Li aatin jultikanb’il xb’aan li Jesus chiru li tzuul, xb’aan laj Gustave Doré

13–19 febrero

Mateo 5; Lukas 6

“Us xaq eere”

Jwal ch’ina-us li xtzolb’aleb’ li kok’al. Naq nakakawresi aawib’ sa’ musiq’ej, li Qaawa’ tatxb’eresi.

Xkanab’ankileb’ chi wotzok

Patz’ reheb’ li kok’al naq te’aatinaq chirix li xe’xb’aanu chiru li xamaan a’in re xwotzb’al lix saqen li Qaawa’—maare xe’xb’aanu li us malaj xe’xk’ut xrahomeb’ ut xchaab’ilaleb’.

Xk’utb’al li tzol’leb’: Kok’al toj ka’ch’ineb’ xyu’am

Mateo 5:9

Naru tink’ojob’ li tuqtuukilal.

Eb’ li kok’al li nakatzoleb’ k’a’jo’ naq neke’ru chixchaab’ilob’resinkil li wank sa’ li rochocheb’ wi neke’raatinaheb’ lix komoneb’ rik’in rahok ut chaab’ilal.

Kok’ k’anjel naru chi b’aanumank

• Yaab’asi Mateo 5:9 choq’ reheb’ li kok’al, ut ch’olob’ naq eb’ laj k’amol tuqtuukilal neke’xk’am lix tuqtuukilal a’ yaal b’ar li na’ajej wankeb’ wi’. Tz’iib’a chiru kok’ hu junjunq li wech’ok-ib’ li maare te’xnumsi li kok’al (maare naq rech alalb’ej rib’ neke’pleetik xb’aan jun b’atz’uul). Patz’ reheb’ li kok’al naq te’xsik’ ru jun li ch’ina hu. Naq yookex chirilb’al ru li junjunq, patz’ reheb’ naq te’xwotz chan raj ru te’xk’am li tuqtuukilal sa’ li hoonal a’an. Malaj seraq’i rix junjunq li hoonal yal yoob’anb’il, ut tenq’aheb’ li kok’al chixyeeb’al wi li kristiaan sa’ li hoonal a’an yookeb’ chixk’eeb’al li tuqtuukilal.

• B’oqeb’ lix na’ xyuwa’eb’ junjunq li kok’al chirula’aninkil li tzoleb’aal ut chixwotzb’al reetalil jo’q’ehaq naq lix kok’aleb’ xe’xk’e li tuqtuukilal sa’ li rochocheb’.

Mateo 5:14–16

Li Jesus naraj naq tinwanq jo’ jun saqen chiru li was wiitz’in.

Eb’ li kok’al toj ka’ch’ineb’ xyu’am k’a’jo’ naq neke’ru chixchaab’ilob’resinkil lix yu’ameb’ li kristiaan. Chan ru taatenq’aheb’ chixkanab’ankil chi lemtz’unk lix saqenkeb’?

Kok’ k’anjel naru chi b’aanumank

• K’ut chiruheb’ li kok’al naab’al paay chi k’a’aq re ru li neke’xk’e li saqen, ut k’ut jun li jalam-uuch wankeb’ wi’ kok’al. Yaab’asi Mateo 5:14–16, ut ye reheb’ li kok’al naq lix saqenkeb’ naru tixkutanob’resi xyu’ameb’ li ras riitz’in. Chan ru naru naqoksi li qasaqen re xk’amb’aleb’ jalaneb’ chik rik’in li Dios?

• K’e lix saqen li pook chiru li tz’ak, ut ye reheb’ li kok’al naq te’xtaaqe li saqen rik’in xnaq’eb’ ru. Oksi li saqen re xk’amb’al xnaq’eb’ ru toj sa’ lix jalam-uuch li Kolonel. Chan ru naq nokoxtenq’a li saqen? Chan ru naq naru toowanq choq’ saqen chiru li ruchich’och’? Tz’ap ru li pook. K’a’ru nak’ulman wi ink’a’ naqawotz li qasaqen malaj naq naqamuq?

• Muq jun li pook sa’ li tzoleb’aal ut chupeb’ li luz. Kanab’eb’ li kok’al chixyalb’al xtawb’al. Yaab’asi Mateo 5:15 ut aatinanqex chirix lix yaalal naq tento naq ink’a’ taqamuq li qasaqen.

• Tenq’aheb’ li kok’al chixtawb’al ut chixb’onb’al li kandeel muqmuukeb’ sa’ li perel re kok’ k’anjel re li xamaan a’in.

• B’ichahomaq jun li b’ich chirix wank jo’ jun saqen, maare “Kristo taaraj naq tinlemtzʼunq,” “Lemtzʼun,” malaj “Chanchanin laaʼin jun chahim” (B’ichleb’aal choq’ reheb’ li Kok’al, 38, 96, 84).

Sahaq qach’ool naq toowanq jo’ kixk’ut li Jesus.

Mateo 5:44–45

Li Jesukristo naraj naq tinraheb’ chixjunil li kristiaan.

Eb’ li kok’al toj ka’ch’ineb’ xyu’am naru neke’xtikib’ chalen anajwan xyalb’al xk’utb’al li rahok, us ta ink’a’ us neke’ile’ xb’aaneb’ li rochb’eeneb’ malaj eb’ li ras riitz’ineb’. Naq nakawil Mateo 5:44–45, tz’il rix chan ru naq lix k’utum li Kolonel nak’anjelak choq’ reheb’ li kok’al nakatzoleb’.

Kok’ k’anjel naru chi b’aanumank

• Ye wi’chik Mateo 5:44 rik’ineb’ aatin ut na’leb’ li te’xtaw ru li kok’al ut rik’in li naru neke’xtaw wi’ rib’. Patz’ reheb’ li kok’al naq te’xwotz junjunq hoonal b’ar wi’ xk’utumeb’ li rahok choq’ re anihaq us ta mas ch’a’aj. K’a’ru xe’reek’a rik’in li xe’xb’aanu?

• B’ichahomaq jun li b’ich na’aatinak chirix li rahok, maare “Li rahok cherib’il eerib’ ” (B’ichleb’aal choq’ reheb’ li Kok’al, 201–202). K’a’ru naqatzol sa’ li b’ich a’an chirix xraab’aleb’ li qas qiitz’in?

• K’e reheb’ li kok’al kok’ huhil aamej rik’in li aatin a’in: “Tink’ut lin rahom choq’ re chixjunil.” Patz’ reheb’ naq te’rutz’u’uji ru li kok’ huhil aamej a’an, ut naq te’xt’uyub’ sa’ li rochocheb’ jo’ xjultikankil reheb’ naq te’xraheb’ chixjunil.

Xk’utb’al li tzol’leb’: Kok’al ak ninqeb’

Mateo 5:3–12

Naru tinwanq chi sa inch’ool naq nikinwan jo’ kixk’ut li Jesus.

Naq nakawil Mateo 5:3–12, k’a’ru li aatin malaj li ch’ol aatin nawulak chawu? Chan ru naq li k’utum a’an taarosob’tesiheb’ xyu’am li kok’al li nakatzoleb’?

Kok’ k’anjel naru chi b’aanumank

• Yiib’ jun li kaaxukuut chiru li pizarron chi wiib’ yijach, rik’in li jolomil na’leb’ Us xaq eere … ut Osob’tesihom. Patz’ reheb’ li kok’al naq te’ril Mateo 5:3–12 re xtawb’al k’a’ru neke’xb’aanu li ani useb’ xaq re jo’ kixye li Jesus, ut li osob’tesihom naxyeechi’i reheb’. Tz’iib’a sa’ li kaaxukuut li k’a’ru neke’xtaw. Aatinan rik’ineb’ li kok’al chirix li junjunq chaab’ilal ut li osob’tesink naxk’ul rib’ rik’in.

• Tz’iib’a li junjunq chaab’ilal sa’eb’ li raqal a’in chiru jun li ch’ina hu, jo’eb’ ajwi’ li osob’tesink sa’ jalan chik li hu. Chi jo’kan, jun li hu tixye “tuulaneb’,” ut li jun naxk’ul rib’ tixye “te’reechani li loq’laj na’ajej” (raqal 5). Kanab’ naq eb’ li kok’al te’xtaw li chaab’ilal ut li osob’tesink li neke’xk’ul rib’. Patz’ reheb’ li kok’al naq te’xsik’ ru jun reheb’ li chaab’ilal sa’eb’ li raqal a’an li te’raj raj xk’anjelankil.

Mateo 5:9, 21–24, 38–47

Naru tink’ojob’ li tuqtuukilal.

Li Jesus kixk’ut naq eb’ laj k’amol tuqtuukilal te’k’ab’a’iiq jo’ ralal li Dios. Chan ru taawaklesiheb’ xch’ool li kok’al chi wank jo’ aj k’amol tuqtuukilal?

Kok’ k’anjel naru chi b’aanumank

• Patz’ re jun li ch’ina al naq tixyaab’asi Mateo 5:9. K’a’ru jun aj k’amol tuqtuukilal? Chan ru naq naru nokowan choq’ aj k’amol tuqtuukilal rik’in li qajunkab’al ut eb’ li qamiiw? (Re xtawb’al chik li na’leb’, chi’ilmanq li raqal 21–24, 38–47.)

• Patz’ reheb’ li kok’al naq te’xk’oxla jun li hoonal li taa’ajmanq raj wi’ ru lix tenq’ jun aj k’amol tuqtuukilal. K’a’ raj ru tixb’aanu jun aj k’amol tuqtuukilal sa’ li hoonal a’an?

• Patz’ reheb’ li kok’al naq te’xwotz resil li hoonal naq xe’xk’ut lix rahom re jun kristiaan, us ta jalan a’an chiruheb’ a’an malaj ch’a’aj xraab’al.

Mateo 5:14–16

Lin b’aanuhom naru naxk’e xsaqen li b’e re naq li was wiitz’in te’xtaaqe li Jesus.

Wankeb’ li kok’al nakatzol li ak okenaqeb’ sa’ li sumwank re li kub’iha’. K’oxla lix yaalalil li raatin li Kolonel sa’ Mateo 5:14–16 chirixeb’ lix sumwank a’an. K’a’ru naxye li Qaawa’ reheb’ li kok’al sa’ li raqal a’in?

Kok’ k’anjel naru chi b’aanumank

• Tenq’aheb’ li kok’al chixkanab’ankil sa’ xk’a’uxleb’ Mateo 5:16. Tz’iib’a li raqal sa’ li pizarron. Ilomaq ru sa’ komonil k’iila sut, xsachb’al jun reheb’ li aatin rajlal sut. Patz’ reheb’ li kok’al naq te’xyiib’ xjalam-uuch li naru neke’xb’aanu re wank jo’ saqen chiruheb’ li kristiaan. Ye reheb’ naq xk’utb’al li qasaqenkil nokoxtenq’a chixpaab’ankil li qasumwank re li kub’iha’ (chi’ilmanq Mosiah 18:8–10).

• B’ichahomaq jun li b’ich li na’aatinak chirix xwotzb’al li saqen, maare “Lemtz’un” (B’ichleb’aal choq’ reheb’ li Kok’al, 96). Chan ru taqawotz lix saqenkil li Kolonel?

• Patz’ reheb’ li kok’al naq te’xyiib’ xjalam-uuch li k’a’aq re ru neke’xk’e li saqen. Yaab’asi Mateo 5:14–16. Patz’ reheb’ k’a’ut naq li Jesus naraj naq toowanq jo’ jun saqen choq’ re li ruchich’och’.

• Patz’ reheb’ wiib’ li kok’al naq te’xaqliiq ut te’xka’ya rib’, ut patz’ re jun naq tixyal xk’eeb’al chi se’ek li jun chik chi ink’a’ tixch’e’. Aatinan chirix lix wankilaleb’ li kok’al re xk’eeb’al xsahileb’ xch’ool li ras riitz’ineb’.

Xb’oqb’aleb’ chi tzolok sa’ kab’l

B’oqeb’ li kok’al chi ilok chi us re xtawb’al ani li yoo chi wank jo’ aj k’amol tuqtuukilal chiru li xamaan a’in. Sa’ xtikib’ankil li tzolok sa’ li xamaan chal re, patz’ reheb’ naq te’xye ani xe’ril ut k’a’ru xe’ril.

Xkawresinkil qib’ jo’ aj k’utunel

Tenq’aheb’ li kok’al chi wank chi aj aj. “Naq nakatzoleb’ li kok’al, k’anab’eb’ chi yiib’ank, chi b’onok, chi tz’iib’ak, ut chi yo’ob’tesink. Eb’ li k’a’aq re ru a’in maawa’ ka’ajwi’ re sahob’resink ch’oolej—aajeleb’ b’an ru choq’ re li tzolok” (chi’ilmanq Li k’utuk jo’ li Kolonel, 25).