Na Gone Cidroi, mai vei Liz Lemon Swindle

6–12 ni Me.

Luke 12–17; Joni 11

“Tou Mai Reki Vata; Niu sa Kunea na Noqu Sipi ka a Yali”

Wilika ena masumasu na Luke 12–17 kei na Joni 11, ni vakasaqarai na sala o rawa ni vukei ira kina na gone o vakavulica me ra kila na dina ena veiwase oqo ka vakila na loloma ni Tamada Vakalomalagi.

Vola na Veika o Uqeti Kina

Sureta na Veiwasei

Vakananuma vei ira na gone na italanoa vakaibalebale kei na italanoa eso e kune ena Luke 12–17 kei na Joni 11, ka sureti ira me ra digitaka e dua ka droinitaka na kena iyaloyalo.

Vakavulica na iVunau

Gone Sobu

Luke 15

Sa gadreva na Tamada Vakalomalagi me ra lesu taucoko Vua na Luvena.

Ena rairai tiko eso na gone ena nomu kalasi ka sega ni dau tiko wasoma ena soqoni ni Lalai. O na vakauqeti ira vakacava na gone o vakavulica me ra dodoliga yani kivei ira ena loloma?

iTaviqaravi e Rawa ni Caka

• Solia na ilavosiliva vua e dua na gone, na iyaloyalo ni dua na sipi vua e dua tale, kei na iyaloyalo ni gone cidroi vua tale e dua (LDS.org). Tukuna na italanoa vakaibalebale e tolu ka kune ena Luke 15 ka sureti ira na gone me ra taura cake na nodra ilavosiliva se iyaloyalo ni o tukuna. Sa rawa ni o sureti ira na gone mera talanoataka tale vakataki ira na italanoa vakaibalebale ena nodra vosa ga.

• Kerei ira na gone me ra wasea e dua na gauna era a vakayalia kina e dua na ka. Vakamacalataka ni rawa ni mai yali vakayalo na tamata ni ra sa sega ni vakila na loloma ni Kalou se ni ra gole tani mai Vua. Vakadinadinataka ni ra vakavulica na italanoa vakaibalebale oqo ni vinakati keda na Kalou me da vukei ira na sa yali tu me ra lesu mai Vua.

• Sureti ira na gone me ra nanumi ira na vo ni gone ka sega ni dau lako mai ki na soqoni ni Lalai. Vukei ira me ra volavola ka sureti ira na gone oqo me ra tiko ena soqoni ni Lalai se dua na itaviqaravi ni Lalai. Na sala cava tale eda rawa ni vukei ira kina na gone oqo mera vakila na loloma ni Tamada Vakalomalagi kivei ira.

Luke 17:11–19

Au rawa ni vakaraitaka noqu lomana na Tamada Vakalomalagi ena noqu vakavinavinakataka na noqu veivakalougatataki.

Na sala cava ena rairai vakauqeti ira na gone kina na italanoa ni le tini na vukavuka me ra dau vakavinavinaka?

iTaviqaravi e Rawa ni Caka

• Tukuna na italanoa ni le tini na vukavuka ka a vakabulai ira o Jisu. Vakaraitaka na iyaloyalo e kune ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ka sureti ira na gone me ra wili ki na tini ena nodra iqaqalo. Qai kerei ira me ra lokia e ciwa na iqaqalo me vakaraitaka na vukavuka e dua ka a vakavinavinaka vei Jisu. Na gauna cava era sa bau vakaraitaka kina na gone na nodra vakavinavinaka kivua e dua nodra itokani se daulomani?

• Sureta na gone yadua me ra matanataka e dua na ka era vakavinavinakata, ka me ra qai vakilakila na vo ni gone se cava oya. Kerei ira na gone me ra wasea na sala eso eda rawa ni vakaraitaka kina vua na Tamada Vakalomalagi ni da sa vakavinavinakataka na noda veivakalougatataki.

Joni 11:1–46

Keimami vakabauta ni sa Luve ni Kalou ko Jisu.

A kaya vei Jisu o Marica, na ganei Lasarusa: “Au sa vakadinata ni sa Karisito koi kemuni, na Luve ni Kalou” (Joni 11:27). Sa rawa ni vaqaqacotaka na nodra vakadinadinataki Jisu Karisito na gone na italanoa kei Meri, Marica, kei Lasarusa.

iTaviqaravi e Rawa ni Caka

• Vakalekalekataka na italanoa kei Jisu ni vakaturi Lasarusa cake mai na mate (raica talega “Wase 43: Jesus Brings Lazarus Back to Life,” New Testament Stories, 107–9, se na kena vidio ena LDS.org) ka vakaraitaka e dua na tabanikau madu kei na dua na kau bula. Wasea na nomu ivakadinadina ni mai na kaukauwa i Jisu Karisito, era na tucake tale na tamata sa mate ka bula tawayalani.

• Vukei ira na gone ni cavuqaqataka na malanivosa a kaya o Jisu vei Marica: “Oi au na vu ni tucake tale, kei na vu ni bula” (Joni 11:25). Vakamacalataka ni mai na Tucaketale ni iVakabula, eda na raici ira tale na noda daulomani era sa mate.

Vakavulica na iVunau

Gone Qase Cake

Luke 15

Au rawa ni vukei Jisu ni kunei ira na Nona sipi yali tu.

Era na rairai sega ni vakila na gone ni ra tiko eso ena kalasi ka sega ni dau lako mai ki na soqoni ni Lalai. O na vakauqeti ira vakacava me ra dodoliga yani kivei ira na gone oqo?

iTaviqaravi e Rawa ni Caka

• Lesia na gone yadua me wilika lo na italanoa vakaibalebale ni sipi ka yali se na italanoa vakaibalebale ni tikinisiliva ka yali e kune ena Luke 15:1–10, ka wasea na ka era vulica.

• Vola na yaca eso oqo ena vava: tama, luvena tagane qase kei luvena gone Vakaraitaka na vidio “The Prodigal Son” (LDS.org) ka cegu vagauna me rawa ni ra vola na gone ena vava na nanuma eso ni tamata era volai tu.

• Kerea e dua na gone me vagalala mai na rumu ni ra vunitaka na vo ni gone e dua na tikinisiliva se dua na sipi pepa. Me qai lesu mai na gone ka vakaraica na tikinisiliva se sipi. Vakananumi ira na gone ni rawa ni mai yali na tamata ki na veivakalougatataki ni kosipeli. Sureti ira me ra vakatura eso na sala era rawa ni dodoliga yani kina vei ira oqori. Lagata vata kei ira na gone “Talei Vua na iVakatawa,” Serenilotu, naba. 130, ka vakadinadinataka na reki e basika mai ni sa lesu na tamata vua na Kalou.

• Vakamacalataka ni vakayagataka o Jisu na sipi ka yali, na tikinisiliva ka yali, kei na gone cidroi me matataki ira na tamata ka sa “yali” baleta ni sega ni tiko vei ira na veivakalougatataki ni kosipeli. Sureti ira na gone me ra vakasamataka na tamata era kila ka sega tiko ni mai lotu. Na cava era rawa ni cakava ni vukei ira na tamata oqo me ra vakila na loloma ni Tamada Vakalomalagi kivei ira?

Sipi ka Yali, mai vei Liz Lemon Swindle

Luke 17:11–19

Au rawa ni vakaraitaka noqu lomana na Tamada Vakalomalagi ena noqu vakavinavinakataka na noqu veivakalougatataki.

Ena rairai dua na sala vinaka me vakauqeti ira na gone na italanoa na le tini na vukavuka mera vakaraitaka kina na nodra vakavinavinaka kivua na Tamada Vakalomalagi ena nodra veivakalougatataki.

iTaviqaravi e Rawa ni Caka

• Wilika vata na italanoa ni le tini na vukavuka. A vakalougatataki vakacava ena nona lomasoli na vukavuka ka a vakavinavinaka? Cava na vuna e bibi kina me da vakavinavinakataka na Kalou ena noda veivakalougatataki?

• Sureti ira na gone me ra vola na veika era vakavinavinakataka e tekivu ena matanivola yadua ni yacadra.

• Kerei ira na gone me ra vola na ivola ni vakavinavinaka kivua na Tamada Vakalomalagi ena veivakalougatataki e solia tiko vei ira. E rawa ni ra vakaliliga na ivola ena yasa ni nodra idavodavo me vakananumi ira ni dau cavuta na nodra vakavinavinaka ni ra masu.

Joni 11:1–46

Keimami vakabauta ni sa Luve ni Kalou ko Jisu.

O rawa ni vakayagataka vakacava na italanoa kei Meri, Marica, kei Lasarusa mo vukei ira na gone ni kila, me vakataki Marica, ni o Jisu “na Karisito, na Luve ni Kalou”? (Joni 11:27).

iTaviqaravi e Rawa ni Caka

• Vola ena vava eso na malanivosa era cavuta na tamata ena Joni 11. Sureti ira na gone me ra vakilakila o cei a cavuta na malanivosa yadua, ka kerei ira me ra vaqara na Joni 11 me raici na nodra vakilakila. Ena vakaevei tu na nodra nanuma ke o ira o Jisu, Marica, Meri, se o Lasarusa? Na vakadinati Jisu ena rawa ni vukei keda vakacava ena gauna ni rarawa se rere?

• Wilika na ivakadinadina nei Marica, e kunei ena Joni 11:20–27. Kerei ira na gone me ra vakaraica na vosa kei na malanivosa e vakaraitaka ni tu vei Marica na vakabauta. Na cava eda rawa ni cakava me tu vei keda na vakabauta ena gauna ni dredre?

• Vukei ira na gone ni cavuqaqataka na Joni 11:25. Vakamacalataka ni tamata kece ena tucake tale, ia na yalododonu ga ena rawata na bula tawamudu ka bula vata tale kei na Tamada Vakalomalagi kei Jisu Karisito.

Vakauqeta na Vuli e Vale

Solia vei ira na gone eso na pepa se dua na ivolalailai era rawa ni vakayagataka ni vola se droinitaka kina na veika era sa vakavinavinakataka ena loma ni macawa.

Vakatorocaketaki Noda Veivakavulici

Na tokarua sa dua na idola ki na vuli. E yaga vei ira na gone ni caka vakavica na rogoci ni dua na ivakavuvuli ni kosipeli se qaravi ni dua na itaviqaravi. Tovolea mo tokaruataka na itaviqaravi ena sala duidui eso.