“20–26 febrero. Mateo 6–7: “Kixtzoleb’ chi wan xwankil,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“20–26 febrero. Mateo 6–7,” Kim, Taaqehin—Choq’ re li Tzoleb’aal reheb’ li Kok’al: 2023
Li Jesus kixtzoleb’ li tenamit chire li palaw, xb’aan laj James Tissot
20–26 febrero
Mateo 6–7
“Kixtzoleb’ chi wan xwankil”
Re xtikib’ankil, il Mateo 6–7 naq yookat chixk’oxlankileb’ li kok’al li nakatzoleb’. B’ar wan reheb’ li esil reheb’ li ch’ol a’an aajel ru naq te’rab’i? Kim, Taaqehin—Choq’ reheb’ li komon ut li junkab’al ut li tusleb’ aatin a’in naru naxk’eheb’ laa na’leb’ re li k’utuk.
Xkanab’ankileb’ chi wotzok
Patz’ reheb’ li kok’al naq te’xwotz li xe’xb’aanu sa’ li xamaan xnume’ re wank jo’ jun saqen malaj eetalil chiru jun kristiaan.
Xk’utb’al li tzol’leb’: Kok’al toj ka’ch’ineb’ xyu’am
Naru nintijok chiru lin Choxahil Yuwa’ jo’ kixb’aanu li Jesus.
Eb’ li kok’al naru neke’xtzol li tijok naq neke’rab’i lix tijeb’ li komon. Chan ru taatenq’aheb’ chi tzolok chirix lix tij li Jesukristo sa’eb’ li raqal a’an?
Kok’ k’anjel naru chi b’aanumank
-
Tzol lix k’utum li Jesus chirix li tijok li natawman sa’ Mateo 6:5–13. Naru nakawoksi li “Ch’ol 20: Li Jesus nak’utuk chirix li tijok,” (sa’ Eb’ li Esilal sa’ li Ak’ Chaq’rab’, 51–52, malaj li video sa’ ChurchofJesusChrist.org).
-
Oksi li perel re kok’ k’anjel re li xamaan a’in re xtenq’ankileb’ li kok’al chixjultikankil lix cha’alil li tij.
-
Yiib’ lix jalam-uuch li ruq’eb’ chixjunileb’ li kok’al sa’ jun perel li hu. Aatinanqex chirix li tento taqab’aanu rik’ineb’ li quq’ ut li qatel naq nokotijok. Sa’ li junjunq chi jalam-uuch, tz’iib’a k’a’ru naru naqab’aanu re xk’utb’al li oxloq’ naq nokotijok (maare xxulub’ankil li qajolom, xmutz’b’al li qu, ut wan chik xkomon).
-
B’ichahomaq jun li b’ich chirix li tijok, maare “Ninmutz’ li wu” (B’ichleb’aal choq’ reheb’ li Kok’al, 18), ut wotz lix nawom aach’ool chirix lix wankilal li tijok. Patz’ reheb’ li kok’al naq te’xwotz ajwi’ xnumsihomeb’ rik’in li tijok.
Naru nintijok chiru lin Choxahil Yuwa’ jo’ kixb’aanu li Jesus.
Tento tinb’aanu reheb’ lin komon jo’ nawulak raj chiwu naq te’xb’aanu we laa’in.
Lix k’utum li Jesus sa’ Mateo 7:12—li na’no ajwi’ ru jo’ li ooril taqlanb’il—naxk’e qab’eresinkil re chan ru wank rik’ineb’ li qakomon. K’a’ru taatenq’anq reheb’ li kok’al li nakatzoleb’ chixyu’aminkil li na’leb’ a’in?
Kok’ k’anjel naru chi b’aanumank
-
Yaab’asi Mateo 7:12, ut k’os ru li naxye rik’in aatin moko ch’a’aj ta li naru te’xtaw ru li kok’al. Tenq’aheb’ li kok’al chixk’oxlankil chi jalan jalanq xyaalal xchoyb’al jun li ch’ol aatin jo’ a’in: “Nawulak chiwu naq eb’ li jun siir chik choq’ we.” Chirix li junjunq chi ch’ol aatin, kanab’eb’ chixka’sutinkil aawik’in, “Jo’kan naq laa’in tento choq’ reheb’ li jun siir chik.”
-
B’ichahomaq jun li b’ich chirix li na’leb’ wan sa’ Mateo 7:12, maare “Chiqara li qas qiitzʼin” (B’ichleb’aal choq’ reheb’ li Kok’al, 39). Tenq’aheb’ chireek’asinkil rib’ rik’in li b’ich. Patz’ reheb’ li kok’al k’a’ru neke’xtzol rik’in li Kolonel chirix rilb’aleb’ li qas qiitz’in.
-
B’oqeb’ li kok’al chixyeeb’al chaab’il k’a’aq re ru li neke’xb’aanu li komon sa’ xjunkab’aleb’ choq’ reheb’. Yaab’asi Mateo 7:12 ut patz’ reheb’ li kok’al naq te’xye li chaab’il k’a’aq re ru li naru neke’xb’aanu choq’ reheb’ lix junkab’al.
Naru ninkab’lak sa’ xb’een jun kawil k’ojleb’aal naq nintaaqe li Jesus.
Roksinkil lix jaljookil ru aatin li Kolonel chirix xkab’lankil jun li ochoch sa’ xb’een li samahib’ malaj sa’ xb’een li pek naru naq chaab’ilaq a’an re xk’utb’al chiruheb’ li kok’al naq aajel ru li k’anjelak a’ yaal jo’ li k’a’ru naqatzol.
Kok’ k’anjel naru chi b’aanumank
-
B’ichahomaq “Li ochoch sa’ xb’een li pek” (B’ichleb’aal choq’ reheb’ li Kok’al, 132), ut b’aanuhomaq li eek’asink-ib’ li tixk’ul rib’ rik’in li raatinul li b’ich.
-
Oksi Mateo 7:24 re k’utuk chirix lix jalanileb’ li winq chaab’il xna’leb’ ut li winq maak’a’ xna’leb’. Patz’ reheb’ li kok’al naq te’xk’oxla naq yookeb’ chixkab’lankil jun li kab’l. Chan ru naru nokowan jo’ li winq chaab’il xna’leb’?
-
Kanab’eb’ li kok’al chixyiib’ankileb’ xjalam-uuch li jaljookil ru aatin chirix li winq chaab’il xna’leb’ ut li winq maak’a’ xna’leb’.
Xk’utb’al li tzol’leb’: Kok’al ak ninqeb’
Sa’ li aatin jultikanb’il chiru li tzuul wan li esil choq’ we.
Sa’eb’ li ch’ol a’in wan naab’al li esil li naru na’oksiman choq’ reheb’ li kok’al li nakatzoleb’. Ileb’ ru rik’in xk’oxlankileb’ li kok’al. K’a’ru li mas nawulak chawu?
Kok’ k’anjel naru chi b’aanumank
-
Jultika reheb’ li kok’al naq ak yookeb’ chixtzolb’al li kixk’ut li Jesus sa’ li aatin jultikanb’il chiru li tzuul. K’a’ru li na’leb’ najultiko’ reheb’ li xe’xtzol sa’ li xamaan xnume’?
-
Tz’iib’a chiru li pizarron junjunq li ch’ol aatin re li aatin jultikanb’il chiru li tzuul ut junjunq chik li ch’ol aatin li moko neke’el ta chaq sa’ li loq’laj hu. Patz’ reheb’ li kok’al naq te’xye b’ar wankeb’ li ch’ol aatin li neke’el chaq sa’ li aatin jultikanb’il chiru li tzuul. Patz’ reheb’ naq te’xwotz k’a’ru neke’xtzol sa’eb’ li k’utum a’an.
-
Sik’ ru junjunq li raqal sa’ Mateo 6–7 li nakak’oxla naq wanq xyaalal choq’ reheb’ li kok’al. Tz’iib’a rajlileb’ li raqal chiru kok’ hu, ut muqeb’ sa’ li tzoleb’aal. Kanab’eb’ li kok’al chixtawb’aleb’, chirilb’al ruheb’ li raqal, ut chixch’olob’ankil k’a’ut naq eb’ li k’utum a’an aajel ru choq’ reheb’.
-
Wotz jun raqal mas nawulak chawu sa’ Mateo 6–7, ut ch’olob’ k’a’ut naq nawulak chawu. Wi wan junaq raqal nawulak chiruheb’ li kok’al, patz’ reheb’ naq te’xwotz k’a’ut naq nawulak chiruheb’ ut k’a’ru neke’xtzol rik’in a’an.
-
B’ichahomaq jun li b’ich li na’aatinak chirix li Kolonel ut lix k’utum, maare “Chinwanq raj joʼ li Jesus” (B’ichleb’aal choq’ reheb’ li Kok’al, 40–41). Kanab’omaq b’ichank naq texwulaq sa’ jun li ch’ol aatin chirix jun li na’leb’ nak’utman sa’ Mateo 6–7. Tenq’aheb’ li kok’al chixk’eeb’al reetal chan ru naq li ch’ol aatin naxk’am rib’ rik’in li yookeb’ chixtzolb’al sa’eb’ li ch’ol a’an.
Lin Choxahil Yuwa’ tinrab’i ut tinixsume naq tintijoq.
Naq nakawil Mateo 6:5–13; 7:7–11, k’a’ru nakak’oxla naq tento te’xtaw ru li kok’al chirix li tijok?
Kok’ k’anjel naru chi b’aanumank
-
Patz’ reheb’ li kok’al naq te’xyaab’asi Mateo 6:9–13 ut chirix a’an te’xye k’a’ru kixye li Kolonel sa’ lix tij. Chan ru nokoru chi tijok jo’ kitijok a’an?
-
B’ichahomaq jun li b’ich chirix li tijok, maare “Ma tijok xayal?” (Eb’ li B’ich, 81). Tenq’aheb’ li kok’al chixsik’b’al sa’ li raatinul k’a’ut naq nokotijok ut eb’ li osob’tesihom li neke’chal rik’in li tijok.
-
Tenq’aheb’ li kok’al chixkanab’ankil sa’ xk’a’uxleb’ Mateo 7:7; re xb’aanunkil a’an, b’aanu jun li b’atz’unk jo’ a’in: Jun li ch’ina al tixye xb’een li aatin malaj li ch’ol aatin re li raqal ut chirix a’an tixkut jun b’olotz’ re jun chik ch’ina al, ut a’an tixye li aatin jun chik malaj li ch’ol aatin.
-
K’utb’esi Mateo 7:9–10 rik’ineb’ li kok’al rik’in roksinkil kok’ k’anjeleb’aal. Patz’ reheb’ li ko’k’al naq te’xwotz li naxk’ut a’in chiruheb’ chirix li tijok.
-
Wotz jun numsihom b’ar wi’ xe’sumeek laa tij.
Naru ninsik’eb’ li junelikil b’ihomal sa’ xna’aj li ruchich’och’il b’ihomal.
Chan ru taatenq’aheb’ li kok’al li nakatzoleb’ chixk’eeb’al xnimal xloq’al li k’a’ru nawan chi junelik ut ink’a’ li k’a’ru re li ruchich’och’?
Kok’ k’anjel naru chi b’aanumank
-
K’am jun li “kaxon re li b’ihomal” nujenaq rik’in k’a’aq re ru malaj jalam-uuch li neke’reetali li k’a’ru naxk’e xloq’al li ruchich’och’—maare li tumin malaj eb’ li b’atz’uul. Ilomaq Mateo 6:19–21 ut chirix a’an patz’ reheb’ li kok’al naq tate’xtenq’a chixk’oxlankileb’ li choxahil b’ihomal li naru tixchap xna’aj li k’a’aq re ru re li ruchich’och’ li wankeb’ sa’ li kaxon.
-
Patz’ reheb’ li kok’al naq te’xk’e xk’ab’a’eb’ malaj te’xyiib’ xjalam-uuch li k’a’ru naru te’xb’aanu re “xtamresinkil … li b’ihomal sa’ choxa” (Mateo 6:20).
Xb’oqb’aleb’ chi tzolok sa’ kab’l
B’oqeb’ li kok’al chixwotzb’al rik’ineb’ lix junkab’al li k’utum mas nawulak chiruheb’ sa’ li aatin jultikanb’il chiru li tzuul.
Xkawresinkil qib’ jo’ aj k’utunel
Yal xtawb’aleb’ ru li komon sa’ laa tzoleb’aal. Laa’at nakanaweb’ ru li kok’al nakatzoleb’. Maare aajelaq ru xjalb’al li na’leb’ re li tusleb’ aatin a’in re xtenq’ankileb’ chi us li nakatzoleb’ rik’in li ajb’il ru xb’aaneb’. Re xtawb’aleb’ li na’leb’ re laa tzoleb’aal, maare us rilb’al wi’chik chixjunil li kok’ k’anjel yeeb’ileb’ resil sa’ li tusleb’ aatin a’in, ut moko ka’ajwi’ ta li kok’ k’anjel yiib’anb’ileb’ choq’ reheb’ lix chihab’ li kok’al nakatzoleb’. (Chi’ilmanq Li k’utuk jo’ li Kolonel, 7.)