6–12 Febwari

Jon 2– 4

“Evri Man mo Woman I Mas Bon Bakegen”

Taem yu stap ridim Jon 2– 4, Spirit bae i tijim yu sam samting abaot wei we bae yu jenisim laef blong yu. Tekem not long ol kwaet toktok blong Hem. Bae yu save faenem sam moa niu tingting aot long stadi aedia insaed long aotlaen ia.

Raetemdaon Ol Filing mo Tingting blong Yu

Long wan mared long Kana, Kraes i bin jenisim wota i kam waen—wan taem we Jon i singaotem “stat blong ol merikel” (Jon 2:11). Hemia i tru, i no long wan wei nomo, be long plante wei. Nating we hemia i bin fasfala merikel we Jisas i bin mekem long pablik, hem i save stap olsem wan simbol blong stat blong ol merikel—rod ia we bae hat blong yumi i jenis taem yumi stap kam moa olsem Sevya. Merikel ia blong wan laeftaem i stat wetem desisen blong stap folem Jisas Kraes, blong jenis mo laef long wan laef we i gud moa tru long Hem. Merikel ia i save jenisim laef tru, mekem se, blong “bon bakegen” i wan long ol bes wei blong tokbaot hemia (Jon 3:7). Be, blong bon bakegen, i jes stat ia nomo blong rod blong stap wan disaepol. Ol toktok blong Kraes long woman Sameria long wel, i mekem yumi tingting bakegen se, sapos yumi gohed long rod ia, long en, bae gospel i kam “springwota we i save ron oltaem” (Jon 4:14).

Sam Aedia blong Skripja Stadi blong Yuwan

Jon 2:1–11

Ol merikel blong Jisas Kraes oli soem glori blong Hem.

Taem yu stap ridim abaot taem ia we Sevya i tanem wota i kam waen long Jon 2:1–11, maet bae yu luk sam moa samting sapos yu lukluk long wei blong ol defren pipol we oli bin stap ia, olsem Meri, ol disaepol, mo ol narawan. Sapos yu yu bin witnesem ol taem ia we oli tokbaot ia, ?bae wanem nao ol tingting mo filing blong yu abaot Jisas long tetaem ia? ?Wanem nao merikel ia i stap tijim yu abaot Hem?

Jon 3:1–21

Mi mas bon bakegen blong save go insaed long kingdom blong God.

Taem we Nikodimas i bin kam long Jisas long wan praevet taem, hem i lukaot gud blong lukluk gud samting we i stap. Be afta, hem i bin difendem Jisas long pablik (luk long Jon 7:45–52) mo hem i bin joenem ol man we oli biliv long taem we oli bin berem Sevya (luk long Jon 19:38–40). ?Wanem tijing nao yu faenem we i stap long Jon 3:1–21 we i save givim insperesen long Nikodimas blong folem Jisas mo blong i bon bakegen?

Profet Josef Smit i bin tijim: “Blong stap bon bakegen, i kam tru long Spirit blong God tru long ol odinens” (Teachings of Presidents of the Church: Joseph Smith [2007], 95). ?Wanem rol nao baptaes mo konfemesen blong yumi—blong yu “bon long wota mo long spirit” (Jon 3:5)—i bin plei blong save bon bakegen? ?Wanem nao yu stap gohed blong mekem blong yu gohed blong mekem hemia? (luk long Alma 5:11–14).

Luk tu long Mosaea 5:7; 27:25–26; David A. Bednar, “Ye Must Be Born Again,” Liahona, May 2007, 19–22.

Jon 3:16–17

Papa long Heven i soem lav we Hem i gat long mi tru long Jisas Kraes.

Elda Jeffrey R. Holland i bin tijim: “Fasfala bigfala trutok blong ful taem we i no save finis, i we God i lavem yumi wetem ful hat, paoa blong tingting, maen, mo paoa blong Hem” (“Tomorrow the Lord Will Do Wonders among You,” Liahona, May 2016, 127). ?Olsem wanem nao yu bin filim lav blong God tru long presen ia, we i Pikinini blong Hem?

Sakramen i stap olsem wan gudfala taem blong tingtingbak long lav ia blong God, mo presen ia, we i Pikinini blong Hem. ?Wanem hym blong sakramen nao i helpem yu blong filim lav ia? ?Wanem nao yu save mekem, blong mekem sakramen i gat moa mining?

Taem yu stap gohed blong rid abaot ol tijing mo seves blong Sevya, askem yuwan olsem wanem ol samting we yu ridim oli helpem yu blong andastanem mo filim lav ia blong God.

Jon 4:24

?God i wan spirit?

Sam, maet oli konfius wetem toktok blong Jisas se God i wan spirit. Translesen blong Josef Smit long saed blong ves ia i mekem samting i klia gud: “From, long olgeta ia nao God i bin promesem Spirit blong hem” (long Jon 4:24, futnot a). Revelesen blong tedei, i tijim tu se God i gat wan bodi blong mit mo bun (luk long Doktrin mo Ol Kavenan 130:22–23; luk tu long Jenesis 5:1–3; Hibrus 1:1–3).

Jon 4:5–26

Kraes i givim mi wota ia we i givim laef.

?Wanem nao maet Jisas i minim taem we Hem i bin talem long woman Sameria se huia i stap dring long wota ia we Hem i givim, bambae i neva tosta bakegen? ?Olsem wanem nao gospel i olsem wota ia we i givim laef?

Gospel blong Kraes i wota we i givim laef, we i fidim ol sol blong yumi.

Wan long ol mesej blong Sevya long woman Sameria, i we, olsem wanem yumi wosip, i moa impoten bitim wea nao yumi stap wosip long hem (luk long Jon 4:21–24). ?Wanem nao yu yu stap mekem blong “wosipim Papa long spirit mo long trutok”? (Jon 4:23).

Luk tu long Gaed long Ol Skripja, “Wosip,” olskripja.ChurchofJesusChrist.org; Dean M. Davies, “The Blessings of Worship,” Liahona, Nov. 2016, 93–95.

Ol Aedia blong Famli Skripja Stadi mo Haos Naet

Jon 2–4.Taem famli blong yu i stap ridim ol japta ia long wik ia, lukluk gud long wei we Sevya i yusum ol evri dei samting—taem man i bon i kam long wol, win, wota, mo kaekae—blong tijim ol trutok long saed blong spirit. ?Wanem samting nao, i stap insaed long hom blong yu, we yu save yusum blong tijim ol trutok long saed blong spirit?

Taem yu stap stadi long ol japta ia, tingting blong stap wajem ol vidio tugeta, we oli soem ol taem ia: “Jesus Turns Water into Wine,” “Jesus Cleanses the Temple,” “Jesus Teaches of Being Born Again,” mo “Jesus Teaches a Samaritan Woman” (ChurchofJesusChrist.org).

Jon 2:13–17.?Wanem rabis paoa long tingting we famli i nidim blong kipim i stap aotsaed long hom blong i kam olsem wan tabu ples—olsem tempol? ?Wanem nao bae yu mekem blong kipim ol samting ia oli stap aotsaed?

Jon 3:1–6.Toktok wetem famli blong yu abaot merikel blong woman i gat bel, mo blong bon i kam long wol—rod ia blong krietem wan we i bae i save laef mo i gat waes. Jisas i bin tijim se yumi mas bon bakegen bifo yumi go insaed long kingdom blong God. ?From wanem, blong bon bakegen, i wan gudfala pikja toktok blong fasin jenis ia we yumi mas mekem bifo yumi go insaed long kingdom blong God? ?Olsem wanem yumi save gat eksperiens ia blong rod ia blong bon bakegen long saed blong spirit?

Jon 3:16–17.Invaetem ol memba blong famli blong talem bakegen ol ves, be wetem toktok blong olgeta nomo, olsem se oli stap eksplenem hemia long wan fren. ?Olsem wanem nao Jisas Kraes i bin helpem yumi blong filim lav ia blong God?

Jon 4:5–15.?Wanem nao Sevya i bin stap tijim yumi taem Hem i bin komperem gospel blong Hem long wota ia we i givim laef? Mebi famli blong yu i save lukaotem sam wota we i ron, mo i tokbaot ol defren kwaliti blong wota. ?From wanem yumi nidim blong dring wota evri dei? ?Long wanem wei nao gospel blong Jisas Kraes i olsem “wan wel blong springwota we i save ron oltaem insaed long hem, blong givim laef ya long hem we i no save finis”? (Jon 4:14).

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “God’s Love,” Children’s Songbook, 97.

Stap Kam Antap long Stadi blong Yuwan

Lukaotem ol simbol. Ol skripja ia oli yusum ol samting, ol taem, o ol aksen blong ripresentem ol trutok long saed blong spirit. Ol simbol ia, oli save mekem andastaning blong yu abaot doktrin i kam bigwan moa. Eksampol: ?Olsem wanem Sevya i talem se, fasin blong jenisim laef, i olsem blong stap bon bakegen?

Wota we I Stap Laef, i kam long Simon Dewey