juon em̧m̧aan ej ekkatak jeje ko rekwojarjar

Ļōmņak ko n̄an Kōkm̧anm̧anļo̧k Ekkatak Jeje Ko Rekwojarjar Am̧ Make

Erkein rej jet iaan wāween ko reļam waan n̄an kōkm̧anm̧anļo̧k ekkatak eo am̧ make kōn naan eo an Anij ilo jeje ko rekwojarjar.

Jar kōn im̧we

Jeje ko rekwojarjar rej naan an Anij, kōn menin kajjitōk Ippān n̄an jipan̄ meļeļe kaki.

Pukot M̧ool ko kōn Jisōs Kraist

Jeje ko rekwojarjar rej katakin kōj bwe aolep men rej kam̧ool kōn Kraist, (lale 2 Nipai 11:4; Moses 6:63), kōn menin ļōmņak in je no̧o̧t ko ak kōkaļļeiki eoon ko me rej kam̧ool kōn Rilo̧mo̧o̧r, kam̧wūlaļļo̧k iakwe eo am̧ n̄an E, im katakin kōn wāween n̄an ļoor E.

Kappukot Naan ko im Eoon ko Reim̧we

Kwomaron̄ lo bwe jet naan ko im eoon ko ilo jeje ko rekwojarjar rej im̧we eok, āinwōt eļan̄n̄e raar jeje n̄an kwe eļap tata. Remaron̄ in aorōk ippam̧ make im rej im̧we im rej kōketak eok. Ļōmņak in kōkaļļeik er ilo jeje ko rekwojarjar am̧ ak jei ilo jōnōļ in ekkatak eo am̧.

Kappukot M̧ool ko an Gospel eo

Jet iien m̧ool ko an gospel eo (emakijkij kar ņa etan katak ak pedped in katak ko) rej kajju kwaļo̧k, im jet iien rej kwaļo̧k kōn juon waanjon̄ak ak bwebwenato. Kajjitōkin eok make, “Ta m̧ool ko indeeo rej katakin ilo eoon kein?”

Ron̄jake Jetōb eo

Leļo̧k am̧ n̄an ļōmņak ko im en̄jake ko, jekdo̧o̧n eļan̄n̄e rejjab iookwaj ta eo kwoj riiti. Im̧we kein remaron̄ in lukkuun men ko me Jemam̧ Ilan̄ ekōņaan bwe kwon ekkatak.

Karōk Jeje Ko Rekwojarjar n̄an Mour eo Am̧

Ļōmņak kōn ekōjkan an bwebwenato ko im katak ko kwoj riiti iookwaj n̄an mour eo am̧. N̄an waanjon̄ak, kwomaron̄ kajjitōkin eok make, “Ta en̄jake ko eaar wōr ippa me rej āinļo̧k wōt ta eo ij riiti?” ak “Ekōjkan aō maron̄ ļoor waanjon̄ak eo an armej in ilo jeje ko rekwojarjar?”

Kajjitōk Kajjitōk ko ilo Am̧ Ekkatak

Ilo am̧ ekkatak jeje ko rekwojarjar, kajjitōk ko remaron̄ itok n̄an ļōmņak eo am̧. Kajjitōk kein remaron̄ iookļo̧k ta eo kwoj riiti ak n̄an mour eo am̧ eļaptata. Kejōkļo̧kjeņ kōn kajjitōk kein im pukot uwaak ko ilo am̧ wōnm̧aanļo̧k im ekkatak jeje ko rekwojarjar.

Kōjerbal Jeje Ko Rekwojarjar ilo Ekkatak Ejipan̄

N̄an bōk elōn̄ļo̧k kōļmenļo̧kjeņ ko n̄an eoon ko kwoj riiti, kōjerbal footnote ko, Topical Guide eo, Bible Dictionary eo, Unin Tōl eo n̄an Jeje ko Rekwōjarjar (scriptures.lds.org,) im ekkatak ko jet ejipan̄.

Ļōmņak kōn Meļeļe eo an Jeje Ko Rekwojarjar

Kwomaron̄ lo ļōmņak ko eļap meļeļeier kōn juon eoon eļan̄n̄e kwoj ļōmņak kōn meļeļe eo an—jekjek ko ak jikin eo an eoon eo. N̄an waanjon̄ak, jeļā bwebwenato eo im tōmak ko an armej ro Anij ekar kōnono n̄an er emaron̄ jipan̄ eok meļeļe jibadbad eo an naan ko An.

Je Ļōmņak ko im En̄jake ko Am̧

Elōn̄ wāween ko n̄an je en̄jake ko me rej itok ilo am̧ ekkatak. N̄an waanjon̄ak, kwomaron̄ kōkaļļeik juon naan ak eoon eļap meļeļein im je ļōmņak ko am̧ āinwōt juon kakeememej ilo jeje ko rekwojarjar am̧. Kwomaron̄ barāinwōt kōjparok juon jōnōļ in kōļmenļo̧kjeņ, en̄jake ko, im im̧we ko kwoj būki.

Ekkatak Naan ko an Rikanaan ro im Rijilōk ro ilo Raan Ko Āliktata

Riiti ta ko rikanaan ro im rijilōk ro ilo raan ko āliktata raar katakin kōn pedped in katak ko kwoj loi ilo jeje ko rekwojarjar (n̄an waanjon̄ak, lale onference.ChurchofJesusChrist.org im māākjin ko an Kabun̄ in).

Kwaļo̧k Ļōmņak ko

Ekkōnono kōn ļōmņak ko jān ekkatak eo am̧ make ejjab wāween eo wōt em̧m̧an n̄an katakin ro jet, bōtaab ebarāinwōt jipan̄ kōkajoorļo̧k meļeļe eo am̧ kōn ta eo em̧ōj am̧ kar riiti.

Mour kōn Ta eo Kwoj Ekkatak

Ekkatak jeje ko rekwojarjar ejjab im̧we wōt kōj bōtaab ej barāinwōt tōl kōj n̄an ukōt wāween ad mour. Ron̄jake ta eo Jetōb ej im̧we eok n̄an kōm̧m̧ane ilo am̧ riit, innām kallim̧ur n̄an mour ekkar n̄an im̧we ko.

juon kōrā ej ekkatak jeje ko rekwojarjar

Elder David A. Bednar ekar ba: “Jejjab aikuj kōtļo̧k bwe Kabun̄ in āinwōt juon doulul en katakin ak jiron̄ kōj aolep men otemjeļo̧k jej aikuj jeļā n̄an kōm̧m̧ani n̄an erom̧ rijilōk ro rej wūjļepļo̧k im niknik n̄an jem̧ļo̧kin. Ijoke, eddo eo ad make ej n̄an ekkatak ta jej aikuj in ekkatak, n̄an mour ilo ad jeļā mour, im n̄an erom̧ wōn eo Maajta ekōņaan bwe jen erom̧. Im kapijuknen ko ad rej jikin ekkatak, mour, im erom̧” (“Pojak n̄an Bōk Aolep Menin Aikuj Otemjeļo̧k,” Ensign ak Liaona, Māe 2019, 102).