6–12 febrero

Jwan 2–4

“Tento naq texyo’laaq wi’chik”

Moko taatz’aqloq ta aahoonal sa’ li tzoleb’aal re xk’utb’al chixjunil li na’leb’ natawman sa’ Jwan 2–4. Sik’ aab’eresinkil rik’in li Musiq’ej re naq taanaw k’a’ru taak’ut li jwal tixtenq’aheb’ li kok’al.

Xkanab’ankileb’ chi wotzok

Re xwaklesinkileb’ xch’ool li kok’al chixwotzb’al li yookeb’ chixtzolb’al ut chixnumsinkil, patz’ reheb’ k’a’ru xe’xb’aanu toje’ re naq te’wanq jo’ “aj sik’onel reheb’ li qas qiitz’in choq’ ruuchil li kar” (Mateo 4:19). Maare taa’ajmanq ru naq taawil wi’chik ru rik’ineb’ li xetzol sa’ li xamaan xnume’.

Xk’utb’al li tzol’leb’: Kok’al toj ka’ch’ineb’ xyu’am

Jwan 3:1–10

Tento naq taakub’eeq inha’ ut tink’ojob’aaq re tinq’ajq chi wank rik’in lin Choxahil Yuwa’.

Eb’ li kok’al li nakatzoleb’ yookeb’ chixkawresinkil rib’ re xk’eeb’al xb’een li yokb’ re te’kub’eeq xha’ (yo’laak rik’in ha’) ut te’k’ojob’aaq choq’ komon (yo’laak rik’in Musiq’ej) re naq te’wanq wi’chik rik’in li qaChoxahil Yuwa’. Chan ru taatenq’aheb’ chixtawb’al ru naq aajeleb’ ru li wiib’ chi k’ojob’anb’il k’anjel a’an?

Kok’ k’anjel naru chi b’aanumank

• K’os ru li esil naq li Jesus kixtzol laj Nikodemo (chi’ilmanq Jwan 3:1–10). Ye reheb’ li kok’al naq chirix naq te’kub’eeq xha’, li qaChoxahil Yuwa’ tixk’e li maatan re li Santil Musiq’ej reheb’.

• K’ut chiruheb’ li kok’al li perel re kok’ k’anjel re li xamaan a’in, ut patz’ reheb’ naq te’xye k’a’ru wan sa’eb’ li jalam-uuch. Yaab’asi Jwan 3:5, ut ch’olob’ xyaalal naq tento taakub’eeq qaha’ ut took’ojob’aaq re wank wi’chik rik’in li qaChoxahil Yuwa’.

• Patz’ reheb’ li kok’al naq te’aatinaq chirix li neke’xb’aanu re xch’ajb’aleb’ li ruq’. K’ut li jalam-uuch Jun saaj ixq nakub’e xha’ (Hu reheb’ li Jalam-uuch re li Evangelio, 104), ut tenq’aheb’ li kok’al chixjuntaq’eetankil li xch’ajb’aleb’ li ruq’ rik’in ha’ rik’in li wulak chi saq qu sa’ musiq’ej rik’in li kub’iha’.

Jwan 3:16

Li qaChoxahil Yuwa’ nikinixra, xb’aan a’an naq kixk’e jun aj Kolol we.

Chan ru taatenq’aheb’ li kok’al chixtzolb’al li nim xloq’alil yaal a’an?

Kok’ k’anjel naru chi b’aanumank

• Patz’ reheb’ li kok’al naq te’xtz’aqob’resi ru li ch’ol aatin jo’ a’in: “Xb’aan naq eb’ lin yuwa’ nikine’xra, a’aneb’ …” Yaab’asi Jwan 3:16. Chirix a’an tenq’aheb’ li kok’al chixka’sutinkil Jwan 3:16, rik’in xjalb’al ru li aatin “li ruchich’och’ ” rik’in lix k’ab’a’eb’. Tenq’aheb’ li kok’al chixk’eeb’al reetal k’a’ru naxye li raqal a’in chirix li kixb’aanu li qaChoxahil Yuwa’ xb’aan naq nokoxra. Patz’ reheb’ li kok’al naq te’xyiib’ xjalam-uuch li Jesus. Kanab’eb’ chixwotzb’aleb’ lix jalam-uuch chirib’ileb’ rib’ ut chixch’olob’ankileb’ lix rahomeb’ choq’ re li Kolonel.

• B’ichahomaq jun li b’ich chirix li Jesus, maare “Kixtaqla li Ralal” (B’ichleb’aal choq’ reheb’ li Kok’al, 20–21). Kanab’eb’ li kok’al chixchapb’al chi kutankil jun xjalam-uuch li Jesus rajlal sut naq te’xb’icha li aatin “Ralal,” “Jesus,” malaj “Kolonel.”

Jwan 4:5–15

Li Jesukristo a’an lin “yo’yookil ha’.”

Chixjunileb’ li kok’al sa’ laa tzoleb’aal naru neke’xtaw ru chan ru naq nawan li chaqi-eel. Chan ru taawoksi li numsihom a’an re xtenq’ankileb’ chixtawb’al ru li rajb’al ru li yo’yookil ha’ li naxyeechi’i li Jesukristo?

Kok’ k’anjel naru chi b’aanumank

• Oksi li jalam-uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al re xseraq’inkil resilal li Jesus ut li ixq chire li yo’leb’aal ha’ (chi’ilmanq Jwan 4:5–15). Patz’ reheb’ li kok’al naq te’xye wi’chik li seraq’.

• K’ut jun uk’leb’ ha’, ut ye reheb’ li kok’al k’a’ut naq aajel ru li ha’ sa’ li qayu’am. K’os ru Jwan 4:5–15, ut ch’olob’ xyaalal naq li Jesukristo ut lix evangelio neke’xk’e xyu’am li qamusiq’, jo’ chanchan naq li ha’ naxk’e xyu’am li qajunxaqalil.

Xk’utb’al li tzol’leb’: Kok’al ak ninqeb’

Jwan 2:1–11

Naru nawoxloq’i lin na’ jo’ kixb’aanu li Jesus.

Sa’ li sumlaak re Kana, xMaria kixye re li Jesus naq ki’oso’ li viin. Jo’ naxye sa’ lix Jaltesinkil ru li Santil Hu xb’aan laj Jose Smith, li Jesus kixsume lix na’ rik’in xpatz’b’al re, “At ixq, k’a’ru taawaj tinb’aanu laa’in choq’ aawe? Tinb’aanu” (sa’ JJS Jwan 2:4). Li Jesus a’an kixk’ut chiqu chan ru naq taqoxloq’i li qana’.

Kok’ k’anjel naru chi b’aanumank

• Patz’ reheb’ li kok’al naq te’ril Jwan 2:1–11 ut te’xk’e xhoonaleb’ chirib’ileb’ rib’ re xyeeb’al li seraq’ rik’in ajwi’ li raatineb’.

• Patz’ reheb’ li kok’al naq te’xye k’a’ raj ru li taaraj wi’ xtenq’ankil lix na’eb’. Patz’ reheb’ naq te’xyal xb’aanunkil li k’a’ raj ru te’xye re lix na’eb’ rik’in roksinkileb’ junjunq reheb’ li raatin li Jesus: “K’a’ru taawaj tinb’aanu laa’in choq’ aawe?” (JJS Jwan 2:4).

• B’oqeb’ junjunq li na’b’ej chirula’aninkil laa tzoleb’aal ut chixwotzb’al li neke’xb’aanu lix kok’aleb’ re xk’utb’al li roxloq’ choq’ reheb’ a’an.

Li Jesus kixye re lix na’, “K’a’ru taawaj tinb’aanu laa’in choq’ aawe?” (JJS Jwan 2:4).

Jwan 3:1–8

Li kub’iha’ ut li k’ojob’aak choq’ komon a’an chanchan li yo’laak wi’chik.

Naq nakub’e qaha’, li kixk’ab’a’in li Jesus jo’ “yo’laak rik’in ha’,” naqak’ul lix kuyb’al li qamaak ut naru “noko’ok sa’ li rawa’b’ejihom li Dios” (Jwan 3:5). Chan ru naru nakatenq’aheb’ li kok’al chixtawb’al ru li k’a’ru naraj naxye li yo’laak wi’chik?

Kok’ k’anjel naru chi b’aanumank

• Chiru kok’ hu, tz’iib’a li raatin li Kolonel li natawman sa’ Jwan 3:3, ut kanab’eb’ li kok’al chixk’eeb’aleb’ sa’ xtusulal ru. Chan ru naq li kub’iha’ ut li k’ojob’aak a’an chanchan li yo’laak wi’chik?

• K’ut jun xjalam-uuch jun li k’uula’al toje’ xyo’la ut re junaq li yoo chi kub’eek xha’ ut chi k’ojob’aak choq’ komon (chi’ilmanq Hu reheb’ li Jalam-uuch re li Evangelio,  104–105). Chan ru naq chanchano jun li k’uula’al toje’ xyo’la chirix naq nakub’e qaha’ ut nokok’ojob’aak? (chi’ilmanq Jwan 3:3–5).

• Patz’ reheb’ li kok’al naq te’xye li najultiko’ reheb’ chirix lix kub’iha’eb’. Yaab’asi Mosiah 18:8–10 ut Tzol’leb’ ut Sumwank 20:37 re xjultikankil li sumwank re li kub’iha’. K’ut chiruheb’ li kok’al naq rik’in tz’aqonk sa’ li loq’laj wa’ak rajlal xamaan, toj yooko chi yo’laak wi’chik.

• Tenq’aheb’ li kok’al chixk’uulankil sa’ xk’a’uxleb’ Eb’ lix Raqalil li Paab’aal 1:4.

Jwan 3:16–17

Li qaChoxahil Yuwa’ nikinxra, xb’aan a’an naq kixtaqla chaq li Ralal.

Chan ru taatenq’aheb’ li kok’al chixnawb’al naq li Jesukristo kitaqlaak chaq sa’ li ruchich’och’ jo’ jun reetalil lix rahom li qaChoxahil Yuwa’?

Kok’ k’anjel naru chi b’aanumank

• Patz’ reheb’ li kok’al naq te’xyiib’ jun xjalam-uuch li maatan mas nawulak chiruheb’ ut re li ani li kik’ehok reheb’. Chirix a’an, patz’ re jun li ch’ina al naq taaril Jwan 3:16. K’a’ru li maatan kixk’e qe li qaChoxahil Yuwa’? Chan ru naq li maatan a’an naxk’utb’esi lix rahom?

• Patz’ reheb’ li kok’al naq te’xtaw xsumenkil li patz’om “K’a’ut naq kitaqlaak chaq qe li Jesukristo xb’aan li qaChoxahil Yuwa’?” naq te’ril Jwan 3:16–17, malaj naq te’xb’icha malaj te’rab’i “Kixtaqla li Ralal,” (B’ichleb’aal choq’ reheb’ li Kok’al, 20–21).

Jwan 4:5–23

Li Jesukristo naxyeechi’i we li “yo’yookil ha’.”

Jo’ ajwi’ naq li Jesus kiroksi li ha’ re xtzolb’al li ixq aj Samaria, laa’at naru nakawoksi li ha’ re xtzolb’aleb’ li kok’al k’a’ut naq aajel ru lix evangelio li Jesukristo choq’ qe.

Kok’ k’anjel naru chi b’aanumank

• Oksi Jwan 4:5–23 re xtz’iib’ankil junjunqeb’ li ch’ol aatin li te’xseraq’i chi k’osb’il ru li seraq’ chirix li ixq chire li yo’leb’aal ha’. Patz’ reheb’ li kok’al naq te’roksi li raqal a’an re xtusub’ankileb’ ru li ch’ol aatin xatz’iib’a. K’a’ru li yoo chixyalb’al xk’utb’al li Jesus chiru li ixq?

• K’e li ha’ reheb’ li kok’al re ruk’b’al, ut patz’ reheb’ naq te’xwotz lix numsihomeb’ naq wankeb’ chaq xchaqi-eel. Aatinanqex chirix li k’a’ru xe’reek’a naq xe’ruk’ li ha’. Kanab’eb’ li kok’al chixyeeb’al li k’a’aq re ru, jo’ li sek’ rik’in ha’, li nokoxsahob’resi chiru junpaat. K’a’ru a’an li chanchan li “yo’yookil ha’ ” li naru nokoxsahob’resi chi junelik?

• Tz’iib’a sa’ li pizarron Chan ru naq li evangelio a’an jo’ li ha’? Patz’ reheb’ li kok’al naq te’xk’oxla chan raj ru te’xsume li patz’om a’an naq yookeb’ chirilb’al Jwan 4:6–23.

Xb’oqb’aleb’ chi tzolok sa’ kab’l

Naru taapatz’ reheb’ li kok’al naq te’xk’e reheb’ li komon sa’ lix junkab’al li ha’ re te’ruk’ naq te’wulaq sa’ ochoch. Naq te’xb’aanu, naru te’xwotz li k’a’ru xe’xtzol chirix li yo’yookil ha’.

Xkawresinkil qib’ jo’ aj k’utunel

Oksi li perel re kok’ k’anjel. Naq eb’ li kok’al te’xtz’aqob’resi ru li perel re kok’ k’anjel, oksi li hoonal re rilb’al wi’chik li na’leb’ re li tzolok a’an.