Let Us Adore Him [Dali Simbahon Nato Siya], ni Dana Mario Wood

Enero 9–15

Mateo 2; Lucas 2

Mianhi Kami aron Pagsimba Kaniya

Ang mga bata nga imong gitudloan bililhon nga mga anak nga lalaki ug mga anak nga babaye sa Langitnong Amahan. Hangyoa Siya sa pagtabang kanimo samtang maningkamot ka sa pagtudlo kanila gikan sa mga kasulatan. Siya makagiya kanimo ngadto sa mga baroganan nga kinahanglan nimong hatagan og gibug-aton ug makadasig kanimo sa mga ideya sa kalihokan nga makatabang sa Iyang mga anak.

Dapita ang Pagpaambit

Hangyoa ang mga bata sa pagsulti kanimo kon unsay ilang nahibaloan mahitungod sa pagkatawo ni Kristo. Unsa ang ilang paborito nga mga parte sa istorya?

Itudlo ang Doktrina: Mas Gagmay nga mga Bata

Lucas 2:1–14

Si Jesus natawo.

Si Jesus mibiya sa Iyang panimalay uban sa Langitnong Amahan aron matawo dinhi sa yuta aron mahimo Siya natong Manluluwas. Unsaon nimo pagtabang ang mga bata nga makahinumdom sa istorya sa pagkatawo ni Kristo?

Posible nga mga Kalihokan

• Samtang imong basahon ang istorya sa pagkatawo ni Kristo, dapita ang mga bata sa pagdrama-drama sa istorya nga sila mismo, o gamita ang pahina sa kalihokan niining semanaha aron sa pagrebyo sa istorya. (Tan-awa usab sa “Kapitulo 5: Jesukristo Natawo,” sa Mga Istorya sa Bag-ong Tugon, 13–15.)

• Kon aduna ka, pagdala og Belen [Nativity set], ug dapita ang mga bata sa pagpahimutang sa mga piraso sa tukma nga mga dapit samtang imong isugilon kanila ang istorya sa pagkatawo ni Jesukristo. Mahimo usab kang magpakita og hulagway sa Pagkatawo ni Jesukristo [Nativity] (tan-awa, pananglit, ang latid niini nga semana sa Dali, Sunod Kanako—Alang sa mga Indibidwal ug mga Pamilya). Itudlo ang lainlaing tawo diha sa Pagkatawo ni Jesukristo, ug dapita ang mga bata sa pagpaambit sa unsay ilang nahibaloan mahitungod sa matag tawo.

• Kantaha og dungan ang paborito nga mga awit sa mga bata mahitungod sa pagkatawo ni Jesus. Samtang inyong buhaton, pangita og mga oportunidad sa pagpaambit sa imong pagpamatuod sa Manluluwas. Dapita ang mga bata sa pagpaambit kon nganong gihigugma nila si Jesus.

Mateo 2:1–12

Makahatag ako og maayo nga mga gasa ngadto ni Jesus.

Ang mga Mago mihatag kang Jesus og mga gasa nga bulawan, insenso, ug mira. Unsaon nimo paggamit niini nga istorya sa pagtudlo sa mga bata nga makahatag usab sila og mga gasa ngadto ni Jesus—mga gasa sama sa gugma, pagserbisyo, ug pagkamasulundon?

Posible nga mga Kalihokan

• Pagpakita og litrato sa mga Mago samtang imong rebyohon ang ilang istorya ngadto sa mga bata, nga makita diha sa Mateo 2:1–12.

• Pusta nga morag regalo ang mga hulagway o mga butang nga nagrepresentar sa mga gasa nga atong mahatag ngadto ni Jesus. Dapita ang mga bata nga tabangan ka sa pag-abli sa mga gasa, ug hisgoti kon sa unsang paagi kita mohatag niini nga mga gasa ngadto sa Manluluwas.

• Tabangi ang matag bata sa pagdrowing o pagsulat og lista sa mga gasa nga ilang mahatag ni Jesus, sama sa “pagkahimong buotan nga higala” o “pag-ampo.” Dapita ang mga bata sa pagpaambit sa ilang mga lista diha sa klase ug sa pagpili og usa ka “gasa” nga ilang ihatag kang Jesus karon.

Lucas 2:40–52

Si Jesus kaniadto usa ka bata sama kanako.

Ang pagkat-on mahitungod sa pagkabata sa Manluluwas makatabang sa mga bata nga imong gitudloan nga mobati og koneksiyon Kaniya. Pangutan-a ang mga bata kon unsay ilang makat-onan gikan niini nga mga bersikulo mahitungod kon sa unsang paagi nga sila mahimong sama ni Jesus karon.

Posible nga mga Kalihokan

• Dapita ang usa sa mga batan-on sa ward sa pagbisita sa imong klase ug sa pagpaambit sa istorya ni Jesus nga nagtudlo didto sa templo niadtong usa Siya ka batan-ong lalaki.

• Hangyoa daan ang pipila ka bata nga magdala og mga litrato sa ilang kaugalingon sa dihang mga masuso pa sila aron mapakita sa klase. Pangutan-a sila kon sa unsang paagi sila midako. Pagpaambit og pipila ka paagi nga si Jesus midako (tan-awa sa Lucas 2:40, 52). Kantaha uban sa mga bata ang “Sa Bata pa si Jesus” (Songbook sa mga Bata, 34) o laing awit mahitungod sa Manluluwas.

• Basaha ang Lucas 2:52, ug ipasabot kon unsa ang kahulogan sa “kinaadman” ug “lawas”. Mahimo nimong hangyoon ang mga bata sa paghimo og mga aksiyon nga nagpakita kon unsa ang gipasabot sa pagtubo diha sa kinaadman ug sa kahimuot sa Dios ug sa ubang tawo. Sama pananglit, mahimo nilang idrama-drama ang pagbasa og libro o pagtabang sa tawo nga nanginahanglan.

Itudlo ang Doktrina: Mas Magulang nga mga Bata

Lucas 2:1–21; Mateo 2:1–12

Ang karaan nga mga propeta nanagna sa pagkatawo sa Manluluwas.

Ang mga propeta ug mga tumutuo nagpaabot sa pagkatawo sa Manluluwas sulod sa daghang siglo. Ang pagsabot niini nga kamatuoran makatabang sa mga bata nga makaangkon og mas lawom nga pagsabot sa kinabuhi ug misyon sa Manluluwas.

Posible nga mga Kalihokan

• Hangyoa ang mga bata sa paghisgot mahitungod sa mga butang nga ilang gipaabot, sama sa birthday o holiday. Ipabasa sa mga bata ang Helaman 14:2–5 aron masayod og usa ka butang nga gipaabot sa mga propeta.

• Basaha og dungan ang pipila ka panagna sa pagkatawo sa Manluluwas (tan-awa sa Isaias 7:14; 9:6; 1 Nephi 11:18; Helaman 14:5). Tabangi ang mga bata sa paglista og mga detalye nga gilangkoban niini nga mga panagna ug sa pagpangita sa katumanan niini diha sa Lucas 2:1–21 ug Mateo 2:1–12.

• Dapita ang mga bata sa pagdrowing og hulagway sa usa ka butang gikan sa Mateo 2:1–12 o Lucas 2:1–21 ug sa pagpaambit kon nganong mapasalamaton sila nga natawo si Jesus.

Simeon Reverencing the Christ Child [Si Simeon Mihatag og Balaang Pagtahod sa Batang Kristo], ni Greg K. Olsen

Lucas 2:40, 52

Si Jesus mitubo “sa lawas ug sa kinaadman ug gikahimut-an siya sa Dios ug sa mga tawo.”

Sama ni Jesus, ang mga bata nga imong gitudloan adunay importante nga misyon nga pangandaman. Unsa ang ilang makat-onan gikan sa ehemplo ni Jesus?

Posible nga mga Kalihokan

• Samtang basahon nimo ang Lucas 2:40, 52, sultihi ang mga bata nga maminaw sa mga butang nga gibuhat ni Jesus. Dapita ang mga bata sa pagpaambit sa mga paagi nga sila midako sukad sa ilang pagkagamay. Ipaambit ang imong kaugalingong kasinatian sa pagkat-on sa ebanghelyo sa hinay-hinay. Ipakigbahin ang imong pagpamatuod kabahin sa Manluluwas.

• Kompletoha ang mga kalihokan nga naghulagway sa mga pulongan diha sa Lucas 2:40, 52. Sama pananglit, mahimo nimong sukdon ang gitas-on sa matag bata (“mitubo si Jesus sa lawas”) o hangyoa ang mga bata sa pagpaambit sa ilang paborito nga kasulatan (“nahimong kusgan”). Tabangi ang mga bata sa pagmatikod sa mga paagi nga sila nagdako ug sa pagpaambit niini sa ilang mga pamilya.

• Human marebyo ang Lucas 2:40, 52, dapita ang mga bata sa pagpaambit kon sama sa unsa kaha si Jesus sa dihang nag-edad Siya og sama kanila. Unsaon kaha Niya pagtratar ang Iyang inahan? Ang Iyang mga igsoon?

Lucas 2:41–52

Makasunod ako sa ehemplo ni Jesus.

Bisan batan-on pa, si Jesus nagtudlo sa ebanghelyo didto sa templo. Sa samang paagi, ang mga bata diha sa imong klase adunay daghang matudlo niadtong naglibot kanila.

Posible nga mga Kalihokan

• Dapita ang usa ka bata nga motungha nga andam sa pag-summarize sa istorya diha sa Lucas 2:41–52. Aron matabangan ang mga bata nga makasabot sa istorya, itudlo kon unsay gipasabot sa “[buluhaton] sa akong Amahan” (bersikulo 49). Sama pananglit, mahimo nimong sultihan ang mga bata kon unsay imong trabaho o unsay trabaho sa imong mga ginikanan. Unsa man ang trabaho o “buluhaton” ni Jose, ang yutan-on nga amahan ni Jesus? (tan-awa sa Mateo 13:55). Unsa man ang buluhaton sa Iyang Langitnong Amahan (tan-awa sa Lucas 2:46–49; tan-awa usab sa Moises 1:39).

• Uban sa mga bata, basaha ang Lucas 2:46–49, ug pangutana, “Giunsa man pagbuhat ni Jesus ang ‘[buluhaton] sa Iyang Amahan’?” Tabangi ang mga bata sa paglista o pagdrowing diha sa pisara sa mga paagi nga makatabang sila sa pagbuhat usab sa buluhaton sa Langitnong Amahan.

• Aron matabangan ang mga bata nga mapalig-on ang ilang kamasaligon nga sila, sama sa batang si Jesus, makatudlo sa ebanghelyo, tabangi sila nga magbansay sa pagtudlo sa usag usa og usa ka baroganan gikan sa Alang sa Kalig-on sa mga Kabatan-onan.

Awhaga ang Pagkat-on diha sa Panimalay

Dapita ang mga bata sa pagtudlo sa ilang pamilya og usa ka butang nga ilang nakat-onan mahitungod sa pagkatawo ni Jesukristo.

Pagpalambo sa Atong Pagtudlo

Ang mga bata kuryoso ug makakat-on sa daghang paagi. Ang mga bata malingaw sa pagkat-on pinaagi sa bag-o ug lainlain nga mga kasinatian. Gamita ang mga kalihokan nga makatabang nila nga molihok, mogamit sa tanan nilang mga balatian, mosuhid, ug mosulay og bag-ong mga butang. (Tan-awa sa Pagtudlo sumala sa Pamaagi sa Manluluwas, 25–26.)