6–12 Febwari

Jon 2–4

“Evri Man mo Woman I Mas Bon Bakegen”

Long wan sot taem blong Praemeri klas, bae yu no gat taem blong tijim evri impoten prinsipol we i stap long Jon 2–4. Lukaotem spirit blong i lidim yu long wanem blong yu tokbaot bigwan, we i bes blong mitim ol nid mo ol intres blong ol pikinini.

Invaetem Ol Pikinini blong Serem Wanem Oli Gat

Blong leftemap tingting blong ol pikinini blong serem wanem oli stap lanem mo eksperiensem, askem olgeta long wanem nao oli jes mekem we i soem se o stap olsem “ol man blong pulum man” (Matiu 4:19). Bae yu wantem blong luklukbak long lesen blong las wik wetem olgeta.

Tijim Doktrin: Ol Smol Pikinini

Jon 3:1–10

Mi nidim blong kasem baptaes mo kasem konfemesen, blong gobak mo stap wetem Papa long Heven.

Ol pikinini we yu stap tijim, oli stap rere blong tekem ol impoten step blong laef bakegen wetem Papa long Heven taem oli kasem baptaes (bon long wota) mo kasem konfemesen (bon long Spirit). ?Olsem wanem nao yu save helpem olgeta blong andastanem se from wanem tufala odinens ia oli impoten?

Samfala Aktiviti we Yu Save Mekem

• Talem long wan sot toktok abaot stori blong Jisas we i stap tijim Nikodimas (luk long Jon 3:1–10). Promesem ol pikinini se taem oli kasem baptaes, Papa long Heven bae i givim presen ia we i Tabu Spirit.

• Soem long ol pikinini aktiviti pej blong wik ia, mo askem olgeta blong tokbaot ol droing. Ridim Jon 3:5, mo testifae se yumi nidim blong kasem baptaes mo konfemesen blong laef bakegen wetem Papa long Heven.

• Askem ol pikinini blong tokbaot wanem oli mekem blong wasem ol han blong olgeta. Soem pikja blong Gel we i Kasem Baptaes (Gospel Art Buk, namba 104), mo helpem ol pikinini blong komperem fasin blong wasem han wetem wota blong kam klin long saed blong spirit tru long baptaes.

Jon 3:16

Papa long Heven i lavem mi mo i givim wan Sevya long mi.

?Olsem wanem nao yu save helpem ol pikinini blong lanem naesfala trutok ia?

Samfala Aktiviti we Yu Save Mekem

• Askem ol pikinini blong komplitim ol sentens olsem hemia: “From se papa mo mama blong mi oli lavem mi, oli …” Ridim Jon 3:16. Afta helpem wanwan pikinini blong ripitim Jon 3:16, riplesem ol toktok ia “wol ia” wetem nem blong hem. Helpem ol pikinini blong luksave wanem ves ia i talem we Papa long Heven i bin mekem from se Hem i lavem yumi. Invaetem ol pikinini blong droem wan pikja blong Jisas. Letem olgeta oli serem ol droing blong olgeta wetem olgeta wanwan mo talemaot lav blong olgeta long Sevya.

• Singsing tugeta wan singsing abaot Jisas, olsem “He Sent His Son” (Children’s Songbook, 34–35). Letem ol pikinini oli leftemap wan pikja blong Jisas evri taem, taem oli singsing mo talem wan toktok olsem,” “Jisas,” o “Sevya.”

Jon 4:5–15

Jisas Kraes i “wota we i stap laef” blong mi.

Ol pikinini long klas blong yu oli save tingting long taem we oli tosta. ?Olsem wanem yu save yusum ol eksperiens ia blong helpem olgeta blong andastanem hamas yumi nidim wota we i stap laef we Jisas i stap givim long yumi?

Samfala Aktiviti we Yu Save Mekem

• Yusum ol pikja long aotlaen blong wik ia long Kam Folem Mi—Blong Wanwan Man, Woman mo Famli blong talem stori blong Jisas mo woman long wel (luk long Jon 4:5–15). Askem ol pikinini blong talem stori ia bakegen.

• Soem wan glas blong wota mo toktok wetem ol pikinini abaot from wanem yumi nidim wota. Talem long wan sot toktok Jon 4:5–15, mo testifae se Jisas Kraes mo gospel blong hem, i givim laef long ol spirit blong yumi, semmak olsem we wota i givim laef long bodi blong yumi.

Tijim Doktrin: Ol Bigfala Pikinini

Jon 2:1–11

Mi save jusum ona long mama blong olsem we Jisas i bin mekem.

Long wan taem blong mared long Kana, Meri i talem long Jisas se waen i stap finis. Folem long Josef Smit Translesen, Jisas i ansa long mama blong Hem taem i askem, “Woman. ?Wanem nao yu wantem blong mi mekem blong yu? Bae mi mekem” (long Jon 2:4, futnot a). Jisas i wan eksampol long olsem wanem yumi mas tritim ol mama blong yumi.

Samfala Aktiviti we Yu Save Mekem

• Invaetem ol pikinini blong ridim Jon 2:1–11 mo wan i talem bakegen stori mo afta wan narawan long toktok blong olgetawan.

• Askem ol pikinini blong mekem lis blong ol samting we maet mama blong olgeta i nidim help long olgeta. Invaetem olgeta blong praktisim wanem oli save talem long hem, taem bae oli yusum sam long ol toktok blong Jisas: “?From wanem yu yu putum samting ya long mi?” (Jon 2:4, futnot a).

• Invaetem sam mama i kam long klas mo serem wanem ol pikinini blong olgeta oli bin mekem blong soem respek long olgeta.

Jisas i talem long mama blong hem: “?Wanem nao yu wantem blong mi mekem blong yu?” (Josef Smit Translesen, Jon 2:4 [long Jon 2:4, futnot a]).

Jon 3:1–8

Blong kasem baptaes mo konfemesen i olsem se yu bon bakegen.

Taem yumi kasem baptaes, we Jisas i singaotem se blong “bon long wota,” yumi kam klin aot long ol sin blong yumi mo save “kam insaed long kingdom blong God” (Jon 3:5). ?Olsem wanem nao yu save helpem ol pikinini we yu tijim blong andastanem se i minim wanem blong bon bakegen?

Samfala Aktiviti we Yu Save Mekem

• Mekem sam pis pepa we i stap soem ol toktok blong Sevya long Jon 3:3, mo letem ol pikinini oli putum olgeta folem stret oda. ?Olsem wanem nao taem yumi kasem baptaes mo konfemesen i olsem se yumi bon bakegen?

• Soem wan pikja blong wan bebi we i jes bon mo blong wan we i stap kasem baptaes mo konfemesen (luk long Gospel Art Buk,, ol namba 104–105). ?Hao nao yumi semmak long bebi we i jes bon, afta we yumi kasem baptaes mo konfemesen? (luk long Jon 3:3–5).

• Invaetem ol pikinini blong serem ol memori blong olgeta abaot taem blong baptaes blong olgeta. Ridim Mosaea 18:8–10 mo Doktrin mo Ol Kavenan 20:37 blong go tru long kavenan blong baptaes. Tijim ol pikinini se blong stap tekem sakramen mo tingting hevi, evri wik, i wan wei blong stap gogohed blong stap bon bakegen.

• Helpem ol pikinini blong lanem baehat Ol Toktok blong Bilif 1:4.

Jon 3:16–17

Papa long Heven i lavem mi mo i sendem Pikinini blong Hem.

?Olsem wanem yu save helpem ol pikinini blong save se Papa long Heven i sendem Jisas Kraes i kam long wol ia olsem wan wei blong soem lav blong Hem?

Samfala Aktiviti we Yu Save Mekem

• Askem pikinini blong droem wan pikja blong fevret presen blong olgeta mo man we i bin givim presen ia long olgeta. Afta, askem wan pikinini blong ridim Jon 3:16. ?Wanem presen nao Papa long Heven i givim long yumi? ?Olsem wanem nao presen ia i soem lav blong Hem?

• Askem ol pikinini blong faenem ol ansa long ol kwestin ia “?From wanem Papa long Heven i sendem i kam long yumi?” taem oli stap ridim Jon 3:16–17 o singsing o lisin long “He Sent His Son” (Children’s Songbook, 34–35).

Jon 4:5–23

Jisas Kraes i givim “wota we i stap laef long mi.”

Semmak olsem we Jisas i bin yusum wota blong tijim woman Samari, yu save yusum wota blong tijim ol pikinini, from wanem yumi nidim gospel blong Jisas Kraes.

Samfala Aktiviti we Yu Save Mekem

• Blong yusum Jon 4:5–23, raetem wan sot stori blong woman long wel. Askem ol pikinini blong lukluk i go bak long ol ves ia mo putum ol sentens long stret oda. ?Wanem nao Jisas i stap traem blong tijim long woman?

• Givim wota long ol pikinini blong drink, mo askem olgeta blong serem ol eksperiens blong olgeta long taem we oli bin tosta. Tokbaot wanem nao oli filim taem long en, oli jes drink wota. Invaetem olgeta blong talem nem blong ol samting olsem, wan kap blong wota, we i mekem yu harem gud blong smoltaem nomo. ?Wanem ol samting we oli olsem “wota we i stap laef” we i save mekem yumi harem gud blong oltaem?

• Raetem long bod ?Olsem wanem gospel i olsem wota? Askem ol pikinini blong tingting long olsem wanem oli save ansa long kwestin ia taem oli ridim Jon 4:5–23.

Stap Leftemap Tingting blong Lanem Samting long Hom

Tingting blong askem ol pikinini blong givim wota long ol memba blong famli taem oli kasem hom. Taem oli mekem olsem, oli save serem wanem oli bin lanem abaot wota we i stap laef.

Stap Kam Antap long Fasin blong Yumi blong Stap Tij

Yusum ol aktiviti pej. Taem ol pikinini oli komplitim ol aktiviti pej, yusum taem we i stap blong luklukbak long ol prinsipol long lesen.