Mo Vakananumi Au, mai vei Walter Rane

June 3–9.

Joni 13–17

“Dou Tikoga ena Noqu Loloma”

Masu mo kila na nodra gagadre na gone o vakavulica ni o wilika na Joni 13–17. Lako Mai, Mo Muri Au—Baleta na Tamata Yadua kei na Matavuvale. kei na ituvatuva oqo e rawa ni vukei iko mo kila na ivunau ka solia vei iko na vakasama eso mo vakavulici ira na gone ena nomu kalasi.

Vola na Veika o Uqeti Kina

Sureta na Veiwasei

Me ra vukei na gone me ra wasea na veika era vulica tiko mai vale, veisoliaka e dua na uto pepa ka sureti ira na gone yadua me ra wasea e dua na ka e dau cakava me vakaraitaka kina na loloma vei ira tale eso ena gauna e yaco yani kina vua na uto.

Vakavulica na iVunau

Gone Sobu

Joni 13:1–17

E vinakata o Jisu meu dau qaravi ira na tani.

Na italanoa kei Jisu ena vui ni yavadratou na Nona iApositolo sa dua na ivakaraitaki ni veiqaravi ena yalomalumalumu. E rawa vakacava ni o vakauqeti ira na gone me ra muria na ivakaraitaki nei Jisu?

iTaviqaravi e Rawa ni Caka

• Vakayagataka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale me vukea na kena tukuni na italanoa ena Joni 13:1–17. Sureti ira na gone me ra dusia na matailalai eso ni italanoa era tiko ena iyaloyalo.

• Vakaraitaka na iyaloyalo kei Jisu ni qaravi ira tiko eso tale (raica na iVola ni iYaloyalo Vakosipeli se mekesini ni Lotu ena vakasama eso). Me ra veivukevuke na gone ena tauri cake tu ni iyaloyalo ni o tukuna tiko na italanoa e tu kina (laiva me ra veivuke ena tukuni ni italanoa kevaka era rawata).

• Taroga vei ira na gone se vakacava na nodra nanuma ni dua e vukei ira. Me ra droinitaka na gone na iyaloyalo ni ivakarau e rawa ni ra muria kina na ivakaraitaki nei Jisu ena nodra qarava e dua.

Joni 13:34–35; 14:15

Au vakaraitaka na noqu lomani Jisu Karisito ena noqu maroroya Nona ivakaro.

O na vukei ira vakacava beka na gone me ra kila ni nodra talairawarawa sa dua na ivakaraitaki ni nodra lomani Jisu Karisito?

iTaviqaravi e Rawa ni Caka

• Solia vei ira yadua na gone e dua na uto pepa me ra ukutaka. Sureti ira na gone me ra taura cake na nodra uto ena veigauna era lagata kina na vosa “love” ena “Jesus Said Love Everyone” kei na “Love One Another,” Children’s Songbook, 61, 136.

• Vukei ira na gone me ra cavuqaqataka na Joni 14:15 ena nodra taura cake nodra uto pepa ni ra cavuta, “Kevaka dou lomani au,” kei na dua na iyaloyalo ni peleti vatu ni ra cavuta, “Talairawarawa ki na noqu ivunau.”

• Sureti ira na gone me ra veivukevuke ni matanataka e dua na cakacaka ni loloma e rawa ni ra cakava vua e dua me vakaraitaka nodra lomani Jisu. Me ra qai vakilakila na kena vo na ka eratou matanataka tiko.

• Vakacavara vata kei ira na gone na tabana ni itaviqaravi ni macawa oqo.

Joni 14:26–27; 15:26; 16:13–14

E vukei au na Yalo Tabu meu voleka cake vei Jisu.

E dina ni ra se bera ni ciqoma na gone o vakavulica na isolisoli ni Yalo Tabu, sa rawa ni ra vulica oqo na ivakarau e cakacaka kina ena nodra bula na mana ni Yalo Tabu.

iTaviqaravi e Rawa ni Caka

• Vakaraitaka na iyaloyalo The Last Supper (iVola ni Yaloyalo Vakosipeli, naba 54). Vakamacalataka vei ira na gone ena iOtioti ni Vakayakavi, a vakavulici ira Nona tisaipeli o Jisu me baleta na Yalo Tabu.

• Sureti ira na gone me ra biuta na ligadra e utodra kei na uludra. Cereka na ivolanikalou ki na Vunau kei na Veiyalayalati 8:2, ka vakamacalataka ni Yalo Tabu e rawa ni vosa vei keda “ki na [noda] vakasama kei na vu ni [yaloda],” se ena noda vakanananu kei na veika eda vakila.

• Bokoca na cina ka taura cake e dua na iyaloyalo. Qai cinava na iyaloyalo ena dua na cinalivaliva. Taroga vei ira na gone se tautauvata vakacava kei na Yalo Tabu na cinalivaliva.

• Lagata vata kei ira na gone na “The Holy Ghost,” Children’s Songbook, 105, ena “domo lailai ka malua.” Sureti ira me ra vakarogoca na veika e cakava na Yalo Tabu.

Vakavulica na iVunau

Gone Qase Cake

Joni 13:34–35; 14:15; 15:10–14

Au vakaraitaka na noqu lomani Jisu Karisito ena noqu maroroya Nona ivakaro.

Ni o wilika na veitukutuku oqo ena nomu vuli vakataki iko, vakasamataki ira na gone o vakavulica. Era na vakalougatataki vakacava ni ra kila ni nodra talairawarawa sa ivakatakilakila ni nodra lomana na iVakabula?

iTaviqaravi e Rawa ni Caka

• Vukei ira na gone me ra cavuqaqataka na Joni 13:34–35. Dua na kena icakacaka me lagati tiko na “Love One Another,” Children’s Songbook, 136–37, ka vukei ira na gone me ra vulica na matana me lako vata kaya.

• Sureti ira na gone me ra vola ena papa na ivakarau eso sa vakaraitaka kina o Jisu Nona lomani keda. E rawa ni o vakaraitaka eso na iyaloyalo mai na bula ni iVakabula me vukei ira (baleta eso na vakasama, raica na iVola ni iYaloyalo Vakosipeli). E rawa vakacava ni da vakaraitaka na loloma vei ira na tani me vakataki Koya? Sureti ira yadua na gone me ra tucake ka wasea e dua na sala ena “veilomani talega vakakina” (Joni 13:34).

• Sureta e dua na gone me wilika na Joni 14:15. Me ra veivukevuke na gone me droinitaki na iyaloyalo ni dua e maroroya tiko na ivunau, ni ra vakilakila tiko na kena vo na cava e droinitaka tiko. Me ivakaraitaki ni ivunau, raica na Me iSakisaki ni iTabagone. Na sala cava eda vakaraitaka kina vua na iVakabula ni da lomani Koya ena maroroi ni ivunau eso oqo?

Joni 14:26; 15:26; 16:13

Na Yalo Tabu e veidusimaki, veivakacegui, ka vakadinadinataka na dina.

Oqo ni sa levu na gone e ciqoma na isolisoli ni Yalo Tabu, ena rawa vakacava ni o vukei ira me ra kila vakavinaka cake na itavi ni Yalo Tabu?

iTaviqaravi e Rawa ni Caka

• Solia vei ira na gone na veitikina oqo me ra wilika yarurua: Joni 14:26; 15:26; kei na 16:13. Kerei ira me ra vaqara na vosa e vakavulici ira ena veika e dau cakava na Yalo Tabu. Vola na vosa ena papa.

• Wasea e dua na gauna a tuberi iko, vakacegui iko, vakasalataki iko, se vakadinadinataka kina vei iko na dina na Yalo Tabu. Kerei ira na gone mera wasea e dua ga na ka era sa sotava vata kei na Yalo Tabu. Era a vakila vakacava na veivakayarayarataki ni Yalo Tabu?

• Sureti ira yadua na gone me droinitaka na matana ena dua na tagapepa. Cinava na loma ni tagapepa ena cinalivaliva ka matataka na Yalo Tabu. Qai biuta eso na ka ena loma ni taga ka vakataotaka na rarama, me vaka na itavoi ni domo se pepamalumu, me vakavulica ni noda digidigi cala e rawa ni yalana na veivakayarayarataki ni Yalo Tabu ena noda bula. Me ra qai vagalalataka na gone na itavoi ni domo se pepamalumu mai na nodra taga me vakaraitaka na veivutuni.

Joni 15:1–8; 17:3

Erau vinakati au na Tamada Vakalomalagi kei Jisu meu kilai Rau.

O na vakalougatataka tawamudu na nodra bula na gone ena nomu vukei ira me na yaco me ra kilai Tamada Vakalomalagi kei Jisu Karisito.

iTaviqaravi e Rawa ni Caka

• Vakaraitaka e dua na itei ni ra veivukevuke ni wilika na gone na veitikina ena Joni 15:1–8. E tautauvata vakacava kei na vaini o Jisu? Eda tautauvata vakacava kei na tabana eso o keda? Na cava e rawa ni da cakava me da voleka tikoga kina vua na iVakabula?

• Wilika i cake na Joni 17:3. Taroga vei ira na gone na cava era sa cakava tiko me ra kilai Tamada Vakalomalagi kei Jisu Karisito kina. Wasea na sala sa yaco tiko kina mo kilai Rau.

E vakavulica o Karisito, “Dou tu vei au” (Joni 15:4).

Vakauqeta na Vuli e Vale

Vakauqeti ira na gone me ra taroga e dua na lewe ni matavuvale se cava e rawa ni cakava me vukei koya kina. Ena kalasi ni macawa ka tu mai, solia vei ira na gone na gauna me ra wasea na veika era a cakava.

Vakatorocaketaki Noda Veivakavulici

Moica na itaviqaravi. Kevaka o vakavulici ira na gone sobu, e rawa ni o raica eso na ikuri ni vakasama o rawa ni na moica me baleta nomu kalasi ena iwasewase ni ituvatuva baleti ira na qase cake. Vakakina, sa rawa ni moici na nodra itaviqaravi na gone sobu me ra vakavulici kina na qase cake.