laj Jwan aj Kub’sihom Ha’ naxkub’si xha’ li Jesus

B’onb’il lem sa’ li santil ochoch re Nauvoo, xb’aan laj Tom Holdman

23–29 enero

Mateo 3; Markos 1; Lukas 3

“Tuqub’omaq lix b’e li Qaawa’ ”

Naq yookat chirilb’al li esil chirix laj Jwan aj Kub’sihom Ha’ ut lix kub’iha’ li Jesukristo, tz’iib’a yalaq musiq’anb’il na’leb’ nakak’ul. Kim, Taaqehin—Choq’ reheb’ li komon ut li junkab’al naru tatxtenq’a chixtawb’al ru li raqal a’an re li loq’laj hu ut chixtz’aqob’resinkil li neke’xtzol li kok’al sa’ rochocheb’.

reetalil li wotzok

Xkanab’ankileb’ chi wotzok

Re xk’eeb’al xhoonaleb’ li kok’al re te’xwotz li k’a’ru xe’xtzol, k’ut jun li jalam-uuch re lix kub’iha’ li Jesus. Patz’ reheb’ naq te’xye li nak’ulman sa’ li jalam-uuch, jo’ ajwi’ li reek’ahomeb’ chirix li kub’siik ha’.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Mateo 3:13–17

Naru taakub’eeq inha’ jo’ li Jesus.

Chan ru taawoksi li seraq’ chirix lix kub’iha’ li Jesus re xtenq’ankileb’ li kok’al chixkawresinkileb’ rib’ choq’ re li kub’iha’?

Kok’ k’anjel naru chi b’aanumank

• K’os ru li seraq’ chirix lix kub’iha’ li Kolonel (chi’ilmanq Mateo 3:13–17; chi’ilmanq ajwi’ “Ch’ol 10: Nakub’e xha’ li Jesus,” sa’ Eb’ li Esilal sa’ li Ak’ Chaq’rab’, 26–29, malaj li video sa’ ChurchofJesusChrist.org). Ch’olob’ naq li Jesus kikub’siik xha’ chi sub’b’il xb’aan junaq li kiwan xwankilal li tijonelil rik’in. Ye li seraq’ chi naab’al sut ut patz’ reheb’ li kok’al naq te’xka’suti chixjunil li nanaq sa’ xch’ooleb’.

• K’ut jun li jalam-uuch re lix kub’iha’ li Jesus ut li perel re kok’ k’anjel re li xamaan a’in. Kanab’eb’ li kok’al chixk’utb’al lix juntaq’eetileb’ li wiib’ chi jalam-uuch. (Wan xjalam-uuch li Jesukristo naq kikub’e xha’ sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al.)

• Tz’il wi’chik rix li yeechi’ihom te’xb’aanu li kok’al naq te’kub’eeq xha’ (chi’ilmanq Mosiah 18:8–10; Tzol’leb’ ut Sumwank 20:37; Temas del Evangelio, “Bautismo,” topics.ChurchofJesusChrist.org). Patz’ reheb’ b’ar wan reheb’ li k’a’aq re ru a’an ak yookeb’ chixb’aanunkil.

• B’oq jun li komon re li obispil chi aatinak rik’ineb’ li kok’al chirix li taapatz’manq reheb’ sa’ li tz’ilok-ix naq maji’ neke’kub’e xha’.

• B’ichahomaq jun li b’ich chirix li kub’iha’, maare “Li kub’iha’ ” (B’ichleb’aal choq’ reheb’ li Kok’al, 54–55). Naru taapatz’ re jun li ch’ina al naq tixb’eresiheb’ lix komoneb’ li kok’al naq yookeb’ chi b’ichank.

jun saaj ixq nakub’e xha’

Naru naqataaqe lix b’aanuhom li Jesukristo naq nakub’e qaha’.

Mateo 3:11, 16

Li Santil Musiq’ej nikinixtenq’a.

Chirix naq neke’xkawresi rib’ choq’ re li kub’iha’, eb’ li kok’al neke’xkawresi ajwi’ rib’ re xk’ulb’al li maatan re li Santil Musiq’ej. Chan ru naru nakatenq’aheb’?

Kok’ k’anjel naru chi b’aanumank

• Oksi Mateo 3:11, 16 re xk’utb’al chiruheb’ li kok’al naq li Santil Musiq’ej kikub’e sa’ xb’een li Jesus naq kikub’siik xha’ (jun li mukuy kixk’utb’esi rib’ jo’ reetalil naq ki’uxman a’an). K’ut li jalam-uuch Li maatan re li Santil Musiqʼej (Hu reheb’ li Jalam-uuch re li Evangelio, 105), ut ch’olob’ naq naqak’ul li maatan re li Santil Musiq’ej naq nokok’ojob’aak jo’ komon.

• K’am chaq jun li kaxon wankeb’ wi’ li k’a’aq re ru jo’ jun xjalam-uuch li Jesus, jun li isb’ q’un ru, ut jun li k’utleb’aal b’e malaj reetalil ch’och’. Patz’ reheb’ li kok’al naq te’xsik’ ru jun li k’a’aq re ru, ut chirix a’an te’xch’olob’ chan ru naq li junjunq chi k’a’aq re ru a’an naxk’utb’esi chan ru naq li Santil Musiq’ej naru nokoxtenq’a—naxch’olob’ xyaalal li Jesus (chi’ilmanq Jwan 15:26), naxk’ojob’ li qach’ool (chi’ilmanq Jwan 14:26), ut naxk’ut chiqu b’ar wan li chaab’il b’e (chi’ilmanq 2 Nefi 32:5).

• Wotz li xak’ul ajwi’ laa’at chirix xk’ulb’al lix tenq’ li Santil Musiq’ej.

• Ye reheb’ li kok’al naq te’xk’e reetal chan ru naq li Santil Musiq’ej nokoxtenq’a naq yookeb’ chixb’ichankil “Li Santil Musiq’ej,” (B’ichleb’aal choq’ reheb’ li Kok’al, 56).

reetalil li k’utuk

Xk’utb’al li tzol’leb’: Kok’al ak ninqeb’

Mateo 3

Osob’tesinb’ilin rik’ineb’ li k’ojob’anb’il k’anjel re li Tijonelil re Aaron.

Laj Jwan aj Kub’sihom Ha’ kiwan li Tijonelil re Aaron rik’in, chi jo’kan naq rilb’al li resil a’an sa’ Mateo 3 naru tatxtenq’a chixtzolb’aleb’ li kok’al chirix li Tijonelil re Aaron. Tenq’aheb’ chixk’eeb’al reetal naq naqak’ul qosob’tesinkil ut qawankilal rik’in li tijonelil a’an.

Kok’ k’anjel naru chi b’aanumank

• Patz’ reheb’ li kok’al naq te’xk’e rajlileb’ li k’anjel sa’ li Tijonelil re Aaron, li wankeb’ sa’ Tzol’leb’ ut Sumwank 20:46, 58–60; 84:111. Patz’ reheb’ li kok’al naq te’xsik’ sa’ Mateo 3 chan ru naq laj Jwan kixtz’aqob’resi ru li k’anjel a’an. Chan ru naru naqab’oqeb’ li qas qiitz’in chi chalk rik’in li Kristo, jo’ kixb’aanu laj Jwan?

• K’uteb’ lix jalam-uuch laj k’amol re li Tijonelil re Aaron li yookeb’ chixb’aanunkil li k’ojob’anb’il k’anjel re li kub’iha’ ut re li loq’laj wa’ak (chi’ilmanq Hu reheb’ li Jalam-uuch re li Evangelio, 103–104, 107–108). Aatinanqex chirix xk’anjeleb’ li k’ojob’anb’il k’anjel chiqakawresinkil re xk’ulb’al li Jesukristo ut lix mayej re tojb’al rix li maak.

• Ilomaq ru Tzol’leb’ ut Sumwank 13:1, ut ch’olob’ xyaalal naq laj Jwan aj Kub’sihom Ha’ kixk’ojob’ wi’chik li Tijonelil re Aaron re laj Jose Smith. Patz’ reheb’ li kok’al chan ru naq ak osob’tesinb’ileb’ sa’ xk’ab’a’ naq li Tijonelil re Aaron kik’ojob’aak wi’chik.

Mateo 3:13–17; Markos 1:1–11; Lukas 3:2–18

Naru nink’uulaheb’ lin sumwank re li kub’iha’.

Sa’ li seraq’ chirix lix kub’iha’ li Jesus wan jun li chaab’il hoonal re xtenq’ankileb’ li kok’al chixk’oxlankileb’ lix sumwank re li kub’iha’ ut chixteneb’ankileb’ wi’chik rib’ chixk’uulankileb’.

Kok’ k’anjel naru chi b’aanumank

• Patz’ reheb’ li kok’al naq te’xk’eheb’ xhoonal re rilb’aleb’ li raqal sa’ Markos 1:1–11. Aatinanqex chirix li rajom li qaChoxahil Yuwa’ naq too’ab’inq chiru. K’a’ut naq li Jesus kikub’e xha’, us ta maak’a’ xmaak? Tenq’aheb’ li kok’al chixtawb’al xsumenkil li patz’om a’an sa’ Mateo 3:13–15 ut 2 Nefi 31:6–7.

• Numsihomaqeb’ li sumwank li ke’xb’aanu li kok’al naq ke’kub’e xha’, li natawman sa’ Mosiah 18:8–10 ut Tzol’leb’ ut Sumwank 20:37. Patz’ reheb’ li kok’al naq te’xtz’iib’aheb’ li raqal a’an sa’ li perel re kok’ k’anjel re li xamaan a’in.

• Kawresiheb’ k’iila sumal li kok’ hu rik’ineb’ li ch’ol aatin malaj li jalam-uuch li neke’xk’ul rib’ ut neke’reetaliheb’ li qasumwank re li kub’iha’. K’eheb’ li kok’ hu chi huphu. Kanab’eb’ li kok’al chixk’eeb’aleb’ xhoonal re xb’alq’usinkileb’ wiib’ chi kok’ hu sa’ jun sut, re xyalb’al xtawb’al wiib’ li neke’xk’ul rib’. Naq te’xch’utub’ jun sumal, ye reheb’ li kok’al naq te’xye chan ru naq neke’roxloq’i li sumwank a’an.

• Ye chan ru naq xat-osob’tesiik rik’in roxloq’inkil laa sumwank re li kub’iha’.

Mateo 3:11, 16

Li Santil Musiq’ej naru nikinixb’eresi.

Eb li kok’al yookeb’ chixtzolb’al xk’eeb’al reetal ut xtaaqenkil lix b’eresihom li Santil Musiq’ej. Tenq’aheb’ chixtawb’al ru naq roxloq’inkileb’ lix sumwank re li kub’iha’ tixke’ xk’ulub’ileb’ re xk’ulb’al lix b’eresihom a’an.

Kok’ k’anjel naru chi b’aanumank

• Patz’ re li junjunq chi kok’al naq taaril jun reheb’ li raqal a’in reheb’ li loq’laj hu ut tixch’olob’ chan ru naq nokoraatina li Santil Musiq’ej: Helaman 5:30; Tzol’leb’ ut Sumwank 6:23; 8:2–3; 11:12–13.

• Patz’ re jun ch’ina al naq taaril Mateo 3:11. Chan ru naq li Santil Musiq’ej a’an chanchan li xam? Li xam naq’ixnob’resin ut naxk’e li saqen re xk’amb’al qab’e (chi’ilmanq Jwan 15:26; 2 Nefi 32:5).

• Patz’ reheb’ li kok’al naq te’xmutz’ li ruheb’ ut te’xye’ li ruq’eb’. Chirix a’an numsi chi timil junaq li xik’ malaj junaq li k’aam sa’ xyi li ruq’eb’. Kanab’eb’ chixyeeb’al resil naq te’reek’a. K’a’ru naxk’ut li ch’ina k’anjel a’in chirix xk’eeb’al reetal lix musiq’ahom li Santil Musiq’ej?

• Patz’ reheb’ li kok’al naq te’xwotz li k’a’ru xe’xk’ul rik’in li Santil Musiq’ej. K’a’ut naq roxloq’inkil li qasumwank nokoxtenq’a chixk’ulb’al lix b’eresihom li Santil Musiq’ej?

reetalil li tzolok

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixpatz’b’al reheb’ lix na’ xyuwa’ malaj reheb’ jalan chik xkomoneb’ lix junkab’al chirixeb’ lix kub’iha’.

Xkawresinkil qib’ jo’ aj k’utunel

Sik’ laa musiq’ankil aajunes. Maawileb’ li tusleb’ aatin a’in jo’ li na’leb’ tento taataaqe naq tatk’utuq. Oksi b’an jo’ li na’leb’ li nakatxtenq’a chixk’ulb’al laa musiq’anb’il na’leb’ ajwi’ laa’at naq taatz’il rix li ajb’il ru chiruheb’ li kok’al li nakatzoleb’. (Chi’ilmanq Li k’utuk jo’ li Kolonel, 7.)

perel re kok’ k’anjel: naru taakub’eeq inha’ jo’ li Jesus