li Jesus naxwaklesi jun winq sa’ xch’aat

27 febrero–5 marzo

Mateo 8; Markos 2–4; Lukas 7

“Laa paab’aal xkolok aawe”

Naq nakawil Mateo 8; Markos 2–4; ut Lukas 7 chiru li xamaan a’in, k’oxlaheb’ li kok’al nakatzoleb’. Patz’ rik’in tijok naq li Santil Musiq’ej tatxmusiq’a rik’in li na’leb’ li tixtenq’aheb’ chixk’eeb’al reetal li yaal sa’eb’ li ch’ol a’in.

reetalil li wotzok

Xkanab’ankileb’ chi wotzok

Patz’ reheb’ li kok’al naq te’xwotz jun seraq’ b’ar wi’ li Jesus kixb’aanu jun li sachb’a-ch’oolej (chi’ilmanq xtusulal li sachb’a-ch’oolej sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Naru ajwi’ nakak’ut xkomon chik li jalam-uuch (maare li wankeb’ sa’ Hu reheb’ li Jalam-uuch re li Evangelio, 40).

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Mateo 8; Markos 2–3; Lukas 7

Li Jesus wan lix wankil re xb’aanunkil li sachb’a-ch’oolej.

Naq yookat chirilb’al resileb’ lix sachb’a-ch’oolej li Kolonel re k’irtesink, tz’il rix b’ar wankeb’ li sachb’a-ch’oolej taawotz. Chan ru taatenq’aheb’ li kok’al chixtawb’al ru lix k’anjel li paab’aal sa’eb’ li sachb’a-ch’oolej kixb’aanu li Jesus?

Kok’ k’anjel naru chi b’aanumank

• Wotz li seraq’ re li winq sik li natawman sa’ Markos 2:1–12. Wi nakawaj aatenq’, sik’ sa’ “Ch’ol 23: Li winq ink’a’ naru chi b’eek,” (sa’ Eb’ li Esilal sa’ li Ak’ Chaq’rab’, 57–58, malaj li video sa’ ChurchofJesusChrist.org). Ch’olob’ naq jun li winq sik ink’a’ naru chi b’eek. Tenq’aheb’ chixk’eeb’al reetal naq li winq a’an kik’irtesiik xb’aan li Kolonel.

• Kanab’eb’ li kok’al chi aatinak chirix jun li hoonal naq yajeb’ chaq. Seraq’i jun reheb’ li resilal naq li Jesus kixk’irtesiheb’ li yaj; junjunq reheb’ wan sa’ Mateo 8:1–4, 5–13, 14–15; Markos 3:1–5; Lukas 7:11–16. Patz’ reheb’ li kok’al naq te’xseraq’i wi’chik li esil rik’ineb’ li raatin a’an. Ch’olob’ xyaalal naq lix wankilal li Jesus naru chiqak’irtesinkil, chiqosob’tesinkil, ut chixk’ojob’ankil qach’ool.

Mateo 8; Markos 2–3; Lukas 7

Naru nink’utb’esi lin rahom choq’ reheb’ li kristiaan jo’ kixb’aanu li Jesus.

Li Jesus kixk’ut xnimal xrahom naq kixk’irtesiheb’ li yaj ut li tawasinb’il. Tz’il rix chan ru taak’ut chiruheb’ li kok’al chan ru xk’utb’al xchaab’ilaleb’ reheb’ li kristiaan neke’raj ru.

Kok’ k’anjel naru chi b’aanumank

• Sik’ ru jun malaj wiib’ oxib’ reheb’ li seraq’ naq li Jesus kixk’e xrahom re li ani naraj ru; maare li wankeb’ sa’ Mateo 8:1–4, 5–13, 14–15; Markos 2:1–12; 3:1–5; Lukas 7:11–16. (Chi’ilmanq ajwi’ li video “La viuda de Naín,” sa’ ChurchofJesusChrist.org.) Seraq’i jun hoonal naq anihaq chik xk’ut xrahom choq’ aawe, ut k’a’ru xaweek’a. Patz’ reheb’ li kok’al naq te’xwotz xnumsihomeb’ a’an.

• K’ut li video “Gordon Hinckley: Lecciones Que Aprendí En La Niñez” malaj li video “El abrigo” (ChurchofJesusChrist.org). Chan ru naq eb’ li kok’al sa’ li video ke’xtaaqe lix b’aanuhom li Jesus? Patz’ reheb’ li kok’al naq te’xwotz jalan chik hoonal naq anihaq naraj ru tenq’aak. K’a’ru naru taqab’aanu re xtenq’ankil?

• B’ichahomaq jun li b’ich chirix xk’utb’al li chaab’ilal, maare “Wik’in laa’in natikla li chaab’ilal” (B’ichleb’aal choq’ reheb’ li Kok’al, 83).

li Jesus naxch’anab’ li kaq-sut-iq’

Chalen li xiw toj li paab’aal, xb’aan laj Howard Lyon

Markos 4:35–41

Naq naweek’a inxiw malaj wankin sa’ xiwxiw, li Jesus naru nikinixtenq’a chireek’ankil tuqtuukilal.

Li seraq’ naq li Jesus kixch’anab’ li kaq-sut-iq’ naru naxtenq’aheb’ li kok’al chixnawb’al naq a’an naru chixk’eeb’al xtuqtuukilaleb’ naq neke’reek’a xxiw.

Kok’ k’anjel naru chi b’aanumank

• Tenq’aheb’ li kok’al chixk’oxlankil naq wankeb’ sa’ jun li jukub’ naq yookat chirilb’al Markos 4:35–41. (Chi’ilmanq ajwi’ “Ch’ol 21: Li Jesus naxtaqlaheb’ li iq’ ut eb’ lix b’oolam li palaw,” sa’ Eb’ li Esilal sa’ li Ak’ Chaq’rab’, 53, malaj li video sa’ ChurchofJesusChrist.org.) Patz’ reheb’ li kok’al naq te’xch’olob’ chan raj ru xe’reek’a wi ta xe’wan aran. Jo’q’e reek’ahomeb’ xxiw li kok’al? Chan ru xe’xtaw li tuqtuukilal?

• Ye reheb’ li kok’al naq te’xb’aanu lix yaab’ jun li kaq-sut-iq’, ut naq te’xkanab’ naq taayeemanq “Matchoqink, ch’anaqat.” Ch’olob’ xyaalal naq jo’ li Jesus naru naxk’e qatuqtuukilal naq wan li kaq-sut-iq’ chirix kab’l, naru naxk’e li tuqtuukilal sa’ li qaam naq ra li qach’ool.

• K’ut chiruheb’ li kok’al li eek’asink-ib’ li tixk’ul rib’ rik’in li rox raqal re li b’ich “Ye we resil li Jesus” (B’ichleb’aal choq’ reheb’ li Kok’al, 36), ut b’ichahomaq naq nekereek’asi eerib’.

reetalil li k’utuk

Xk’utb’al li tzol’leb’: Kok’al ak ninqeb’

Mateo 8; Markos 2–3; Lukas 7

Li Jesus naru naxk’e chi uxmank li sachb’a-ch’oolej sa’ lin yu’am naq wan lin paab’aal chirix a’an.

Li Jesus kixk’e chi uxmank naab’al li sachb’a-ch’oolej chiru lix k’anjel sa’ li ruchich’och’. Chan ru taatenq’aheb’ li kok’al chixk’eeb’al reetal naq eb’ li sachb’a-ch’oolej neke’uxman sa’eb’ li qakutan?

Kok’ k’anjel naru chi b’aanumank

• Patz’ reheb’ li kok’al naq te’xsik’ ru jun reheb’ li sachb’a-ch’oolej a’in re naq te’ril ut te’xyiib’ xjalam-uuch: Mateo 8:1–4, 5–13, 14–15; Markos 2:1–12; 3:1–5; Lukas 7:11–16. Patz’ reheb’ li kok’al naq te’xch’olob’eb’ lix jalam-uuch chiruheb’ li rech kok’alil. K’a’ru naqatzol chirix li Jesus sa’eb’ li seraq’ a’an?

• Patz’ reheb’ li kok’al naq te’xk’utb’esi li neke’reek’a naq yajeb’, naq raheb’ xch’ool, naq wankeb’ xxiw, malaj naq yookeb’ xk’a’uxl. Chan ru nokoxtenq’a li Jesus naq wankeb’ li qeek’ahom a’an? Ch’olob’ xyaalal naq li Jesus naru tixtenq’aheb’ li kok’al sa’ chixjunileb’ li hoonal a’an.

• Patz’ reheb’ li kok’al naq te’xwotz xnumsihomeb’ naq eb’ a’an malaj anihaq chik xk’ul jun li osob’tesihom re li tijonelil. Chan ru xk’irtesiik malaj x’osob’tesiik li kristiaan a’an?

Markos 2:15–17; Lukas 7:36–50

Li Jesus nokoxra us ta nokomaakob’k, ut a’an naraj qatenq’ankil chixjalb’al qak’a’uxl.

Li na’leb’ sa’ Markos 2:15–17 ut Lukas 7:36–50 naru tixtenq’aheb’ li kok’al chixtawb’al ru naq li Jesukristo nokoxra us ta nokomaakob’k. A’an naraj qatenq’ankil chixjalb’al qak’a’uxl ut chi nach’ok rik’in a’an.

Kok’ k’anjel naru chi b’aanumank

• Tz’iib’a chiru li pizarron K’a’ru nareek’a li Jesus chirix li maak? ut K’a’ru nareek’a li Jesus naq nokomaakob’k? Patz’ reheb’ li kok’al naq te’xtz’il rixeb’ li patz’om a’in naq te’ril Markos 2:15–17 sa’ komonil, toja’ naq te’xwotz xna’leb’. (Maare us naq teeril sa’ komonil “Aj titz’ol toj (Publicano)” sa’ li K’utul Raqal reheb’ li Loq’laj Hu. K’a’ut naq nim xwankil xnawb’al naq li Jesus nokoxra, us ta moko tz’aqal ta qe qu? Chan ru naq a’in nokoxtenq’a naq naqaj ru xjalb’al qak’a’uxl?

• Wiib’ oxib’ kutan rub’elaj li tzolok, patz’ re jun ch’ina al ut jun xkomon re lix junkab’al naq te’xkawresi rib’ re xwotzb’al sa’ li tzoleb’aal li seraq’ sa’ Lukas 7:36–50. Naru te’xyiib’eb’ xjalam-uuch li seraq’ re xk’utb’al sa’ li tzoleb’aal. Ch’olob’ chiruheb’ li kok’al li maare naraj li Qaawa’ naq taqatzol rik’in li seraq’ a’in.

Markos 4:35–41

Naq naweek’a inxiw malaj wankin sa’ xiwxiw, li Jesus naru nikinixtenq’a chireek’ankil tuqtuukilal.

Aajel ru naq eb’ li kok’al te’xnaw naq li Kolonel naru naxk’e xtuqtuukilaleb’ naq neke’tawman sa’ lix kaq-sut-iq’ li yu’am—anajwan ut chalel.

Kok’ k’anjel naru chi b’aanumank

• Patz’ re jun li ch’ina al naq taaroksi Markos 4:35–41 ut li jalam-uuch Li Jesus naxch’anab’ li kaq-sut-iq’ (Hu reheb’ li Jalam-uuch re li Evangelio, 40) re xseraq’inkil naq li Jesus kixch’anab’ li kaq-sut-iq’. Patz’ reheb’ li kok’al naq te’xch’olob’ chan raj ru xe’reek’a wi ta xe’wan aran.

• Patz’ reheb’ li kok’al naq te’xwotz li numsihom b’ar wi’ xe’reek’a li tuqtuukilal chirix naq xe’tijok re xpatz’b’al lix tenq’. Jultika reheb’ naq li tuqtuukilal a’an nachal rik’in li Kolonel.

• K’e reheb’ li junjunq chi kok’al jun li ch’ina hu setb’il jo’ li choql rik’in hab’, ut patz’ reheb’ naq te’xtz’iib’a chiru jun li yale’k li taawanq raj re anihaq. K’e chixjunileb’ li choql chiru li pizarron, chiru jun lix jalam-uuch li Kolonel. Kanab’ jun li ch’ina al chirisinkil jun reheb’ li choql ut chixsik’b’al xyaalal chan raj ru naru naqatenq’a ani li yalb’il rix chi jo’kan chixtawb’al li tuqtuukilal. Naq ak xe’risi chixjunileb’ li choql, ch’olob’ xyaalal lix wankilal li Kolonel re xch’anab’ankileb’ li kaq-sut-iq’ sa’ li qayu’am.

reetalil li tzolok

Xb’oqb’aleb’ chi tzolok sa’ kab’l

Tenq’aheb’ li kok’al chixtz’iib’ankil resil jun li k’anjel li te’xb’aanu choq’ re jun kristiaan chiru li xamaan a’in.

Xkawresinkil qib’ jo’ aj k’utunel

Eb’ li kok’al aj ajeb’ ru. Maare wan naq taaweek’a naq lix ajikeb’ ru li kok’al a’anaq jun ramleb’ re te’tzoloq. A’b’anan, naru nakawoksi lix metz’eweb’ rik’in xb’oqb’aleb’ chixk’utb’esinkil jun seraq’ malaj reek’asinkileb’ rib’ jo’ chanru naxk’ul rib’ rik’in jun li b’ich malaj jun li raqal sa’eb’ li loq’laj hu. (Chi’ilmanq Li k’utuk jo’ li Kolonel, 25.)

perel re kok’ k’anjel: naq naweek’a inxiw malaj wankin sa’ xiwxiw, li Jesus naru nikinixtenq’a chireek’ankil tuqtuukilal