13–19 ni Me.

Maciu 19–20; Marika 10; Luke 18

“A Cava Tale sa Vo Vei Au?”

Wilika na Maciu 19–20; Marika 10; kei na Luke 18, ka nanumi ira tiko na gone o vakavulica. Vola na veivakauqeti cavaga o ciqoma. Na nomu vakavakarau ena vukei iko mo vakavulici ira na gone ena veika era gadreva me ra kila mai na veiwase oqo.

Vola na Veika o Uqeti Kina

Sureta na Veiwasei

Sureti ira na gone me ra tukuna ki na kalasi e dua na ka era taleitaka me baleta nodra matavuvale. E rawa talega mo kerei ira na itubutubu ni gone me ra vakarautaka na iyaloyalo ni nodra matavuvale me ra mai wasea na luvedra ena kalasi.

Vakavulica na iVunau

Gone Sobu

Marika 10:6–8

E vinakata na Tamada Vakalomalagi me da vakamau ena valetabu ka taukena na matavuvale tawamudu.

Ena yaga vakacava vei ira na gone o vakavulica na vulici ni ivunau ni vakamau tawamudu? Ena yaga beka kevaka eda goleva “Na Matavuvale: Ai Vakaro ki Vuravura Raraba” (Ensign se Liaona, Nove. 2010, 129).

iTaviqaravi e Rawa ni Caka

• Wilika na Marika 10:6–8 vei ira na gone, ka vakaraitaka na iyaloyalo ni dua na veiwatini. Kerei ira na gone me ra dusia na tagane kei na yalewa ni ra rogoca ni o wilika na vosa tagane kei na yalewa. Vakamacalataka ni sa nakita na Tamada Vakalomalagi me rau vakamautaka na tagane kei na yalewa (raica na Ai Vakatekivu 1:27–28).

• Vakaraitaka na iyaloyalo ni dua na matavuvale kei na valetabu. Vakamacalataka ni vinakata na Tamada Vakalomalagi me da vauci ki na noda matavuvale ena valetabu me rawa ni da tiko vata me tawamudu. Nanumi ira na gone era se bera ni vauci vata na nodra itubutubu.

• Lagata na “A Happy Family,” Children’s Songbook, 198. Sureti ira na gone me ra dusi ira ni ra lagata na “au,” kei na “keda.” E rawa ni tokaruataki vakavica na itaviqaravi oqo. Sureti ira na gone me ra wasea na veika lasa era cakava vata kei na nodra matavuvale. Cava na vuna era vakavinavinaka kina ena vuku ni nodra matavuvale?

• Lagata e dua na sere me baleta na valetabu se matavuvale, me vaka na “I Love to See the Temple” se “Families Can Be Together Forever,” Children’s Songbook, 95, 188. Me ra taura tu na gone na iyaloyalo ni valetabu se matavuvale, ka sureti ira me ra dulaka cake nodra iyaloyalo ni ra lagata na “valetabu” se “matavuvale.” Cava na vuna sa rui bibi kina me da vakamau ena valetabu?

Na vakamau tawamudu e sa tiki ni nona ituvatuva na Kalou.

Marika 10:13–16

E vinakata o Jisu me ra lako mai Vua na gonelalai me rawa ni vakalougatataki ira.

Na italanoa oqo e vakarautaka e dua na madigi me vukea nodra vakila na gone na levu ni nona lomani ira ko Jisu.

iTaviqaravi e Rawa ni Caka

• Ena nomu vosa ga, wasea na italanoa ena Marika 10:13–16. Ko na rairai vakaraitaka talega na vidio “Suffer the Little Children to Come unto Me” (LDS.org). Na gauna cava beka sa ra bau vakila kina na gone ni lomani ira o Jisu? Wasea na nomu ivakadinadina vei ira na gone ni lomani ira o Jisu ka vinakata me vakalougatataki ira.

• Vakaraitaka na iyaloyalo Christ and the Children (Gospel Art Book, naba 47). Vakamacalataka ni kevaka eda vinakata me da vaka na gone era dabe tikivi Jisu sa rawa ni da muria na Nona ivunau ka lomani Koya kei ira tale eso. Na cava e rawa ni ra cakava na gone me ra vakataki ira na gone era dabe tikivi Jisu?

• Me ra droinitaka na gone na kedra iyaloyalo ni ra vakalougatataki tiko mai vei Jisu (raica na Marika 10:16).

Marika 10:17–22

Kevaka eda talairawarawa ki na ivunau, sa rawa ni da rawata na bula tawamudu.

E vakavulica na cauravou vutuniyau o Jisu ni kevaka me na rawata na bula tawamudu—na bula me vaka na Tamada Vakalomalagi—sa dodonu me talairawarawa ki na ivunau.

iTaviqaravi e Rawa ni Caka

• Wilika na kena italanoa na cauravou vutuniyau ena Marika 10:17–22 vata kei ira na gone. (Raica talega na “Wase 42: The Rich Young Man,” New Testament Stories, 105–6, se na kena vidio ena LDS.org.) Kerei ira me ra vakarogoca na ka a tukuna o Jisu vua na cauravou me cakava vakakina na nona sauma na cauravou.

• Tukuna e dua se levu na italanoa era a kere ivakasala se veidusimaki kina na gone vei ira nodra itubutubu ka sega ni muria se talairawarawa kina. Na cava eso na ka e kerea vei keda na Tamada Vakalomalagi me da cakava? E vakaevei na ivakarau ni yaloda ni da talairawarawa ki na Nona ivunau?

• Wasea na veika o sotava ena nomu ciqoma na veivakauqeti eso mo cakava e dua na ka mo vinaka cake kina.

Vakavulica na iVunau

Gone Qase Cake

Marika 10:6–8

E vinakata na Tamada Vakalomalagi me da vakamau ena valetabu ka taukena na matavuvale tawamudu.

Na veika e vakavulica o Jisu me baleta na vakawati sa rawa ni vukei ira na gone ni ra sotakaya na itukutuku veisaqasaqa eso ena vuravura.

iTaviqaravi e Rawa ni Caka

• Kerea e dua na gone me wilika na Marika 10:6–8 vakadomoilevu. Vakamacalataka ni kabita e kena ibalebale me “kabi matua” se “taura matua” e dua na ka. Cava na vuna me ra sema vata kina na veiwatini, veilomani, ka cakacaka vata vakaveitokani?

• Wasea na malanivosa oqo mai “Na Matavuvale: Ai Vakaro ki Vuravura Raraba,” ka vukei ira na gone me ra kila na kena ibalebale: “Na tagane se yalewa e dua na ivakatakilakila bibi ka inaki ni tamata ena bula taumada, bula oqo, ka yacova na tawamudu.”

• Kerei ira na gone me ra vukei iko ni vakasamataka na isaunitaro vaka na “Cava na vuna era bibi kina na matavuvale ena Lotu?” se “Cava na vuna e bibi kina mo vakamau ena valetabu?” Lagata vata “Families Can Be Together Forever,” Children’s Songbook, 188. Wasea na nomu ivakadinadina ni vakamau tawamudu kei na matavuvale vei ira na gone. Sureti ira me ra wasea talega na nodra ivakadinadina.

• Sureti ira yadua na gone me ra wilika e dua na ivolanikalou mai na ituvatuva oqo: Marika 10:6–8; 1 Korinica 11:11; V&V 42:22; 131:1–4; kei na Mosese 3:18, 21–24. Na cava era vakavulica na ivolanikalou oqo me baleta na vakamau?

Marika 10:17–22

E rawa ni vukei au o Jisu ni kila na ka meu cakava meu rawaka kina.

A vakasaqarai Jisu na cauravou vutuniyau ka ciqoma na idusidusi e baleti koya vakatabakidua. Ena rawa vakacava ni o vakauqeti ira na gone me ra vakasaqara na mataqali veituberi vata oqo ena nodra bula?

iTaviqaravi e Rawa ni Caka

• Kerei ira na gone me ra raica e dua na tikina ena Marika 10:17–22 ka vakamacalataka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Vakamacalataka ni ivakasala a solia ko Jisu vua na cauravou e baleti koya ga, ka sa rawa vei keda kece me da ciqoma na veidusimaki yadua ni Yalo mai vua na Turaga.

• Wilika vata na Marika 10:17–22. Sureti ira na gone me ra vola ena vava na ivunau a tukuna na iVakabula vua na cauravou vutuniyau me muria (raica na tikina 19). Na cava tale a gadrevi me cakava okoya? (raica na tikina 21). Vakauqeti ira na gone me ra vakasamataka eso na ka era na gadreva me ra sa tekivu cakava se muduka me ra muri Jisu vakavinaka cake kina. Na cava eso na sala eda rawa ni kila kina na ka e vinakata ko Jisu me da cakava?

Vakauqeta na Vuli e Vale

Sureti ira na gone me ra tukuna ki na nodra matavuvale na vuna era vakavinavinakataki ira kina, ena volai beka ni dua na ivola me soli vei nodra itubutubu se na nodra wase ivakadinadina me baleta na matavuvale donuya na lotu vakamatavuvale.

Vakatorocaketaki Noda Veivakavulici

Dau vakarorogo vei ira na gone. E vakacava tiko na ivakarau ni nodra vakaitavi ena itaviqaravi ni vuli na gone ena nomu kalasi? Kevaka era sega ni kauwai, sa na rairai kena gauna me tovolei kina e dua tale na itaviqaravi se dua na taubale lekaleka, ena vakarokoroko. Ena dua tale na yasana, kevaka o raica ni ra sa vakaitavi na gone ka vuli mai na dua na iwase ni lesoni, kakua ni vakavorakitaki iko mo tomana tikoga ka vakadeitaka kina ni ko sa vakacavara na lesoni taucoko.