O Koya sa Sega na Nona iValavala Ca, mai vei Liz Lemon Swindle

29 ni Epereli–5 ni Me

Joni 7–10

“Koi Au na iVakatawa Vinaka”

Ni o wilika na Joni 7–10, vakasamataki ira na gone o vakavulica. Vuqa na vakasama me baleti ira na gone qase cake ena ituvatuva oqo e rawa ni moici me ganiti ira na gone sobu, se kena veibasai.

Vola na Veika o Uqeti Kina

Sureta na Veiwasei

Kerei ira na gone me ra wasea e dua na ka era a cakava ena macawa sa oti me vakataka kina na kai Samaria dauloloma.

Vakavulica na iVunau

Gone Sobu

Joni 7:14–17

Na muri ni ivunau ena vukea meu kila na kedra dina.

A vakavuvulitaka o Jisu ni da na rawata e dua na ivakadinadina ni veika dina a wasea o Koya ni da sa bulataka. O na vakayagataka vakacava na itukutuku oqo mo vakavulici ira kina na gone ni vakacegu eda vakila ni da dau talairawarawa ki na ivunau e sa vukei keda ni kila na kedra dina?

iTaviqaravi e Rawa ni Caka

• Vakalekalekataka na Joni 7:17 ena veimalanivosa era na kila na gone. Vukei ira me ra kila ni talairawarawa ki na ivunau ena vukei keda me da voleka cake kivei Jisu Karisito, ena kena lagati vata “Keep the Commandments” se “Choose the Right Way,” Children’s Songbook, 146–47, 160–61. Kerei ira na gone me ra vakarogoca na ivakarau eda na vakalougatataki kina ni da muria na ivunau.

• Wasea e dua na gauna o a vulica kina ni sa mai vua na Kalou na ivunau ni o sa bulataka, me vaka na saumi ikatini se na vosoti ni dua a cakava vakaca. Sureti ira na gone me ra vakasamataka e dua na ka era a sotava ni ra talairawarawa ki na dua na ivunau. Taroga, “A vakaevei na veika o vakila ni o talairawarawa kina?”

• Digitaka eso na ivunau ka droinitaka e rua na iwasewase ni iyaloyalo rawarawa ka matataka na ivunau yadua. Vakatoboicutaka na iyaloyalo kece e delaniqele ka sureti ira na gone me ra veivukevuke ena kena vakasotari vata na ivunau. Vakadinadinataka na kedra bibi na ivunau kei na kena sa vaqaqacotaka na noda ivakadinadina na kena muri.

Joni 8:29

A talairawarawa vei Tamana o Jisu.

E dau cakava o Jisu Karisito na veika me marau kina na Tamana mai Lomalagi. O na vukei ira vakacava na gone ni kunea na sala me ra muria kina na Nona ivakaraitaki?

iTaviqaravi e Rawa ni Caka

• Vukei ira na gone me ra tokaruataka na veika a tukuna o Jisu me baleti Tamada Vakalomalagi ena Joni 8:29: “Niu sa kitaka tikoga na ka sa vinakata ko koya.” Kerei ira me ra wasea na veika a vakayacora o Jisu me marau kina na Tamada Vakalomalagi. Vakaraitaka vei ira eso na iyaloyalo mai na Gospel Art Book me solia eso na vakasama.

• Tarogi ira na gone se cava e dau vakavuna nodra marau. Qai taroga se cava e rawa ni ra cakava ena macawa oqo me marau kina e dua na lewe ni matavuvale se itokani. Sureti ira na gone me ra droinitaka na kedra iyaloyalo ni ra cakava tiko na itaviqaravi oqo ka kauta ivale me vakananumi ira kina.

• Sureta na itubutubu ni dua na gone me wasea e dua na gauna a cakava kina na gone e dua na ka me vakamarautaki koya kina. Me qai wasea na gone na veika a vakila.

Joni 10:1–18

E kilai au ka lomani au o Jisu.

Na italanoa vakaibalebale ni ivakatawa vinaka e rawa ni vukei ira na gone me ra kila ni lomani ira o Jisu ka kila se o cei o ira.

iTaviqaravi e Rawa ni Caka

• Kerei ira na gone me ra droinitaka e dua na iyaloyalo ka matataka e dua na ka mai na italanoa vakaibalebale ni ivakatawa vinaka, me vaka na sipi, na daubutako, se na olifa. Wilika na Joni 10:1–18 vei ira na gone, ka kerei ira me ra taura cake na nodra iyaloyalo ni ra rogoca ni o wilika na ka era droinitaka. Vakamacalataka me vaka ga na nona tubera ka lomana na nona qelenisipi na “ivakatawa vinaka,” sa lomani keda ko Jisu ka tuberi keda lesu taucoko ki Vua. Vakasuluma e dua na gone me vaka na ivakatawa, ka me ra qai wasea na gone na sala e vaka kina e dua na ivakatawa o Jisu kivei keda.

• Vakaraitaka na iyaloyalo kei Jisu kei ira na lami ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Eda kila vakacava ni lomani ira na lami ko Jisu? Eda kila vakacava ni ra lomani Jisu na lami?

• Vukei ira na gone me ra vakacavara na tabana ni itaviqaravi ni macawa oqo.

Vakavulica na iVunau

Gone Qase Cake

Joni 7:14–17

Na muri ni ivunau ena vukea meu kila na kedra dina.

O iko kei ira na gone o vakavulica ena dui tu beka na veika o ni sotava ena bulataki ni dina va kosipeli kei vulici ni kena dina. Ena rawa vakacava mo yavutaki iko ena veika oqori ni o veivakavulici?

iTaviqaravi e Rawa ni Caka

• Vola na veitiki yadua ni Joni 7:14–17 ena tikinipepa duidui eso ka vakaraitaki ira ena ituvatuva duidui. Kerei ira na gone me ra tuvana vakadodonu ka veidutaitaka kei na Joni 7:14–17 mo raica kevaka sa donu. Sureti ira na gone me ra veisasa ka wasea na veika era sa kila mai na tikina yadua vua na kedra isa. Sa vukei ira vakacava me ra kila na dina ni ivunau na talairawarawa ki na ivunau ni Kalou?

• Wasea na ivakaraitaki eso mai na ivolanikalou ka vakaraitaka na ivakarau era vakalougatataki kina na tamata ena nodra bulataka na dina ni kosipeli, me vakataki Taniela (raica Taniela 6) se Nifai (raica 1 Nifai 3–4).

• E vica na siga ni bera na kalasi, sureta e dua na gone me vola na gauna a vakadinadinataka rawa kina e dua na ivunau ena nona bulataka. Ena gauna ni kalasi, kerea na gone me wasea na veika sa vola.

Joni 8:31–36

E rawa ni sereki keda na dina.

Ni ra sa qase cake na gone, era na sotava na tamata eso ka nanuma ni sa veivesuki na bulataki ni kosipeli. O na vakayagataka beka vakacava na Joni 8:31–36 mo vakalasuya kina na vakasama oya?

iTaviqaravi e Rawa ni Caka

• Sureti ira na gone me ra wilika na Joni 8:31–36 ka wasea na nodra nanuma ena ibalebale ni bobula ki na ivalavala ca. E vukei keda vakacava na ivakavuvuli nei Jisu me da bula galala?

• Kerea e dua na gone me vukei iko ni vesuka vakamamada e dua na dali, sikavu, se neketai e ligamu me vakaraitaka na ivakarau eda vesuki tu kina ena ivalavala ca ni da cakava wasoma voli ka sega ni veivutunitaka.

• Vakaraitaka e dua na loka me matataka na ivalavala ca kei na dua na ki me matataka na kena rawa ni sereki keda na dina ni kosipeli. Me ivakaraitaki, na kilai ni Veisorovaki ni iVakabula sa rawa ni vagalalataki keda me da veivutuni ka vosoti mai na noda ivalavala ca. Se na kilai ni Vosa ni Vuku sa rawa ni vagalalataki keda me da levea na veivakabobulataki.

E vakavuvulitaka o Jisu, “Ia na ka dina ena sereki kemudou” (Joni 8:32).

Joni 10:1–18

O Jisu sa vaka e dua na ivakatawa kivei keda.

Ni o vulica na italanoa vakaibalebale ni ivakatawa vinaka, vaqara na dina e vakavuvulitaka me baleta na keda isema vua na iVakabula. Ena vakalougatataki ira vakacava na gone na kilai ni dina oqo?

iTaviqaravi e Rawa ni Caka

• Vola na ivakatawa vinaka kei na ivakatawa saumi ena papa. Vakamacalataka ni ivakatawa saumi e dua ka saumi vakailavo me cakava e dua na cakacaka. Kerei ira na gone me ra vola na duidui era raica ena Joni 10:1–18 vei rau na ivakatawa vinaka kei na ivakatawa saumi. Cava na vuna o na vinakata kina mo muria na ivakatawa vinaka mai vua na ivakatawa saumi?

• Droinitaka se vakaraitaka na iyaloyalo ni dua na katuba. Wilika vata na Joni 10:7–9, ka tarogi ira na gone se tautauvata vakacava kei na katuba o Jisu. Ena tikina e 9, na veivakalougatataki cava ena yaco vei ira na “curu kina” ena katuba? Me da curu vakacava ena katuba sa vakarautaka vei keda o Jisu Karisito?

Vakauqeta na Vuli e Vale

Vukei ira na gone me ra vakasamataka e dua na ivunau e rawa ni ra talairawarawa kina vakavinaka. Kerei ira me ra tovolea me ra talairawarawa ki na ivunau oya ena macawa mai oqo.

Vakatorocaketaki Noda Veivakavulici

Taroga na taro e veivakauqeti. Taroga na taro e sureti ira na gone o vakavulica me ra ulabaleta na tukunika. Ia, vakauqeti ira me ra wasea na nodra ivakadinadina ena dina ni kosipeli. Me ivakaraitaki, kevaka o ni veivosakitaka na ivunau, e rawa ni o kerei ira na gone me ra wasea na ivakarau e sa vakalougatataki ira kina na ivunau.