Na iKarua ni Lako Mai, mai vei Harry Anderson

Me 27–June 2

Josefa Simici—Maciu 1; Maciu 25; Marika 12–13; Luke 21

“Na Luve ni Tamata ni sa Lako Mai”

Vakananuma titobu na cava era gadreva na gone o vakavulica me ra kila Josefa Simici—Maciu 1; Maciu 25; Marika 12–13; kei na Luke 21. E rawa ni o moica na vakasama e ganiti ira na qase cake ena nodra ituvatuva oqo na gone sobu kei na kena veibasai.

Vola na Veika o Uqeti Kina

Sureta na Veiwasei

Vakaraitaka e dua na iyaloyalo e semati ki na dua na italanoa ni wiliwili ena macawa oqo (me vaka na iyaloyalo ni tini na goneyalewa mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Kerei ira na gone me ra wasea na ka era kila me baleta na italanoa.

Vakavulica na iVunau

Gone Sobu

Josefa Simici—Maciu 1:31

Ena vunautaki yani na kosipeli ki vuravura taucoko, ni bera ni lako tale mai ko Jisu.

A tukuna o Jisu ni bera na Nona lako tale mai, ena vunautaki yani na kosipeli ki vuravura taucoko. E rawa ni ra veivuke na gone ena vakataucokotaki ni parofisai oqo ena wasei ni kosipeli.

iTaviqaravi e Rawa ni Caka

• Vakaraitaka e dua na mape, polo, se iyaloyalo ni vuravura (raica na iVola ni iYaloyalo Vakosipeli, naba 3) ka vukei ira na gone me ra kaya, “Na Kosipeli oqo … ena vunautaki yani ki vuravura taucoko” (Josefa Simici—Maciu 1:31). Cava na vuna e vinakati ira kece kina na Luvena na Kalou me ra rogoca na Nona kosipeli?

• Sureti ira na gone me ra tayabe tu ga ena vanua era tu kina ni lagati vata “I Want to Be a Missionary Now” kei na “Called to Serve,” Children’s Songbook, 168, 174. Sureti ira na daukaulotu tudei se lesu wale mai me ra wasea na veika era sotava ena wasei ni kosipeli ka vukei ira na gone me ra vakasamataka na sala eso era rawa ni wasea kina na kosipeli.

iTaba iLoloma mai na NASA Johnson Space Center

Maciu 25:14–30

Au rawa ni vakayagataka na isolisoli sa solia vei au na Kalou.

Era sa dikeva voli na gonelalai na nodra isolisoli kei na ka era rawata. Vukei ira me ra kila ni veisolisoli kei na ka era rawata oqo e sa vu mai vua na Tamada Vakalomalagi.

iTaviqaravi e Rawa ni Caka

• Kauta mai e vica na tikinisiliva mo vakayagataka ni o tukuna na italanoa vakaibalebale ni taledi, e kunei ena Maciu 25:14–30. E rawa ni o kerea e tolu na gone me ratou matataka na italai e tolu. Vakamacalataka ena gauna i Jisu, na taledi sa vakaibalebaletaki ki na ilavo, ia nikua na taledi sa rawa ni kena ibalebale na noda isolisoli kei na ka eda rawata.

• Kerei ira na gone me ra tukuna na sala eso e sa vukei ira kina na nodra itubutubu, tacidra, qasenivuli, se itokani. Na cava soti e tu vei ira na tamata oqo e sa vukei ira ni qaravi ira na tani?

• Vola e dua na itukutuku lailai vei ira na gone ka tukuna vei ira yadua baleta na isolisoli se rawaka eso o siqema rawa vei ira. Ologa na itukutuku yadua me vaka e dua na iloloma ka sureti ira na gone me ra cereka na nodra “iloloma.” Vakauqeti ira me ra vakavinakataka na nodra isolisoli ka vakayagataka mera qaravi ira kina na tani.

Maciu 25:31–46

E vinakati au o Jisu meu qaravi ira na tani.

Eda qaravi Tamada Vakalomalagi kei Jisu Karisito ena noda qaravi ira na tamata era wavoliti keda tu. O ira mada ga na gonelalai sa rawa ni qaravi ira na tani.

iTaviqaravi e Rawa ni Caka

• Umana na italanoa vakaibalebale ena Maciu 25:34–46. Vukei ira na gone me ra kila ni gauna eda sa qaravi ira tiko kina na tani, eda sa qaravi Jisu tiko.

• Taura cake e dua na iyaloyalo ni gone ena nomu kalasi ka vunitaki toka e dakuna na iyaloyalo kei Jisu. Na cava eda rawa ni cakava meda qarava kina na gone oqo. Vagalalataka na iyaloyalo ni gone ka vakamacalataka ni gauna eda veiqaravi vakataki keda kina, eda sa qaravi Jisu tiko.

• Sureti ira na gone me ra droinitaka na kedra iyaloyalo ni qaravi ira tiko na tani ena ivakarau e vakamacalataka na iVakabula ena Maciu 25:35–36. Kerei ira na gone tale so me ra vakilakila na ka era droinitaka tiko.

• Sureti ira na gone me ra wasea na veika era sotava ni dua sa vakaraitaka na veiqaravi Vakarisito kivei ira se na nodra matavuvale.

Vakavulica na iVunau

Gone Qase Cake

Josefa Simici—Maciu 1:31

Ena vunautaki yani na kosipeli ki vuravura taucoko, ni bera ni lako tale mai ko Jisu.

E rawa ni ra veivuke na gone o vakavulica ena vunautaki ni kosipeli ki vuravura taucoko ni bera nai Karua ni Lako Mai ni iVakabula.

iTaviqaravi e Rawa ni Caka

• Sureti ira na gone me ra wasea na veivakalougatataki era sa ciqoma se ra na ciqoma baleta ni ra sa lewena na Lotu i Karisito. Wilika vata Josefa Simici—Maciu 1:31, ka taroga vei ira na gone na ivakarau ena vakalougatataki ira kina na luve ni Kalou e vuravura taucoko na kosipeli.

• Vakaraitaka vei ira na gone e dua na mape ni vuravura se nomu matanitu, ka vukei ira ni vakatakila eso na vanua e a vunautaka kina na kosipeli e dua na lewe ni matavuvale se itokani ena gauna ni kaulotu.

• Sureta e vica na gone me ra vakavakarau mai ni wasea na iwalewale era a vakatakilai kina ki na kosipeli na nodra lewe ni matavuvale se o ira na tubudra. Kevaka e rawa, kerea e dua ena tabanalevu ka a veiqaravi vakaulotu tudei me wasea e dua na ka sa sotava ena wasei ni kosipeli.

• Kerei ira yadua na gone me ra vola na yacana e dua e rawa ni ra veitalanoa vata kaya me baleta na kosipeli se sureta ki lotu. Kerei ira talega na gone me ra vola na veika e rawa ni ra cakava me ra daukaulotu kina ena gauna oqo.

Maciu 25: 1–13

Sa noqu itavi vakataki au na noqu saumaki ki na kosipeli.

Sa vakavulica vei keda na italanoa vakaibalebale ni tini na goneyalewa ni sega ni rawa ni da kerea mai vua tale e dua na noda saumaki ki na kosipeli. O rawa vakacava ni vukei ira na gone me nodra itavi vakataki ira na nodra saumaki mai?

iTaviqaravi e Rawa ni Caka

• Kerea e dua na gone kei na dua na nona itubutubu me vakavakarau mai ni wasea na iwalewale rau a vulica kina na italanoa vakaibalebale ni tini na goneyalewa e vale ena macawa oqo.

• Droinitaka e dua na cina tabucagi ena papa, ka vakayacana me ivakadinadina. Solia vei ira yadua na gone e dua na tikinipepa ka vaka na ibulibuli ni turu ni waiwai, ka kerea vei ira yadua na gone me ra vola kina e dua na ka ena cakava mera saumaki vakalevu cake kina ki na kosipeli. Vakabïra na nodra ituru ki na papa wavokita na cina.

• Sureti ira na gone me ra vukei iko ni cakava e dua na lisi ni ka eso me caka me vakavakarau ki na dua na vulagi dokai. E tautauvata se duidui vakacava na veika oqo mai na ivakarau eso eda rawa ni vakavakarau kina vakayalo ki nai Karua ni Lako Mai ni iVakabula.

• Ena lima na tikinipepa, vola na veika e sega ni rawa ni kerei. Ena lima tale na tikinipepa, vola na veika e rawa ni kerei. Veiwakitaka na tikinipepa, ka kerei ira na gone me ra wasewasea ki na rua na ibinibini oqo. Wilika vata Maciu 25:1–13. Cava na vuna e bibi kina me da kakua ni vakararavi vei ira na tani me baleta na noda saumaki mai ki na kosipeli?

Maciu 25:14–46

Ena iOtioti ni Veilewai, eda na solia vua na Turaga e dua na ivolatukutuku ni noda bula.

Ni oti na Tucaketale, ena lewai keda na Kalou me vaka na noda talairawarawa ki na Nona ivakaro kei na vakadonui ni isoro cabori ni iVakabula. Na italanoa vakaibalebale ni taledi kei na italanoa vakaibalebale ni sipi kei na me sa vakavulica vei keda baleta na iOtioti ni Veilewai oqo.

iTaviqaravi e Rawa ni Caka

• Sureta na veimama ni kalasi me wilika na Maciu 25:14–30 kei na veimama kadua me wilika na Maciu 25:31–46. Kerei rau na ilawalawa me matanataka na italanoa vakaibalebale ki na kalasi.

• Sureti ira na gone me ra wilika yarua na Maciu 25:35–36 ka vola na veika era rawa ni cakava me vakaraitaka na nodra lomani Jisu Karisito.

Vakauqeta na Vuli e Vale

Kerei ira na gone me ra wasea vata kei na nodra matavuvale na sala eso era rawa ni daukaulotu vinaka cake kina ka veivosaki kei na nodra matavuvale me baleta na tamata era rawa ni wasea vua na kosipeli.

Vakatorocaketaki Noda Veivakavulici

Vakarogoca se matanataka e dua na italanoa. Baleta ni ra dau taleitaka na gone na italanoa, vaqara na sala eso me ra vakaitavitaki kina ena italanoa vakaivolanikalou o wasea. E rawa ni ra taura tu na iyaloyalo se iyaya, droinitaka na iyaloyalo ni talanoa, matanataka na italanoa, se veivuke ni tukuna na italanoa. Tokaruataka na italanoa me vukei ira ni kila na veika bibi matailalai kei na ivakavuvuli ni kosipeli.