Enero 16–22

Juan 1

Gikahibalag Namo ang Mesiyas

Samtang ikaw nagbasa ug namalandong sa Juan 1, i-rekord ang mga panghunahuna nga imong madawat. Unsa nga mga mensahe ang imong nakita nga mahimong labing bililhon kanimo ug sa imong pamilya? Unsa ang imong ipakigbahin sa imong mga klase sa Simbahan?

I-rekord ang Imong mga Panghunahuna

Nakahunahuna ka ba kon makaila ka ni Jesus sa Nazaret isip ang Anak sa Dios kon ikaw buhi sa panahon sa Iyang mortal nga pangalagad? Sulod sa katuigan, ang matinud-anong mga Israelite, lakip ni Andres, Pedro, Felipe, ug Natanael, naghulat ug nag-ampo alang sa pag-anhi sa gisaad nga Mesiyas. Sa dihang gikahibalag nila Siya, giunsa nila sa pagkahibalo nga Siya mao ang Usa nga ilang gipangita? Sa samang paagi kitang tanan makaila sa Manluluwas—pinaagi sa pagdawat sa pagdapit sa “umari kamo ug makita ninyo” alang sa atong mga kaugalingon (Juan 1:39). Mabasa nato ang mahitungod Kaniya diha sa mga kasulatan. Madunggan nato ang Iyang doktrina. Ma-obserbahan nato ang Iyang paagi sa pagpuyo. Mabati nato ang Iyang Espiritu. Samtang magpadayon, madiskobrehan nato, sama ni Natanael, nga ang Manluluwas nakaila kanato ug nahigugma kanato ug gusto kanato nga maandam sa pagdawat og “labi pa ka dagkong mga butang” (Juan 1:50).

Mga Ideya alang sa Personal nga Pagtuon sa Kasulatan

Kinsa si Juan?

Si Juan mao ang usa sa tinun-an ni Juan nga Bautista ug sa kadugayan nahimong usa sa mga sumusunod ni Jesukristo ug usa sa Iyang Napulog Duha ka Apostoles. Siya misulat sa Ebanghelyo ni Juan, pipila ka epistola, ug sa basahon sa Pinadayag. Sa iyang Ebanghelyo, iyang gipasabot ang iyang kaugalingon isip ang tinun-an “nga hinigugma ni Jesus” ug ang “usang tinun-an” (Juan 13:23; 20:3). Ang kadasig ni Juan sa pagsangyaw sa ebanghelyo hilabihan ka lig-on nga mihangyo siya nga magpabilin sa yuta hangtod sa Ikaduhang Pag-anhi sa Manluluwas aron makadala siya og mga kalag ngadto ni Kristo (tan-awa sa Doktrina ug mga Pakigsaad 7:1–6).

Tan-awa usab sa Giya ngadto sa mga Kasulatan, “Juan, Anak nga Lalaki ni Zebedeo,” “Juan, Ebanghelyo ni.”

Juan 1:1–5

Si Jesukristo “sa sinugdan uban sa Dios.”

Gisugdan ni Juan ang iyang Ebanghelyo pinaagi sa paghulagway sa buhat nga gipahigayon ni Kristo sa wala pa Siya matawo: “Sa sinugdan … ang Pulong [Jesukristo] uban sa Dios.” Unsa ang imong nakat-onan gikan sa mga bersikulo 1–5 mahitungod sa Manluluwas ug sa Iyang buhat? Makakita ka og makatabang nga pagpatin-aw sa Hubad ni Joseph Smith, Juan 1:1–5 (diha sa Giya ngadto sa mga Kasulatan). Sa imong pagsugod sa imong pagtuon sa kinabuhi sa Manluluwas, ngano nga importante nga makahibalo mahitungod sa Iyang buhat kaniadto sa kinabuhi nga wala pa dinhi sa kalibotan?

Juan 1:1–18

Si Jesukristo mao ang “tinuod nga Kahayag,” ang Anak sa Dios.

Nadasig si Juan sa pagtinguha sa Manluluwas tungod sa pagpamatuod ni Juan nga Bautista, nga mipahayag nga siya “mianhi aron sa pagpanghimatuod mahitungod … sa Kahayag” (Juan 1:8–9). Si Juan mismo mipamatuod usab og gamhanan nga saksi sa kinabuhi ug misyon sa Manluluwas.

Makapaikag tingali ang paghimo og lista sa mga kamatuoran nga gilakip ni Juan sa iyang pangbukas nga pagpamatuod ni Kristo (mga bersikulo 1–18; tan-awa usab sa Hubad ni Joseph Smith, Juan 1:1–19 [diha sa Giya ngadto sa mga Kasulatan]). Ngano kaha sa imong hunahuna nga gisugdan ni Juan ang iyang Ebanghelyo uban niini nga mga kamatuoran? Hunahunaa ang pagsulat sa imong pagsaksi ni Jesukristo—unsa ang gusto nimong ipakigbahin? Unsa nga mga kasinatian ang mitabang kanimo sa pag-ila ug pagsunod sa Manluluwas? Kinsa kaha ang mapanalanginan pinaagi sa pagpaminaw sa imong pagpamatuod?

Juan 1:11–13

Si Jesukristo naghatag kanato og “kagahom sa pagkahimong” mga anak sa Dios.

Bisan og kitang tanan espiritu nga mga anak sa Dios nga Amahan, kon kita makasala kita mahilayo, o mabulag gikan Kaniya. Si Jesukristo nagtanyag kanato og paagi sa pagbalik pinaagi sa Iyang maulaong sakripisyo. Pamalandonga kon unsa ang gitudlo sa Juan 1:11–13 mahitungod sa pagkamahimong mga anak sa Dios. Hunahunaa usab unsa ang gitudlo niini nga mga kasulatan mahitungod kon unsaon nato sa pagdawat niini nga gasa: Mga Taga-Roma 8:14–18; Mosiah 5:7–9; Doktrina ug mga Pakigsaad 25:1. Unsa ang kahulogan niini nganha kanimo sa pagbaton og “gahom nga mahimong “ usa ka anak sa Dios?

Juan 1:18

Ang Amahan nagpamatuod sa Iyang Anak.

Ang Juan 1:18 nagpahayag nga walay usa nga nakakita sa Dios. Hinoon, ang Hubad ni Joseph Smith niini nga bersikulo nagpatin-aw nga “wala pa gayuy tawo nga nakakita sa Dios sa bisan unsa nga higayon, gawas kon siya nakapamatuod sa Anak” (tan-awa sa Juan 1:18). Hunahunaa ang pagrebyo sa mosunod nga mga panig-ingnan diin ang Dios nga Amahan nadungog nga nagpamatuod sa Anak: Mateo 3:17; 17:5; 3 Nephi 11:6–7; Joseph Smith––Kasaysayan 1:17.

Nganong usa kini ka panalangin nga aduna niini nga mga asoy? Unsa ang gitudlo niini kanimo mahitungod sa relasyon ni Jesukristo ngadto sa Iyang Amahan?

Mga Ideya alang sa Pamilya nga Pagtuon sa Kasulatan ug Home Evening

Samtang magtuon kita sa mga kasulatan, makadawat kita og inspirasyon alang sa atong mga kinabuhi.

Juan 1:4–10.Unsaon nimo sa pagtabang ang imong pamilya sa paghanduraw sa unsay ilang nabasa mahitungod sa kahayag niini nga mga bersikulo? Mahimo nimong papuli-pulihon ang mga sakop sa pamilya sa pagpasiga og suga sa ngitngit nga kwarto ug mopakigbahin kon sa unsa nga paagi ang Manluluwas mao ang Kahayag sa ilang mga kinabuhi. Dayon, samtang ikaw nagbasa sa Juan 1:4–10, tingali ang mga sakop sa pamilya adunay dugang nga panabot ngadto sa pagpamatuod ni Juan kabahin ni Jesukristo, ang Kahayag sa Kalibotan.

Juan 1:35–36.Ngano kaha si Juan nga Bautista mitawag ni Jesus “ang Kordero sa Dios”? Unsa ang atong makat-onan mahitungod niini nga ulohan gikan sa mensahe ni Elder Jeffrey R. Holland “Tan-awa ang Kordero sa Dios” o kang Elder Gerrit W. Gong nga mensahe “Maayong Magbalantay, Kordero sa Dios”? (Liahona, Mayo 2019, 44–46, 97–101)

Juan 1:35–46.Unsa ang mga resulta sa pagpamatuod ni Juan? Unsa ang nakat-onan sa imong pamilya gikan sa mga tawo nga gihulagway niini nga mga bersikulo mahitungod kon unsaon sa pagpakigbahin sa ebanghelyo?

Juan 1:45–51.Unsay gibuhat ni Natanael nga mitabang kaniya nga makaangkon og pagpamatuod sa Manluluwas? Dapita ang mga sakop sa pamilya sa pagsulti mahitungod kon giunsa nila pag-angkon ang ilang mga pagpamatuod.

Alang sa dugang nga mga ideya sa pagtudlo sa mga bata, tan-awa ang latid karon nga semana sa Dali, Sunod Kanako—Alang sa Primary.

Gisugyot nga Himno: “Ang Dios Kahayag Ko,” Mga Himno, nu. 46.

Pagpalambo sa Atong Pagtudlo

Ipaambit ang mga leksiyon nga naggamit og mga butang. Dapita ang mga sakop sa pamilya sa pagpangita og mga butang nga ilang magamit sa pagtabang kanila nga makasabot sa mga baroganan nga makaplagan diha sa mga kasulatan nga inyong gibasa isip usa ka pamilya. Sama pananglit, mahimo silang mogamit og kandila nga nagrepresentar sa Kahayag ni Kristo (tan-awa sa Juan 1:4).

Jehovah Creates the Earth [Si Jehova Naglalang sa Yuta], ni Walter Rane