“30 Jenuware–5 Febwari. Matiu 4; Luk 4–5: ‘Paoa blong Spirit blong Hem I kam Fulap long Mi,’” Kam Folem Mi—Blong Wanwan Man, Woman mo Famli: Niu Testeman 2023 (2022)

“30 Jenuware–5 Febwari. Matiu 4; Luk 4–5,” Kam Folem Mi—Blong Wanwan Man, Woman mo Famli: 2023

Pikja

Jisas i stanap long waelples

I Go long Waelples,, i kam long Eva Koleva Timothy

31 Jenuware–5 Febwari

Matiu 4; Luk 4–5

“Paoa blong Spirit blong Hem I kam Fulap long Mi”

Sevya i bin yusum ol skripja blong tugeta samting ia, blong stanap agensem ol temtesen blong Setan, mo blong testifae abaot tabu misin blong Hem (luk long Luk 4:1–21). Tingting hevi long wei we ol skripja oli save bildimap fet blong yu, mo blong yu mekem strong tingting blong stanap agensem temtesen.

Raetemdaon Ol Filing mo Tingting blong Yu

Taem Hem i yangfala i kam, i luk olsem se Jisas i savegud se Hem, Hem i gat wan misin we i no semmak long eni nara misin, mo misin blong Hem i tabu. Be taem we Jisas i stap rere blong statem seves blong Hem long wol ia, enemi i traem blong planem fasin blong gat tu tingting insaed long maen blong Sevya. “Sapos yu yu Pikinini blong God,” Setan i talem (Luk 4:3, oli ademap italik). Be Sevya i bin toktok finis wetem Papa blong Hem we i stap long Heven. Hem i bin save ol skripja, mo Hem i bin save huia Hem. Long Jisas, wanem we Setan i wantem givim:—“Bambae mi mi putum olgeta kantri ya, wetem olgeta gudgudfala samting blong olgeta, oli stap long han blong yu” (Luk 4:6)—i wan samting we i emti nomo, from se Sevya i bin stap rere ful laef blong Hem, mo hemia i letem Hem blong kasem “paoa blong Tabu Spirit” (Luk 4:14). So nomata long temtesen, ol tes, mo fasin blong sakemaot Hem, Jisas Kraes i neva kamaot long wok ia we oli jusum Hem blong mekem: “No, mi mas go long ol narafala vilej tu, mi mas talemaot gud nius ya long olgeta, se God i stap kam King blong olgeta man long wol, from we God i sanem mi blong mi mekem olsem” (Luk 4:43).

Pikja

stadi blong yuwan pikja aekon

Sam Aedia blong Skripja Stadi blong Yuwan

Matiu 4:1–2

Blong stap toktok wetem God i mekem mi mi rere blong givim seves long Hem.

Blong rere from misin blong Hem, Jisas i go long wan waelples “blong stap wetem God” (Josef Smit Translesen, Matiu 4:1 [insaed long Matiu 4:1, futnot b]). Tingting long wanem bae yu mekem blong yu filim se yu stap kolosap long God. ?Olsem wanem nao hemia i mekem yu yu rere from wok ia we Hem i wantem yu blong mekem?

Matiu 4:1–11; Luk 4:1–13

Jisas Kraes i putum wan eksampol blong mi, taem we Hem i stanap agensem temtesen.

Samtaem, ol pipol oli filim we oli rong mo sem taem we oli gat temtesen ia blong mekem sin. Be iven Sevya ia, we i laef “we i no gat sin” (Hibrus 4:15), i fesem temtesen. Jisas Kraes i save ol temtesen we yumi stap fesem mo Hem i save olsem wanem blong helpem yumi blong winim olgeta temtesen ia (luk long Hibrus 2:18; Alma 7:11–12).

Taem yu stap ridim Matiu 4:1–11 mo Luk 4:1–13, ?wanem nao yu lanem we i save helpem yu blong fesem ol temtesen? Yu save oganaesem ol tingting blong yu long wan tebol olsem hemia ia:

Jisas Kraes	Mi
Jisas Kraes ?Wanem nao Setan i temtem Kraes blong mekem?	Mi ?Wanem nao Setan i temtem mi blong mekem?
Jisas Kraes ?Olsem wanem Kraes i rere blong stanap agensem temtesen?	Mi ?Olsem wanem mi rere blong stanap agensem temtesen?
Jisas Kraes	Mi

?Wanem sam moa niu samting yu yu stap karem aot long Josef Smit Translesen blong Matiu 4? (luk long ol futnot i go kasem Matiu 4).

Luk tu long 1 Korin 10:13; Alma 13:28; Moses 1:10–22; Gospel Topics, “Temptation,” topics.ChurchofJesusChrist.org.

Luk 4:16–32

Jisas Kraes i Mesaea ia we God i promesem.

Sapos oli askem yu blong tokbaot wanem we God i sendem Jisas Kraes blong mekem long wol ia, ?bae yu talem wanem? Taem yu kwotem wan long ol profesi blong Aesea abaot Mesaea, Sevya i tokbaot ol defren pat blong misin blong Hem (luk long Luk 4:18–19; Aesea 61:1–2). ?Wanem nao yu lanem abaot misin blong Hem taem yu stap ridim ol ves ia?

?Wanem nao sam wei we Sevya i stap invaetem yu blong tekpat long wok ia blong Hem?

Pikja

Jisas i stap stanap long haos blong prea

Nomata se Ol Jiu oli bin stap wet blong plante handred yia blong profesi blong Aesea i hapen, plante oli no bin akseptem se Jisas nao i Mesaea taem we Hem i talemaot: “Tedei, long taem ya we yufala i stap lisin long ol tok ya blong Baebol, God i stap mekem ol samting we tok ya i talem, oli kamtru” (Luk 4:21). Taem yufala i stap ridim Luk 4:20–30 (luk tu long Mark 6:1–6), traem putum yuwan long ples blong ol pipol blong Nasaret. ?I gat eni samting we i save stopem yu blong akseptem fulwan Kraes ia olsem Sevya blong yu?

Luk tu long Mosaea 3:5–12; “Jesus Declares He Is the Messiah” (vidio), ChurchofJesusChrist.org.

Matiu 4:18–22; Luk 5:1–11

Taem mi stap gat tras long Lod, Hem i stap helpem mi blong kasem ful tabu paoa blong mi.

Presiden Esra Taft Benson i tijim, “Ol man mo ol woman we oli tanem olgeta i go long God, bambae oli faenemaot se Hem i save mekem plante moa samting wetem laef blong olgeta, bitim we olgetawan oli save mekem” (Teachings of Presidents of the Church: Ezra Taft Benson [2014], 42). Lukluk olsem wanem hemia i bin hapen long Saemon Pita mo ol nara fren blong hem blong stap pulum fis. Jisas i bin luk wan samting i moa hae insaed long olgeta, bitim we olgeta bakegen oli bin luk long olgetawan. Hem i bin wantem mekem olgeta oli kam ol “man blong pulum man” (Matiu 4:19; luk tu long Luk 5:10).

Taem yu stap ridim Matiu 4:18–22 mo Luk 5:1–11, tingting hevi long wanem Jisas Kraes i stap helpem yu blong kam. ?Long wanem wei nao yu bin filim se Hem i stap invaetem yu blong stap folem Hem? ?Olsem wanem nao yu soem long Lod se yu yu glad blong stap lego fogud evri samting, blong stap folem Hem? (luk long Luk 5:11).

Pikja

famli stadi pikja aekon

Ol Aedia blong Famli Skripja Stadi mo Haos Naet

Matiu 4:1–2; Luk 4:1–2.?Wanem niu tingting nao yu kasem aot long stori ia abaot paoa blong stap livim kakae? Blong helpem famli blong yu blong i lan abaot fasin blong livim kakae, maet yu save yusum “Fasting and Fast Offerings” long Gospel Topics (topics.ChurchofJesusChrist.org). Ol memba blong famli oli save serem sam eksperiens we oli bin gat taem oli bin livim kakae. Maet, yufala i save prea, mo mekem ol plan blong livim kakae tugeta from wan spesifik stamba tingting.

Matiu 4:3–4; Luk 4:3–4.Taem we Setan i bin temtem Kraes blong i tanem ston i kam bred, hem i bin kwestinim wan poen ia, se, “Sapos Yu Yu Pikinini blong God” (Matiu 4:3, oli ademap italik). ?From wanem Setan i traem blong mekem yumi gat tu tingting abaot tabu aedentiti blong yumi—mo aedentiti blong Sevya? ?Olsem wanem nao Hem i stap traem blong mekem hemia? (Luk tu long Moses 1:10–23.)

Josef Smit Translesen, Matiu 4:11.Afta we oli testem Jisas long saed blong bodi mo long saed blong spirit, ol tingting blong Hem i tanem i go long ol nid blong Jon Baptaes, we i bin stap long kalabus: “Mo nao, Jisas i bin save se oli putum Jon long kalabus, mo hem i bin sendem ol enjel; mo luk, oli bin kam kolosap blong givhan long hem” (Josef Smit Translesen, Matiu 4:11 [insaed long Matiu 4:11, futnot a). ?Olsem wanem nao yumi kasem blesing taem yumi stap folem eksampol blong Kraes, blong stap tingting long ol nara man?

Luk 4:16–21.?Yumi save eniwan we hat blong hem i harem nogud tumas, o i nidim blong oli mekem hem i kam fri? (Luk 4:18). ?Olsem wanem yumi save helpem ol narawan blong kasem hiling blong Sevya mo letem Hem i mekem yumi kam fri? Maet bae yufala i save toktok raon long, hao nao, taem yumi stap mekem ol odinens blong tempol, i stap helpem yumi blong “save go fri” (Luk 4:18).

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Kam Folem Mi,” Liahona, Oktoba 2012, pej 62.

Stap Kam Antap long Fasin blong Yumi blong Stap Tij

Laef folem gospel blong Jisas Kraes. “Impoten samting we yufala i save mekem [olsem papa mo mama] i blong laef folem gospel wetem ful hat blong yufala. Hemia i bes wei blong kwalifae blong gat Tabu Spirit olsem kompanion blong yu. Yu no nid blong yu stret evriwan, jes gohed blong traem wetem tru tingting—mo askem fogivnes tru long Atonmen blong Sevya eni taem yu foldaon” (Teaching in the Savior’s Way, 13).