“6–12 marzo. Mateo 9–10; Markos 5; Lukas 9: “Eb’ li kab’laju a’in ke’taqlaak xb’aan li Jesus,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“6–12 marzo. Mateo 9–10; Markos 5; Lukas 9,” Kim, Taaqehin—Choq’ re li Tzoleb’aal reheb’ li Kok’al: 2023
6–12 marzo
Mateo 9–10; Markos 5; Lukas 9
“Eb’ li kab’laju a’in ke’taqlaak xb’aan li Jesus”
Naq nakawil Mateo 9–10; Markos 5; ut Lukas 9, maare taak’ul lix musiq’anb’il na’leb’ li Santil Musiq’ej. Li musiq’anb’il na’leb’ a’an, rik’in ajwi’ Kim, Taaqehin—Choq’ reheb’ li komon ut li junkab’al ut li tusleb’ aatin a’in, naru nakate’xtenq’a chixkawresinkil aawib’ re k’utuk.
Xkanab’ankileb’ chi wotzok
Patz’ reheb’ li kok’al naq te’xye k’a’ru xe’xb’aanu chiru li xamaan a’in re xtenq’ankil li ras riitz’ineb’. K’a’ru kixb’aanu li Kolonel re xtenq’ankileb’ li ras riitz’in?
Xk’utb’al li tzol’leb’: Kok’al toj ka’ch’ineb’ xyu’am
Li Jesus wan xwankil re ink’irtesinkil.
Li Kolonel kixk’ut k’iila sut naq wan xwankil chixk’irtesinkileb’ li neke’paab’ank re. Laa’at naru nakatenq’aheb’ li kok’al chixkawob’resinkil lix paab’aaleb’ chirix lix wankilal aj k’irtesinel.
Kok’ k’anjel naru chi b’aanumank
-
Seraq’i chiruheb’ li kok’al li seraq’ chirix lix rab’in laj Jairo (chi’ilmanq Markos 5:22–23, 35–43). Naq tatwulaq b’ar wi’ li Jesus naxye “At ixqa’al, aawe ninye, waklin” (raqal 41), yaab’asi a’an ut b’oqeb’ li kok’al chi xaqliik. Tenq’aheb’ li kok’al chixtawb’al ru naq li Jesus wan xwankil chiqak’irtesinkil ut chixk’eeb’al li qayu’am chi junelik.
-
K’ut jun xjalam-uuch li seraq’ sa’ Mateo 9:20–22 naq nakawileb’ li raqal a’an. Tenq’aheb’ li kok’al chixtzolb’al sa’ xk’a’uxleb’ li ch’ol aatin “laa paab’aal xkolok aawe” (raqal 22). Re xb’aanunkil a’in, naru taak’e jun aatin re li junjunq kok’al, ut eb’ a’an te’xye li aatin chi tustu k’iila sut. Chan ru naq li ixq kixk’ut naq wan xpaab’aal chirix li Jesukristo? K’a’ru naru taqab’aanu re xk’utb’al naq naqapaab’ li Kristo?
-
Patz’ reheb’ li kok’al naq te’xmutz’ li ruheb’ ut tate’rab’i naq yookat chixyaab’asinkil Mateo 9:27–30. Naq taaye naq li Jesus kixk’irtesiheb’ li winq mutz’eb’, patz’ reheb’ li kok’al naq te’xte li ru. Patz’ reheb’ li kok’al naq te’xye k’a’ raj ru xe’reek’a wi ta xe’k’irtesiik xb’aan li Jesus.
-
Oksi li perel re kok’ k’anjel re li xamaan a’in re xtenq’ankileb’ li kok’al chixtzolb’al li seraq’ chirix li Jesus naq kixwaklesi lix rab’in laj Jairo chiru li kamk.
Kanab’ aawib’ chiru li Qaawa’, xb’aan li xLiz Lemon Swindle
Li Jesus kixb’oqeb’ kab’laju chi apostol ut kixk’e xwankilaleb’ re xk’eeb’al chi uxmank lix k’anjel.
Ma neke’xnaw li kok’al li nakatzoleb’ naq wankeb’ kab’laju chi apostol sa’ li qakutan? Chan ru taawoksiheb’ li raqal a’an re xk’utb’al chiruheb’ naq aajeleb’ ru li apostol sa’eb’ li kutan a’in, ut k’a’ru b’oqb’ileb’ chixb’aanunkil?
Kok’ k’anjel naru chi b’aanumank
-
K’os ru Mateo 10:1–10 rik’ineb’ aatin moko ch’a’aj ta xtawb’aleb’ ru. Ch’olob’ naq li Jesus naxb’oqeb’ li apostol re tenq’ank chixwaklesinkil lix Iglees. Kanab’eb’ li kok’al chirajlankileb’ li apostol sa’ li jalam-uuch Li Kristo naxk’ojob’eb’ li apostol (Hu reheb’ li Jalam-uuch re li Evangelio, 38) ut sa’ jun xjalam-uuch lix Molameb’ li Kab’laju chi Apostol sa’ li qakutan (chi’ilmanq ChurchofJesusChrist.org malaj li revista Liahona li puktesinb’il wi’ li jolomil ch’utub’aj-ib’ xnume’). Ch’olob’ naq sa’eb’ li kutan a’in wankeb’ kab’laju chi apostol, jo’ sa’ lix kutankil li Jesus. Wotz lix nawom aach’ool chirixeb’ lix apostol li Qaawa’ ut jun li na’leb’ toje’ xe’xwotz.
-
Muqeb’ xjalam-uucheb’ li apostol re li kutan a’in sa’ li tzoleb’aal (naru nakataweb’ a’an sa’ li revista Liahona li puktesinb’il wi’ li jolomil ch’utub’aj-ib’ xnume’). Patz’ reheb’ li kok’al naq te’xtaweb’ li jalam-uuch, ut aatinan b’ayaq rik’ineb’ chirix li junjunq chi apostol (chi’ilmanq Conoce a los profetas y apóstoles de la actualidad” sa’ ChurchofJesusChrist.org).
-
Kanab’ jun li ch’ina al chixchapb’al chi kutankil jun xjalam-uuch li Xb’eenil Awa’b’ejil ut jun xjalam-uuch lix Molameb’ li Kab’laju chi Apostol. Patz’ re li ch’ina al naq tixb’eresi xkomoneb’ li kok’al chire li tzoleb’aal toj reetal naq te’wulaq chixk’atq jun lix jalam-uuch li Jesus. Ch’olob’ xyaalal naq eb’ li profeet ut eb’ li apostol nokohe’xb’eresi rik’in li Jesukristo.
Xk’utb’al li tzol’leb’: Kok’al ak ninqeb’
Li Jesus wan xwankil re ink’irtesinkil.
Rilb’aleb’ li seraq’ chirix li Kolonel naq kixk’irtesiheb’ li kristiaan naru naxtenq’aheb’ li kok’al chixnimob’resinkil lix paab’aaleb’ chirix a’an. Eb’ li seraq’ a’in naru ajwi’ naxtenq’aheb’ chireek’ankil lix toq’ob’ahom ut lix rahom.
Kok’ k’anjel naru chi b’aanumank
-
Ilomaqeb’ li seraq’ chirix li Jesukristo naq kixk’irtesiheb’ li kristiaan sa’ Mateo 9:20–22, 27–30 ut Markos 5:22–23, 35–43 (malaj k’uteb’ li video “Jesús sana a una mujer de fe” ut “Jesús resucita a la hija de Jairo” sa’ ChurchofJesusChrist.org). Chan ru ke’xk’ut li kristiaan sa’eb’ li seraq’ a’an naq ke’paab’an re li Jesukristo? K’a’ru naqatzol chirix li Kolonel sa’eb’ li seraq’ a’an?
-
Patz’ reheb’ li kok’al naq te’xwotz xnumsihomeb’ naq eb’ a’an malaj ani chik neke’xnaw ru xk’ul jun li osob’tesihom re li tijonelil choq’ reheb’ li yaj. Chan ru xk’irtesiik malaj x’osob’tesiik? Ch’olob’ naq wan naq moko naraj ta li Qaawa’ naq taak’ulmanq li k’iraak, a’ut toj naru too’osob’tesiiq xb’aan lix rahom ut lix k’ojob’ahom.
Eb’ li kab’laju chi apostol naru nikine’xtzol chirix li Jesus.
Chan ru naq li tzolok chirixeb’ li kab’laju chi apostol sa’ lix kutankil li Kristo naru tixtenq’aheb’ li kok’al chixtawb’al ru chi us li k’a’ru neke’xb’aanu li kab’laju chi apostol sa’eb’ li kutan a’in?
Kok’ k’anjel naru chi b’aanumank
-
K’uteb’ xjalam-uucheb’ li apostol sa’ lix kutankil li Jesus ut sa’ li qakutankil (chi’ilmanq Li Kristo naxk’ojob’eb’ li apostol [Hu reheb’ li Jalam-uuch re li Evangelio, 38] ut jun Liahona puktesinb’il wi’ li jolomil ch’utub’aj-ib’ xnume’). Patz’ reheb’ li kok’al naq te’ril Mateo 10:7 re te’xnaw k’a’ru neke’xb’aanu li apostol (chi’ilmanq ajwi’ Lukas 9:1–2, 6; Tzol’leb’ ut Sumwank 107:23).
-
Patz’ reheb’ li kok’al naq te’xtz’iib’a chiru li pizarron lix k’ab’a’eb’ chixjunileb’ li xb’eenil apostol li neke’jultiko’ reheb’. Chirix a’an, patz’ reheb’ naq te’xye xk’ab’a’eb’ li apostol re li qakutankil. Kanab’eb’ chixjuntaq’eetankil li xe’xye rik’in Mateo 10:2–4 ut jun li Liahona puktesinb’il wi’ li jolomil ch’utub’aj-ib’ xnume’. Naru ajwi’ teeb’aanu jun li b’atz’unk b’ar wi’ eb’ li kok’al te’xye xk’ab’a’ li apostol naq neke’ril lix jalam-uuch. Naru xtawb’aleb’ li jalam-uuch sa’ ChurchofJesusChrist.org.
-
Wiib’ oxib’ kutan rub’elaj li tzolok, patz’ reheb’ junjunq li kok’al naq te’xkawresi rib’ re xwotzb’al jun seraq’ yeeb’il xb’aan jun reheb’ li yo’yookil apostol (naru xtawb’aleb’ li seraq’ sa’eb’ li Liahona). Chan ru naq li apostol a’an kiroksi li seraq’ re xwaklesinkil qach’ool chi wulak jo’ li Kolonel?
-
Wotz rik’ineb’ li kok’al naab’al reetalileb’ lix nawom xch’ooleb’ li apostol re li kutan a’in chirix li Kristo (chi’ilmanq li aatin re li jolomil ch’utub’aj-ib’ toje’ xnume’ malaj “Li Yo’yookil Kristo: Lix Ch’olob’ahomeb’ li Apostol” [ChurchofJesusChrist.org]).
-
Tenq’aheb’ li kok’al chixtzolb’al sa’ xk’a’uxleb’ Eb’ lix Raqalil li Paab’aal 1:6.
Re xtaaqenkil li Jesukristo, tento tinmayejaq.
Chan ru taatenq’aheb’ li kok’al chixtawb’al ru k’a’ru naraj naxye “xsachb’al” lix yu’ameb’ sa’ xtaaqenkil li Kolonel?
Kok’ k’anjel naru chi b’aanumank
-
Seraq’i reheb’ li kok’al junaq hoonal b’ar wi’ xakanab’ jun k’a’aq re ru re xk’ulb’al li k’a’ru chaab’il wi’chik. Patz’ reheb’ li kok’al naq te’xwotz xna’leb’eb’. Chirix a’an, ilomaq Lukas 9:23–25. Ch’olob’ naq li Jesus naraj naq wanq qach’ool chixkanab’ankil chixjunil re xtaaqenkil a’an. Us ta ink’a’ tixpatz’ naq taqamayeja li qayu’am, k’a’ru b’i’ naxpatz’ naq taqamayeja? (chi’ilmanq JJS, Mateo 16:26).
-
Tz’iib’aheb’ lix chaab’ilal li Kristo chiruheb’ kok’ hu, ut chiruheb’ jalan chik li kok’ hu, tz’iib’aheb’ li na’leb’ li neke’xpak’aliheb’ a’an (maare li rahok ut li b’ach’b’ach’il, li tuulanil ut li q’etq’etil, ut wankeb’ xkomon). Tz’iib’aheb’ li aatin kolok ut sachok chiru li pizarron, ut patz’ reheb’ li kok’al naq te’xtusub’eb’ li na’leb’ chiruheb’ li kok’ hu rub’el li wiib’ chi aatin a’in. K’e xhoonaleb’ li kok’al re naq te’xtz’il rixeb’ lix chaab’ilal li Kristo chiru li pizarron ut re naq te’xsik’ jun reheb’ re xk’anjelankil sa’ xyu’ameb’.
Xb’oqb’aleb’ chi tzolok sa’ kab’l
Patz’ reheb’ li kok’al naq te’roksi li perel re kok’ k’anjel re li xamaan a’in re xk’utb’al chiruheb’ lix junkab’al li seraq’ naq li Jesus kixk’irtesi lix rab’in laj Jairo.
Xkawresinkil qib’ jo’ aj k’utunel
Waklesiheb’ xch’ool chi oxloq’ink. Tenq’aheb’ li kok’al chixtawb’al ru naq jun na’leb’ aajel ru chirix li oxloq’ink a’an xk’oxlankil li qaChoxahil Yuwa’ ut li Jesukristo. Naru nakajultika reheb’ li kok’al naq te’oxloq’inq rik’in xb’ichankil malaj xtz’uyinkil jun li b’ich, malaj rik’in xk’utb’al jun xjalam-uuch li Jesus.