Enero 16–22

Juan 1

Nakita Namo ang Mesiyas

Samtang imong basahon ang Juan 1, irekord ang espirituwal nga mga impresyon nga imong madawat. Ang latid niini nga semana sa Dali, Sunod Kanako—Alang sa mga Indibidwal ug mga Pamilya makatabang kanimo sa pagtuon niini nga kapitulo. Ang mosunod nga gisugyot nga mga kalihokan makahatag kanimo og mga ideya kon unsaon sa pagtabang sa mga bata nga makakat-on sa mga baroganan diha sa Juan 1. Ang mga kalihokan alang sa mas dagko nga mga bata mahimong mapahiangay, kon gusto, alang sa mas gagmayng mga bata.

Dapita ang Pagpaambit

Aron matabangan ang mga bata sa pagpaambit sa unsay ilang nahibaloan mahitungod ni Jesus, pagpakita og mga hulagway Niya nga nagbuhat sa pipila sa Iyang mga tahas nga gihulagway diha sa Juan 1 (sama sa paglalang sa kalibotan o pagtudlo sa ebanghelyo). Hangyoa ang mga bata sa paghulagway kon unsay nahitabo diha sa mga litrato.

Itudlo ang Doktrina: Mas Gagmay nga mga Bata

Juan 1:1–2

Si Jesus nagpuyo uban sa Langitnong Amahan sa wala pa Siya matawo.

Si Juan mitudlo nga si Jesukristo nagpuyo uban sa Dios nga Amahan sa wala pa ang Iyang mortal nga kinabuhi. Kita usab nagpuyo uban sa Dios sa wala pa kita matawo (tan-awa sa “Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Unsaon nimo sa pagtudlo sa mga bata niini nga kamatuoran?

Posible nga mga Kalihokan

• Ipasabot nga “ang Pulong” diha sa Juan 1:1 nagpasabot kang Jesus. Basaha og kusog ang bersikulo, ug hangyoa ang mga bata sa pagsulti og “Jesus” sa matag higayon nga mobasa ka sa “ang Pulong.” Ipakita ang paghulagway nga giulohan og “Kinabuhi [sa] Wala pa Dinhi sa Yuta” (ChurchofJesusChrist.org; tan-awa usab sa Tan-awa Ang Inyong Gagmay nga mga Bata [2008], 15). Ipasabot nga si Jesukristo nagpuyo uban sa Langitnong Amahan sa wala pa Siya mianhi sa yuta.

• Pagkuha gikan sa mga kapanguhaan sama niini aron sa pagtudlo sa mga bata mahitungod sa atong kinabuhi uban sa Dios sa wala pa kita mianhi sa yuta: “Pasiuna: Ang Plano sa Atong Langitnong Amahan” (sa Mga Istorya sa Bag-ong Tugon, 1–5,) o “Kinabuhi [sa] Wala pa Dinhi sa Yuta” sa Giya ngadto sa mga Kasulatan (scriptures.ChurchofJesusChrist.org).

• Dapita ang usa ka ginikanan nga magdala og masuso sa klase. Pangutan-a ang mga bata kon diin nagpuyo ang espiritu niini nga masuso sa wala pa siya matawo. Pahinumdomi ang mga bata nga sila mga masuso kaniadto, ug pagpamatuod nga sila usab nagpuyo uban sa Langitnong Amahan isip espiritu nga mga anak sa wala pa sila matawo.

Juan 1:3

Si Jesus milalang sa tanan nga mga butang.

Ang pagkahibalo mahitungod sa tahas ni Jesukristo isip Tiglalang makatabang sa mga bata nga imong gitudloan nga mapalambo ang ilang balaang pagtahod alang Kaniya.

Posible nga mga Kalihokan

• Basaha ang Juan 1:3 uban sa mga bata, ug ipakita ang hulagway gikan sa latid niini nga semana diha sa Dali, Sunod Kanako—Alang sa mga Indibidwal ug mga Pamilya. Tabangi ang mga bata nga makasag-ulo sa pulongan nga “pinaagi [kang Jesukristo] gibuhat sa Dios ang tanan.”

• Pakit-a ang usa sa mga bata og litrato sa usa sa mga binuhat sa Ginoo. Ipahulagway kini kaniya ngadto sa ubang mga bata, ug hangyoa sila sa pagtagna kon unsa ang gihulagway.

• Hangyoa ang matag bata sa pagngalan og usa ka butang nga gilalang ni Jesukristo. Tabangi ang mga bata sa paghunahuna og mga paagi nga sila makaatiman sa yuta ug sa ubang mga binuhat sa Ginoo.

Si Jesukristo milalang sa kalibotan ug sa tanan nga anaa niini.

Juan 1:35–51

Makadapit ako sa uban sa pagduol kang Jesukristo ug pagkat-on mahitungod Kaniya.

Ang Juan 1 naglangkob og mga istorya sa mga disipulo kinsa midapit sa mga tawo nga “dali diri ug tan-awa” nga si Jesus mao ang Anak sa Dios. Bisan ang gagmayng mga bata makasunod niini nga ehemplo.

Posible nga mga Kalihokan

• Ihulagway kon sa unsang paagi si Andres nakakat-on mahitungod ni Jesus, ug isulti kon sa unsang paagi si Andres mitudlo usab dayon ni Pedro (tan-awa sa Juan 1:35–42). Ipaambit kon sa unsang paagi nga nakakat-on ka mahitungod sa Simbahan, o dapita ang usa ka bag-ong miyembro sa pagpaambit kon sa unsang paagi siya nakakat-on mahitungod sa Simbahan.

• Ipaambit ang istorya ni Felipe nga nagdapit ni Natanael nga “dali diri ug tan-awa” (Juan 1:43–51). Tagoi ang usa ka hulagway ni Jesus sulod sa kahon, ug dapita ang usa ka bata nga “dali diri ug tan-awa” kini ug dayon mosulti sa ubang mga bata kon unsa ang iyang nakita.

• Pakolori sa mga bata ang pahina sa kalihokan karong semanaha, ug awhaga sila sa paggamit niini aron modapit og tawo sa pagkat-on mahitungod ni Jesus.

• Hangyoa ang usa ka bata sa pagsulti bahin sa usa ka higayon dihang mipaambit siya og usa ka butang, sama sa usa ka dulaan o gasa, ngadto sa usa ka tawo. Sa unsang paagi kita makapaambit sa ebanghelyo? Isaysay ang istorya sa usa ka bata kinsa mipaambit sa ebanghelyo ngadto sa usa ka higala, sama sa “Usa ka Higala ug Misyonaryo,” Liahona, Hulyo 2018, 70–71.

Itudlo ang Doktrina: Mas Magulang nga mga Bata

Juan 1:1–5

Si Jesukristo nagpuyo uban sa Langitnong Amahan sa wala pa Siya matawo.

Bisan sa wala pa Siya matawo, si Jesukristo adunay importanting mga tahas sa plano sa Langitnong Amahan. Samtang imong basahon ang Juan 1:1–5, unsa ang nakadani nimo mahitungod sa buhat ni Kristo sa wala pa dinhi sa yuta?

Posible nga mga Kalihokan

• Pangutan-a ang mga bata kon duna ba silay bisan unsa nga nahibaloan mahitungod sa unsay gibuhat ni Jesus sa wala pa Siya matawo. Dapita sila sa pagpangita og mga tubag diha sa Juan 1:1–5. Tingali makatabang ang pagtan-aw diha sa Hubad ni Joseph Smith, Juan 1:1–5 (sa Giya ngadto sa mga Kasulatan).

• Ipaambit ang mga bahin sa “Pasiuna: Ang Plano sa Atong Langitnong Amahan” (sa Mga Istorya sa Bag-ong Tugon, 1–5). Pangutan-a ang mga bata kon unsay ilang nakat-onan mahitungod ni Jesukristo.

• Pipila ka adlaw sa dili pa ang klase, dapita ang pipila ka bata sa pagtungha sa klase nga andam nga mopakita o mohulagway og usa ka butang nga ilang gihimo. Ipakita ang mga litrato sa pipila sa mga binuhat sa Ginoo, ug gamita ang Juan 1:3 sa pagpasabot nga si Jesus milalang sa yuta ug sa tanan nga anaa niini.

Juan 1:4–9

Si Jesukristo mao ang akong kahayag.

Ang simbolismo sa kahayag makatabang sa mga bata sa pagsabot sa Manluluwas ug sa Iyang ebanghelyo. Sa unsang paagi nga makadasig ka sa mga bata sa pagtinguha sa kahayag sa Manluluwas kon ang kalibotan daw ngitngit?

Posible nga mga Kalihokan

• Dapita ang mga bata sa pagbasa sa Salmo 27:1; Juan 1:4–9; Mosiah 16:9; ug Doktrina ug mga Pakigsaad 39:1–2, nga mangita sa mga pulongan nga komon niini nga mga kasulatan. Sa unsang paagi si Jesukristo sama sa usa ka kahayag?

• Ipakita ang hulagway sa Manluluwas ug ang pipila ka butang nga mohatag og kahayag, sama sa flashlight. Sa unsang paagi si Jesukristo sama niini nga mga butang? Sa unsang paagi nato mapaambit ang Iyang kahayag ngadto sa uban? Kantaha og dungan ang “Ang Dios Kahayag Ko” (Mga Himno, nu. 89) o laing awit mahitungod sa kahayag sa ebanghelyo.

• Pangutan-a ang mga bata kon unsa ang ilang buhaton kon anaa sila sa kangitngit ug mobati og kahadlok. Pagpamatuod nga kanunay silang makadangop sa Manluluwas kon sila nahadlok.

Juan 1:35–51

Isip usa ka sumusunod ni Jesukristo, makadapit ako sa uban sa pagsunod Kaniya.

Hunahunaa kon unsaon nimo sa paggamit ang mga ehemplo diha sa Juan 1:35–51 aron sa pag-awhag sa mga bata sa pagdapit sa uban nga magkat-on mahitungod sa Manluluwas.

Posible nga mga Kalihokan

• Tabangi ang mga bata sa pagsiksik sa Juan 1:35–51 aron makakita og mga butang nga gisulti sa mga tawo aron sa pagdapit sa uban nga magkat-on mahitungod sa Manluluwas. Ipabansay nila kon unsay ilang isulti aron sa pagdapit og usa ka higala nga magkat-on mahitungod Kaniya.

• Hangyoa ang mga bata sa paggamit sa pahina sa kalihokan niini nga semana aron sa paghimo og imbitasyon nga ilang magamit sa pagdapit og higala o sakop sa pamilya nga magkat-on og dugang mahitungod ni Jesukristo.

• Hatagi ang mga bata og oportunidad sa pagsulti sa klase mahitungod sa usa ka butang nga ilang gimahal. Tabangi ang mga bata nga makakita kon sa unsang paagi nga ang pagpaambit sa ebanghelyo mahimong sama sa pagpaambit sa ubang mga butang nga atong gimahal.

Awhaga ang Pagkat-on diha sa Panimalay

Awhaga ang mga bata sa pagdapit og usa ka tawo nga ilang gimahal nga magkat-on og dugang mahitungod ni Jesukristo.

Pagpalambo sa Atong Pagtudlo

Paggamit og mga biswal nga tabang [visual aids]. Pangita og mga paagi nga matabangan ang mga bata nga mahulagway [visualize] ang unsay ilang nakat-onan sa mga kasulatan. Mahimo nimo kini gamit ang art sa ebanghelyo, mga drowing, mga bidyo, mga puppet, o mga mugbong pasundayag.