Jisas I Stap Tij Antap long Hil, i kam long Gustave Doré

13–19 Febwari

Matiu 5; Luke 6

God bae I Blesem Yufala”

Janis blong yu blong tijim ol pikinini i naes tumas. Taem yu mekem yuwan yu rere long saed blong spirit, Lod bae i lidim yu.

Invaetem Ol Pikinini blong Serem Wanem Oli Gat

Askem ol pikinini blong tokbaot wan samting we oli mekem long wik ia, blong soem laet blong Lod wetem wan narafala wan—ating blong stap wan gudfala eksampol o stap soem lav mo fasin blong stap kaen.

Tijim Doktrin: Ol Smol Pikinini

Matiu 5:9

Mi save stap olsem wan we i putum pis.

Ol pikinini we yu tijim oli save mekem wan bigfala jenis long hom taem oli tritim ol narafala wan wetem lav mo fasin blong stap kaen.

Samfala Aktiviti we Yu Save Mekem

• Ridim Matiu 5:9 long ol pikinini, mo eksplenem se ol man blong putum pis, oli mekem eni ples i fulap long pis, nomata wea ples oli stap. Raetem sam eksampol blong ol situesen blong stap raorao, we ol pikinini maet oli fesem (eksampol, ol brata mo sista oli stap faet from wan pleiplei doli). Invaetem wanwan pikinini blong jusum wan pis pepa. Taem yu ridim ol wanwan pat, askem ol pikinini blong serem olsem wanem oli save stap olsem wan man blong putum pis long situesen ia. O serem wan stori long buk, mo helpem ol pikinini blong talemaot sapos ol pipol we oli stap long stori oli bin stap olsem man blong putum pis o no.

• Invaetem sam long ol papa mo mama blong ol pikinini blong visit klas blong yu mo serem ol eksampol blong ol taem we ol pikinini blong olgeta oli bin putum pis long hom.

Matiu 5:14–16

Jisas i wantem mi blong stap olsem wan laet long ol narafala man.

Ol smolsmol pikinini oli save gat bigfala paoa blong mekem gud long ol narafala wan. ?Olsem wanem nao yu save givim insperesen long long olgeta blong letem laet blong olgeta i saen?

Samfala Aktiviti we Yu Save Mekem

• Soem long ol pikinini sam aetem we i save givim laet, mo soem wan pikja blong ol pikinini. Ridim Matiu 5:14–16, mo talem long ol pikinini se ol gudfala eksampol blong olgeta i save stap olsem wan laet long ol narafala wan blong luk. ?Olsem wanem yumi save yusum laet blong yumi blong karem ol narafala wan i kam long God.

• Saenem laet blong toj raonem rum mo invaetem ol pikinini blong folem laet blong toj wetem ae blong olgeta. Yusum laet blong lidim ae blong olgeta i go long wan pikja blong Sevya. ?Olsem wanem laet ia i helpem yumi? ?Olsem wanem yumi save stap wan laet long wol? Kavremap laet blong toj. ?Wanem bae i hapen sapos yumi no serem laet blong yumi o yumi haedem?

• Haedem wan toj long rum mo ofem ol laet. Letem ol pikinini blong oli traem blong faenem. Lukluk bak long Matiu 5:15, mo tokbaot se from wanem yumi no mas haedem laet blong yumi.

• Helpem ol pikinini blong faenem mo kalarem kalarem ol kandel we oli haed long aktiviti pej blong wik ia.

• Singsing wan singsing wetem ol pikinini abaot stap olsem wan laet long ol narafala wan olsem “Jesus Wants Me for a Sunbeam,” “Shine On,” o “I Am like a Star” (Children’s Songbook, 60–61, 144, 163).

Yumi save stap hapi taem yumi stap laef folem wei we Jisas i bin tijim.

Matiu 5:44–45

Jisas Kraes i wantem mi blong mi lavem evriwan.

Ol smol pikinini oli save stat blong praktisim naoia blong stap soem lav, iven taem ol fren mo ol brata mo sista oli no tritim olgeta i fea. Taem yu ridim Matiu 5:44–45, tingting long olsem wanem ol tijing blong Sevya i aplae long ol pikinini we yu tijim.

Samfala Aktiviti we Yu Save Mekem

• Talem wan moa taem Matiu 5:44 mo stap yusum ol toktok mo ol situesen we ol pikinini bae oli andastanem yusum. Askem ol pikinini blong serem ol taem we oli bin soem lav long ol narafala man nomata i bin had. ?Olsem wanem nao olgeta i bin filim long ol eksperiens ia?

• Olsem wan klas, singsing long wan singsing abaot fasin blong lavem ol narawan, olsem “Love One Another” (Children’s Songbook, 136–37). ?Wanem nao yumi lanem abaot singsing ia blong stap lavem ol narafala wan?

• Givim ol pepa hat long ol pikinini we oli raetem ol toktok ia “Bae mi soem lav blong mi long evriwan.” Askem olgeta blong flasem gud ol hat blong ia mo haggem long hom blong olgeta olsem wan rimaenda blong lavem ol narafala wan.

Tijim Doktrin: Ol Bigfala Pikinini

Matiu 5:3–12

Mi save stap hapi taem mi laef folem wei we Jisas i bin tijim.

Taem yu ridim Matiu 5:3–12, ?wanem ol toktok mo ol sentens we i kamaot klia long yu? ?Olsem wanem nao ol tijing ia i save blesem laef blong ol pikinini we yu tijim?

Samfala Aktiviti we Yu Save Mekem

• Mekem tu jat long bod wetem tu kolom we i gat toktok ia God bae i blesem yufala… mo Blesing. Invaetem ol pikinini blong lukaotem Matiu 5:3–12 mo stap lukaotem ol kwaliti blong olgeta we Jisas i bin talem we bae oli kasem blesing mo ol blesing we Hem i promesem long olgeta. Mo fulumap jat wetem wanem we oli faenem. Tokbaot wetem ol pikinini abaot wanem mining blong wanwan kwaliti mo blesing we i go stret wetem.

• Raetem wanwan kwaliti aot long ol ves ia long wan kad mo blesing we i go wetem long wan kad. Eksampol. Wan kad bae i talem “meek,” mo wan narafala wan i talem “inherit the earth” (ves 5). Letem ol pikinini blong oli majem ol kwaliti wetem ol blesing. Askem ol pikinini blong pikimap wan long ol kwaliti long ol ves ia we oli wantem blong developem.

Matiu 5:9, 21–24, 38–47

Mi save stap olsem wan we i putum pis.

Jisas i bin tijim se ol man blong putum pis bae oli singaotem olgeta ol pikinini blong God. ?Olsem wanem yu save givim insperesen long ol pikinini blong stap olsem wan we i putum pis?

Samfala Aktiviti we Yu Save Mekem

• Invaetem wan pikinini blong ridim Matiu 5:9 laod. ?Wanem i minim, man blong putum pis? ?Wanem ol wei we yumi save stap ol man blong putum pis wetem ol famli mo ol fren blong yumi? (Blong karem sam aedia, luk long ol ves 21–24, 38–47.)

• Askem wanwan pikinini blong tingting long wan situesen we i nidim wan help blong man we i putum pis. ?Wanem nao wan man blong putum pis bae i mekem long wan situesen olsem?

• Invaetem ol pikinini blong serem ol taem we, oli bin soem lav long wan narafala man, iven sapos man ia i defren long olgeta o we i had blong oli soem lav long hem.

Matiu 5:14–16

Eksampol blong mi i save saenem rod blong ol narawan oli folem Jisas.

Plante long pikinini we yu tijim, oli bin mekem ol kavenan blong baptaes. Tingting long ol olsem wanem ol toktok blong Sevya long Matiu 5:14–16 i go wetem ol kavenan blong olgeta. ?Wanem ol mesej we maet Lod i gat long ol sentens ia, blong ol pikinini long long klas blong yu?

Samfala Aktiviti we Yu Save Mekem

• Helpem ol pikinini blong lanem baehat Matiu5:16. Raetem ves ia long bod. Ridim tugeta plante taem, mo stap rapemaot sam toktok wanwan taem. Invaetem ol pikinini blong droem ol samting we oli save mekem blong stap wan laet long ol narafala wan. Tokbaot olsem wanem taem yumi stap wan laet long ol narafala man, i stap helpem yumi blong mekem i hapen ol kavenan blong baptaes blong yumi (luk long Mosaea 18:8–10).

• Singsing wan singsing abaot stap serem laet wetem ol narafala wan olsem “Shine On” (Children’s Songbook, 144). ?Olsem wanem yumi save serem laet blong Sevya?

• Askem ol pikinini blong droem ol samting we i givim laet long yumi. Ridim Matiu 5:14–16. Askem long olgeta se, from wanem Jisas i wantem yumi blong stap wan laet long wol.

• Invaetem tu pikinini blong fesfesem tufala mo askem wan blong traem blong mekem narawan i smael, be i no save tajem hem. Tokbaot paoa ia we ol pikinini oli gat blong karem hapines i go long ol narafala man.

Stap Leftemap Tingting blong Lanem Samting long Hom

Givim jalenj long ol pikinini, blong blong lukaotem wan we i stap olsem man blong mekem pis long wik ia. Long stat blong klas long nekis wik, invaetem olgeta blong tokbaot huia mo wanem oli bin luk.

Stap Kam Antap long Fasin blong Yumi blong Stap Tij

Helpem ol pikinini blong stap aktiv. “Taem yu stap tijim ol pikinini, letem olgeta blong bildimap samting, dro, kala, raet mo krietem wan samting. Ol samting ia oli no ol aktiviti blong pleiplei nomo be—oli impoten long fasin blong lanem samting” (Teaching in the Savior’s Way, 25).