tagane ena vunikau ni lako yani o Jisu

Sakiusa ena Vu ni Lolo, mai vei James Tissot

Me 20–26

Maciu 21–23; Marika 11; Luke 19–20; Joni 12

“Raica, Sa Lako Mai vei Iko na Nomu Tui”

Ni ko wilika na Maciu 21–23; Marika 11; Luke 19–20; kei na Joni 12, vakarorogo vakavinaka ki na veivakauqeti o ciqoma mai na Yalo Tabu. Goleva na “Sotava Nodra Gagadre na Gone Sobu” ena itekivu ni ivolavakarau oqo baleta na veika me nanumi tiko ni o vakavulica na ivakavuvuli eso oqo.

Vola na Veika o Uqeti Kina

ivakatakilakila ni veiwasei

Sureta na Veiwasei

Vakaraitaka na iyaloyalo mai na ituvatuva ni macawa oqo ena Lako Mai Mo Muri Au—Baleta na Tamata Yadua kei na Matavuvale, ka sureti ira na gone me ra wasea na ka era kila baleta na ka sa yaco tiko ena iyaloyalo.

ivakatakilakila ni veivakavulici

Vakavulica na iVunau

Gone Sobu

Luke 19:1–10

Sa kilai au ena yacaqu na Tamada Vakalomalagi kei Jisu.

Ni o wilika na nodrau sota na iVakabula kei Sakiusa, na itukutuku cava soti o raica ena rawa ni vakalougatataki ira na gone o vakavulica?

iTaviqaravi e Rawa ni Caka

• Vakaraitaka na iyaloyalo Zacchaeus in the Sycamore Tree (LDS.org). Vukei ira na gone me ra vakatakilai Sakiusa ka cavuta na yacana. Cakava na ivukivuki eso me ra muria na gone ni o tukuna na italanoa i Sakiusa kei Jisu—me vaka oqo, titeqe voli me ra raisivita e dua na ilala tamata se vakalecaleca voli me ra kabata e dua na vunikau. Vakamacalataka ni a raici Sakiusa na iVakabula ka kacivi koya ena yacana. Vakadinadinataka ni sa kilai ira yadua talega na gone na iVakabula kei na yacadra.

• Kauta mai e dua na waqa ni taba lala ki na kalasi, se cakava e dua ena pepa. Sureti ira yadua na gone me ra veivukevuke ni taura tu na waqa e matadra ni ra kaya tiko na vo ni kalasi, “sa kilai [yaca ni gone] na Tamada Vakalomalagi kei Jisu Karisito.”

• Sureti ira yadua na gone me ra veivukevuke ni vakalasutaki kabata tiko e dua na vunikau, me vaka e cakava o Sakiusa. Me ra qai kaya na vo ni kalasi, “sa kilai [yaca ni gone] na Tamada Vakalomalagi kei Jisu Karisito.”

• Lagata vata “I Am a Child of God,” Children’s Songbook, 2–3, ka vukei ira na gone ni rogoca na veika e vukei ira ni kila ni sa lomani ira na Tamada Vakalomalagi.

Maciu 21:12–14

Na valetabu sa dua na vanua tabu.

Na nomu ivakadinaina ni valetabu sa rawa ni vukei ira na gone o vakavulica me ra kila ni sa vanua tabu na valetabu.

iTaviqaravi e Rawa ni Caka

• Vakaraitaka na iyaloyalo Vakasavasavataka tiko na Valetabu o Jisu (iVola ni iYaloyalo Vakosipeli, naba 51), ka tukuna na italanoa e volai toka ena Maciu 21:12–14. Vukei ira na gone me ra kunea na ivakatakarakara ni ilavo kei na manumanu ena iyaloyalo. Qai veivosakitaka na vuna a vinakata kina na iVakabula me ra vagalala mai na valetabu na dauveisau ilavo kei ira na volitaki manumanu.

• Vakaraitaka na iyaloyalo ni valetabu (me ivakaraitaki, raica na iVola ni iYaloyalo Vakosipeli, 117–21), ka kerei ira na gone me ra wasea na ivakarau ni lomadra ni ra raica e dua na valetabu. Tukuna vei ira na gone ni veika era vakila oya sai koya na Yalo Tabu e tukuna tiko vei keda ni sa dua na vanua vakasakiti na valetabu. Kerei ira na gone me ra vakaitovotaki ira me vaka ga era tiko ena loma ni valetabu. Vakaoqo, sa rawa ni ra vosa ena vakasorokakana ka dabe ena vakarokoroko. Lagata vata “I Love to See the Temple,” Children’s Songbook, 95, ka sureti ira na gone me ra lalawataka ni curuma na valetabu ena dua na siga.

Valetabu Fort Collins Colorado

Na valetabu e vale ni Turaga

Maciu 21:28–32

Au rawa ni talairawarawa.

Sa vinakata na Tamada Vakalomalagi meda talairawarawa. Na italanoa vakaibalebale baleti rau na gonetagane e sa dua na madigi me vakavulici kina na bibi ni talairawarawa.

iTaviqaravi e Rawa ni Caka

• Droinitaka e dua na iyaloyalo ni rua na gonetagane ena papa, ka vakayagataka na droini ni o vakamuria tiko na italanoa vakaibalebale ena Maciu 21:28–32. Na gonetagane cava e qai cakava e muri na ka dodonu? Kerei ira na gone me ra cavuta eso na ka era rawa ni cakava me ra talairawarawa kina e vale. Me ra droinitaka na kedra yaloyalo ni cakava tiko e dua vei ira na ka oqori.

• Sureti ira na gone me ra wasea na veika era sa sotakaya ni ra talairawarawa ki na nodra itubutubu se dua na dauveisusu se iliuliu. Era a vakalougatataki vakacava ena nodra talairawarawa? E rawa vakacava ni ra talairawarawa vakalevu cake ena veisiga ni mataka.

ivakatakilakila ni veivakavulici

Vakavulica na iVunau

Gone Qase Cake

Luke 19:1–10

Niu vakasaqara na iVakabula, au na kunei Koya.

O na rairai vakayagataka na italanoa kei Sakiusa me vukea na nodra vakasamataka na gone na veika e rawa ni ra cakava me ra toro vaka voleka kina vua na iVakabula.

iTaviqaravi e Rawa ni Caka

• Wilika na Luke 19:1–10, cegu vakalailai voli ni oti e vica na tikina me veivosakitaki na ka eda vulica me baleti Sakiusa. Na cava e cakava o Sakiusa me rawa ni raici Jisu kina? Na cava a cakava o koya ni kerei koya o Jisu me kevu sobu mai na vunikau? Kerei ira na gone yadua me ra wasea e dua na vuna era na via raici Jisu kina. Kevaka e lako mai ki na nomu koro o Jisu, na cava o na cakava mo vakavakarau kina?

• Sureti ira na gone me ra vakasamataka na tamata era kila ka, vakataki Sakiusa, na rairai vaqara voli na iVakabula. Tarogi ira na gone na cava era na rairai cakava me ra vukea kina e dua tale me vulica baleta na iVakabula.

• Sureti ira na gone me ra wasea na veika era sotava ni ra a vakila ni kilai ira ka lomani ira na Tamada Vakalomalagi kei Jisu Karisito.

Maciu 21:12–14

Na valetabu sa dua na vanua tabu e dodonu meu rokova.

E rawa ni vukei iko vakacava ni vakavulici ira na gone ena vakatabui ni valetabu na italanoa ni iVakabula ni vakasavasavataka tiko na valetabu?

iTaviqaravi e Rawa ni Caka

• Sureti ira na gone me ra wilika na Maciu 21:12–14. Vakaraitaka na yaloyalo Vakasavasavataka tiko na Valetabu o Jisu (iVola ni Yaloyalo Vakosipeli, naba 51), ka tarogi ira na tikina cava e vakaraitaki ena iyaloyalo. Kerei ira me ra droinitaka na yaloyalo ni ituvaki ni valetabu eliu vakakina ni oti na kena vakasavasavataka o Jisu.

• Sureti ira na gone me ra wasea na veika era a vakila ni ra curuma e dua na valetabu, sikova na lomanibai ni valetabu, se sarava na yaloyalo ni valetabu eso. Na cava a vukei ira me kila ni valetabu sa dua na vanua tabu?

• Sureta e dua se levu na itabagone me ra lako mai ki na kalasi ka veivosakitaka na iwalewale era sa vakavakarau tu kina me ra curuma na valetabu. Kevaka era sa taleva na valetabu, kerei ira me ra veivosakitaka na ivakarau ni yalodra ena nodra tiko ekea.

• Kotiva e dua na yaloyalo ni valetabu ki na veitiki ni ibulibuli, ka solia vei ira yadua na gone e dua na tikina. Kerei ira na gone me ra vola ena daku ni nodra tiki ni ibulibuli e dua na ka era rawa ni cakava me ra vakavakarau kina ni curuma na valetabu. Ni ra wasea na gone na nodra dui vakasama, semata na nona tikina ki na ibulibuli.

Maciu 23:25–28

Sa gadrevi meu na buladodonu ena noqu ivalavala kei na noqu gagadre.

A vakavulici ira na vunivola kei na Farisi o Jisu me baleta na bibi ni kena bulataki vakaidina ni kosipeli—sega ni vakarairaitaka ga ni ra buladodonu. Na cava ena vukei ira na gone me ra kila na dina oqo?

iTaviqaravi e Rawa ni Caka

• Ni o wilika vata kei ira na gone na Maciu 23:25–28 navuca ni wasea na ivakamacala oqo ni dauveivakaisini mai na Bible Dictionary: “E dua ka vakalecalecava ni daulotu ni sega tu ni vakakina.” Cava na vuna e ca kina na dauveivakaisini?

• Vakaraitaka vei ira na gone e dua na bilo ka savasava e taudaku ia e duka na lomana me vukea ni vakamacalataka na ivakatautauvata ena Maciu 23:25. E rawa vakacava ni da vakadeitaka ni da sa savasava ka taucoko e loma?

ivakatakilakila ni vuli

Vakauqeta na Vuli e Vale

Vukei ira na gone ni digitaka e dua na ivakavuvuli se itaviqaravi mai na kalasi me ra wasea ki na nodra matavuvale e vale.

Vakatorocaketaki Noda Veivakavulici

Tokoni ira na itubutubu ni gone. “Era sa qasenivuli ni kosipeli bibi duadua na itubutubu kivei ira na luvedra—sa nodra ruarua na itavi bibi kei na kaukauwa levu duadua me ra vakayarayarataka na luvedra (raica Nai Vakarua 6:6–7). Ni o vakavulici ira na gone ena lotu, vakasaqara ena masumasu na sala eso me tokoni kina na nodra itubutubu ena nodra itavi bibi” (Veituberi ena iVakarau ni iVakabula, 25).

tabana ni itaviqaravi: sa ka tabu na valetabu