Matxuwak, xb‘aan laj Michael Malm

13–19 marzo

Mateo 11–12; Lukas 11

“Laa’in texinhiltasi”

Li na’leb’ re k’utuk sa’ li tusleb’ aatin a’in naru nakate’xtenq’a chixtawb’al aana’leb’ laa’at. Naru nakajaleb’ a’ yaal li neke’raj ru li kok’al nakatzoleb’.

Xkanab‘ankileb‘ chi wotzok

B’oqeb’ li kok’al chixwotzb’al li naru neke’xb’aanu re roxloq’inkil li Qaawa’ chiru li hilob’aal kutan.

Xk’utb’al li tzol’leb’: Kok’al toj ka’ch’ineb’ xyu’am

Mateo 11:28–30

Li Jesus tinixtenq’a naq yooqin chi xik rik’in a’an.

Eb’ li kok’al naru neke’reek’a li tuqtuukilal rik’in xnawb’al naq li Jesus tixtenq’aheb’ rik’ineb’ li riiq naq neke’xsik’ a’an.

Kok’ k’anjel naru chi b’aanumank

• Yaab’asi Mateo 11:28–30, ut k’ut xjalam-uucheb’ li b’ooyx natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Patz’ reheb’ li kok’al naq te’xk’ut chi ru’uj ruq’eb’ li b’ooyx ut li iiqleb’. Ch’olob’ naq eb’ li b’ooyx b’ak’b’ookeb’ rik’in che’ naru neke’xkelo k’iila aalil chiru wi’chik li neke’xkelo raj chi jachjookeb’ ru. Ch’olob’ xyaalal naq wi naqeek’a xrahil qach’ool, wi wan qak’a’uxl, malaj wi wan li qaxiw, naru naqasik’ li Jesus ut a’an tooxtenq’a.

• Patz’ re jun li ch’ina al naq tixtaqsi jun li k’a’aq re ru jwal aal. Naq ch’a’ajaq chiru, yeechi’i laa tenq’ re. Chan ru nokoxtenq’a li Jesus chixb’aanunkil li k’a’aq re ru ch’a’aj? Wotz junaq aanumsihom naq xaweek’a li Jesus chatenq’ankil rik’in li k’a’ru ch’a’aj, ut patz’ reheb’ li kok’al ma xe’xnumsi ajwi’ a’an.

Mateo 12:1–13

Naru ninsantob’resi li hilob’aal kutan.

Chan ru naq naru nakatzoleb’ li kok’al chirix li hilob’aal kutan ut k’a’ut naq naqasantob’resi?

Kok’ k’anjel naru chi b’aanumank

• Yaab’asi Mateo 12:10–13. Patz’ reheb’ li kok’al naq te’xaqliiq ut te’chunlaaq rajlal sut naq laa’at taaye “hilob’aal kutan,” ut ka’suti rik’ineb’ li ch’ol aatin: “Chaab’il xb’aanunkil li us sa’eb’ li hilob’aal kutan” (Mateo 12:12). K’a’ru neke’xk’oxla naq naraj naxye a’an?

• K’ut jun li ajleb’aal kutan chiruheb’ li kok’al, ut k’ut li hilob’aal kutan chi sa’. K’a’ru naqab’aanu sa’ xkomoneb’ chik li kutan sa’ li xamaan? K’a’ru naru naqab’aanu chiru li hilob’aal kutan re naq jalanaq chiruheb’ chik xkomon li kutan? (chi’ilmanq Isaias 58:13–14).

• Patz’ reheb’ li kok’al naq te’xyiib’ sa’ jalam-uuch eb’ li chaab’il ka’a’q re ru naru neke’xb’aanu sa’ li hilob’aal kutan (chi’ilmanq li perel re kok’ k’anjel re li xamaan a’in).

• Patz’ reheb’ li kok’al naq te’xk’oxlaheb’ li eek’asink-ib’ li te’tenq’anq reheb’ chixjultikankil chan ru te’xkawresi rib’ choq’ re li hilob’aal kutan naq yooqeb’ chixb’ichankil “Sabado, jun kutan chaabʼil” (B’ichleb’aal choq’ reheb’ li Kok’al, 105).

• Yiib’ xjalam-uuch li sa’ uhej, li xik, li ehej, ut eb’ li uq’ej chiru li pizarron. Patz’ reheb’ li kok’al naq te’xye aawe k’a’ru naru neke’xb’aanu li junjunq xcha’alileb’ li junxaqalil a’in re xsantob’resinkil li hilob’aal kutan.

Lukas 11:11–13

Li qaChoxahil Yuwa’ naxk’eheb’ li qachaab’il maatan.

Li raatin li Kolonel sa’ Lukas 11:11–13 naru tixtenq’aheb’ li kok’al chixtawb’al ru naq li qaChoxahil Yuwa’ naxraheb’ ut naraj rosob’tesinkileb’.

Kok’ k’anjel naru chi b’aanumank

• Oksiheb’ li kok’ k’anjeleb’aal re xk’utb’al li kixk’ut li Kolonel sa’ Lukas 11:11–13. Naru nakak’e jun li pek chi sa’ xna’aj li kaxlan wa, malaj naru nakak’e xjalam-uuch jun li xook’ chi sa’ xna’aj li mol. Kanab’eb’ li kok’al chixq’ehinkil k’a’ru wan chi sa’, ut chirix a’an k’ut a’an chiruheb’. Ye reheb’ naq te’xk’e li kaxlan wa malaj li mol sa’ xna’aj li pek malaj li jalam-uuch. Yaab’asi Lukas 11:11–13 ut wotz lix nawom aach’ool naq li qaChoxahil Yuwa’ nokoxra, naxsume li qatij, ut nokorosob’tesi rik’in lix Musiq’.

• B’ichahomaq jun li b’ich chirix lix rahom li Dios, maare “Raabʼilin xbʼaan li Dios saʼ choxa” (B’ichleb’aal choq’ reheb’ li Kok’al, 16–17). B’ar wankeb’ junjunq reetalil li chaab’il maatan naxk’e li Dios qe? Patz’ reheb’ naq te’xyiib’ xjalam-uuch jun rosob’tesihom li qaChoxahil Yuwa’ li neke’xb’antioxi.

Xk’utb’al li tzol’leb’: Kok’al ak ninqeb’

Mateo 11:28–30

Li Jesus tinixtenq’a naq yooqin chi xik rik’in a’an.

Chan ru taatenq’aheb’ li kok’al chixtawb’al ru naq li Kolonel tixk’e xhiilaleb’ chiruheb’ lix ch’a’ajkilal a’ yaal jo’ neke’chal chiru a’an?

Kok’ k’anjel naru chi b’aanumank

• Patz’ reheb’ li kok’al naq te’xye resil jun li hoonal b’ar wi’ xe’wan xk’a’uxl malaj xxiw. Patz’ reheb’ naq te’ril Mateo 11:28–30 re xtawb’al li na’leb’ naru tixtenq’aheb’ sa’eb’ li hoonal jo’eb’ a’an. Chan ru naq li Kolonel “nokoxhiltasi”? (raqal 28).

• Patz’ reheb’ li kok’al naq te’xyiib’ xjalam-uuch li k’a’ru yookeb’ chixb’aanunkil re chalk chiru li Kristo ut tzolok chirix a’an.

• Tenq’aheb’ li kok’al chixtzolb’al sa’ xk’a’uxleb’ li xkaa xraqalil li paab’aal. Ch’olob’ chiruheb’ chan ru naq li xb’eenil na’leb’ ut k’ojob’anb’il k’anjel re li evangelio nokohe’xtenq’a chixk’ulub’ankil lix b’oqom li Jesus, “Chalqex wik’in” (Mateo 11:28).

Mateo 12:1–13

Li hilob’aal kutan a’an jun li kutan re xb’aanunkileb’ chaab’il k’anjel li tinixnach’ob’resi chi us rik’in li Dios.

Eb’ li kok’al li nakatzoleb’ te’kawob’resiiq naq laa’at taajultika li rajom ut li rosob’tesihom lix santob’resinkil li hilob’aal kutan.

Kok’ k’anjel naru chi b’aanumank

• Patz’ re jun li ch’ina al naq tixb’aanu rib’ jo’ li winq li kik’irtesiik li ruq’ xb’aan li Kolonel (chi’ilmanq Mateo 12:10–13). Jun chik li ch’ina al naru tixpatz’ re k’a’ru kixk’ul sa’ li hoonal a’an.

• Ilomaq Mateo 12:12 sa’ komonil. B’ar wan junjunq reheb’ li chaab’il k’anjel li naru naqab’aanu sa’ li hilob’aal kutan? Kanab’eb’ li kok’al chixyiib’ankil lix na’leb’eb’ sa’ jalam-uuch sa’ li perel re kok’ k’anjel re li xamaan a’in, chixsetb’aleb’ lix cha’alil, ut chixjalinkil ruheb’ li kok’ setb’il hu ut chixtusub’ankileb’ ru.

• Muqeb’ xjalam-uucheb’ li kristiaan li yookeb’ chixb’aanunkil li k’a’aq re ru naxk’ut lix rahomeb’ choq’ re li qaChoxahil Yuwa’ sa’ li hilob’aal kutan. Patz’ reheb’ li kok’al naq te’xtaw li jalam-uuch ut naq te’xwotz chan ru naq xb’aanunkil li k’a’aq re ru li wan sa’eb’ li jalam-uuch naxk’ut li qarahom choq’ re li Dios.

Eb’ li tzolom neke’xkux li trigo chiru li hilob’aal kutan, xb’aan laj James Tissot

Lukas 11:37–42

Tento naq saq ru lin b’aanuhom jo’ ajwi’ lin ch’ool.

Li Kolonel kixk’ut naq maak’a’ aj-e naq taak’utunq li qatiikilal chiruheb’ li qas qiitz’in. Tento ajwi’ naq saqaq ru li qak’oxlahom, li qeek’ahom, ut li qab’aanuhom sa’ muqmu.

Kok’ k’anjel naru chi b’aanumank

• Re xk’utb’esinkil li na’leb’ k’utb’il sa’eb’ li raqal a’in, k’ut chiruheb’ li kok’al jun li sek’ li saq ru rix, a’ut tz’aj lix sa’. Tenq’aheb’ chixtz’ilb’al rix k’a’ru nareetali “li rix li sek’.” K’a’ru nareetali “lix sa’ ”? K’a’ut naq aajel ru xch’ajb’al li rix jo’ ajwi’ lix sa’?

• Ilomaq sa’ komonil junjunq reheb’ li raqal sa’ li loq’laj hu li neke’xjultika xyaalal li tiikilal sa’ li qach’ool jo’ ajwi’ rik’in li qab’aanuhom—maare Salmos 24:3–5; Mateo 15:7–8; Moroni 7:6–9. Tz’ilomaq rix k’a’ut naq li Kolonel naraj naq saqaq ru sa’ musiq’ej li qach’ool ut li qab’aanuhom sa’ muqmu.

Xb’oqb’aleb’ chi tzolok sa’ kab’l

B’oqeb’ li kok’al chi aatinak rik’ineb’ lix junkab’al chirix xsantob’resinkil li hilob’aal kutan.

Xkawresinkil qib’ jo’ aj k’utunel

Roksinkileb’ li patz’om. “Jun patz’om li naxb’oqeb’ li komon sa’ li tzoleb’aal chixyeeb’al jun na’leb’ re li evangelio rik’in tz’aqal li raatin—q’axal wi’chik wi patz’b’il sa’ xtiklajik li tzolok—naru tatxtenq’a chixk’eeb’al reetal jarub’ jo’ najtil textzoloq chirix li na’leb’ a’an sa’ li tzolok” (Li k’utuk jo’ li Kolonel, 32).