“6–12 marzo. Mateo 9–10; Markos 5; Lukas 9: “Eb’ li kab’laju a’in ke’taqlaak xb’aan li Jesus,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“6–12 marzo. Mateo 9–10; Markos 5; Lukas 9,” Kim, Taaqehin—Choq’ reheb’ li komon ut li junkab’al: 2023
6–12 marzo
Mateo 9–10; Markos 5; Lukas 9
“Eb’ li kab’laju a’in ke’taqlaak xb’aan li Jesus”
Li na’leb’ re tzolok sa’ li hu a’in a’an re aatenq’ankil chixtawb’aleb’ ru li loq’laj hu. A’b’anan ink’a’ naraj naxye naq ink’a’ chik taak’ul li k’utb’esinb’il na’leb’ chirix k’a’ru li raqal naru taatzol malaj chan ru taatzol.
Tz’iib’a li nakak’oxla
Sa’ junpaat kijek’iman resil li sachb’a-ch’oolejil k’irtesink yoo chixb’aanunkil li Jesus. Kitaaqeek xb’aan k’iila tenamit, li ke’raj naq te’k’irtesiiq lix yajeleb’. A’b’anan naq li Kolonel kirileb’ li k’iila tenamit, ink’a’ ka’ajwi’ kiril lix tz’ejwalejil yajeleb’. Chi nujenaq rik’in uxtaan, kirileb’ “li karneer maak’a’ aj ilol reheb’ ” (Mateo 9:36). “Li q’olom naab’al,” chan, “a’ut eb’ laj k’anjel ink’a’ k’iheb’ ” (Mateo 9:37). Jo’kan naq kixb’oqeb’ kab’laju chi apostol, “kixk’eheb’ xwankil,” ut kixtaqlaheb’ re “te’xik rik’ineb’ li karneer sachenaqeb’ sa’ li tenamit Israel” (Mateo 10:1, 6). Anajwan ajwi’ neke’ajman ru naab’al chik aj k’anjel re te’k’anjelaq chiruheb’ li ralal xk’ajol li qaChoxahil Yuwa’. Toj wankeb’ kab’laju chi apostol, a’ut k’iheb’ wi’chik lix tzolom li Qaawa’ Jesukristo anajwan—eb’ li neke’ru chixch’olob’ankil chiru chixjunil li ruchich’och’ naq “lix nimajwal wankilal li choxa ak xnach’ok chaq” (Mateo 10:7).
Li na’leb’ re xtzolb’aleb’ li loq’laj hu aajunes
“Mexxiwak, ka’ajwi’ naq wanq eepaab’aal.”
Li xb’een sut naq laj Jairo kixtz’aama chiru li Jesus naq tixk’irtesi lix rab’in, li ak “kamk chik re,” laj Jairo ki’aatinak chi ajb’il ru a’b’anan rik’in oyb’enihom: “Kim ut k’e chaq laa wuq’ sa’ xb’een, … re naq taakole’q” (Markos 5:23). A’b’anan naq yookeb’ chi xik, jun laj taql kixye re laj Jairo naq jwal kib’ay: “Ak kikam chik lix rab’in: k’a’ chik aj-e taach’i’ch’i’i li Tzolonel?” (raqal 35). Jo’kan ajwi’, maare jwal kib’ay choq’ re li ixq li naqil resil sa’ Markos 5:25–34, li kiyajer chiru kab’laju chihab’.
Naq yooqat chirilb’al li seraq’ a’in, naru nakak’oxla li taaraj k’irtesiik sa’ laa yu’am malaj sa’ laa junkab’al—maare li wan “chiru li kamk” malaj li kib’ay chi b’ane’k. K’a’ru li jwal nawulak chawu sa’eb’ li eetalil a’an chirix li paab’aal? K’e reetal li kixye li Jesus re li ixq ut re laj Jairo. K’a’ru nakak’oxla naq yoo chixyeeb’al aawe laa’at?
Chi’ilmanq ajwi’ Lukas 8:41–56; Russell M. Nelson, “Roksinkil lix wankil li Jesukristo sa’ li qayu’am,” Jolomil ch’utub’aj-ib’ re abril 2017; Enseñanzas de los Presidentes de la Iglesia: Gordon B. Hinckley (2016), 351–360.
Kanab’ aawib’ chiru li Qaawa’, xb’aan li xLiz Lemon Swindle
Li Qaawa’ naxk’e reheb’ lix moos li wankilal re xb’aanunkil lix k’anjel.
Li na’leb’ kixk’e li Jesus sa’ Mateo 10 a’an choq’ reheb’ lix apostol, a’b’an naru ajwi’ taawanq choq’ qe, xb’aan naq chiqajunilo wanko sa’ xk’anjel li Qaawa’. K’a’ru li wankilal li kixk’e li Kristo reheb’ lix apostol re xtenq’ankileb’ chixb’aanunkil lix k’anjeleb’? Chan ru naru taak’ul li wankilal a’an re xb’aanunkil li k’anjel b’oqb’ilat wi’? (chi’ilmanq 2 Korintios 6:1–10; Tzol’leb’ ut Sumwank 121:34–46).
Naq nakawil li k’anjel li kixk’e li Kristo reheb’ lix apostol, maare taak’ul aana’leb’ chirix li k’anjel taaraj li Qaawa’ naq taab’aanu laa’at. Jun li eetalil jo’ li tusb’il arin naru tatxtenq’a chixtuqub’ankil li yookat chixk’oxlankil:
Li k’a’ru naweek’a | |
Li Kolonel kixk’e xwankileb’ lix tzolom. |
Li Dios tixk’e we li wankilal li na’ajman re xb’aanunkil lin k’anjel. |
Chi’ilmanq ajwi’ Markos 6:7–13; Eb’ lix Raqalil li Paab’aal 1:6; K’utul Raqal reheb’ li Loq’laj Hu, “Apostol”; “Jesús llama a los Doce Apóstoles para predicar y bendecir a la gente” (video), ChurchofJesusChrist.org.
Naq wankin chi k’anjelak chiru li Qaawa’, a’an tinixtenq’a chixnawb’al k’a’ru tinye.
Li Qaawa’ kiril chi rub’elaj naq eb’ lix tzolom te’rahob’tesiiq ut te’tz’ile’q rix chirix lix paab’aaleb’—a’an ajwi’ li naru neke’xk’ul lix tzolom sa’ li kutan a’in. A’ut kixye reheb’ lix tzolom naq te’xnaw rik’in li Musiq’ej k’a’ru te’xye. Ma wan k’a’ru xak’ul sa’ laa yu’am li xtz’aqlok wi’ ru li yeechi’ihom a’in, jo’ maare naq xaye lix nawom aach’ool, naq xak’e jun li osob’tesink, malaj naq xat-aatinak rik’in anihaq? Maare taawotz li k’a’ru xak’ul rik’in jun aakomon, malaj taatz’iib’a sa’ jun li hu. K’a’ru musiq’anb’ilat chixb’aanunkil re naq taak’uleb’ li na’leb’ a’in rajlal?
Chi’ilmanq ajwi’ Lukas 12:11–12; Tzol’leb’ ut Sumwank 84:85).
K’a’ru xyaalalil naq li Jesus kixye, “Ink’a’ xinchalk chixk’eeb’al li tuqtuukilal, a’an b’an li ch’iich’ ”?
Li Elder D. Todd Christofferson kixye, “Nink’oxla naq wankeb’ sa’ eeyanq li xextz’eqtaanaak ut xexhob’e’ xb’aan lee na’ eeyuwa’, malaj xb’aaneb’ lee ras eeriitz’in rik’in naq xek’ul lix evangelio li Jesukristo ut xex’ok sa’ lix sumwank. Chi jo’kan, rik’in naq mas wi’chik xera li Kristo, x’ajman ru naq xexwan chi jachjo eeru rik’ineb’ li raab’ileb’ aab’aan, ut x’el xya’al eeru xb’aan a’an. A’b’anan lee rahom ink’a’ k’osb’il ru, ut xaqxo nekexkana rub’el li krus a’in, ut nekek’ut naq ink’a’ nekexxutaanak chirix li Ralal li Dios” (“Cómo encontrar tu vida,” Liahona, marzo 2016, 28).
Wi wan qach’ool chi jache’k qu rik’ineb’ li raab’ileb’ qab’aan re xtaaqenkil li Kristo, yeechi’inb’il naq “li tixsach lix yu’am sa’ ink’ab’a’, a’an tixtaw” (Mateo 10:39).
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Markos 5:22–43.Naq li junkab’al yooq chirilb’al li seraq’ a’in, naru taapatz’eb’ re k’a’ raj ru te’reek’a wi ta a’aneb’ laj Jairo, malaj li ixq, malaj junaq chik kristiaan li wan resil sa’ li seraq’. Naru taak’ut li jalam-uuch chirix li seraq’, jo’ li na’el sa’ li hu a’in. Chan ru naq li jalam-uuch a’an nareetali lix paab’aaleb’ li kristiaan sa’ li seraq’? (Che’ilmanq ajwi’ li video “Jesús resucita a la hija de Jairo” ut “Jesús sana a una mujer de fe” sa’ ChurchofJesusChrist.org.) Naru ajwi’ nakak’oxla eb’ li majelal naxnumsi li junkab’alej. Chan ru tooruuq chixyu’aminkil li raatin, “Mexxiwak, ka’ajwi’ naq wanq eepaab’aal”? (Markos 5:36).
-
Mateo 10:39; Lukas 9:23–26.K’a’ru naraj naxye “xsachb’al” li qayu’am ut “xtawb’al”? (Mateo 10:39). Maare eb’ li komon sa’ laa junkab’al naru te’xwotz xnumsihomeb’ li tixk’ul rib’ rik’in lix k’utum li Jesus sa’eb’ li raqal a’an.
-
Mateo 10:40.Chan ru naq laa’at ut laa junkab’al nekepaab’ li neke’xye li apostol sa’ qakutankil? Chan ru naq nokonach’ok rik’in li Jesukristo sa’ xpaab’ankil li raatineb’?
-
Lukas 9:61–62.K’a’ru xyaalalil li ilok wi’chik chiqix naq ak xqachap li k’anjeleb’aal? K’a’ut naq xb’aan a’in moko usaqo ta choq’ re lix nimajwal awa’b’ejihom li Dios?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Li paab’aal,” Eb’ li B’ich, 68.
Xkawresinkil aawib’ chi tzolok
Ab’i li Musiq’ej. Naq nakattzolok, k’e reetal li k’a’ru nakak’oxla ut nakaweek’a (chi’ilmanq Tzol’leb’ ut Sumwank 8:2–3, us ta maare jalan wi’ rik’in li yookat chirilb’al. Naru naq li na’leb’ nakak’ul chi jo’kan a’an ajwi’ li taaraj li Dios naq taanaw ut taab’aanu.
Talitha Cumi, xb’aan li xEva Koleva Timothy