga a Siona, sa lipoti mai ai e Iosefa Iaga, o lē sa avea ma se sui auai o le tolauapiga, e faapea sa saunoa Iosefa Samita i le saunoaga lenei:

“Uso e, o nisi o outou ua feita ia te au, ona tou te lei tau i Misuri; ae sei ou tau atu ia te outou, e lei finagalo le Atua tou te tau. Sa le mafai ona Ia faatulagaina lona malo i ni tamalii e toasefululua e tatalaina faitotoa o le talalelei i atunuu o le lalolagi, ma i ni tamalii e toa fitugafulu i lalo o la latou taitaiga ia mulimuli i o latou tulagaaao, seiiloga na ia aveina i latou mai se tino o alii o e na ofoina atu o latou ola, ma o e na faia se osigataulaga maoae e pei ona sa faia e Aperaamo.

“O lenei la, ua i ai i le Alii lana Toasefululua ma lana Toafitugafulu, ma o le a i ai isi korama a Fitugafulu e valaauina, o e o le a faia le osigataulaga, ma i latou o e e le’i faia a latou osigataulaga ma a latou taulaga i le taimi nei, o le a faia lea i le olaga a sau.”¹

Polika Iaga

“Ina ua matou taunuu i Misuri sa fetalai mai le Alii i lana auauna o Iosefa ma faapea mai, ‘Ua ou talia lau taulaga,’ ma sa matou maua le avanoa e toe foi mai ai. I lo’u toe taliu mai e toatele ni uo sa fesili mai ia te a’u po o le a se aoga sa i ai i le valaauina o alii ma la latou galuega e o atu i Misuri ae toe foi mai, e aunoa ma le foliga mai o le ausiga o se mea. Sa latou fesili mai, ‘O ai na aoga i ai?’ ‘Afai na poloai mai le Alii e fai, o le a se faamoemoega sa ia silafia mo le faia o lea mea?’ … Sa ou fai atu i nei uso, sa matuai lelei lo’u totogi—o le totogi faatasi ma se tului tele lava—ioe o lea sa faapea ona faatumulia ai la’u fuataga i le poto ua ou mauaina e ala i le malaga faatasi ma le Perofeta.”²

Uilifoti Uitilafi

“Sa ou i ai faatasi ma le Perofeta a le Atua i le Tolauapiga a Siona. Sa ou vaai i fegalegaleaiga a le Atua ma ia. Sa ou vaai i le mana o le Atua ia te ia. Sa ou vaai o ia o se Perofeta. O le mea sa faaali mai ia te ia e ala i le mana o le Atua i luga o lena misiona sa maoae le taua ia te a’u ma ia i latou uma o e na talaiaina ana faatonuga.”³

“Ina ua tofia sui o le Tolauapiga a Siona, e toatele i matou e lei vaai lava i le tasi ma le isi; sa o i matou o ni tagata ese i le tasi ma le isi ma e toatele foi e lei vaai i le perofeta. Sa faataape solo i matou, e pei o ni sana na faamama i totonu o se vili falaoamata, i le atunuu atoa. O i matou o ni alii talavou, ae sa valaauina i le taeao po o lena aso e o atu ma laveai Siona, ma o le mea na tatau ona matou faia, sa tatau ona matou faia e ala i le faatuatua. Sa matou faapotopoto faatasi mai Setete eseese i Katelani ma o atu e laveai Siona, e faataunuu ai le poloaiga a le Atua ia i matou. Sa talia e le Atua a matou galuega e pei ona sa Ia faia i galuega a Aperaamo. E tele mea sa matou ausia, e ui ina tuufesili le au liliuese ma le au le talitonu i le tele o taimi i le fesili, ‘o le a se mea ua e faia?‘ Sa matou maua ai se aafiaga na semanu e le mafai ona matou mauaina i se isi lava ala. Na matou maua le avanoa o le vaai atu i fofoga o le perofeta, ma sa matou maua foi le avanoa e malaga faatasi ma ia i ni maila se tele, ma vaai i galuega a le Agaga o le Atua ia te ia, ma faaaliga a Iesu Keriso ia te ia ma le faataunuuina o na faaaliga. Ma sa ia faapotopotoina ni toeaiina e lua selau mai le atunuu atoa i le taeao o lena aso ma auina atu i matou i le lalolagi atoa e talai atu le talalelei a Iesu Keriso. Pe ana ou le alu i le Tolauapiga a Siona semanu ou te le i ai iinei i le taimi nei [i le Aai o Sate Leki, e auauna atu i le Korama a le Toasefululua]. … E ala i le o atu iina sa lafo atu ai i matou i totonu o le tovine e talai le talalelei, ma sa talia e le Alii a matou galuega. Ma i a matou galuega ma sauaga uma, ma o matou olaga ia sa masani ona lamatia ai, sa tatau ai ona matou galulue malosi ma ola e ala i le faatuatua.”

“O le aafiaga na [matou] maua i le malaga ai i le Tolauapiga a Siona, sa sili mamao atu ona aogā nai lo o auro.”

Faamatalaga

1. I le Joseph Young Sr., History of the Organization of the Seventies (1878), 1.

2. “Discourse,” Deseret News, Dec. 3, 1862, 177.

3. I le Conference Report, Apr. 1898, 29–30; tagai foi Aoaoga a Peresitene o le Ekalesia: Uilifoti Uitilafi (2004), 135.

Tolauapiga a Siona (Tolauapiga a Siona i le Vaitafe o Fagotaga), saunia e Judith A. Mehr