Disyembre 26–Enero 1

Kita Ang Responsable alang sa Atong Kaugalingong Pagkat-on

Ang katuyoan sa mga kasulatan mao ang pagtabang kanimo nga moduol ngadto ni Kristo ug mahimong mas lig-on pang makabig ngadto sa Iyang ebanghelyo. Ang Dali, Sunod Kanako—Alang sa mga Indibidwal ug mga Pamilya makatabang kanimo nga makasabot sa mga kasulatan ug makakaplag diha niini sa espirituhanong kalig-on nga gikinahanglan nimo ug sa imong pamilya. Dayon, sa imong mga klase sa Simbahan, makabaton ka og mga oportunidad sa pagpakigbahin og mga panabot ug makaawhag sa imong isig ka mga Santos sa ilang mga paningkamot sa pagsunod ni Kristo.

I-rekord ang Imong mga Panghunahuna

“Unsay inyong gipangita?” Nangutana si Jesus sa mga tinun-an ni Juan Bautista (Juan 1:38). Mahimo nimong pangutan-on ang imong kaugalingon sa samang pangutana—kay unsay imong makaplagan diha sa Bag-ong Tugon niining tuiga mag-agad pag-ayo sa unsay imong gipangita. “Pangita, ug kamo makakaplag” mao ang saad sa Manluluwas (Mateo 7:7). Busa ipangutana kanang moabot sa imong hunahuna samtang magtuon ka, ug dayon paningkamot sa makugihon nga paagi ang pagpangita sa mga tubag. Sa Bag-ong Tugon mabasa nimo ang gamhanan nga espirituhanong mga kasinatian sa mga tinun-an ni Jesukristo. Isip usa ka matinud-anon nga tinun-an sa Manluluwas, makabaton ka og imong kaugalingong gamhanan nga espirituhanong mga kasinatian samtang ikaw nagdawat sa pagdapit sa Manluluwas, makaplagan niining tibuok nga volume, “Dali, sunod kanako” (Lucas 18:22).

Mga Ideya alang sa Personal nga Pagtuon sa Kasulatan

Aron makakat-on sa tinuoray gikan sa Manluluwas, kinahanglan gayod nga akong dawaton ang Iyang pagdapit, “Dali, sunod kanako.”

Ang pagdapit sa Manluluwas, “Dali, sunod kanako,” alang ngadto sa tanan—bisan og bag-o kita sa dalan sa pagkatinun-an o nakalakaw na niini sa tibuok natong mga kinabuhi. Mao kini ang Iyang pagdapit ngadto sa usa ka adunahan nga batan-on nga lalaki kinsa naningkamot sa pagsunod sa mga sugo (tan-awa sa Mateo 19:16–22; Lucas 18:18–23). Unsay nakat-unan sa batan-ong lalaki—ug unsay kinahanglan gayod nga makat-unan natong tanan—mao nga ang pagkatinun-an nagpasabot sa paghatag sa atong tibuok kalag ngadto sa Langitnong Amahan ug ni Jesukristo. Molambo kita sa atong pagkatinun-an samtang ilhon nato unsay atong kulang, maghimo og mga kausaban, ug maningkamot nga mas hingpit nga mosunod Kanila.

Ang pagkat-on gikan sa Manluluwas magsugod kon maningkamot kita sa pagsabot kon unsa ang Iyang gitudlo. Pananglitan, sa unsa nga paagi ang imong pagsabot sa pagpaubos malig-on samtang imong suhiron ang mosunod?

• Ang mga pagtulon-an sa Manluluwas (tan-awa sa Mateo 18:1–5; Lucas 18:9-14)

• Usa ka ehemplo gikan sa Iyang kinabuhi (tan-awa sa Juan 13:1–15)

Kon ikaw gusto pa nga makakat-on og dugang, sulayi kini nga kalihokan uban sa laing baroganan sa ebanghelyo, sama sa gugma o pagpasaylo.

Responsable ako alang sa akong kaugalingong pagkat-on.

Si Elder David A. Bednar miingon: “Kinahanglang dili kita maghulat sa Simbahan isip kapunongan nga motudlo o mosulti kanato sa tanang butang nga kinahanglan natong mahibaloan ug buhaton aron mahimong matinud-anong mga disipulo ug maisugong molahutay ngadto sa katap[o]san. Hinoon, ang atong personal nga responsibilidad mao ang pagkat-on sa unsa ang kinahanglan natong makat-onan, sa pagpuyo nga atong nahibaloan nga kita kinahanglan nga magpuyo, ug mamahimo kinsa gusto sa atong Agalon nga kita kinahanglang mamahimo. Ug ang atong mga panimalay mao ang pinakamaayong dapit alang sa pagkat-on, pagpuyo, ug pag-uswag” (“Andam nga Makaangkon sa Matag Gikinahanglan nga Butang,” Liahona, Mayo 2019, 102).

Unsay buot ipasabot sa pag-angkon og responsibilidad alang sa imong kaugalingong pagkat-on? Pangita sa posible nga mga tubag diha sa pamahayag ni Elder Bednar ug sa mosunod nga mga kasulatan: Juan 7:17; 1 Mga Taga-Tesalonica 5:21; Santiago 1:5–6, 22; 2:17; 1 Nephi 10:17–19; 2 Nephi 4:15; Alma 32:27; ug Doktrina ug mga Pakigsaad 18:18; 58:26–28; 88:118. Unsa ka nadasig sa pagbuhat aron mas maaktibo sa pagkat-on sa ebanghelyo?

Kinahanglan nakong mahibaloan ang kamatuoran sa akong kaugalingon mismo.

Tingali nakaila ka og mga tawo kinsa ingon og wala gayod mawagtang ang ilang hugot nga pagtuo, bisan unsa pay nahitabo sa ilang mga kinabuhi. Makapahinumdom sila kanimo sa lima ka buotan nga mga birhen sa sambingay sa Manluluwas (tan-awa sa Mateo 25:1–13). Unsay dili tingali nimo makita mao ang ilang makugihong mga paningkamot sa paglig-on sa ilang mga pagpamatuod sa kamatuoran.

Unsaon nato sa pag-angkon ug pag-amuma sa atong kaugalingong mga pagpamatuod? Isulat ang imong mga hunahuna samtang ikaw mamalandong sa mosunod nga mga kasulatan: Lucas 11:9–13; Juan 5:39; Juan 7:14–17; Mga Buhat 17:10–12; 1 Mga Taga-Corinto 2:9–11; ug Alma 5:45–46. (Tan-awa usab sa Giya ngadto sa mga Kasulatan, “Pagpamatuod,” topics.ChurchofJesusChrist.org.)

Kinahanglan nga ang matag usa kanato makaangkon og pagpamatuod alang sa atong kaugalingon.

Unsay akong buhaton kon ako adunay mga pangutana?

Samtang magtinguha ka og espirituhanong kahibalo, ang mga pangutana moabut sa imong hunahuna. Ang mosunod nga mga baroganan makatabang kanimo pagtubag sa mga pangutana sa mga paagi nga makalig-on sa hugot nga pagtuo ug pagpamatuod:

• Tinguhaa ang pagsabot gikan sa Dios. Ang Dios mao ang tinubdan sa tanang kamatuoran, ug Siya nagpadayag og kamatuoran pinaagi sa Espiritu Santo, sa mga kasulatan, ug sa Iyang mga propeta ug apostoles.

• Lihok diha sa hugot nga pagtuo. Kon ang mga tubag dili moabot dayon, salig nga ang Ginoo mopadayag sa mga tubag kon ang panahon husto. Sa pagkakaron, padayon sa pagpuyo sa kamatuoran nga imo nang nahibaloan.

• Pagbaton og mahangturon nga panglantaw. Paningkamot sa pagtan-aw sa mga butang sama sa pagtan-aw sa Ginoo niini, dili sama sa pagtan-aw sa kalibotan. Tan-awa ang imong mga pangutana diha sa kahulogan sa Langitnong Amahan sa plano sa kaluwasan.

Mga Ideya alang sa Pamilya nga Pagtuon sa Kasulatan ug Home Evening

Mateo 13:1–23.Sa pagtabang sa imong pamilya nga maandam sa pagkat-on gikan sa Bag-ong Tugon niining tuiga, mahimo nimong basahon ang sambingay sa magpupugas. Tingali ang imong pamilya malingaw diha sa gawas ug sa pagpangita alang sa lain-laing mga matang sa yuta nga gihulagway diha sa sambingay. Unsaon nato sa paghimo sa atong mga kasingkasing nga masama sa “maayong yuta” nga gihulagway ni Jesus? (Mateo 13:8).

Mga Taga-Galacia 5:22–23; Mga Taga-Filipos 4:8.Si Presidente Russell M. Nelson nagdapit kanimo nga “mousab sa [imong] panimalay ngadto sa usa ka santuwaryo sa hugot nga pagtuo” ug sa “pagbag-o sa imong panimalay ngadto sa usa ka sentro sa pagkat-on sa ebanghelyo.” Niadtong kinsa mobuhat niining mga butanga, misaad siya: “Inyong mga anak maghinam-hinam sa pagkat-on ug pagsunod sa mga panudlo sa Manluluwas, ug ang impluwensya sa kaaway sa inyong kinabuhi ug sa inyong panimalay makuhaan. Ang mga kausaban sa inyong pamilya dako ug magpadayon” (“Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 113).

Ang sinugdanan sa bag-ong tuig mao ang maayong panahon sa paghimo og family council mahitungod sa paghimo sa imong panimalay nga “usa ka santuwaryo sa hugot nga pagtuo” ug “usa ka sentro sa pagkat-on sa ebanghelyo.” Unsa nga mga ideya mahitungod kon unsaon ang pagbuhat niini moabot sa hunahuna samtang kita nagbasa sa Mga Taga-Galacia 5:22–23 ug Mga Taga-Filipos 4:8? Tingali ang imong pamilya makahimo og personal ug pamilya nga mga tumong sa pagtuon sa Bag-ong Tugon niini nga tuig. Unsa ang atong mabuhat sa pagpahinumdom sa atong mga kaugalingon sa atong mga tumong?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Tudloi Ko Paglakaw sa Kahayag,” Songbook sa mga Bata,, 70.

Pagpalambo sa Personal nga Pagtuon

Pangitaa ang doktrina. Ang doktrina usa ka mahangturon, dili mausab nga kamatuoran. Si Presidente Boyd K. Packer mipadayag nga ang “tinuod nga doktrina, nga masabtan, makapausab sa mga kinaiya ug batasan” (Little Children,” Ensign,, Nob. 1986, 17). Samtang ikaw ug ang imong pamilya magtuon sa mga kasulatan, pangita sa mga kamatuoran nga makatabang kanimo sa pagpuyo sama sa Manluluwas.

Light of the World [Kahayag sa Kalibotan], ni Brent Borup