Sakiusa ena Vu ni Lolo, mai vei James Tissot

Me 20–26

Maciu 21–23; Marika 11; Luke 19–20; Joni 12

“Raica, Sa Lako Mai na Nomuni Tui”

Ni se bera ni wiliki na ituvatuva, wilika mada na Maciu 21–23; Marika 11; Luke 19–20; kei na Joni 12. Vola na ka o vakila ka rawa ni o wasea kei na nomu vuvale se lewe ni kalasi ena Lotu.

Vola na Nomu Veivakasama

Sa viakana na iVakabula ena ilakolako mai Pecani ki Jerusalemi, ka vaka na irairai ni ivurevure ni kakana e dua na vu ni lolo ni laurai vakayawa. Ia ni toro yani ki na kau ko Jisu, e raica ni sega tu na vuana (raica Maciu 21:17–20; Marika 11:12–14, 20). Ena dua na sala, na vu ni lolo e vakataki ira na iliuliu ni lotu dauveivakaisini e Jerusalemi: na nodra ivakavuvuli lala kei na irairai vakalotu e taudaku e sega ni veivakamamautaki vakayalo. O ira na Farisi kei na vunivola e kena irairai ni ra muria na ivunau ia era calata na rua na ivunau lelevu duadua: mo lomana na Kalou ka lomana na wekamu me vakataki iko (raica na Maciu 22:34 - 40; 23:23).

E kena veibasai, e levu era sa kunea na vua vinaka ena ivakavuvuli i Jisu. Ni sa yaco ki Jerusalemi, era kidavaki ena tabanikau era taya mera conia kina na Nona sala, ka reki ni sa dede, me vaka e tukuna na parofisai makawa, “Ena lako mai vei iko na nomu Tui” (Sakaraia 9:9). Ni ko wiliwili tiko ena macawa oqo, vakasamataka na vua ni ivakavuvuli ni iVakabula kei na solibula ni veisorovaki kei na nomu rawa ni “vua vakalevu” (Joni 12: 24).

Vakasama eso ni Vuli iVolanikalou Yadua

Maciu 23; Luke 19:1–10; 20:45–47

Na Turaga e sega ni vakatulewa mai na irairai e taudaku ia mai na gagadre ga ni lomada.

Ena gauna i Jisu, era dau vakanananutaka na tamata ni o ira na daukumuni vakacavacava era daulawaki ka butakoci ira na tamata. E baleta oya era sa nanuma kina ni o Sakiusa, na duakumuni vakacavacava liu, e vutuniyau, e rairai kilakasamitaki vakalevu. Ia ko Jisu e rai ki lomai Sakiusa. Na cava e vakaraitaka na Luke 19:1 - 10 baleta na lomai Sakiusa? E rawa ni ko vola na veivosa ni veitikina oqo ka tukuna na ka e cakava ko Sakaraia me vakaraitaka kina nona lomadina vua na iVakabula. Na cava soti na gagadre ni lomamu? Na cava o sa cakava tiko mo vakasaqara kina na iVakabula, me vakataki Sakaraia?

Na veimaliwai ni iVakabula kei ira na vunivloa kei na Farisi r tu kina e dua na duidui matalia ki na nona veimaliwai kei Sakaraia. Me vaka ni vakamacalataka o Peresitedi Dieter F. Uchtdorf , “O [Jisu] e tucake ena cudru dodonu me saqati ira na dauveivakaisini vakai ira na vunivola, na Farisi, kei na luvei Setoki—o ira ka ra via rairai dodonu tiko me ra raw ata kina na dokai, rawa ile kei na iyau kei vuravura, ia ena gauna kece oya era vakatotogani ira tiko kina na tamata ka dodonu me ra vakalougatataki ira tiko” (Ena Keda iTuvaki Dina,” Ensign se Liaona, Me 2015, 81).

Ena Maciu 23, e a vakayagataka kina na iVakabula e vica vata na vosa vakatautauvata me vakamacalataka kina na veivakaisini. Navuca mo makataka se tuvana na vosa vakatautauvata oqori ka nanuma dei na ka era vakatavulica me baleta na veivakaisini. Na cava o sa vakauqeti me duidui nomu cakava ena vuku ni ivakavuvuli ni iVakabula?

Raica talega Vunau kei na Veiyalayalati 88:62-63.; 137:9; Bible Dictionary, “Hypocrite.”

Maciu 21:1–11; Marika 11:1–11; Luke 19:29–44; Joni 12:12–16

O Jisu Karisito na Tui.

Na itukutuku ena Maciu 21:1 - 11; Marika 11:1 - 11; Luke 19:29 - 44; kei na Joni 12:12 - 16 e vakamacalataka na iotioti ni macawa ena bula ni iVakabula, wili kina Nona curu ni qaqa ki Jerusalemi. O ira ka kilai Koya ni sa nodra Tui era vakaraitaka nodra loloma ni ra lumuti Koya (raica na Joni 12:1 - 8), ka ra biuta na isulu kei na drau ni niu ki na Nona salatu ki Jerusalemi, ka ra kailavaka na vakalagilagi. Vakasamataka ena vakatitobutaka vakacava na nomu kila na ka e yaco ka tekivu ena iotioti ni macawa ni bula ni iVakabula na ivurevure ka muri oqo .

• E dua na ivakaraitaki makawa ni kena lumuti e e dua na tui: 2 Tui 9: 1 - 13

• E dua na parofisai makawa me baleta na curu qaqa: Sakaraia 9:9

• Na ibalebale ni vosa na osana: Bible Dictionary, “Hosanna”

• Na parofisai ni na lesu mai vakacava na iVakabula: iVakatakila 7:9–10; 19:11–16

O na rawa ni ciqoma vakacava na iVakabula me nomu Turaga ka Tui?

Raica talega “The Lord’s Triumphal Entry into Jerusalem” (vidio, LDS.org).

Maciu 22:34–40

Na rua na ivunau levu oya mo lomana na Kalou ka lomana na tani me vakataki iko.

Kevaka ko vakila ni ko sa bitaki ena nomu saga mo muri Jisu Karisito, na Nona vosa na iVakabula vei ira vu ni vunau ena Maciu 22 rawa ni vukei iko mo vakarawarawataka ka vakanamatataka nomu itutu vakatisaipeli. Oqo e dua na sala mo cakava kina: Vola e dua na iwiliwili ni ivunau ni Turaga. Era sema vakacava na ka yadudua e na nomu iwiliwili ki na rua na ivunau lelevu? E rawa vakacava ni nomu vakanamata ki na rua na ivunau lelevu ena vukei iko mo muri ira na kena vo?

Maciu 23:5

Na cava na veivakananumi tabu?

Na veivakananumi tabu sa i ira na kato kuli ni manumanu ka vakatawani kina na ivivi kulinimanumanu ka volai tu kina na tiki ni ivolanikalou. O ira na Jiu era vauca na kato lalai oqori ki na wa kulinimanumanu ka ra daramaka e yadredra se ligadra me dua na sala me ra nanuma tiko kina na ivunau (raica iVakarua 6:6–8) Mai na dokadoka, o ira na Farisi era tokara na veivakananumi tabu ka raba sivia tu yani me laurai na kena levu ni nodra lomana na vosa ni Kalou.

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:

Joni 12:1–8

E vakaraitaka vakacava o Meri na nona lomana na iVakabula? Eda vakaraitaka vakacava noda lomani Koya?

Sava Tiko na Yavai Jisu, mai vei Brian Call

Joni 12:42–43

Ena rawa vakacava ni da vakaraitaka na vakarokoroko vei ira na tani ni ra vakaraitaka se taqomaka tiko nodra vakabauta vakalotu? Na cava e rawa ni yaco ena veimaliwai ka rawa ni vakayalolailaitaki keda mai na noda vakaraitaka se taqomaka noda vakabauti Karisito? Me ivakaraitaki ni tamata sega ni dau rawai mai na ibili ni veimaliwai, raica Taniela 1:3–20; 3; 6; Joni 7:45–53; 9:1–38; and Mosaia 17:1–4.

Maciu 21:12–17

Eda vakaraitaka vakacava na noda doka ka vakarokorokotaka na valetabu? Na cava eda rawa ni “vakaseva” mai na noda bula ka dau tarovi keda na vakila tiko ni valetabu e “vale ni masu” (Maciu 21:12–13) ka vanua ni vakabulai vakayalo? Vakananuma me lagati na “I Love to See the Temple,” Children’s Songbook, 95.

Maciu 21:28–32

Na lesoni cava mai na vosavakatautauvata ni tamata kei na rua na luvena tagane e rawa ni vukea nomu matavuvale? Me vaka beka oqo, e rawa ni ra vakayagataka na italanoa me veitalanoataki kina na bibi ni talairawarawa kei na veivutuni. De rawa ki na nomu vuvale me vola e dua ivola ka vakatasuasuataka na vosavakatautauvata ka dui taura na dui tamata.

Maciu 22: 15 –22

Na cava soti na “ka sa nona na Kalou” (tikina e 21) ka dodonu meda solia Vua?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakatorocaketaki ni Noda Veivakavulici

Vakayagataka na cakacakaniliga me ra vagolei mai kina na lewe ni vuvale. “Na Gospel Art Book kei na LDS Media Library ena LDS.org e lewena tu e vuqa na iyaloyalo kei na vidio e rawa ni vukea [nomu vuvale] me ra raica na vakasama kei na veika e yaco” (Veivakavulici ena iVakarau ni Turaga , 22). Me ivakaraitaki, na itaba-droini ka itokani tiko ni ituvatuva oqo e rawa ni vukea na kena vakabula na italanoa ni curu i Karisito ki Jerusalemi.

Curu Qaqa, mai vei Walter Rane