Mga Ideya sa Pagpauswag sang Inyo Pang-pamilya nga Pagtuon sang Balaan nga mga Kasulatan

Ang regular nga pang-pamilya nga pagtuon sang balaan nga mga kasulatan isa ka mabaskog nga paagi agud buligan ang imo pamilya nga tun-an ang ebanghelyo. Kon ano kadamo kag kon ano kalawig ang inyo basahon bilang pamilya indi pareho kaimportante sangsa katayuyon sa inyo mga pagpaninguha. Kon himuon ninyo ang pagtuon sang balaan nga mga kasulatan nga importante nga bahin sang inyo pangabuhi sa pamilya, mabuligan mo ang mga miyembro sang imo pamilya nga mangin mas malapit sa isa kag isa kag kay Jesucristo kag matukod ang ila testimonya sa pundasyon sang Iya pulong.

Binagbinaga ang masunod nga mga pamangkot:

• Paano mo paisugon ang mga miyembro sang pamilya nga magtuon sang balaan nga mga kasulatan nga sila lang?

• Ano ang pwede mo himuon agud paisugon ang mga miyembro sang pamilya nga ipaambit ang ila natun-an?

• Paano mo tutokan ang mga prinsipyo nga inyo ginatun-an sa Doktrina kag mga Kasugtanan sa adlaw-adlaw nga mga oportunidad sa pagtudlo?

Tandai nga ang balay amo ang nagakabagay nga lugar para sa pagtuon sang ebanghelyo. Mahimo mo tun-an kag itudlo ang ebanghelyo sa balay sa mga paagi nga indi posible sa klase sa Simbahan. Magmangin matugahon (creative) samtang imo ginahunahuna ang mga paagi nga mabuligan ang imo pamilya nga magtuon gikan sa balaan nga mga kasulatan.

Mga Ideya para sa Kahiwatan

Binagbinaga ang pila sa masunod nga mga ideya agud panamion ang inyo pang-pamilya nga pagtuon sang balaan nga mga kasulatan:

Maggamit sang musika

Magkanta sang mga kalantahon nga nagapabakod sang mga prinsipyo nga ginatudlo sa balaan nga mga kasulatan. Isa ka ginapanugyan nga himno ukon kanta sang kabataan ang nalista sa tagsa ka semanal nga outline. Pwede ka mamangkot parte sa mga tinaga ukon mga dinalan sa kanta. Dugang pa sa pagkanta, ang imo kabataan pwede mag-aksyon nga bagay sa mga kanta ukon mamati sa mga kanta nga ginapatukar samtang nagaobra sila sang iban nga mga buluhaton.

Magpaambit sang makahulugan nga balaan nga mga kasulatan

Hatagi ang mga miyembro sang pamilya sang oras agud ipaambit ang mga dinalan sa balaan nga mga kasulatan nga nangin makahulugan para sa ila sa tion sang ila personal nga pagtuon.

Gamita ang imo kaugalingon nga mga pulong

Agdaha ang mga miyembro sang pamilya nga palip-uton sa ila kaugalingon nga pulong ang ila natun-an halin sa balaan nga mga kasulatan nga inyo ginatun-an.

Gamita ang balaan nga mga kasulatan sa imo kabuhi

Pagkatapos basahon ang isa ka dinalan sa balaan nga mga kasulatan, pangabaya ang mga miyembro sang pamilya nga magpaambit sang mga paagi nga ang dinalan mahimo magamit sa ila mga kabuhi.

Magpamangkot

Agdaha ang mga miyembro sang pamilya nga magpamangkot parte sa ebanghelyo, kag dayon hatagi sang oras nga pangitaon ang mga bersikulo nga mahimo makasabat sa pamangkot.

Mag-display sang balaan nga kasulatan

Magpili sang isa ka bersikulo nga makahulugan sa imo, kag i-display ini sa lugar nga makita pirme sang mga miyembro sang pamilya. Agdaha ang iban nga mga miyembro sang pamilya nga magbulos-bulos pili sang balaan nga kasulatan nga i-display.

Maghimo sang listahan sang balaan nga kasulatan

Bilang pamilya, magpili sang pila ka mga bersikulo nga gusto mo nga hambalan sa maabot nga semana.

Magsaulo sang balaan nga mga kasulatan

Magpili sang dinalan sa balaan nga kasulatan nga makahulugan sa imo pamilya, kag agdaha ang mga miyembro sang pamilya nga sauluhon ini paagi sa pagsulit sini adlaw-adlaw ukon magpakontes sa pagsaulo.

Magpaambit sang mga leksyon gamit ang isa ka bagay

Magpangita sang mga bagay nga may kaangtanan sa mga kapitulo kag bersikulo nga inyo ginabasa bilang pamilya. Agdaha ang mga miyembro sang pamilya nga hambalan kon paano ang tagsa ka bagay maangot sa mga pinanudlo sa balaan nga mga kasulatan.

Magpili sang topiko

Pabulos-bulosa ang mga miyembro sang pamilya sa pagpili sang topiko nga tun-an sang pamilya sing ululupod.   

Magdrowing sang litrato

Basaha ang pila ka mga bersikulo bilang pamilya, kag dayon hatagi sang tion ang mga miyembro sang pamilya nga magdrowing sang isa ka butang nga may kaangtanan sa inyo ginbasa. Hatagi sang tion nga hambalan ang drowing sang kada isa.

Idrama-drama ang isa ka istorya

Pagkatapos basahon ang isa ka istorya, agdaha ang mga miyembro sang pamilya nga idrama-drama ini. Pagkatapos, hambali kon paano ang istorya maangot sa mga butang nga inyo ginaeksperiyensya sing indibidwal kag bilang pamilya.

Pagtudlo sang Kabataan

Kon may magagmay ka nga kabataan sa imo pamilya, ari ang pila ka kahiwatan nga makabulig sa ila nga magtuon:

Magkanta

Ang mga himno kag mga kalantahon gikan sa Mga Himno kag mga Ambahanon sang Kabataan mabaskog nga nagatudlo sang doktrina. Ang tagsa ka outline sa sining manwal nagalakip sang ginapanugyan nga kanta.   Buligi ang imo kabataan nga mapaanggid ang mga mensahe sa mga kanta sa ila mga kabuhi.

Magpamati ukon magdrama-drama sang isa ka istorya.

Ang magagmay nga kabataan nanamian sang mga istorya—halin sa balaan nga mga kasulatan, halin sa imo kabuhi, halin sa kasaysayan sang Simbahan, ukon halin sa mga magasin sang Simbahan. Magpangita sang mga paagi nga makaentra sila sa pagsugid sang istorya. Pwede sila mag-uyat sang mga litrato ukon mga bagay, magdrowing sang mga litrato parte sa ila mabatian, magdrama-drama sang istorya, ukon bisan gani magbulig sa pagsugid sang istorya. Buligi ang imo kabataan nga makilala ang mga kamatuoran sang ebanghelyo sa mga istorya nga imo ginasugid.

Magbasa sang balaan nga kasulatan

Ang magagmay nga kabataan mahimo nga indi pa kaayo makahibalo magbasa, pero pwede mo sila gihapon maentra sa pagtuon gikan sa balaan nga mga kasulatan. Mahimo ka nga magtutok sa isa lamang ka bersikulo, tampok nga dinalan, ukon tinaga.

Magtan-aw sang isa ka litrato ukon magtan-aw sang video

Magpamangkot parte sa litrato ukon video parte sa prinsipyo sang ebanghelyo nga inyo ginahambalan. Halimbawa, mahimo ka magpamangkot, “Ano ang nagakatabo sa sining litrato? Ano ang nabatyagan ninyo parte sini?”  

Maghimo

Ang mga kabataan pwede maghimo, magdrowing, ukon magkolor sang isa ka bagay nga may kaangtanan sa istorya ukon prinsipyo nga ila ginatun-an.

Mag-entra sa mga leksyon nga nagagamit sang mga bagay

Ang simple nga leksyon nga nagagamit sang bagay sa pagtudlo makabulig sa imo kabataan nga maintiendihan ang isa ka prinsipyo sang ebanghelyo nga mabudlay maintiendihan. Kon maggamit sang leksyon nga nagagamit sang mga bagay sa pagtudlo, pangitai sang paagi nga makaentra ang imo kabataan. Mas makatuon sila sang maayo gikan sa eksperiyensya nga may inter-aksyon kaysa magtan-aw lang sa ginahimo.

Magrole-play

Kon ang kabataan magrole-play sang isa ka sitwasyon nga posible masugata nila sa matuod-tuod nga kabuhi, mas maintiendihan nila kon paano ang prinsipyo sang ebanghelyo magamit sa ila mga kabuhi.

Sulita ang mga kahiwatan

Ang magagmay nga kabataan mahimo nga kinahanglan makabati sang mga konsepto sing madamo nga beses para maintiendihan nila ang mga ini. Halimbawa, mahimo ka magsugid sang istorya sa balaan nga mga kasulatan sing pila ka beses sa nagkalain-lain nga paagi—pagbasa gikan sa balaan nga mga kasulatan, pagpalip-ot sa imo kaugalingon nga mga pulong, pagpabulig sang imo mga kabataan nga magsaysay sang istorya, pag-imbitar sa ila nga idrama-drama ang istorya, kag madamo pa.

I-angot ini sa ila personal nga mga tuyo sa pag-uswag.

Ang pang-pamilya nga pagtuon sang balaan nga mga kasulatan sarang makahatag sang inspirasyon sa mga lamharon kag kabataan nga magpahamtang sang mga tinutuyo para sa ila espirituhanon, pisikal, kinaalam, kag sosyal nga pagtubo (tan-awa sa Lucas 2:52).

Pagtudlo sang mga Lamharon

Kon may mga lamharon sa imo pamilya, ari ang pila ka kahiwatan nga makabulig sa ila nga magtuon:

Agdaha sila nga magtudlo

Sa kinaandan mas makatuon kita kon nagatudlo kita sang isa ka butang sangsa magpamati lang kita parte diri. Hatagi ang inyo mga lamharon sang mga oportunidad nga magpanguna sa mga diskusyon sa pamilya parte sa balaan nga mga kasulatan.

I-angot ini sa seminary

Sini nga tuig tun-an sang mga estudyante sang seminary ang Doktrina kag mga Kasugtanan. Kon ang inyo mga lamharon nagatambong sa seminary, agdaha sila nga ipaambit ang ila mga natun-an didto.

Ipaanggid ang balaan nga mga kasulatan

Kon kaisa nabudlayan ang mga lamharon nga makita kon paano nagaangot ang doktrina kag mga prinsipyo sa balaan nga mga kasulatan sa ila mga kabuhi. Buligi sila nga makita kon paano ang mga istorya kag mga pinanudlo sa balaan nga mga kasulatan magamit sa mga sitwasyon nga ila ginaatubang sa balay, sa eskwelahan, ukon sa ila mga abyan.

Magpamangkot sang mga nagatulod sang pagpamensar

Madamo sa mga lamharon ang nagaakto sa mga pamangkot nga nagatugot sa ila nga ihambal ang ila mga panghunahuna kag mga balatyagon parte sa balaan nga mga kasulatan imbes nga ipasulit lamang ang ginasiling sa balaan nga mga kasulatan. Halimbawa, pwede ka mamangkot, “Ano ayhan ang ginatudlo sa inyo sang Ginuo sa sining mga bersikulo?” ukon “Ngaa sa banta ninyo nga nangin makahulugan ining rebelasyon sa mga Santos sang tinuig 1830?”

I-angot ini sa ila personal nga mga tuyo sa pag-uswag.

Ang pang-pamilya nga pagtuon sang balaan nga mga kasulatan sarang makahatag sang inspirasyon sa mga lamharon kag kabataan nga magpahamtang sang mga tinutuyo para sa ila espirituhanon, pisikal, kinaalam, kag sosyal nga pagtubo (tan-awa sa Lucas 2:52).

Mangin bukas sa ila mga pamangkot

Ang pamangkot halin sa lamharon isa ka malahalon nga oportunidad sa pagpaambit sang kamatuoran kag paghandum sang paghangop sang topiko nga interesado sia. Indi magkahadlok sa mga pamangkot ukon bale-walaon ang mga ini, bisan pa nga daw wala ini sang kaangtanan sa topiko nga ginahambalan. OK lang kon ginakulabos ka sang isabat. Ang puluy-an amo ang pinakamaayo nga lugar sa pagpangita sang mga sabat nga ululupod.

Paisoga sila nga ipaambit ang ila mga panghunahuna

May pinasahi nga perspektibo kag panan-aw ang mga lamharon nga maamot sa pang-pamilya nga pagtuon sang balaan nga mga kasulatan. Ipahibalo sa ila nga interesado ka sa ginatudlo sa ila sang Espiritu parte sa balaan nga mga kasulatan. Pwede ka man gani mangabay nga iistorya nila ang mga panghunahuna sa ila personal nga pagtuon.

Makigbagay

Kon may lamharon ka nga indi handa sa pagpartisipar sa pang-pamilya nga pagtuon sang balaan nga mga kasulatan, magpangita sang iban nga pamaagi nga magkig-angot sa iya. Halimbawa, pwede mo bala sambiton ang ebanghelyo sing natural lang sa inyo mga paghambalanay ukon magpaambit sang makahulugan nga balaan nga kasulatan sa paagi nga wala nagasermon ukon nagadikta? Ang pagtuon sang balaan nga mga kasulatan indi kinahanglan nga palareho sa tagsa ka pamilya. May mga kabataan nga mas nagaresponder sa pagtuon sang balaan nga mga kasulatan nga tinag-isaisa. Mangin mapinangamuyuon kag sunda ang mga pagpabatyag sang Espiritu.

Siling ni Pangulong Russell M. Nelson: “Ginapromisa ko nga samtang matutom ninyo nga ginakaayo ang inyo puluy-an agud mangin sentro sang pagtuon sang ebanghelyo, sa kadugayan ang inyo mga Adlaw nga Inugpahuway matuod nga mangin makalilipay. Ang inyo kabataan malangkag sa pagtuon kag sa pagpangabuhi sang mga pinanudlo sang Manluluwas, ang impluwensya sang kaaway sa inyo kabuhi kag sa inyo puluy-an maganubo. Ang mga pagbag-o sa inyo pamilya mangin dako kag nagadugay” (“Becoming Exemplary Latter-day Saints,” Ensign ukon Liahona, Nob. 2018, 113).