Maria ug Elisabet

Enero 2–8

Mateo 1; Lucas 1

“Matuman Unta Kanako kanang Imong Giingon”

Samtang ikaw magbasa ug mamalandong sa Mateo 1 ug sa Lucas 1, i-rekord ang espirituhanong mga panghunahuna nga imong madawat. Unsa nga doktrinal nga mga kamatuoran ang imong nakaplagan? Unsa nga mga mensahe ang mahimong labing bililhon nganha kanimo ug sa imong pamilya? Ang mga ideya sa pagtuon niini nga latid mahimong makatabang kanimo sa pagdiskobre og dugang nga mga panabot.

I-rekord ang Imong mga Panghunahuna

Gikan sa mortal nga panglantaw, kini imposible. Ang usa ka birhen dili makapanamkon––ni ang usa ka apuli [barren] kinsa lapas na kaayo sa mga tuig sa pagmabdos. Apan ang Dios adunay plano alang sa pagkatawo sa Iyang Anak ug sa pagkatawo ni Juan nga Bautista, mao nga sila si Maria ug Elisabet, supak man sa tanang yutan-ong mga kahigayonan, nahimong mga inahan. Makatabang kini ang paghinumdom sa ilang milagroso nga mga kasinatian sa higayon nga kita mag-atubang og usa ka butang nga ingon og imposible. Makabuntog ba kita sa atong mga kahuyang? Makatandog ba kita sa kasingkasing sa dili mauyunon nga sakop sa pamilya? Si Gabriel dali ra unta kaayong makasulti ngari kanato sa dihang gipahinumdoman niya si Maria, “Kay sa Dios walay butang nga dili mahimo” (Lucas 1:37). Ug ang tubag ni Maria tingali mao usab ang atong tubag kon ang Dios mopadayag sa Iyang kabubut-on: “Matuman unta kanako kanang imong giingon” (Lucas 1:38).

icon sa personal nga pagtuon

Mga Ideya alang sa Personal nga Pagtuon sa Kasulatan

Kinsa si Mateo ug si Lucas?

Si Mateo usa ka Judeo nga publikano o maniningil og buhis, kinsa gitawag ni Jesus isip usa sa Iyang Apostoles (tan-awa sa Mateo 10:3; tan-awa usab sa Giya ngadto sa mga Kasulatan, “Publikano”). Gisulat ni Mateo ang iyang Ebanghelyo una sa tanan ngadto sa iyang isigka-Judeo; busa, mipili siya sa paghatag og gibug-aton sa mga panagna sa Daang Tugon mahitungod sa Mesiyas nga nangatuman pinaagi sa kinabuhi ug pangalagad ni Jesus.

Si Lucas usa ka Hentil (dili Judeo) nga doktor kinsa mibiyahe uban ni Apostol Pablo. Gisulat niya ang iyang Ebanghelyo human sa kamatayon sa Manluluwas una sa tanan ngadto sa mga dili Judeo nga magbabasa. Mipamatuod siya ni Jesukristo isip ang Manluluwas sa mga Hentil ug sa mga Judeo. Mirekord siya og personal nga nasaksihan nga mga asoy sa mga panghitabo sa kinabuhi sa Manluluwas, ug giapil niya ang daghan pang mga istorya nga naglakip og mga babaye kon itandi sa ubang mga Ebanghelyo.

Tan-awa usab sa Giya ngadto sa mga Kasulatan, “Ebanghelyo, Mga,” “Mateo,” “Lucas.”

Mateo 1:18–25; Lucas 1:26–35

Natawo si Jesukristo sa usa ka mortal nga inahan ug sa usa ka imortal nga Amahan.

Sa Mateo 1:18–25 ug Lucas 1:26–35, tan-awa kon giunsa ni Mateo ug ni Lucas paghulagway ang milagro sa pagkatawo ni Jesus. Sa unsa nga paagi nga ang ilang mga paghulagway naglig-on sa imong hugot nga pagtuo diha sa Manluluwas? Nganong importante kini nganha kanimo nga mahibalo nga si Jesus Anak sa Dios ug anak ni Maria?

Si Presidente Russell M. Nelson mipasabot nga ang Pag-ula ni Jesukristo “nagkinahanglan og usa ka personal nga sakripisyo sa usa ka imortal nga binuhat nga dili ubos sa kamatayon. Apan Siya kinahanglan gayod nga mamatay ug buhion ang Iyang kaugalingong lawas pag-usab. Ang Manluluwas mao lamang ang bugtong tawo nga makatuman niini. Gikan sa Iyang inahan napanunod Niya ang gahom nga mamatay. Gikan sa Iyang Amahan naangkon Niya ang gahom ibabaw sa kamatayon” (“Constancy amid Change,” Ensign, Nob. 1993, 34).

Lucas 1:5–25, 57–80

Ang mga panalangin sa Dios moabot sa Iyang kaugalingong panahon.

Kon makita nimo ang imong kaugalingon nga naghulat og panalangin, o kon kini ingon og ang Dios wala maminaw sa imong mga pag-ampo, ang istorya ni Elisabet ug Zacarias mahimong usa ka pahinumdom nga wala Siya makalimot kanimo. Ingon nga si Elder Jeffrey R. Holland misaad: Samtang nagtrabaho kita ug nagpaabot sa mga tubag sa pipila sa atong mga pag-ampo, akong ihalad kaninyo ang akong apostolikanhong saad nga kini gidungog ug gitubag, hinoon tingali dili sa panahon o sa paagi nga atong gusto. Apan kanunay kini nga gitubag sa panahon ug sa paagi nga kini tubagon sa usa nga nasayod sa tanan ug walay paglurang nga maloloy-ong ginikanan” (“Naghulat sa Ginoo,” Liahona, Nob. 2020, 115–16). Giunsa ni Zacarias ug Elisabet pagpabiling matinud-anon? (tan-awa sa Lucas 1:5–25, 57–80). Nakaplagan ba nimo ang imong kaugalingon nga naghulat alang sa usa ka panalangin? Unsay imong gihunahuna nga gipaabot sa Ginoo kanimo samtang ikaw naghulat?

Elisabet ug Zacarias uban sa batang masuso nga si Juan

Human sa matinud-anong paghulat, sila si Elisabet ug Zacarias gipanalanginan og usa ka anak nga lalaki.

Mateo 1:18–25; Lucas 1:26–38

Ang matinud-anon andam nga mosunod sa kabubut-on sa Dios.

Sama ni Maria, usahay atong makita nga ang mga plano sa Dios alang sa atong kinabuhi lahi kaayo sa unsay atong giplano. Unsay imong nakat-onan gikan ni Maria bahin sa pagdawat sa kabubut-on sa Dios? Sa mosunod nga mga tsart, isulat ang mga pamahayag gikan sa anghel ug ni Maria (tan-awa sa Lucas 1:26–38), uban sa mga mensahe nga imong makita sa ilang mga pamahayag:

Ang mga pulong sa anghel ngadto ni Maria	Mensahe alang kanako
Ang mga pulong sa anghel ngadto ni Maria “Ang Ginoo anaa uban kanimo” (bersikulo 28).	Mensahe alang kanako Ang Ginoo nakahibalo sa akong sitwasyon ug mga pakigbisog.
Ang mga pulong sa anghel ngadto ni Maria	Mensahe alang kanako
Ang mga pulong sa anghel ngadto ni Maria	Mensahe alang kanako

Mga reaksyon ni Maria	Mensahe alang kanako
Mga reaksyon ni Maria “Unsaon ba pagkahimo niini?” (bersikulo 34).	Mensahe alang kanako OK kini ang pagpangutana aron mas masabtan ang kabubut-on sa Dios.
Mga reaksyon ni Maria	Mensahe alang kanako
Mga reaksyon ni Maria	Mensahe alang kanako

Samtang ikaw magbasa sa matarong nga ehemplo ni Jose diha sa Mateo 1:18–25, unsay imong nakat-onan mahitungod sa pagdawat sa kabubut-on sa Dios? Unsay dugang nga mga panabot ang imong nakat-onan gikan sa mga kasinatian ni Zacarias ug Elisabet? (tan-awa sa Lucas 1).

Tan-awa usab sa Lucas 22:42; Giya ngadto sa mga Kasulatan, “Gabriel.”

Lucas 1:46–55

Gipamatuod ni Maria ang misyon ni Jesukristo.

Ang mga pulong ni Maria sa Lucas 1:46–55 nagtagna sa mga bahin sa misyon sa Manluluwas. Unsay imong nakat-onan mahitungod ni Jesukristo gikan sa mga pamahayag ni Maria? Mahimo nimong itandi kini nga mga bersikulo ngadto sa mga pulong ni Ana sa 1 Samuel 2:1–10 ug sa mga Kabulahanan ni Jesus sa Mateo 5:3–12. Unsa ang gitudlo sa Espiritu kanimo samtang ikaw mamalandong niini nga mga bersikulo?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mateo 1:1–17.Samtang ang imong pamilya nagbasa sa kagikanan ni Jesus, mahimo nimong hisgotan ang kasaysayan sa imong kaugalingon nga pamilya ug makigbahin og pipila ka mga istorya mahitungod sa imong mga katigulangan. Sa unsa nga paagi nga ang pagkahibalo mahitungod sa imong family history nagpanalangin sa imong pamilya? Alang sa dugang pa nga mga kalihokan sa family history, tan-awa sa FamilySearch.org/discovery.

Mateo 1:20; Lucas 1:11–13, 30.Ngano kaha ang mga tawo niini nga mga bersikulo nagmahinadlukon? Unsa ang hinungdan nga mobati kita og kahadlok? Sa unsa nga paagi ang Dios nagdapit kanato og “ayaw kalisang”?

Lucas 1:37.Sa pagtabangan sa imong pamilya sa paglig-on sa hugot nga pagtuo nga “sa Dios walay butang nga dili mahimo,” kamo makasiksik sa Lucas 1 nga mag-uban ug mangita sa mga butang nga gibuhat sa Dios nga mahunahuna nga imposible. Unsa ang ubang mga istorya nga atong ikapakigbahin—gikan sa mga kasulatan o sa atong kaugalingong mga kinabuhi—diin ang Dios mibuhat ingon og imposible nga mga butang? Ang pagsiksik pinaagi sa Libro sa mga Hulagway sa Ebanghelyo makahatag og mga ideya.

Lucas 1:46–55.Unsa ang pipila ka “dagko nga mga butang” ang nahimo sa Manluluwas alang kanato? Unsa ang mahimong kahulogan niini alang sa atong mga kalag nga “nagadayeg sa Ginoo”?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Mipadala sa Bugtong Anak” Songbook sa mga Bata, 34–35.

Pagpalambo sa Atong Pagtudlo

Gamita ang mga kasulatan nganha sa imong kinabuhi. Human mobasa og tudling sa kasulatan, dapita ang mga sakop sa pamilya sa paggamit niini nganha sa ilang mga kinabuhi (tan-awa sa Pagtudlo sumala sa Pamaagi sa Manluluwas, 21). Sama pananglit, Unsaon sa mga sakop sa pamilya sa paggamit kon unsay ilang nakat-onan gikan sa Mateo 1 ug sa Lucas 1 mahitungod sa pagtubag ngadto sa tawag sa Ginoo?

Gabriel nagpakita ngadto ni Maria

Blessed Art Thou Among Women [Bulahan ka sa Babayeng Tanan], ni Walter Rane