“11–17 Nōvema. Hepelū 7–13: ‘Ko e Taulaʻeiki Lahi ʻo e Ngaahi Meʻa Lelei ʻe Hoko’” Haʻu ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻou 2019 (2019)
“11–17 Nōvema. Hepelū 7–13,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2019
Ko e Tāpuakiʻi ʻe Melekisēteki ʻa ʻEpalamé, ta ʻa Walter Rane
11–17 Nōvema
Hepelū 7–13
“Ko e Taulaʻeiki Lahi ʻo e Ngaahi Meʻa Lelei ʻe Hoko”
ʻI hoʻo lau ʻa e Hepelū 7–13, te ke lava ʻo maʻu ha ngaahi ongo ʻo fakafou ʻi he Laumālie Māʻoniʻoní. Fakakaukauʻi ha ngaahi founga ʻe lava ai ʻo lekooti ia; hangē ko ʻení, te ke lava ʻo lekooti ia ʻi he tohi lēsoni ko ʻení, ʻi he tafaʻaki hoʻo tohi folofolá, pe ʻi he Gospel Library app.
Lekooti e Ngaahi Ongo ʻOkú ke Maʻú
ʻOku kau pē mo e Kāingalotu faivelengá ʻi heʻenau mamahi ʻi he “ngaahi manuki mo e ngaahi fakamamahi” ʻa ia ʻe lava ke fakafeʻātungiaʻi ai ʻenau loto-falalá (vakai, Hepelū 10:32–38). Naʻe ʻiloʻi ʻe Paula naʻe fakatangaʻi lahi ʻa e kau Siu ne nau ului ki he tui faka-Kalisitiané koeʻuhí ko ʻenau tui fakalotu foʻoú. Ke fakalotolahiʻi kinautolu ke nau tauhi moʻoni ʻenau ngaahi fakamoʻoní, naʻá ne fakamanatu ange kiate kinautolu ʻa e tukufakaholo fuoloa ʻo e kau tui faivelenga mei honau hisitōlia ʻonautolú: ʻĒpeli, ʻĪnoke, Noa, ʻĒpalahame, Sela, Siosefa, Mōsese–ko e “ʻao ʻo e kau fakamoʻoni tokolahi” ʻoku moʻoni pea mahuʻinga ke faʻa tatali ki he ngaahi talaʻofa ʻa e ʻOtuá (Hepelū 12:1). Ko e ngaahi sīpinga ko ʻeni ʻo e tuí ʻoku maʻanautolu kotoa pē ʻoku nau sio “kia Sīsū ko e kamataʻanga mo e ngataʻanga ʻo e tuí” (Hepelū 12:2). Koeʻuhí ko Ia, ʻi he taimi kotoa pē ʻoku hanga ai ʻe he filí ʻo ʻai ke tau fakaʻamu ke “fakaholomui,” te tau lava ʻo “ʻunuʻunu atu ʻi he loto moʻoni mo e ʻamanaki mālohi ʻo e tuí” (Hepelū 10:22, 38). ʻOku hoko ʻa Sīsū Kalaisi ko hotau “taulaʻeiki lahi ʻo e ngaahi meʻa lelei ʻe hoko” kiate kitautolu, pea mo e Kāingalotu ʻi he kuonga muʻá (Hepelū 9:11).
Ngaahi Fakakaukau ki hono Ako Fakataautaha ʻo e Folofolá
Ko e Lakanga Taulaʻeiki Faka-Melekisētekí ko e lakanga fakataulaʻeiki māʻolunga angé ia.
Ne laui senituli ʻa hono fakaʻaongaʻi ʻe he kau Siú ʻa e Lakanga Taulaʻeiki Faka-Līvaí, ʻa ia ʻoku toe ʻiloa foki ko e Lakanga Taulaʻeiki Faka-ʻĒloné. Ka naʻe hoko mai ʻa e kakato ʻo e ongoongolelei ʻo Sīsū Kalaisí fakataha mo e Lakanga Taulaʻeiki Faka-Melekisētekí ʻa ia ʻoku māʻolunga angé, ʻa ia naʻe ʻomi ai ha ngaahi tāpuaki maʻongoʻonga ange. Ko e hā ʻokú ke ako fekauʻaki mo e Lakanga Taulaʻeiki Faka-Melekisētekí mei he Hepelū 7? Ko ha sīpinga ʻeni ʻo e ngaahi moʻoni te ke ala maʻú:
-
Liliu ʻa Siosefa Sāmita, Hepelū 7:3, 21:Ko kinautolu ʻoku fakanofo ki he Lakanga Taulaʻeiki Faka-Melekisētekí “kuo ngaohi ʻa kinautolu ke nau tatau mo e ʻAlo ʻo e ʻOtuá” pea ʻoku nau hoko ko e “[kau taulaʻeiki] maʻu pē.”
-
Hepelū 7:11:ʻOku ʻikai foaki mai ʻe he Lakanga Taulaʻeiki Faka-Līvaí ʻa e “haohaoa” ko ia naʻe fetongi leva ia ʻe he Faka-Melekisētekí (vakai, TF 84:18–22).
-
Hepelū 7:20–21:ʻOku maʻu ʻa e Lakanga Taulaʻeiki Faka-Melekisētekí ʻi ha fakapapau (vakai, TF 84:19–44).
Ko e hā ha ngaahi tāpuaki kuó ke maʻu mei he Lakanga Taulaʻeiki Faka-Melekisētekí mo hono ngaahi ouau fekauʻakí?
Vakai foki, ʻAlamā 13:1–13; Tokāteline mo e Ngaahi Fuakava 121:36–46; Fakahinohino ki he Ngaahi Folofolá, “Lakanga Taulaʻeiki Faka-Melekisētekí,” scriptures.lds.org; Henry B. Eyring, “Tui mo e Fakapapau mo e Fuakava ʻo e Lakanga Fakataulaʻeikí,” Ensign pe Liahona, Mē 2008, 61–64; Dallin H. Oaks, “Ko e Ngaahi Kī mo e Mafai ʻo e Lakanga Fakataulaʻeikí,” Ensign pe Liahona, Mē 2014, 49–52.
ʻOku hanga ʻe he ngaahi ouau ʻo e kuonga muʻá mo e kuonga ní ʻo fakataumuʻa ʻetau fakakaukaú kia Sīsū Kalaisi.
Ne mei maheni ʻa e kau laukonga Hepelū ʻo e ʻipiseli ko ʻení mo e fale fehikitakí mo e ngaahi ouau ne fakamatalaʻi ʻe Paulá. Ka naʻe ʻikai fakatokangaʻi ʻe ha niʻihi naʻe fakataumuʻa ʻa e ngaahi ouau ko ʻení ki he feilaulau fakalelei ʻa Sīsū Kalaisí.
ʻI he kuonga fakatohitapú, ʻi ha ʻaho mālōlō fakataʻu naʻe ui ko e ʻAho ʻo e Fakaleleí, naʻe hū ha taulaʻeiki lahi ki he potu toputapú (pe Potu Toputapu ʻaupitó) ʻi he temipale Selusalemá ʻo feilaulauʻi ha kosi pe lami ke fakalelei ʻa e ngaahi angahala ʻa ʻIsilelí. Naʻe fakamatalaʻi ʻe Paula ko Sīsū Kalaisí ko ha taulaʻeiki lahi ʻokú Ne fai feilaulau pē ʻe taha—ko ʻEne moʻuí—ke fakalelei ʻa e ngaahi angahala ʻo e māmaní (vakai, Hepelū 9:24–10:14).
Fakakaukau ki he ngaahi ouau ʻokú ke fakahoko he ʻaho ní. ʻOku hoko fēfē nai ʻa e ngaahi ouau ko ʻení ke ne tataki koe kia Sīsū Kalaisi?
Ke ako ange fekauʻaki pea mo e ngaahi ouau fakasiu pea mo honau ngaahi fakataipe sio he ngaahi vitiō “The Tabernacle” and “Sacrifice and Sacrament” (LDS.org).
ʻOku fie maʻu ke falala ki he ngaahi talaʻofa ʻa e ʻOtuá kae maʻu ʻa e tuí.
Ka kole atu ʻe ha taha ke ke fakamatalaʻi ʻa e ʻuhinga ʻo e tuí, ko e hā te ke lea ʻakí? Naʻe fakaʻaongaʻi ʻe Sisitā Anne C. Pingree, ko ha mēmipa mālōlō ʻo e Kau Palesitenisī Lahi ʻo e Fineʻofá, ʻa e lea mei he Hepelū 11 ke ʻomi ʻa e fakamatala ko ʻení: “Ko e tuí, ʻa e malava fakalaumālie ko ia ke fakalotoʻi ʻe he ngaahi talaʻofa ʻoku ‘mamata mamaʻo atú’ ka ʻoku ngali he ʻikai maʻu ia ʻi he moʻui ní, ko ha meʻafua pau ia ʻo kinautolu ʻoku tui moʻoní” (“Seeing the Promises Afar Off,” Ensign pe Liahona, Nov. 2003, 14).
Fakakaukau ke fakatupulaki hoʻo fakaʻuhinga pē ʻaʻau ki he tuí ʻi hoʻo fakalaulauloto ki he ngaahi fakakaukau ʻi he Hepelū 11. Ko e hā ʻoku akoʻi atu ‘e he ngaahi sīpinga ʻo e kakai ʻoku lau ki ai ʻi he vahe ko ʻení fekauʻaki mo e tuí? (Vakai foki, ʻEta 12:6–22.)
Vakai foki, ʻAlamā 32:21, 26–43; Jeffrey R. Holland, “An High Priest of Good Things to Come,” Ensign, Nov. 1999, 36 – 38.
Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí
ʻI hoʻo lau mo ho fāmilí e folofolá, ʻe lava ke tokoniʻi koe ʻe he Laumālié ke ke ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu ho fāmilí. Ko ha ngaahi fokotuʻu fakakaukau ʻeni:
Te ke ala fakaafeʻi e kau mēmipa ʻo e fāmilí ke nau vahevahe ha ngaahi aʻusia fakalaumālie ne nau ongoʻi “fakamaamangia” ai ʻe he moʻoní. ‘E tokoni fēfē ʻa e ngaahi aʻusia ko ʻení kiate kitautolu ke “ʻoua naʻa siʻaki [ʻetau] tuí” ʻi he ngaahi taimi faingataʻá pe veiveiuá?
Te ke tokoniʻi fēfē e kau mēmipa ho fāmilí ke nau ako mei he ngaahi sīpinga faivelenga ne lave ki ai ʻi he Hepelū 11? Mahalo naʻa fakalata ke fakatātaaʻi e ʻū talanoa ʻe niʻihi ʻo e ngaahi sīpinga ko ʻení. Pe mahalo ʻe lava ke aleaʻi ʻe homou fāmilí ʻa e ngaahi sīpinga ʻo e kakai faivelenga kehe ʻokú ke ʻiloʻi—kau ai e ngaahi kuí, kau taki ʻo e Siasí, mo e niʻihi ʻo homou koló.
Fakatatau ki he veesi ko ʻení, ko e hā naʻe finangalo ai ʻa Sīsū ke kātekina e mamahi mo faingataʻaʻia ʻi he kolosí? Ko e hā ʻoku akoʻi mai heni fekauʻaki mo e founga te tau lava ai ke kātekina hotau ngaahi ʻahiʻahí? Naʻe ʻomi ʻe Palesiteni Russell M. Nelson ha ngaahi fakakaukau ʻaonga ʻi he veesi ko ʻení ʻi heʻene pōpoaki “Fiefiá mo e Moʻui Fakalaumālié” (Ensign pe Liahona, Nōv. 2016, 81–84).
Ko e hā ʻoku valokiʻi mo fakatonutonu ai kitautolu ʻe he ʻEikí? Ko e hā ʻoku fakatokangaʻi ʻe he kau mēmipa ʻo e fāmilí fekauʻaki mo e founga ʻoku ʻafio ai ʻa e ʻEikí ki he tauteá ʻi hoʻomou ako fakataha e ngaahi veesi ko ʻení? ʻOku tokoni fēfē ʻa e ngaahi veesi ko ʻení ki he founga hoʻo fakahoko pe maʻu ʻa e tauteá?
Ki ha ngaahi fakakaukau lahi ange ki hono ako’i ‘o e fānaú, vakai ki he lesoni ʻo e uike ko ‘eni ʻi he Haʻu, ‘o Muimui ʻIate Au— Ki he Palaimeli.
Fakatupulaki ʻEtau Akoʻí
Fakaʻaongaʻi e mūsiká ke fakaafeʻi e Laumālié mo akoʻi e tokāteliné. Naʻe pehē ʻe he Kau Palesitenisī ʻUluakí, “ʻOku ʻi ai ha mālohi taʻefakangangata ʻo e mūsiká ʻi hono fokotuʻu [kitautolu] ki he tuʻunga fakalaumālie ʻoku māʻolunga angé” (“Talamuʻaki ʻa e Kau Palesitenisī ʻUluakí,” Ngaahi Himí, x). Mahalo ʻe lava ʻe ha foʻi hiva fekauʻaki mo e tuí, hangē ko e “Tauhi ʻa e Moʻoní” (Ngaahi Himí, fika 157), ʻo fetongi ha fealeaʻaki fakafāmili ʻi he Hepelū 11.
Naʻe akoʻi ʻe he ngaahi fakataipe ʻo e temipale ʻo e kuonga muʻá mo hono ngaahi ouaú ʻa e fatongia ʻo Sīsū Kalaisí.