Paghaylo Amo ang Aton Tuyo

Ang katuyuan sang tanan nga pagtuon sang ebanghelyo kag pagtudlo amo ang padalumon ang aton pagkahaylo (conversion) kay Jesucristo kag buligan kita nga mangin mas pareho sa Iya. Sa sini nga rason, kon magtuon kita sang ebanghelyo, wala lang kita nagapangita sang bag-o nga impormasyon; gusto naton nga mangin “bag-o nga tinuga” (2 Mga Taga-Corinto 5:17). Nagakahulugan ini sang pagsandig sa Amay nga Langitnon kag kay Jesucristo nga buligan kita nga bag-uhon ang aton mga tagipusuon, ang aton mga panan-aw, ang aton mga aksyon, kag ang aton mga kinaugali.

Pero ang klase sang pagtuon sang ebanghelyo nga nagapabakod sang aton pagtuo kag nagadala sang milagro sang pagbag-o wala nagakatabo sa gilayon. Nagalab-ot ini sa gwa sang hulot-klasehan padulong sa tagipusuon kag puluy-an sang isa ka indibidwal. Nagapangayo ini sang tayuyon, adlaw-adlaw nga pagpaninguha nga maintiendihan kag ipangabuhi ang ebanghelyo. Pero wala nagapaabot ang Amay nga Langitnon nga obrahon naton ina nga kita lang—ipadala Niya ang Balaan nga Espiritu agud buligan kita nga magbag-o.

Ang Balaan nga Espiritu nagagiya sa aton padulong sa kamatuoran kag nagasaksi sinang kamatuoran (tan-awa sa Juan 16:13). Ginapasanag Niya ang aton mga kaisipan, ginapadasig ang aton pag-intiendi, kag ginatandog ang aton mga tagipusuon upod ang rebelasyon halin sa Dios, ang ginahalinan sang tanan nga kamatuoran. Ang Balaan nga Espiritu nagatinlo sang aton mga tagipusuon. Ginainspirar Niya sa aton ang kaluyag nga magpangabuhi sa kamatuoran, kag nagahutik Sia sa aton sang mga paagi agud himuon ini. Matuod gid, “ang Balaan nga Espiritu … magatudlo [sa aton] sang tanan nga mga butang” (Juan 14:26).

Sa sini nga mga rason, sa aton pagpaninguha nga ipangabuhi, tun-an, kag itudlo ang ebanghelyo, dapat naton una kag labi sa tanan pangitaon ang pagpakig-upod sang Espiritu. Ini nga tuyo amo dapat ang magadumala sang aton mga pagpili kag magagiya sang aton mga pamensaron kag mga aksyon. Dapat naton handumon ang kon ano nga nagaimbitar sang impluwensya sang Espiritu kag sikwayon ang kon ano nga nagatabog sina nga impluwensya—tungod nakahibalo kita nga kon takos kita sa presensya sang Balaan nga Espiritu, sarang man kita mangin takos nga magpangabuhi sa presensya sang Amay nga Langitnon kag sang Iya Anak, nga si Jesucristo.