Mga Ideya sa Pagpauswag sang Imo Personal nga Pagtuon sang Balaan nga Mga Kasulatan

Ari ang pila ka simple nga mga paagi para pauswagon ang imo pagtuon sang pulong sang Dios sa balaan nga mga kasulatan.

Magpangamuyo para sa Inspirasyon

Ang balaan nga mga kasulatan pulong sang Dios, gani magpangayo sa Iya sang bulig agud maintiendihan ang mga ini.

Magpangita sang Mga Kamatuoran parte kay Jesucristo

Ang balaan nga mga kasulatan nagatudlo sa aton nga ang tanan nga butang nagapamatuod kay Cristo (tan-awa sa 2 Nefi 11:4; Moises 6:63), gani pamensara nga tandaan ukon markahan ang mga bersikulo nga nagapamatuod sa Manluluwas, nagapasangkad sang imo pagpalangga sa Iya, kag nagatudlo kon paano Sia sundon.

Magpangita sang Nagainspirar nga mga Tinaga kag Mga Dinalan

Mahimo nga makakita ka sang mga tinaga kag mga dinalan sa balaan nga mga kasulatan nga manamian mo, nga daw ginsulat gid para sa imo. Mahimo nga personal nga mapuslanon ini sa imo kag magainspirar kag magapapagsik sa imo. Pamensara nga markahan ang mga ini sa imo balaan nga mga kasulatan ukon isulat ang mga ini sa isa ka sululatan sang mga tinun-an.

Pangitaa ang Mga Kamatuoran sang Ebanghelyo

Kon kaisa ang mga kamatuoran sang ebanghelyo (masami ginatawag nga doktrina ukon mga prinsipyo) ginahambal sing direkta, kag kon kaisa ginapahangop paagi sa halimbawa ukon istorya. Pamangkuta ang imo kaugalingon, “Ano nga wala katapusan nga mga kamatuoran ang gintudlo sa sining mga bersikulo?”

Pamatii ang Espiritu

Bantayi ang imo mga panghunahuna kag mga balatyagon, bisan pa nga wala ini sing kaangtanan sa imo ginabasa. Basi inang mga pagpabatyag amo mismo ang mga butang nga gusto sang imo Amay nga Langitnon nga imo matun-an.

Ipaanggid ang Balaan nga mga Kasulatan sa Imo Kabuhi

Pamensara kon paano ang mga istorya kag pinanudlo nga imo ginabasa magamit sa imo kabuhi. Halimbawa, pwede mo pamangkuton ang imo kaugalingon, “Ano ang akon mga eksperiyensya nga pareho sa akon ginabasa?” ukon “Paano ko sundon ang ehemplo sining tawo sa balaan nga mga kasulatan?”

Magpamangkot Samtang Nagatuon

Sa imo pagtuon sang balaan nga mga kasulatan, mahimo nga may mapamensaran ka nga mga pamangkot. Ining mga pamangkot mahimo nga may kaangtanan sa imo ginabasa ukon sa imo kabuhi sa kabilugan. Binag-binaga ining mga pamangkot kag pangitaa ang mga sabat samtang padayon ka nga nagatuon sang balaan nga mga kasulatan.

Maggamit sang mga Bulig sa Pagtuon sang Balaan nga mga Kasulatan

Hunahunaa ang Konteksto sang Balaan nga mga Kasulatan

Makakita ka sang makahulugan nga mga panan-aw parte sa dinalan sang balaan nga kasulatan samtang imo ginapamensar ang iya konteksto, lakip na ang mga sirkumstansya ukon palibot nga ginhalinan sini. Halimbawa, ang paghibalo sang palibot kag pagpati sang mga tawo nga gin-istorya sang Dios makabulig sa imo nga mas maintiendihan ang katuyuan sang Iya mga pulong.

Isulat ang Imo Mga Panghunahuna kag Balatyagon

May madamo nga paagi para isulat ang mga pagpabatyag nga nagaabot sa imo samtang nagatuon ka. Halimbawa, pwede mo markahan ang makahulugan nga tinaga ukon dinalan kag isulat ang imo panghunahuna bilang tanda sa imo balaan nga mga kasulatan. Mahimo ka man magtipig sang sululatan sang mga ideya, mga balatyagon, kag mga impresyon nga imo mabaton.

Tun-i ang Mga Pulong sang mga Propeta kag Apostoles sa Ulihing mga Adlaw

Basaha ang pinanudlo sang mga propeta kag apostoles sa ulihing mga adlaw parte sa mga prinsipyo nga imo makita sa balaan nga mga kasulatan (halimbawa, tan-awa sa conference.ChurchofJesusChrist.org kag Church magazines).

Magpaambit sang mga Ideya

Ang paghambalanay parte sa mga ideya halin sa imo personal nga pagtuon indi lamang maayo nga paagi sa pagtudlo sa iban, kundi nagabulig man ini nga magpabakod sang imo pag-intiendi sang imo ginbasa.

Ipangabuhi ang Imo Natun-an

Ang pagtuon sang balaan nga mga kasulatan dapat wala lang nagainspirar sa aton kundi nagatulod man sa aton nga bag-uhon ang aton pagpangabuhi. Pamatii ang ginapabatyag sa imo sang Espiritu nga imo himuon samtang nagabasa, kag dayon magpangako nga aktuhan inang mga pagpabatyag.

Si Elder David A. Bednar nagsiling: “Indi kita magpaabot nga ang Simbahan bilang isa ka organisasyon magtudlo ukon maghambal sa aton sang tanan nga kinahanglan naton mahibal-an kag himuon agud mangin matutom nga mga disipulo kag magpadayon nga maisog tubtob sa katapusan. Kundi, ang aton personal nga responsibilidad amo nga tun-an ang dapat naton tun-an, magkabuhi suno sa nahibal-an naton nga pagkabuhi, kag mangin mga tawo nga luyag sang Agalon nga mangin kita. Kag ang aton mga puluy-an amo ang pinakabagay nga lugar sa pagtuon, pagpangabuhi kag pagmangin” (“Prepared to Obtain Every Needful Thing,” Ensign ukon Liahona, Mayo 2019, 102).