“Me 13–19. Maciu 19–20; Marika 10; Luke 18: ‘A Cava Tale sa Vo Vei Au’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Me 13–19. Maciu 19-20; Marika 10; Luke18,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
13–19 ni Me.
Maciu 19–20; Marika 10; Luke 18
“A Cava Tale Sa Vo Vei Au?”
Wilika ka vakasamataka vakatitobu na Maciu 19–20; Marika 10; kei na Luke 18, raica matua na veivakauqeti o ciqoma. Toqa toka na veivakauqeti oqori, ka qai tuva o na cakacakataki ira vakacava.
Vola na Nomu Veivakasama
Kevaka e nomu na madigi mo taroga vua na iVakabula e dua na taro, na taro cava oya? Ni rau a sota kei na iVakabula e dua na tamata vutuniyau ena imatai ni gauna, e taroga o koya, “A cava na ka vinaka meu kitaka, meu rawata kina na bula tawamudu?” (Maciu 19:16). Na veika e tukuna nai Vakabula e vakaraitaka na vakavinavinakataki ni veika vinaka e sa cakava oti na tamata kei na veivakauqeti ena loloma me vakayacori e levu tale. Ni da vakasamataka vakatitobu na kena rawati na bula tawamudu, eda na rawa talega ni vakanananutaka se me levu cake beka na ka e dodonu meda cakava tiko. Ni da taroga, ena noda sala ga, “A cava tale sa vo vei au?” (Maciu 19:20), ena rawa ni solia vei keda na Turaga na isau ni taro e ganiti keda saraga me vakaga Nona a sauma vua na cauravou vutuniyau. Na cava ga e kerea na Turaga meda cakava, na caka ni ka e vinakata ena dau gadrevi kina meda nuitaki Koya vakalevu cake mai na noda yalododonu (raica na Luke 18:9–14) ka meda “vakabauta na matanitu ni Kalou me vaka na gonelailai” (Luke 18:17; raica talega na 3 Nifai 9:22).
Vakasama eso ni Vuli iVolanikalou Yadua
Nodrau vakamau e dua na tagane kei na yalewa sa ilesilesi ni Kalou.
Na veivosaki e yaco vei ira Farisi kei nai Vakabula e dua ga mai na vica nai tukutuku ka veivakatavulici vakatabakidua kina na iVakabula me baleta na vakamau. Ni oti na wiliki ni Maciu 19:1–9 kei na Mark 10:1–12, cakava e dua nai tuvatuva ni itukutuku o nanuma ni soqona vata na nona rai na Turaga me baleta na vakamau. Ka qai vulica na “Marriage” ena iUlutaga Vakosipeli, topics.lds.org, ka qai tomana tiko kina nomu ituvatuva ni o sa raica tiko eso tale. E vukei iko vakacava na kila me baleta nai tuvatuva ni veivakabulai nei Tamada mo kila vakavinaka cake na vuna e vakatabui mai vua na Kalou na vakamau ni dua na yalewa kei na tagane?
Na vakamau tawamudu e tiki ni ituvatuva ni Kalou.
O na kila beka eso na tamata era sega ni duavata se saqata nai vakatagedegede ni Turaga me baleta na vakamau. E dua na veivuke me baleta na iwalewale ni veitalanoa me caka ena sala e matau ka rakorako kei ira oqo, raica na vidio na “Everyday Example: When Beliefs Are Questioned” (LDS.org).
E vakatavulica beka o Jisu ni sega ni ciqoma na serenivakamau se na tamata e sa sere e sega ni dodonu me vakamau tale?
Ena dua na vosa ena sere, nei Elder Dallin H. E vakavulica o Oaks ni Tamada Vakalomalagi e vinakata me baleta na veimaliwai ni bula vakamau me tawamudu. Ia, e kila talega na Kalou “ena vuku ni loma[da] kaukauwa” (Maciu 19:8), e oka kina na digidigi ca se nanumi koya ga e dua se o rau ruarua na veiwatini, ena so na gauna e gadrevi kina na veisere ni vakamau.
E vakamacalataka o Elder Oaks ni Turaga e “vakatara me vakawati tale e dua na sere mai ena vakamau ka sega ni tauvi koya na maka ni dukadukali ni lawa cecere. Vakavo ga kevaka e sa vakayacora nai valavala ca bibi na lewe ni lotu sa sere mai na vakamau, ena rawa vua me vakai volatara ni valetabu ena ivakatagedegede vata ga ni bula kilikili me vakataki ira na lewe ni lotu kece” (“Divorce,” Ensign se Liaona, Me 2007, 70).
Raica talega na “Divorce,” ena iUlutaga Vakosipeli, topics.lds.org.
Maciu 19:16–22; Marika 10:17–22; Luke 18:18–23
Kevaka au kerea na Turaga, ena vakavulici au o Koya na veika au gadreva me’u rawata kina na bula tawamudu.
Nai tukutuku ni cauravou vutuniyau ena rawa ni tu kina vakadua o koya mada na vakabauta, tisaipeli ni bula taucoko. Ni o wilika na Marika 10:17–22, nai vakadinadina cava o kunea me baleta na nona yalodina ka lomadina cauravou?
Me vaka na cauravou vutuniyau, eda sa tamata druka ka sega ni taucoko, vakatisaipeli e dodonu meda taroga, “A cava sa vo vei au?”—ka meda taroga tiko ena noda bula taucoko. Raica tiko ni sau ni taro e soli ena loloma mai na Dua ka raici keda ena keda ituvaki dina (raica na Marika 10:21). Na cava e dodonu mo cakava mo kerea vua na Turaga na cava sa vo vei iko—ka mo qai ciqoma na Nona isau ni taro?
Raica talega na Larry R. Lawrence, “Na cava tale sa vo vei au mada?” Ensign se Liaona, Nove. 2015, 33 – 35; S. S. Mark Palmer, “A Sa Vakaraici Koya Ko Jisu A Sa Lomani Koya,” Ensign se Liaona, Me 2017, 114–16
Na tamata kece ena rawa ni ciqoma na veivakalougatataki ni bula tawamudu, veitalia na gauna cava ga era ciqoma kina na kosipeli.
Ena rawa beka ni o semati kei na ka e sotava e dua vei ira na tamata cakacaka ena were ni vaini? Na lesoni cava so o kunea e baleti iko ena tikina oqo? E solia na rai oqo o Elder Jeffrey R. Holland Na Tamata Cakacaka ena Were ni Vaini” (Ensign se Liaona, Me 2012, 31–33) ena rawa ni vukei iko mo raica tale eso na sala vou mo bulataka na vosavakatautauvata oqo. Na cava eso tale na veivakauqeti e solia vei iko na Yalo?
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Ena vinaka beka ki na nomu vuvale na veitalanoataki ni vakavuvuli ni Kalou me baleta na vakamau kei na vuvale? Kevaka e vakakina, wilika na “ Na Matavuvale: Ai Vakaro ki Vuravura Raraba, ,” (Ensign se Liaona, Nove. 2010, 129). Ena rawa vakacava ni vakamatatataka na ivakaro na veilecayaki kei na lasutaki ni tukutuku e vuravura me baleta na vakamau kei na matavuvale?
Na cava na duidui ni tiko vutuniyau kei na nuitaka na vutuniyau? (raica na Marika 10:23–24). Ni o wilika na tikina e 27, o na vinakata beka mo dusia ena iVakadewa i Josefa Simici: “Ki na tamata sa nuitaka na vutuniyau, ena sega ni rawata; ia ena rawata na tamata sa nuitaka na Kalou ka sa biuta kece ena vukuna, vei ira oqo na ka kece sara oqo e sa rawa” (ena Marika 10:27 ivakamacala e ra a).
Me vakamatatataka na ivakavuvuli oqori ena Maciu 20:1–16, ena rawa ni o tuva e dua na veisisivi rawarawa, me vaka na veitaucici leleka, ka qai yalataka ni na dua na nona icocovi o koya e qaqa. Ni sa vakacavari na veisisivi, solia kece vei ira yadua nai cocovi vata ga, me tekivu mai vei koya e murimuri ka tinia vei koya e matai. Na cava e vakatavulica vei keda na veika oqo me baleta na ciqomi ni veivakalougatataki ni bula tawamudu ena ituvatuva ni Tamada Vakalomalagi?
Na cava nai balebale ni malanivosa oqo “ o koya sa turaga vei kemudou, me sa italai”? (Maciu 20:27). A vakaraitaka vakacava o Jisu Karisito na ivakavuvuli oqo? Ena rawa vakacava meda vakamuria na Nona ivakaraitaki ena noda vuvale, tabanalevu se tabana, kei na tikotiko raraba?
Na cava eda vulica mai na rua na vosavakatautauvata ena veitikina oqo?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Raica na gauna e ganiti iko. E rawarawa na nomu vuli ni o vulica na ivolanikalou ka sega ni takosovi se vakaosoosotaki. Raica na gauna e veiganiti vei iko, ka qai vakayacora ena nomu vinaka taucoko mo na vuli tiko ena gauna vata oqori ena veisiga.
Karisito kei na iLiuliu Cauravou Vutuniyau, mai vei Heinrich Hofmann.