iOtioti ni Vakayakavi

And It Was Night, mai vei Benjamin McPherson

June 10–16

Maciu 26; Marika 14; Luke 22; Joni 18

“Me kakua ni Yaco Noqu Lewa, ia me Yaco ga na Lomamuni”

Ni o wilika na Maciu 26; Marika 14; Luke 22; kei na Joni 18, vakaraica na ivakavuvuli eso o nanuma ni ra gadreva na gone me ra kila.

Vola na Veika o Uqeti Kina

ivakatakilakila ni veiwasei

Sureta na Veiwasei

Vakaraitaka na iyaloyalo ni veika a yaco ena veiwase eso oqo, vaka na Gospel Art Book, naba 54, 55, kei na 56, ka sureti ira na gone me ra tukuna na ka e yaco tiko ena iyaloyalo.

ivakatakilakila ni veivakavulici

Vakavulica na iVunau

Gone Sobu

Marika 14:22–25; Luke 22:19–20

Na sakaramede e vukei au meu vakananumi Jisu.

Vukei ira na gone me ra kila ni vakaivotavota ena sakaramede e sa dua na gauna me da vakananumi Jisu kina.

iTaviqaravi e Rawa ni Caka

• Vakalekalekataka na italanoa kei Jisu ni vakarautaka voli na sakaramede. O rawa ni vakayagataka na “Wase 49: The First Sacrament,” New Testament Stories, 124-26, se na kena vidio ena (LDS.org). Raica talega na vidio “Sacrament” (LDS.org). Vukei ira na gone mera kila ni da dau nanumi Jisu ena gauna ni sakaramede.

• Tarogi ira na gone ke ra kila se cava e matataka na madrai kei na wai ni sakaramede. Vakamacalataka ni ivakatakarakara oqo e vukea ni nanuma ni a mate ena vukuda ka tucake tale mai na mate o Jisu. Vakaraitaka e dua na tiki ni madrai kei na dua na bilo wai ni o vukei ira na gone me ra cavuqaqataka na malanivosa “Mo dou vakananumi [Koya] kina” (Luke 22:19).

• Kerei ira na gone me ra bobo ka vakasamataka e dua era dau lomana, ka qai sureti ira me ra tukuna na tamata oya vei iko. Kerei ira me ra bobo tale, vakananuma na iVakabula, ka qai wasea na veika era kila me baleti Koya. Vakauqeti ira me ra vakasamataki Jisu ena gauna ni sakaramede e veimacawa.

• Sureti ira na gone me ra vakaraitaka na ka era rawa ni cakava me ra nanumi Jisu kina ka vakarokoroko ena gauna ni sakaramede.

• Vukei ira na gone me ra cakava na ivolalailai e vakamacalataki ena tabana ni itaviqaravi ena macawa oqo. Vakatura me ra vakayagataka me vukei ira ni vakasamataki Jisu ena gauna ni sakaramede.

• Vukei ira na gone me ra vaqara eso na mekesini ni Lotu me baleta na iyaloyalo kei Jisu ka cakava e dua na ivolayaloyalo era rawa ni raica toka ena gauna ni soqoni ni sakaramede.

Maciu 26:36–46

A vakararawataki ena vukuqu o Jisu baleta ni lomani au.

Navuca na iwalewale o rawa ni vukei ira kina na gone ni vakila na loloma i Jisu kivei ira ni o veivosakitaka na italanoa ni Nona vakararawataki e Kecisemani.

iTaviqaravi e Rawa ni Caka

• Sureti ira na gone me ra vakasamataka e dua na gauna era a rarawa se vakacudrui kina. Ke ganita, sureta e vica na gone me ra wasea. Vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Vakamacalataka o Jisu, ena sala eso eda sega ni kila vinaka sara, a vakila na mosi kei na rarawa taucoko eda sa sotava kecega na tamata. Kena ibalebale oqo ni rawa ni vukei keda o Koya me da yalo vinaka ni da rarawa tu, mosi, se yaloca.

• Lagata kei ira na gone “I Feel My Savior’s Love,” Children’s Songbook, 74–75. Sureti ira me ra wasea na sala eso era sa vakila kina na loloma i Jisu.

Masu o Karisito e Kecisemani

Christ Praying in the Garden of Gethsemane, mai vei Hermann Clementz

ivakatakilakila ni veivakavulici

Vakavulica na iVunau

Gone Qase Cake

Marika 14:22–24

Sa vukei au na sakaramede meu nanumi Jisu Karisito kei na Nona solibula ena vukuqu.

O na rawa ni vukei ira vakacava na gone mera sotava e dua na sakaramede vakaibalebale cake?

iTaviqaravi e Rawa ni Caka

• Sureti ira na gone me ra veivukevuke ni wiliwili mai na veitikina ena Marika 14:22–24 (raica talega na iVakadewa nei Josefa Simici, Marika 14:20–24 [ena idusidusi vakaiulutaga ni iVolatabu]) kei na Vunau kei na Veiyalayalati 20:75–79. Na vosa kei na vakasama cava soti sa tautauvata ena rua na malanivosa oqo?

• Tarogi ira na gone na cava era dau cakava me vukei ira ni vakasamataki Jisu ena gauna ni sakaramede. Vukei ira me raica na ivolanikalou se vosa eso mai na sere ni sakaramede e rawa ni ra wilika ena gauna ni sakaramede, ka qai volai ira ena dua na kadi era rawa ni raica na gone ena nodra vakayagataka na sakaramede ka tarava. Lagata e vica na sere oqo vata kei ira na gone (raica na Serenilotu, naba 169–97).

• Vola na veimalanivosa bibi mai na masu ni sakaramede ena papa, ka vukei ira na gone mera cavuqaqataka. Na cava na ibalebale ni veimalanivosa oqo? Cava na vuna eda vakavinavinakataka kina ni rawa ni da dau vakavouia na noda veiyalayalati ni papitaiso ena veimacawa?

• Sureta e dua ka taura tu na Matabete i Eroni me tukuna vei ira na gone na ka a sotava ena vakarautaki, masulaki, se veivotayaki ni sakaramede. Na cava e vukea na nona vakavakarau me cakava oqo? E vakacava na ivakarau ni yalona ni cakava tiko? E vakananumi koya vakacava baleta na iVakabula na madrai kei na wai?

• Kerei ira na gone ka sa papitaiso me ra wasea na ka era nanuma baleta na nodra papitaiso. E vakacava tu na ka era vakila? Na veiyalayalati cava era a cakava? (raica na Mosaia 18:8–10). Tukuna vei ira ni veimacawa eda vakayagataka kina na sakaramede, e sa rawa ni vaka ni da papitaiso tale—sa rawa ni da vosoti ena noda ivalavala ca, ka da vakavouia na noda veiyalayalati.

Maciu 26:36–42

E Kecisemani, a taura kina o Jisu Karisito ki Vua na noqu ivalavala ca kei na mosi.

Na kilai ni veika e cakava o Jisu ena vukuda e Kecisemani sa rawa ni vukei ira na gone mera veivutunitaka na nodra ivalavala ca ka goleva na iVakabula ni ra sotava na veivakatovolei dredre eso.

iTaviqaravi e Rawa ni Caka

• Sureti ira na gone me ra wilika na Maciu 26:36–42, ni vakaraici na vosa se na malanivosa eso e vakamacalataka na veika a vakila o Jisu e Kecisemani. Na cava a vakila voli o Jisu ka vakavuna me vaqo na veika e vakila? Solia vei ira na gone na madigi me ra wasea na nodra nanuma baleti Jisu kei na Nona solibula ena vukuda.

• Sureti ira na gone me ra wasea e dua na gauna era a rarawa kina se mosi voli. Tarogi ira kevaka era kila e dua ka sa vakila na ka vata oya. Vakamacalataka mai Kecisemani, a vakila o Jisu na mosi kei na rarawa taucoko esa bau vakila na tamata kecega. E vakayacora oqo o Koya me rawa ni vakacegui keda ena gauna eda gadreva kina (raica na Alama 7:11–12).

• Solia ki na dua na gone e dua na kau e balavu cake mai na raba ni katuba ni valenivuli, ka kerei koya me tarura tu vakababa ka tovolea me lako curuma na katuba. Vakamacalataka ni kau e matataka na noda ivalavala ca, ka sai itatao ni noda curuma na matanitu ni Kalou. Kauta tani na kau me vakaraitaka ni sa mai taura o Jisu Kivua na noda ivalavala ca me rawa kina ni da vosoti ni da veivutuni.

Luke 22: 39–44

Au rawa ni muria na ivakaraitaki i Jisu ena noqu talairawarawa kivua na Tamada Vakalomalagi.

A vakaraitaka na talairawarawa o Jisu kivua na Tamana ena Nona kaya, “Me kakua ni yaco na noqu lewa, me yaco ga nomuni lewa” (Luke 22:42). O na rawa ni vukei ira vakacava na gone ni vulica na ivakaraitaki i Jisu?

iTaviqaravi e Rawa ni Caka

• Cavuqaqataka vata kei ira na gone na malanivosa “Me kakua ni yaco noqu lewa, me yaco ga nomuni lewa” (Luke 22:42) ka veivosakitaka na kena ibalebale. Na cava eda rawa ni cakava meda talairawarawa kina ki na lomai Tamada Vakalomalagi?

• Vukei ira na gone me ra vakatakila eso na ivunau era sa talairawarawa kina. Taroga: Na veivakalougatataki cava soti o sa ciqoma ena nomu talairawarawa tu kivua na Tamada Vakalomalagi, ena gauna mada ga a dredre kina? Sureti ira me ra wasea na veika era sotava kei na nodra ivakadinadina.

Luke 22:41–43

Au rawa ni ciqoma na veivuke niu masu.

Ni masu tu o Jisu e Kecisemani, a rairai mai e dua na agilosi me vakaukauwataki Koya. Era sa kila tiko li na gone o vakavulica ni rawa talega vei ira me ra masuta na kaukauwa kivua na Tamada Vakalomalagi?

iTaviqaravi e Rawa ni Caka

• Tukuna na italanoa i Luke 22:41–43 vei ira na gone (ena nomu vakayagataka beka na “Wase 51: Jesus Suffers in the Garden of Gethsemane,” New Testament Stories, 129–32, se na kena vidio ena LDS.org). Vakamacalataka ni gauna a masu kina o Jisu, sa tala mai na Tamada Vakalomalagi e dua na agilosi me vakaukauwataki Koya. O cei sa tala mai na Tamada Vakalomalagi me vakaukauwataki keda?

• Vakaraitaka na ivakatakarakara ni agilosi ni vakacegui Karisito tiko ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka wasea e dua na gauna o a vakila kina na nomu vakaukauwataki mai vua na Tamada Vakalomalagi.

ivakatakilakila ni vuli

Vakauqeta na Vuli e Vale

Sureti ira na gone me ra wasea ki na nodra matavuvale na ka era na cakava ena gauna ni sakaramede me ra nanumi Jisu kina.

Vakatorocaketaki Noda Veivakavulici

Wasea na nomu ivakadinadina ki na nomu kalasi. Na ivakadinadina e rawa ni rawarawa sara me vaka “Au kila ni lomani keda yadua na Tamada Vakalomalagi” se “Au vakila na vinaka ni lomaqu niu vulica na veika e baleti Jisu Karisito.”

tabana ni itaviqaravi: na sakaramede