“20–26 marzo. Mateo 13; Lukas 8; 13: “Ani wan xxik, chi’ab’inq,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“20–26 marzo. Mateo 13; Lukas 8; 13” Kim, Taaqehin—Choq’ re li Tzoleb’aal reheb’ li Kok’al: 2023
20–26 marzo
Mateo 13; Lukas 8; 13
“Ani wan xxik, chi’ab’inq”
Eb’ li jaljookil ru aatin a’aneb’ esilal moko ch’a’aj ta xtawb’aleb’ ru li naru naxchap li rab’ihomeb’ li kok’al. Li tusleb’ aatin a’in ut Kim, Taaqehin—Choq’ reheb’ li komon ut li junkab’al naru tate’xtenq’a chiroksinkileb’ lix jaljookil ru aatin li Kolonel re xk’utb’al chiruheb’ li kok’al li yaal tento te’xnaw.
Xkanab’ankileb’ chi wotzok
K’am junjunq li k’a’aq re ru li naru tixtenq’aheb’ li kok’al chi jultiko’k reheb’ li jaljookil ru aatin sa’ Mateo 13, jo’ jun li iyaj, jun li q’ol, malaj jun li kaxon re b’ihomal. Patz’ reheb’ li kok’al naq te’xye k’a’ru najultiko’ reheb’ chirixeb’ li jaljookil ru aatin.
Xk’utb’al li tzol’leb’: Kok’al toj ka’ch’ineb’ xyu’am
Tento tinkawresi wib’ re xtzolb’aleb’ lix k’utum li Jesus.
Maare eb’ li kok’al toj kok’eb’ ink’a’ te’xtaw ru chixjunileb’ li eetalil sa’ li jaljookil ru aatin re laj awinel, a’b’an naru neke’xtzol li yaal moko ch’a’aj ta xtawb’al ru li nakak’ut chirix li evangelio. Chan ru taatenq’aheb’ chixtawb’al ru chi chaab’il naq li jaljookil ru aatin a’an wan xyaalal sa’ xyu’ameb’?
Kok’ k’anjel naru chi b’aanumank
-
K’ut reetalileb’ k’iila paay li ch’och’ (malaj xjalam-uuch li ch’och’) naq yookat chixk’osb’al ru Mateo 13:3–8. K’e jun li iyaj re li junjunq kok’al, ut patz’ reheb’ k’a’ raj ru te’xb’aanu re xtenq’ankil chi k’iik. Ch’olob’ naq lix nawom qach’ool chanchan li iyaj. Chan ru naqatenq’a chi k’iik li “iyaj” re lix nawom qach’ool?
-
Oksi li perel re kok’ k’anjel re li xamaan a’in re xtenq’ankileb’ li kok’al chixtawb’al ru k’a’ru neke’xk’ut li jar paay chi ch’och’ sa’ Mateo 13 chirix li qaam. Patz’ reheb’ li kok’al chan ru naraj li Jesus naq taawanq li qaam re xtzolb’aleb’ lix k’utum.
-
Yaab’asi Mateo 13:9, 15, ut patz’ reheb’ li kok’al naq te’xk’ut jalan jalanq xcha’alileb’ lix junxaqalil naq te’rab’i chi yaab’asiik lix k’ab’a’. Chan ru naru naqoksiheb’ lix cha’alileb’ li qajunxaqalil a’an re xtzolb’aleb’ lix k’utum li Jesus?
Lin Choxahil Yuwa’ naraj naq tinsik’ ru li us.
Junjunq reheb’ lix jaljookil ru aatin li Jesus neke’xk’ut naq sa’ roso’jik li kutan, li Dios tixjacheb’ ru laj maak rik’ineb’ li tiikeb’ xch’ool. Chan ru taawoksiheb’ li jaljookil ru aatin re xmusiq’ankileb’ li kok’al chixsik’b’al ru li us?
Kok’ k’anjel naru chi b’aanumank
-
Kanab’eb’ li kok’al chixk’utb’esinkil li jaljookil ru aatin re li trigo ut li yib’ aj pim (chi’ilmanq Mateo 13:24–30). Ch’olob’ naq li trigo nareetaliheb’ li kristiaan li neke’xsik’ ru li us, ut naq li yib’ aj pim (pim neke’sachok) nareetaliheb’ li kristiaan li ink’a’ neke’xb’aanu li us. Sa’ jun kutan, li qaChoxahil Yuwa’ tixch’utub’eb’ li kristiaan tiikeb’ xch’ool re te’wanq rik’in a’an.
-
Ye reheb’ li kok’al junjunq k’a’ru us xb’aanunkil ut junjunq ink’a’ us. Patz’ reheb’ li kok’al naq te’xye “b’aanuhom re trigo” naq taaye jun b’aanuhom us, ut “b’aanuhom re yib’ aj pim” naq taaye jun b’aanuhom ink’a’ us.
-
K’ameb’ xjalam-uuch lix toon li trigo, ut kanab’eb’ li kok’al chixyiib’ankileb’ sa’ jalam-uuch junjunq xyaalal chan ru naru neke’wan chi tiikeb’ xch’ool.
Lin wanjik jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an jun b’ihomal.
Chan ru taawoksiheb’ lix jalam-uuch li b’ihomal ut eb’ li ch’ina-usil q’ol re xtenq’ankileb’ li kok’al chixtawb’al ru lix loq’al li wank jo’ komon re lix Iglees li Kristo?
Kok’ k’anjel naru chi b’aanumank
-
Muqeb’ sa’ li tzoleb’aal lix jalam-uuch jun li kaxon re li b’ihomal ut re jun li q’ol, ut kanab’eb’ li kok’al chixtawb’aleb’. Oksiheb’ li jalam-uuch re k’utuk chirixeb’ li jaljookil ru aatin neke’tawman sa’ Mateo 13:44–46. Ye reheb’ li kok’al k’a’ut naq junaq tixk’e raj chixjunil li wan re, re xk’ulb’al jun xq’ol chaq’al ru malaj jun xb’ihomal sa’ jun li ch’och’? Ch’olob’ naq wan naq naqamayeja k’a’ruhaq chaab’il re xtawb’al li k’a’ru mas chaab’il wi’chik. Ye reheb’ li kok’al k’a’ut naq li evangelio mas nim xloq’al choq’ aawe.
-
K’e sa’ jun li kaxon k’iila k’a’aq re ru malaj jalam-uuch li neke’reetaliheb’ “li b’ihomal” sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, maare li Kolonel, li santil ochoch, malaj lix Hu laj Mormon. Patz’ reheb’ li kok’al naq te’xsik’ ru jun li k’a’aq re ru malaj jalam-uuch ut te’aatinaq chirix k’a’ut naq a’an jun li b’ihomal.
-
B’ichahomaq “Lix Iglees li Jesukristo” (B’ichleb’aal choq’ reheb’ li Kok’al, 48), ut patz’ reheb’ k’a’ut naq neke’xb’antioxi lix Iglees li Kolonel. Ch’olob’ xyaalaleb’ li osob’tesihom nakak’ul xb’aan naq laa’at komon re li Iglees.
Xk’utb’al li tzol’leb’: Kok’al ak ninqeb’
Tento tinkawresi li waam re xk’ulb’aleb’ lix k’utum li Jesus.
Chan ru taatenq’aheb’ li kok’al chixk’eeb’al reetal naq aajel ru lix q’unal xch’ooleb’ ut li wank chi wan rajomeb’ re naq taaruuq te’tzole’q xb’aan li Jesus?
Kok’ k’anjel naru chi b’aanumank
-
Ye re li junjunq chi kok’al naq taaril ru resil jun reheb’ li kaahib’ paay chi ch’och’ sa’ Mateo 13:4–8. Patz’ reheb’ naq te’xsik’ ut te’xwotz k’a’ru nak’ulman rik’in li iyaj sa’ lix paay li ch’och’ li xe’ril resil. Chan ru naq li qaam naru nawan jo’ li junjunq paay chi ch’och’? (chi’ilmanq Mateo 13:19–23).
-
K’ut chiruheb’ li kok’al xjalam-uuch jun li awimq. K’a’ru naraj ru li ch’och’ re naq te’k’iiq li iyaj aran? K’ut xjalam-uuch li ch’och’ pek ru ut li ch’och’ k’ix ru. K’a’ut naq ch’a’aj chiru jun li iyaj k’iik sa’eb’ li ch’och’ a’an? K’a’ru taqab’aanu re naq li qaam chanchanaq li chaab’il ch’och’ re naq tooruuq chixk’ulb’aleb’ lix k’utum li Kolonel?
-
Patz’ reheb’ li kok’al naq te’ril Mateo 13:15–17. Yiib’ xjalam-uuch jun li xsa’ uhej, jun li xik, ut jun li aamej chiru li pizarron. Chan ru naqoksiheb’ li k’a’aq re ru a’an re xtzolb’aleb’ lix k’utum li Jesus?
Naru ninsik’ ru li us, us ta li wankeb’ sa’ insutam ink’a’ neke’xb’aanu.
Naq nakawil ruheb’ li raqal a’an rik’in xk’oxlankileb’ li kok’al, k’a’ru li musiq’anb’il na’leb’ nakak’ul?
Kok’ k’anjel naru chi b’aanumank
-
Patz’ reheb’ li kok’al naq te’xyiib’ xjalam-uucheb’ jalan jalanq reetalileb’ li jaljookil ru aatin re li trigo ut li yib’ aj pim, li natawman sa’ Mateo 13:24–30, ut naq te’xwotz lix jalam-uuch sa’ li tzoleb’aal. Patz’ reheb’ naq te’xk’e xk’ab’a’eb’ lix jalam-uucheb’ rik’in lix ch’olob’ankil li jaljookil ru aatin li natawman sa’ Mateo 13:36–43. Wi na’ajman, ch’olob’ naq li yib’ aj pim a’an jun li pim nasachok.
-
Wi naru, k’ut jun xjalam-uuch li trigo ut li yib’ aj pim. Ch’olob’ naq li trigo ut li yib’ aj pim te’k’iiq sa’ komonil toj sa’ li q’olok (xraqik li ruchich’och’). A’an naxk’ut chiqu naq wanko rik’in li k’a’ru chaab’il ut rik’in li ink’a’ us li wan sa’ qasutam, ut tento naq taqasik’ ru li k’a’ru us. Patz’ reheb’ li kok’al naq te’xwotz chan ru naru te’xnaw b’ar wan li us ut li ink’a’ us.
Lin wanjik jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an jun b’ihomal.
Ma neke’xk’e reetal li kok’al li nakatzoleb’ naq lix wanjikeb’ jo’ komon re li Iglees a’an jun b’ihomal nim xloq’al? Maare li aatinak chirixeb’ li jaljookil ru aatin sa’ Mateo 13:44–46 naru naxtenq’aheb’ chixwotzb’al li neke’reek’a chirix lix Iglees li Kolonel.
Kok’ k’anjel naru chi b’aanumank
-
Patz’ reheb’ li kok’al naq te’ril xjuneseb’ Mateo 13:44–46 ut naq te’xseraq’i li jaljookil ru aatin rik’ineb’ ajwi’ li raatineb’ re jun chik li komon sa’ li tzoleb’aal.
-
Set naab’al li sirso li te’reetali li kok’ tumin, ut k’eheb’ sa’ jun li kaxon re b’ihomal. Ye reheb’ li kok’al naq te’xxok jun li tumin ut naq te’xyiib’ jun li jalam-uuch malaj te’xtz’iib’a chiru a’an jun na’leb’ li mas nawulak chiruheb’ chirix li wank jo’ komon re li Iglees. Patz’ reheb’ li kok’al naq te’xwotz li xe’xk’e chiru lix kok’ tumineb’.
-
B’oq jun li komon re li teep chixwotzb’al resilal lix jalajik xch’ool rik’ineb’ li kok’al ut chixyeeb’al li k’a’ru kixmayeja re ok sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Malaj patz’ reheb’ li kok’al naq te’aatinaq chirixeb’ lix mayej choq’ re li Qaawa’ ut lix Iglees.
Xb’oqb’aleb’ chi tzolok sa’ kab’l
Patz’ reheb’ li kok’al naq te’xwotz rik’in lix junkab’aleb’ jun reheb’ li jaljookil ru aatin li xe’xtzol sa’ li Tzoleb’aal reheb’ li Kok’al.
Xkawresinkil qib’ jo’ aj k’utunel
Eb’ li kok’al nawulak chiruheb’ xwotzb’al li k’a’ru yookeb’ chixtzolb’al. Us ta toj kok’eb’, naru neke’xkawob’resiheb’ li komon sa’ lix junkab’aleb’. Waklesiheb’ xch’ool chixwotzb’al rik’ineb’ lix junkab’al li neke’xtzol sa’ li Tzoleb’aal reheb’ li Kok’al. (Chi’ilmanq Li k’utuk jo’ li Kolonel, 30.)