Sa’ li yamyookil ch’och’, xb’aan li xEva Koleva Timothy

30 enero–5 febrero

Mateo 4; Lukas 4–5

“Lix Musiq’ li Qaawa’ wank sa’ inb’een”

Re xtikib’ankil lix kawresinkil aawib’ choq’ re li tzolok a’in, il Mateo 4 ut Lukas 4–5. Kim, Taaqehin—Choq’ reheb’ li komon ut li junkab’al naru tatxtenq’a chixtawb’al ruheb’ li ch’ol a’an, ut li tusleb’ aatin a’in naru naxk’eheb’ laa na’leb’ re li k’utuk.

Xkanab’ankileb’ chi wotzok

Patz’ reheb’ li kok’al naq te’xnumsi jun xjalam-uuch li Jesus chirib’ileb’ rib’. Naq li junjunq chi kok’al yoo chixk’ulb’al li jalam-uuch, patz’ re naq tixwotz jun xb’aanuhom li Jesus naq kiwan sa’ li ruchich’och’.

Xk’utb’al li tzol’leb’: Kok’al toj ka’ch’ineb’ xyu’am

Mateo 4:1–11; Lukas 4:1–13

Naru ninsik’ ru li us jo’ li Jesus.

Eb’ li kok’al toj ka’ch’ineb’ xyu’am “ink’a’ neke’ru chi maakob’k” (Tzol’leb’ ut Sumwank 29:47). A’b’anan, li seraq’ naq li Jesus kixkuy xnumsinkileb’ li raalehom laj tza naru naxwaklesiheb’ xch’ool li kok’al chixsik’b’al ru li us.

Kok’ k’anjel naru chi b’aanumank

• Seraq’i li resilaleb’ li aaleek kixk’ul li Jesus sa’ Mateo 4:1–11. (Chi’ilmanq ajwi’ “Ch’ol 11: Na’aaleek li Jesus,” sa’ Eb’ li Esilal sa’ li Ak’ Chaq’rab’, 30–31, malaj li video sa’ ChurchofJesusChrist.org.) Sa’ jun chaab’il hoonal sa’ li seraq’, patz’: “K’a’ru nekek’oxla naq tento raj tixb’aanu li Jesus?”

• K’ut jun xjalam-uuch li Jesukristo, ut ch’olob’ li k’a’ raj ru tixsik’ ru xb’aanunkil jun li ch’ina al. Patz’ reheb’ li kok’al naq te’nach’oq chi b’ayataq rik’in li jalam-uuch rajlal sut naq laa’at taaye jun b’aanuhom us. Patz’ reheb’ naq te’najto’q chi b’ayatq naq taaye jun b’aanuhom ink’a’ us.

• Tenq’aheb’ li kok’al chixtzolb’al li raatinul jun li b’ich chirix xsik’b’al ru li us, maare “Tinsik’ ru li us” (B’ichleb’aal choq’ reheb’ li Kok’al, 82–83). Oksi li jalam-uuch, li k’a’aq re ru, malaj yalaq chik k’a’ru re xtenq’ankileb’ chixtawb’al ru li raatinul.

Lukas 4:18–19

Li Jesukristo a’an lin Kolonel.

Lukas 4:18–19 naxch’olob’ k’a’ru lix k’anjel li Jesus. Chan ru taatenq’aheb’ li kok’al chixb’antioxinkil li k’a’ru kixb’aanu li Jesus choq’ reheb’?

Kok’ k’anjel naru chi b’aanumank

• Yaab’asi Lukas 4:18–19 choq’ reheb’ li kok’al, ut ch’olob’ k’a’ru aj-e naq kitaqlaak chaq li Jesukristo sa’ li ruchich’och’ (chixk’utb’al chiqu chan ru toosutq’iiq rik’in li qaChoxahil Yuwa’, chixk’ojob’ankil qach’ool, ut chixk’irtesinkileb’ li kristiaan). Wotz li k’a’ru xb’aanuhom a’an choq’ aawe.

• Patz’ reheb’ wiib’ oxib’ li kok’al naq te’wanq chanchan naq sachsookeb’ xch’ool, raheb’ xch’ool, malaj yajeb’. Patz’ reheb’ lix komon naq te’xk’utb’esi li k’a’ raj ru naru te’xb’aanu re xtenq’ankileb’. Ch’olob’ xyaalal naq li Jesukristo kichal chi k’utuk, chi k’ojob’ank ch’oolej, ut chi k’irtesink, ut naq tento taqataaqe lix b’aanuhom.

• K’uteb’ xjalam-uuch lix k’anjel li Jesus sa’ ruchich’och’ (chi’ilmanq Hu reheb’ li Jalam-uuch re li Evangelio). Patz’ reheb’ li kok’al naq te’xye aawe k’a’ru yoo chi k’ulmank sa’ li junjunq chi jalam-uuch. K’uteb’ ajwi’ xjalam-uucheb’ li kristiaan li yookeb’ chixyalb’al wank jo’ li Jesus (naru nakataweb’ junjunq sa’eb’ li puktesinb’il hu re li Iglees).

Mateo 4:18–22; Lukas 5:1–11

Li Jesukristo nokoxb’oq chi wank jo’ “aj sik’onel reheb’ li qas qiitz’in choq’ ruuchil li kar.”

Lix b’oqom li Qaawa’, “Chineetaaqe ut tink’e naq eb’ lee ras eeriitz’in chik teesik’ choq’ ruuchil li kar” (Mateo 4:19), a’an choq’ reheb’ chixjunil, jo’eb’ ajwi’ li kok’al.

Kok’ k’anjel naru chi b’aanumank

• Patz’ reheb’ wiib’ li kok’al naq te’wanq chanchan naq a’aneb’ laj Simon Pedro ut laj Andres naq yookat chixyaab’asinkil Mateo 4:18–22). Tenq’aheb’ li kok’al chixk’eeb’al reetal li k’a’ru ke’xtz’eqtaanaheb’ li winq’ a’in re xtaaqenkil li Jesus.

• Kanab’eb’ li kok’al chixk’eeb’aleb’ xhoonal chirib’ileb’ rib’ re xseraq’inkileb’ li raqal a’an rik’in roksinkil li jalam-uuch natawman arin ut sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al.

• B’ichahomaq jun li b’ich chirix xtaaqenkil li Jesukristo, maare “Tintaaqe li kixk’uub’ choq’ we” (B’ichleb’aal choq’ reheb’ li Kok’al, 86–87). Tenq’aheb’ li kok’al chixtawb’al sa’ li b’ich li naru neke’xb’aanu re xtaaqenkil li Jesus.

• Oksi li perel re kok’ k’anjel re li xamaan a’in re aatinak rik’ineb’ li kok’al chirix li wank choq’ “aj sik’onel reheb’ li qas qiitz’in choq’ ruuchil li kar” sa’ xtaaqenkil li Jesus. Naru ajwi’ teeb’anu li b’atz’unk li wan sa’ li perel re kok’ k’anjel. Set wiib’ reetalil li junjunq chi kar, kanab’ chi huphu, ut kanab’eb’ li kok’al chixb’alq’usinkil junjunq sa’ jun sut re xtawb’al li neke’xk’ul rib’.

Li Kristo naxb’oqeb’ lix tzolom, xb’aan laj Gary Ernest Smith

Xk’utb’al li tzol’leb’: Kok’al ak ninqeb’

Mateo 4:1–11; Lukas 4:1–13

Li Jesukristo kixk’ut li b’e chiwu rik’in xq’axb’al ru li aaleek.

Li Jesukristo ki’aaleek ajwi’ xb’aan laj tza, a’b’an maajun wa kixkanab’ rib’. Chan ru taatenq’aheb’ li kok’al chixtaaqenkil lix b’aanuhom li Jesus?

Kok’ k’anjel naru chi b’aanumank

• Yiib’ jun li kaaxukuut sa’ li pizarron rik’ineb’ li jolomil na’leb’ a’in: Aaleek naxb’aanu laj tza ut Lix sumenkileb’ xb’aan li Jesus. Tenq’aheb’ li kok’al chixnujob’resinkil li kaaxukuut rik’in roksinkil Mateo 4:1–11 ut Lukas 4:1–13. Patz’ reheb’ li kok’al chan ru naru neke’xtaaqe lix b’aanuhom li Jesus.

• Tz’iib’a resilal junjunq reheb’ li hoonal naq jun li ch’ina al naru na’aaleek chixsik’b’al ru li ink’a’ us. Kanab’ jun li ch’ina al chixsik’b’al ru jun re rilb’al ru, ut patz’ reheb’ li kok’al naq te’xye chan raj ru naru te’xnumsi li aaleek a’an.

Mateo 4:1–2

Li kuyuk sa’ naru nikinixtenq’a chireek’ankil naq nach’in rik’in li qaChoxahil Yuwa’.

Naq maji’ naxtikib’ lix k’anjel, li Jesus kixkuy xsa’ ut “ki’aatinak rik’in li Dios” (JJS, Mateo 4:2). Tenq’aheb’ li kok’al chirilb’al chan ru naq li kuyuk sa’ naru naxk’e xkawilaleb’ sa’ musiq’ej ut naru naxtenq’aheb’ chireek’ankileb’ rib’ chi nach’ rik’in li qaChoxahil Yuwa’.

Kok’ k’anjel naru chi b’aanumank

• Patz’ re jun li ch’ina al naq tixyaab’asi Mateo 4:1–2 li wan’ sa’ li JJS. K’a’ru kixb’aanu li Jesus re “wank rik’in li Dios”? Wotz chan ru naq li kuyuk sa’ nakatxtenq’a chireek’ankil aawib’ chi nach’ rik’in li qaChoxahil Yuwa’.

• Kanab’eb’ li kok’al li ak xkuyumeb’ xsa’ chi rub’elaj chixwotzb’al li k’a’ru xe’reek’a. Chan raj ru te’xch’olob’ li kuyuk sa’ chiru li ani maajun wa xkuyum xsa’?

• Tz’iib’aheb’ li patz’om chirix li kuyuk sa’ (k’a’ut, jo’q’e, malaj chan ru naqakuy qasa’) chiruheb’ kok’ hu, ut k’eheb’ sa’ junaq li sek’. Kanab’eb’ li kok’al chixsik’b’al ru junaq li patz’om ut chixyalb’al xsumenkil. K’a’ru li numsihom naru nakawotz laa’at malaj eb’ li kok’al chirix li kuyuk sa’?

Lukas 4:16–22, 28–30

Li Jesukristo a’an lin Kolonel.

K’oxla chan ru naq li Kolonel narosob’tesi laa yu’am. Chan ru taatenq’aheb’ li kok’al chixb’antioxinkil chi us li naxk’anjela li Jesus sa’eb’ lix yu’am?

Kok’ k’anjel naru chi b’aanumank

• Patz’ re jun li ch’ina al naq taachalq chi kawresinb’il re xyeeb’al chi k’osb’il ru Lukas 4:16–30. Maare us roksinkil “Ch’ol 17: Xjosq’ileb’ li tenamit sa’ Nazaret” (sa’ Eb’ li Esilal sa’ li Ak’ Chaq’rab’, 42–43, malaj li video sa’ ChurchofJesusChrist.org). Naru ajwi’ taak’ut li video “Jesús declara que Él es el Mesías” (ChurchofJesusChrist.org).

• Yaab’asi Lukas 4:18 naq eb’ li kok’al te’ril ajwi’ ru chi ch’anch’o. Patz’ reheb’ naq te’xtz’iib’a li k’a’aq re ru li kichal chixb’aanunkil li Kolonel. Patz’ reheb’ li kok’al naq te’xye chan ru naq li Kristo kixb’aanu li k’a’aq re ru a’an, sa’eb’ li loq’laj hu malaj sa’eb’ lix yu’am.

• Tz’iib’a chiruheb’ kok’ hu li ch’ol aatin “Sa’ xk’ab’a’ li Jesukristo …” Jek’iheb’ reheb’ li kok’al, ut patz’ reheb’ naq te’xchoy li ch’ol aatin. Kanab’eb’ chixwotzb’al k’a’ru xe’xtz’iib’a.

Mateo 4:18–22; Lukas 5:1–11

Li Jesukristo nokoxb’oq chixtaaqenkil ut chi wank jo’ “aj sik’onel reheb’ li qas qiitz’in choq’ ruuchil li kar.”

Wan naab’al paay ru naq eb’ li kok’al naru neke’xtaaqe li Kolonel ut wank jo’ “aj sik’onel reheb’ li ras riitz’in choq’ ruuchil li kar” (Mateo 4:19). Chan ru taatenq’aheb’ li kok’al chirilb’al li chaab’ilal naru neke’xk’utb’esi chiruheb’ li ras riitz’in?

Kok’ k’anjel naru chi b’aanumank

• Patz’ reheb’ li kok’al naq te’ril Mateo 4:18–22 ut Lukas 5:1–11. Chan ru ke’sumen lix tzolom li Jesus naq kixb’oqeb’ chixtaaqenkil? K’a’ru naru naqab’aanu re xtaaqenkil lix b’aanuhom?

• K’ut chiruheb’ li kok’al li k’anjeleb’aal re karab’k malaj lix jalam-uuch jun aj kar. K’a’ru naraj naxye wank jo’ “aj sik’onel reheb’ li qas qiitz’in choq’ ruuchil li kar”? K’a’ru li k’anjeleb’aal wan qe re qatenq’ankil chi wank jo’ aj sik’onel reheb’ li qas qiitz’in choq’ ruuchil li kar?

Xb’oqb’aleb’ chi tzolok sa’ kab’l

B’oqeb’ li kok’al chixwotzb’al rik’ineb’ lix junkab’al li k’a’ru xe’xtzol chirix li wank jo’ aj sik’onel reheb’ li qas qiitz’in choq’ ruuchil li kar.

Xkawresinkil qib’ jo’ aj k’utunel

Eb’ li kok’al naru neke’xk’e reetal lix musiq’ahom li Musiq’ej. K’ut chiruheb’ li kok’al naq li eek’ahom re tuqtuukilal, li rahok, ut li q’ixnal neke’reek’a naq neke’aatinak malaj neke’b’ichan chirix li Jesukristo ut lix evangelio neke’chal rik’in li Santil Musiq’ej. Eb’ li eek’ahom a’an naru neke’xwaklesi lix nawom xch’ooleb’.