baam̧le eo ej ekkatak jeje ko rekwojarjar

Ļōmņak ko n̄an Kōkm̧anm̧anļo̧k an Baam̧le eo Am̧ Ekkatak Jeje ko Rekwojarjar

Iien katak jeje ko rekwojarjar an baam̧le ej juon wāween ekajoor n̄an jipan̄ baam̧le eo am̧ ekkatak gospel eo. Ewi jon̄an im ewi aitokan am̧ riit āinwōt juon baam̧le ejjab lukkuun aorōk jān am̧ niknik ilo kijejeto ko am̧. Ilo am̧ kōm̧m̧an bwe ekkatak jeje ko rekwojarjar en juon m̧ōttan eaorōk ilo an baam̧le eo am̧, kwonaaj jipan̄ ro uwaan baam̧le eo am̧ epaakeļo̧k Jisōs Kraist im kalōk naan in kam̧ool ko aer ioon pedped in naan eo An.

Ļōmņak kōn kajjitōk kein:

• Ekōjkan am̧ kōketak ro uwaan baam̧le eo am̧ n̄an ekkatak jeje ko rekwojarjar kōn er make?

• Ta eo kwomaron̄ kōm̧m̧ane n̄an kōketak ro uwaan baam̧le eo am̧ n̄an kwaļo̧k ta eo rej ekkatak?

• Ekōjkan am̧ maron̄ kōmejajaik pedped in katak ko kwoj ekkatak ilo Katak im Bujen Ko ilo iien katakin ko aolep raan?

Keememej bwe m̧weo ej jikin eo em̧m̧an n̄an ekkatak gospel eo. Kwomaron̄ ekkatak im katakin gospel eo ilo m̧weo ilo wāween ko me rejjab maron̄ kōm̧m̧an ilo juon kūlaaj. Kwon laļļe n̄e kwoj ļōmņak kōn wāween ko n̄an jipan̄ baam̧le eo am̧ ekkatak jān jeje ko rekwojarjar.

Ļōmņak ko n̄an M̧akūtkūt ko

Ļōmņak kōn jet iaan ļōmņak kein n̄an kōkm̧anm̧anļo̧k an baam̧le eo am̧ ekkatak jeje ko rekwojarjar.

Kōjerbal al

Al al ko me rej kōkajoorļo̧k pedped in katak ko kar katakin ilo jeje ko rekwojarjar. Juon al eo kwoj ļōmņake ak al eo an ajri me ej elaajrak ilo kajjojo wiik. Kwomaron̄ kajjitōk kōn naan ko an eoon ko ilo al eo. Ilo kakobaba n̄an al, ajri ro nejūm̧ remaron̄ kōm̧m̧ani kōl ko me rej ilo̧k ippān al ko ak ron̄jake al ko ilo an jo al eo im rej kōm̧m̧ani m̧akūtkūt ko jet.

Kwaļo̧k jeje ko rekwojarjar reļļap meļeļeier

Leļo̧k n̄an ro uwaan baam̧le eo iien n̄an kwaļo̧k eoon ko me raar loi eļap meļeļeier ilo iien ekkatak jeje ko rekwojarjar aer make.

Kōjerbal naan ko am̧ make

Kūr ro uwaan baam̧le eo n̄an ba ilo tukadu in ilo naan ko aer make ta eo rekar ekkatak jān eoon ko rekar katak jāni.

Kōjerbale eoon ko n̄an mour eo Am̧.

Ālkin riiti juon eoon, kajjitōk ippān ro uwaan baam̧le eo n̄an kwaļo̧k wāween ko eoon eo ej jerbal n̄an mour ko aer.

Kajjitōk juon kajjitōk

Kūr ro uwaan baam̧le eo n̄an kajjitōk juon kajjtōk kōn gospel eo, innām joļo̧k iien kappukot eoon ko me remaron̄ jipan̄ uwaake kajjitōk eo.

Kwaļo̧k juon eoon

Kāālet juon eoon kwoj lo eļap meļeļein, im likūt ijo ro uwaan baam̧le eo naaj emakijkij aer loe. Kūr ro jet uwaan baam̧le eo n̄an kajjojo kāālet juon eoon n̄an kwaļo̧ke.

Kōm̧m̧ane juon Laajrak in eoon

Āinwōt juon baam̧le, kāālet jet eoon ko me kwoj kōņaan ekkōnono kaki ilo wiik eo ej itok.

Kakilōklōk eoon ko

Kāālet juon eoon jān jeje ko rekwojarjar me eļap meļeļein n̄an baam̧le eo am̧, im kūr ro uwaan baam̧le eo n̄an kakilōklōk e ilo an āliji raan otemjej ak kōm̧m̧ane juon ikkure in kakilōklōke.

Kwaļo̧k katak ilo am̧ kōjerbal m̧weik ko

Pukot men ko me rej iookļo̧k jepta ko im eoon ko me kwoj riiti āinwōt juon baam̧le. Kūr ro uwaan baam̧le eo n̄an kōnono kōn ekōjkan an kajjojo men ko rej iookļo̧k katak ko ilo eoon ko.

Kāālet juon unin kōnono

Kōm̧m̧an bwe ro uwaan baam̧le eo ren kajjojo kāālet juon unin kōnono me baam̧le eo enaaj katak ippān doon kake. Kōjerbal Topical Guide, Bible Dictionary eo, ak Unin Tōl eo n̄an Jeje Ko Rekwojarjar (scriptures.ChurchofJesusChrist.org) n̄an pukot eoon ko jān jeje ko rekwojarjar kōn unin kōnono eo.

Jin̄aik juon pija

Riiti jet eoon ko āinwōt juon baam̧le, innām leļo̧k iien n̄an ro uwaan baam̧le eo n̄an jin̄aik juon men me eiookļo̧k ta eo kwoj riiti. Joļo̧k iien n̄an ekōnono kōn jin̄a ko an doon.

Kōm̧m̧an Arin bwebwenato eo

Ālkin riiti juon bwebwenato, kūr ro uwaan baam̧le eo n̄an kōm̧m̧an arin. Ālkin wōt, kōnono kōn ekōjkan an bwebwenato eo iookļo̧k men ko me kwoj en̄jaki ippam̧ make im āinwōt juon baam̧le.

Katakin Ajri ro

Eļan̄n̄e ewōr nejūm̧ ajri ro reddik ilo baam̧le eo am̧, errein rej jet m̧akūtkūt ko me remaron̄ jipan̄ er ekkatak:

Al

Al in jar ko im al ko jān Children’s Songbook rekajoor ilo aer katakin katak ko. Kajjojo laajrak ilo kein jipan̄ in ekoba juon al kar ļōmņak kake. Kwomaron̄ barāinwōt kōjerbale topics index eo ilo tulikin Children’s Songbook n̄an pukot al ko me reiookļo̧k pedped in katak ko an gospel eo kwoj katakin. Jipan̄ ajri ro nejūm̧ keidi ennaan ko an al ko n̄an mour ko aer.

Ron̄jake im kōm̧m̧an arin juon bwebwenato

Ajri ro reddikļo̧k em̧m̧an bwebwenato ippāer—jān jeje ko rekwojarjar, jān mour eo am̧, jān bwebwenatoon Kabun̄ in, ak jān māākjin ko an Kabun̄ in. Kappukot wāween ko n̄an kobaik er ilo ba bwebwenato eo. Remaron̄ jibwe pija ko an men ko, jin̄aik pija ko kōn ta eo rej ron̄jake, ikkure kōn bwebwenato eo, ak em̧ool jipan̄ bwebwenato kōn bwebwenato eo. Jipan̄ ajri ro nejūm̧ kile m̧ool ko an gospel eo ilo bwebwenato ko kwoj kwaļo̧ki.

Riiti juon eoon

Ajri ro reddik remaron̄ jab lukkuun jeļā riit, ak kwomaron̄ kobaik er ilo ekkatak eoon ko jān jeje ko rekwojarjar. Kwomaron̄ mije wōt juon eoon, naan eo eaorōk, ak naan eo.

Lale juon pija ak alooje juon pijaan alooj

Kajjitōk kajjitōk ko kōn juon pija ak pijaan alooj me ej iookļo̧k juon pedped in gospel me kwoj kōmeļeļe kake. N̄an waanjon̄ak, kwomaron̄ kajjitōk, “Ta eo ej waļo̧k ilo pija in ak pijaan alooj in? Ekōjkan an kōm̧m̧an bwe kwon en̄jake?” Gospel Library app eo, Gospel Media Library ilo ChurchofJesusChrist.org, im children.ChurchofJesusChrist.org rej jikin ko rem̧m̧an n̄an kappukot pija ko im bitio ko.

Ejaake

Ajri ro remaron̄ ekkal, jin̄a, ak kōļare men eo ej iookļo̧k bwebwenato eo ak pedped in katak eo rej ekkatak.

Bōk koņaam̧ ilo kwaļo̧k katak ilo am̧ kōjerbal m̧weik ko

Juon mennin katak eļam waan emaron̄ jipan̄ ajri ro nejūm̧ meļeļe juon pedped in katak an gospel eo me epen n̄an meļeļe. N̄e kōjerbal mennin katak ko, pukot wāween ko n̄an kōm̧m̧an bwe ajri ro nejūm̧ ren bōk koņaer. Renaaj ekkatak eļapļo̧k jān juon en̄jake in ikitōltōl jān baj alooj juon kōmeļeļe.

Kōmmālmel

N̄e ajri ro rej kōmmālmel juon jekjek renaaj ioon e ilo mour, em̧m̧anļo̧k aer meļeļe ewi wāween an juon pedped in katak an gospel eo jerbal ilo mour ko aer.

Āliji m̧akūtkūt ko

Ajri ro reddikļo̧k remaron̄ kōņaan ron̄ katak elōn̄ ļo̧k alen bwe ren meļeļe kaki. N̄an waanjon̄ak, kwomaron̄ kwaļo̧k juon bwebwenato jān jeje ko rekwojarjar jejjo kōttan ilo wāween ko rokkotaktak—riit jān jeje ko rekwojarjar, kōmeļeļeiki ilo tukaduin ilo naan ko am̧ make, kōtļo̧k bwe ajri ro nejūm̧ ren jipan̄ eok ba bwebwenato eo, kūr er n̄an tietaik bwebwenato eo, im ko jet eierļo̧k wōt.

Kōm̧m̧an ko̧o̧neekjen ko n̄an kōttōpar ko aer make n̄an eddōkļo̧k

Katak jeje ko rekwojarjar an baam̧le remaron̄ letok im̧we n̄an jodikdik im ajri ro n̄an kōm̧m̧an kōttōpar ko aer ilo mour in jetōb, kanniōk, māletlet, im eddōkļo̧k ilo iiaio ko (lale Luk 2:52).

baam̧le eo ej ettōn̄ dikdik ippān doon

Katakin Jodikdik ro

Eļan̄n̄e ewōr jodikdik ilo baam̧le eo am̧, erkein jet iaan m̧akūtkūt ko me remaron̄ jipan̄ er ekkatak:

Karuwaineneik er n̄an katakin

Jej lukkuun ekkatak eļapļo̧k n̄e jej katakin juon men ijjeļo̧kin n̄e jej ron̄ wōt kake. Leļo̧k an jodikdik eo nejūm̧ iien em̧m̧an n̄an tōl kōmeļeļe in katakin ko an baam̧le eo kōn eoon ko.

Kōm̧m̧an ko̧o̧neekjen ko n̄an jemenere

Iiō in rijikuuļ ro an jemenere rej katak kōn Katak im Bujen Ko. Eļan̄n̄e jodikddik eo nejūm̧ ej pād ilo jemenere, karuwaineneik er n̄an kwaļo̧k ta eo rej ekkatak ilo jemenere.

Keidi n̄an jeje ko rekwojarjar

Jet iien jodikdik ro epen aer lo wāween an katak im pedped in katak ko ilo jeje ko rekwojarjar ko̧o̧neek n̄an mour ko aer. Jipan̄ er lo wāween an bwebwenato ko im katak ko ilo jeje ko rekwojarjar iookļo̧k jekjek ko rej jelm̧aeiki ilo m̧ōko, m̧ōn jikuuļ ko, ak ippān ro m̧ōttāer.

Kajjitōk kajjitōk ko me rej kōm̧m̧an bwe jen kejokļo̧kjeņ

Elōn̄ jodikdik ro em̧m̧an aer uwaak n̄an kajjitōk ko me rej kōtļo̧k er n̄an kwaļo̧k ļōmņak ko aer im en̄jake ko aer kōn eoon ko ijjeļo̧kin aer āliji wōt ta eo eoon eo ej ba. N̄an waanjon̄ak, kwomaron̄ kajjitōk, “Ta eo Irooj emaron̄ katakin eok ilo eoon kein?” ak “Etke kwoj ļōmņak revelesōn in enaaj kar ļap meļeļein n̄an Armej ro Rekwojarjar ilo 1830 ko?”

Kōm̧m̧an ko̧o̧neekjen ko n̄an kōttōpar ko aer make n̄an eddōkļo̧k

Katak jeje ko rekwojarjar an baam̧le remaron̄ letok im̧we n̄an jodikdik im ajri ro n̄an kōm̧m̧an kōttōpar ko aer ilo mour in jetōb, kanniōk, māletlet, im eddōkļo̧k ilo iiaio ko (lale Luk 2:52).

Kwaļo̧k buruōm̧ n̄an kajjitōk ko aer

Juon kajjitōk jān juon jodikdik ej juon iien eaorōk n̄an kwaļo̧k m̧ool im kappukot meļeļe kōn juon tapik eo me e ej m̧ool ilo an itok limoin kake. Jab mijak kōn kajjitōk ko ak kōjekdo̧o̧ni, men̄e ilo lale rejjab iookļo̧k tapik in unin kōnono eo. Ej em̧m̧an wōt eļan̄n̄e kwojjab jeļā aolep uwaak ko. M̧ōko im̧ōd ej juon jikin eaorōk n̄an kappukot uwaak ko ippān doon.

Kapilōk er n̄an kwaļo̧k en̄jake ko aer

Jodikdik ro ewōr aer ļōmņak ejeņoļo̧k im en̄jake n̄an kwaļo̧k ilo iien katak jeje ko rekwojarjar an baam̧le. Kōtļo̧k bwe ren jeļā ke kwoj itok limo kake ta eo Jetōb ej katakin er kōn eoon ko. Kwomaron̄ kar kajjitōk ippāer n̄an kwaļo̧k aer en̄jake jān katak ko aer make.

Kwon pāpojakjak

Eļan̄n̄e ewōr nejūm̧ jodikdik eo ejjab kōņaan bōk koņaan ilo iien katak jeje ko rekwojarjar an baam̧le, kappukot wāween ko jet n̄an ko̧o̧neek e er. N̄an waanjon̄ak, kwomaron̄ bōk lōn̄tak gospel ilo iien am̧ bwebwenato ak kwaļo̧k juon eoon eo eļap meļeļein ilo juon wāween eo me ilo kalimjōke ejjab āinwōt n̄e kwoj kwaļo̧k naan? Ekkatak jeje ko rekwojarjar ejjab aikuj jon̄an wōt juon ilo kajjojo baam̧le. Jet ajri remaron̄ kar uwaak em̧m̧anļo̧k n̄an ekkatak eoon ko juon ilo̧k juon. Lukkuun jar im ļoor unoojdikdik ko an Jetōb.

Būreejtōn Russell M. Nelson ekar ba: “Ij kallim̧ur bwe ilo ami tiljek jerbal n̄an bar kōkāāl m̧weo im̧ōmi n̄an juon jikin ekkatak gospel eo, ilo m̧ool raan in Jabōt ko ami renaaj em̧ool erom̧ juon men elan̄lōn̄. Ajri ro nejimi renaaj m̧ōņōņō in ekkatak im mour kōn katak ko an Rilo̧mo̧o̧r eo, im kareel ko an rikapo eo ilo mour eo ami im ilo m̧weo imōmi enaaj dikļo̧k. Oktak ko ilo baam̧le eo ami renaaj em̧m̧an im kajoorļo̧k” (“Erom̧ Riwaanjon̄ak ro rej Armej ro Rekwojarjar ilo Raan-ko Āliktata,” Ensign ak Liaona, No̧b. 2018, 113).