ኢየሱስ ጴጥሮስን ሲሾም

መጋቢት 6–12 (እ.አ.አ)

ማቴዎስ 9–10፤ ማርቆስ 5፤ ሉቃስ 9

“እነዚህን አሥራ ሁለቱን ኢየሱስ ላካቸው”

በዚህ የመማርያ ረቂቅ ውስጥ ያሉ የመማርያ ሃሳቦች በቅዱሳት መጻህፍት ውስጥ ግላዊ ትርጉም እንድታገኙ እንዲረዷችሁ ነው። ሆኖም ግን የትኛውን ምዕራፍ እና እንዴት ማጥናት እንዳለባችሁ የምትቀበሉትን ግላዊ መገለጥን መተካት የለባቸውም።

ያሳደረባችሁን ስሜት መዝግቡ

የክርስቶስ የፈውስ ተአምራት ወሬ በፍጥነት እየተዛመተ ነበር። ከህመሞቻቸው ፈውስን ለማግኘት በተስፋ ብዙዎች ተከተሉት። ነገር ግን አዳኙ ህዝቡን ሲመለከት ከአካላዊ ህመማቸው በላይ ነበር ያየው። በሃዘን ተሞልቶ “እረኛ [የሌላቸውን] በጎች” (ማቴዎስ 9፥36) አየ። “መከሩ ብዙ … ሠራተኞች ግን ጥቂቶች [እንደሆኑ]”(ማቴዎስ 9፥37) ተመለከተ። ስለዚህ አስራ ሁለት ሐዋርያትን ጠራ፥ “ሥልጣን ሰጣቸው፣” እንዲያስተምሩ እና እንዲያገለግሉ “የእስራኤል ቤት ወደሚሆኑ ወደ ጠፉት በጎች” (ማቴዎስ 10፥1፣ 6) ላካቸው። ዛሬም የሰማይ አባት ልጆችን ለማገልገል የሚያስፈልጉ ሰራተኞች ብዙ ናቸው። አሁንም አስራ ሁለት ሐዋርያት አሉ፣ ነገር ግን ከመቼውም ጊዜ በላይ “መንግሥተ ሰማያት ቀርባለች” (ማቴዎስ 10፥7) ብለው ለሁሉም ሰዎች የሚያውጁ ብዙ የኢየሱስ ክርስቶስ ደቀመዛሙርት አሉ።

የግል ጥናት ምልክት

ለግል የቅዱሳት መጻህፍት ጥናት ሃሳቦች

ማቴዎስ 9፥18–26፤ ማርቆስ 5፥22–43

“እመን ብቻ እንጂ አትፍራ”

መጀመርያ ኢያኢሮስ “ልትሞት [የቀረበችውን]” ልጁን ኢየሱስ እንዲፈውስለት ሲጠይቅ በችኮላ ነገር ግን ተስፋ በመሞላት “በሕይወት እንድትኖር መጥተህ እጅህን ጫንባት” በማለት ተናገረ (ማርቆስ 5፥23)። ነገር ግን እየሄዱ ሳለ መልዕክተኛ “ልጅህ ሞታለች፤ ስለ ምን መምህሩን አሁን ታደክመዋለህ?” (ቁጥር 35) በማለት እንደረፈደ ነገረው። በተመሳሳይ ሁኔታ በማርቆስ 5፥25–34 ላይ 12 አመት ለታመመችው ሴት በጣም የረፈደ ሊመስል ይችላል።

እነዚህን ቁጥሮች ስታነቡ በእናንተ ወይም በቤተሰባችሁ ፈውስ ስለሚያስፈልጋቸው ነገሮች ልታስቡ ትችላላችሁ—“[ሊሞት የቀረበ]” ወይም ለፈውስ እጅግ የዘገየ ነገርን ጨምሮ። በእነዚህ ቁጥሮች ውስጥ ስላሉ የእምነት አገላለጾች የሚያስደንቃችሁ ምንድነው? ኢየሱስ ለሴቲቷ እና ለኢያኢሮስ የሚለውን ልብ በሉ። ለእናንተ ምን እያለ እንደሆነ ይሰማችኋል?

በተጨማሪም ሉቃስ 8፥41–56፤ ረስል ኤም. ኔልሰን፣ “የኢየሱስ ክርስቶስን ሃይል ወደ ህይወታችን ማምጣት፣” ሊያሆና፣ ግንቦት 2017 (እ.አ.አ) 39–42፤ የቤተክርስቲያኗ ፕሬዝዳንቶች ትምህርቶች፤ ጎርደን ቢ. ሂንክሊይ (2016 (እ.አ.አ))፥ 333–42ን ተመልከቱ።

አንዲት ሴት የኢየሱስን ልብስ ለመዳሰስ እየዘረጋች

በጌታ እመኑ፣ በሊዝ ሌመን ስዊንድል

ማቴዎስ 10፤ ሉቃስ 9፥1–6

ጌታ የእርሱን ስራ እንዲሰሩ ለአገልጋዮቹ ሃይልን ይሰጣል።

በማቴዎስ 10 ላይ ኢየሱስ ለሐዋርያት የሰጠው ትዕዛዝ ለእኛም ይሰራል፣ ምክንያቱም ሁላችንም በጌታ ስራ ድርሻ ስላለን ነው። ሐዋርያት ተልዕኳቸውን እንዲፈጽሙ እንዲረዳቸው ክርስቶስ ምን ሃይል ሰጣቸው? እንድትሰሩ በተጠራችሁበት ስራ ላይ ሃይሉን እንዴት ማግኘት ትችላላችሁ? (2 ቆሮንቶስ 6፥1–10፤ ትምህርት እና ቃል ኪዳኖች 121፥34–46ን ተመልከቱ)።

ክርስቶስ ለሐዋርያት ስለሰጠው ስራ ስታነቡ ጌታ እንድትሰሩ ስለሚፈልገው ነገር ሊሰማችሁ ይችላል። እንደሚከተለው አይነት ካርታ ሃሳባችሁን እንድታቀናጁ ሊረዳችሁ ይችላል፦

ማቴዎስ 10	የሚሰማኝ ነገር
አዳኙ ለደቀመዛሙርቱ ኃይልን ሰጣቸው።	እግዚአብሔር ስራዬን እንድሰራ ሃይልን ይሰጠኛል።

በተጨማሪም ማርቆስ 6፥7–13፤ የእምነት አንቀጽ 1፥6፤ የመጽሃፍ ቅዱስ መዝገበ ቃላት፣ “ሃዋርያ”፤ “ኢየሱስ አስራ ሁለት ሐዋርያት እንዲሰብኩ እና ሌሎችን እንዲባርኩ ጠራቸው” (ቪድዮ)፣ ChurchofJesusChrist.orgን ተመልከቱ።

ማቴዎስ 10፥17–20

በጌታ ስራ ውስጥ ስሆን ምን መናገር እንዳለብኝ ያሳውቀኛል።

ጌታ የእርሱ ደቀመዛሙርት እንደሚያሳድዷቸው እና ስለ እምነታቸው እንደሚጠየቁ አስቀድሞ አይቶ ነበር—ደቀመዛሙርት አሁን ላይ ሊያጋጥማቸው እንደሚችል አይነት ማለት ነው። ነገር ግን ለደቀመዛሙርቱ በመንፈስ አማካኝነት ምን ማለት እንዳለባቸው እንደሚያውቁ ቃል ገባላቸው። ምናልባት ምስክርነታችሁን ስታካፍሉ፣ በረከት ስትሰጡ፣ ወይም ከሆነ ሰው ጋር ስትነጋገሩ በህይወታችሁ ይህ መለኮታዊ ቃል ኪዳን የተፈጸመበት አጋጣሚ ኖሮ ያውቃልን? እነዚህንም አጋጣሚዎች ለምትወዱት ሰው አካፍሉ ወይም በጥናት ደብተራችሁ ውስጥ መፃፍን ያስቡ። እንዲህ አይነት አጋጣሚዎች ይበልጥ እንዲኖራችሁ ምን ለማድረግ ተነሳሽነት ይሰማችኋል?

በተጨማሪም ሉቃስ 12፥11–12፤ ትምህርት እና ቃል ኪዳኖች 84፥85ን ይመልከቱ።

ማቴዎስ 10፥34–39

ኢየሱስ “ሰይፍን እንጂ ሰላምን ለማምጣት አልመጣሁም” ሲል ምን ለማለቱ ነው?

ሽማግሌ ዲ. ቶድ ክርስቶፈርሰን “ብዙዎቻችሁ የኢየሱስ ክርስቶስን ወንጌል ስትቀበሉ እና ወደ እርሱ የቃል ኪዳን መንገድ ስትገቡ በአባት እና እናት፣ በወንድሞች እና እህቶች እንደተጠላችሁ እና እንደተገለላችሁ እርግጠኛ ነኝ። በአንድም ሆነ በሌላ መንገድ ለክርስቶስ ያላችሁ ከፍ ያለ ፍቅር ለእናንተ ውድ የሆኑ ግንኙነቶችን መስዋዕት እንድታደርጉ አድርጓችኋል፣ ብዙም እንባ አፍስሳችኋል። ይህም ሆኖ ፍቅራችሁ ሳይቀንስ በእግዚአብሔር ልጅ እንደማታፍሩ እያሳያችሁ በመስቀሉ ስር ቆይታችኋል” (“ህይወታችሁን ማግኘት፣” ኢንዛይን፣ መጋቢት 2016 (እ.አ.አ)፣ 28)።

አዳኙን ለመከተል ስትሉ የምትወዱትን ግንኙነቶችን ለመተው ፈቃደኛ መሆናችሁ “ነፍሱንም ስለ እኔ የሚያጠፋ ያገኛታል” (ማቴዎስ 10፥39) ከሚል ቃል ኪዳን ጋር ይመጣል።

የቤተሰብ ጥናት ምልክት

ለቤተሰብ ቅዱሳት መጻህፍት ጥናትና ለቤተሰብ የቤት ምሽት ሃሳቦች

ማርቆስ 5፥22–43።ቤተሰባችሁ ይህን ታሪክ በአንድነት ሲታነብቡ፣ ምንባብን በማቆም በማለት የቤተሰባችሁ አባላት በኢያኢሮስ፣ በሴቲቷ ወይም በታሪኩ ላይ ያሉ ሌሎች ሰዎች ቦታ ላይ ቢሆኑ ምን እንደሚሰማቸው ጠይቋቸው። ስለዚህ ታሪክ በዚህ ረቂቅ ላይ እንዳሉት አይነት ፎቶዎች ማሳየትም ትችላላችሁ። እነዚህ ፎቶዎች በታሪኩ ላይ ያሉ ሰዎችን እምነት እንዴት ነው የሚያሳዩት? (በተጨማሪ ም “ኢየሱስ የኢያኢሮስን ልጅ አስነሳ” እና “ኢየሱስ እምነት ያላትን ሴት ፈወሰ” የሚል ር እስ ያላቸውን ቪድዮዎች በChurchofJesusChrist.org ላይ ማየት ትችላላችሁ።) በተጨማሪም ቤተሰባችሁ የሚገጥመውን አንዳንድ ፈተናዎች ማሰብ ትችላላችሁ። “እመን ብቻ እንጂ አትፍራ” የሚለውን ቃል እንዴት ተግባራዊ ማድረግ እንችላለን? (ማርቆስ 5፥36)።

ማቴዎስ 10፥39፤ ሉቃስ 9፥23–26 ህይወታችንን “[ማጣት]” እና “[ማግኘት]” ምን ማለት ሊሆን ይችላል? (ማቴዎስ 10፥39)። ምናልባት የቤተሰብ አባላት በእነዚህ ጥቅሶች ላይ ያለውን የኢየሱስ አስተምሮት የሚያሳዩ ልምዶችን ሊያካፍሉ ይችላሉ።

ማቴዎስ 10፥40።የአሁን ጊዜ ነቢያትን ምክር መከተል ላይ እናንተ እና ቤተሰባችሁ እንዴት ናችሁ? ለእነሱ ምክር ታዛዥነታችን ወደ ኢየሱስ ክርስቶስ የሚያቀርበን እንዴት ነው?

ሉቃስ 9፥61–62።ዕርፍን በእጅ ይዞ ወደ ኋላ መመልከት ምን ማለት ነው? ይህ ባህርይ ለእግዚአብሔር መንግስት ተገቢ ያልሆንን የሚያደርገን ለምንድነው?

ልጆችን ለማስተማር ተጨማሪ ሃሳቦችን ለማግኘት የዚህን ሳምንት ዝርዝር በኑ፣ ተከተሉኝ—ለመጀመሪያ ክፍልን ይመልከቱ።

በሃሳብ የሚቀርብ መዝሙር፦ “እምነት ሲጸና፣” መዝሙሮች፣ ቁጥር 128

የግል ጥናትን ማሻሻል

መንፈሱን አድምጡ በምታነቡበት ጊዜ ከምታነቡት ጋር የማይዛመዱ ቢመስሉም ለሀሳባችሁ እና ለስሜታችሁ ትኩረት ስጡ (ትምህርት እና ቃል ኪዳኖች 8፥2–3ን ተመልከቱ)። ምናልባት እነዚያ ግንዛቤዎች ራሳቸው እግዚአብሔር እንድትማሩ የፈለጋቸው ነገሮች ሊሆኑ ይችላሉ።

ኢየሱስ ሴት ልጅን ከአልጋ ላይ እያስነሳት

ጣሊታ ቁሚ፣ በኤቫ ኮሌቫ ቲሞቲይ