B’onb’il lem sa’ li santil ochoch re Nauvoo, xb’aan laj Tom Holdman

23–29 enero

Mateo 3; Markos 1; Lukas 3

“Tuqub’omaq lix b’e li Qaawa’ ”

Re xtikib’ankil, il Mateo 3; Markos 1; ut Lukas 3. Wi nakattijok re naq li Santil Musiq’ej tatxtenq’a chixtawb’aleb’ ru li ch’ol a’in, a’an tixk’e li na’leb’ li taak’anjelaq choq’ aawe. Tz’iib’aheb’ li musiq’anb’il na’leb’ a’in, ut k’e aach’ool chixb’aanunkil.

Tz’iib’a li nakak’oxla

Li Jesukristo ut lix evangelio naru chajalb’al. Laj Lukas kixye jun li najteril profeetil aatin re laj Isaias, li naxk’ut k’a’ru taa’uxq xb’aan lix k’ulunik li Kolonel: “Chixjunil li julux taab’ut’manq, chixjunileb’ li tzuul ut eb’ li b’ool tekub’simanq xteram, li yokos ru taatiikob’resimanq ut li b’uq’ux ru taatuqub’amanq ru choq’ taq’a” (Lukas 3:5; chi’ilmanq ajwi’ Isaias 40:4). A’in jun esil choq’ qe chiqajunilo, ut jo’kan ajwi’ choq’ reheb’ li neke’k’oxlank re naq ink’a’ neke’ru chi jalaak. Wi naru nakub’siman xteram jun li tzuul li chalen najter wanjenaq, naraj naxye naq li Qaawa’ naru tooxtenq’a chixtiikob’resinkil li qayokos ruhil b’e (chi’ilmanq Lukas 3:4–5). Naq naqak’ulub’a li raatin laj Jwan aj Kub’sihom ha’ naq taqajal qak’a’uxl ut toojalaaq, naqakawresi li qak’a’xul ut li qach’ool chixk’ulb’al li Jesukristo re naq laa’o ajwi’ “taqil li kolb’a-ib’ naxk’e li Dios” (Lukas 3:6).

Li na’leb’ re xtzolb’aleb’ li loq’laj hu aajunes

Ani laj Markos?

Sa’ xyanqeb’ li ke’xtz’iib’a resil lix yu’am li Jesus, ka’ch’in ajwi’ naqanaw chirix laj Markos. Naqanaw naq kirochb’eeni laj Pablo, laj Pedro, ut xkomoneb’ chik li taqlanb’il aj k’anjel. Wankeb’ laj tzolol re li Santil Hu li neke’xk’oxla naq laj Pedro kiyehok re laj Markos naq tixtz’iib’a resil lix yu’am li Kolonel. Nak’oxlaman naq lix hu laj Markos kitz’iib’aman xb’een wa chiruheb’ li oxib’ chik chi hu chirix lix yu’am li Jesus.

Chi’ilmanq ajwi’ K’utul Raqal reheb’ li Loq’laj Hu, “Markos.”

Mateo 3:1–12; Markos 1:1–8; Lukas 3:2–18

Li jalb’a-k’a’uxlej, a’an jun nimla jalaak sa’ li qak’a’uxl ut li qach’ool.

Li k’anjel taqlanb’il chixb’aanunkil laj Jwan aj Kub’sihom Ha’ a’an re xkawresinkil xch’ooleb’ li tenamit chixk’ulb’al li Kolonel, ut chi wank jo’ a’an. Chan ru naq kixb’aanu? A’an kixye, “Cheyot’ eech’ool chejal eek’a’uxl” (Mateo 3:2). Ut kiroksiheb’ li na’leb’ re li ru li che’ ut li trigo re k’utuk chirix li jalb’a-k’a’uxlej (chi’ilmanq Lukas 3:9, 17).

K’a’ru chik junaq li eetalil nakataw sa’eb’ li k’utum chirix lix k’anjel laj Jwan aj Kub’sihom Ha’? (chi’ilmanq Mateo 3:1–12; Markos 1:1–8; Lukas 3:2–18). Naru taak’e reetalileb’ sa’eb’ laa loq’laj hu, malaj taayiib’ li kok’ jalam-uuch chirixeb’. K’a’ru neke’xk’ut li eetalil a’in chirix li tzol’leb’ re li jalb’a-k’a’uxlej ut k’a’ut naq aajel ru?

Li tz’aqal jalb’a-k’a’uxlej a’an “xjalajik li qak’a’uxl ut li qach’ool li na’ak’ob’resink re li k’a’ru naqak’oxla chirix li Dios, chiqix laa’o, ut chirix li qayu’am. … Naraj naxye risinkil qib’ rik’in li maa’usilal, ut xq’axtesinkil li qach’ool ut li qajom re li Dios” (K’utul Raqal reheb’ li Loq’laj Hu, “Jalok k’a’uxl, jalb’a-k’a’uxlej”). Sa’ Lukas 3:7–14 chan ru naq laj Jwan kixb’oqeb’ li tenamit chixjalb’al rib’ re te’xkawresi rib’ chixk’ulb’al li Kristo? Chan ru naq taaruuq taak’anjelaq aawe li na’leb’ a’in? Chan ru taak’ut naq xajal aak’a’uxl chi yaal? (chi’ilmanq Lukas 3:8).

Chi’ilmanq ajwi’ Russell M. Nelson, “Naru taqab’aanu li chaab’il wi’chik ut toowanq chi chaab’il wi’chik,” Jolomil ch’utub’aj-ib’ re abril 2019; Dallin H. Oaks, “Saqob’resinb’il qu xb’aan li jalb’a-k’a’uxlej,” Jolomil ch’utub’aj-ib’ re abril 2019.

Mateo 3:7; Lukas 3:7

Aniheb’ laj Fariseo ut eb’ laj Saduceo?

Eb’ laj Fariseo wankeb’ sa’ jun ch’uut chi paab’aal reheb’ laj Judio, li anchaleb’ xch’ool chixpaab’ankil chi tz’aqal tz’aqal lix chaq’rab’ laj Moises ut lix k’anjelankil. Eb’ laj Saduceo a’aneb’ jun ch’uuteb’ aj Judio wankeb’ xtumin nawb’ileb’ ru sa’ li paab’aal ut xjolomil li tenamit. Ink’a’ neke’xpaab’ li tzol’leb’ chirix li wakliik chi yo’yo. Li wiib’ chi ch’uut ke’xjal xb’e rik’in li tz’aqal rajom xchaq’rab’ li Dios.

Chi’ilmanq ajwi’ Mateo 23:23–28; K’utul Raqal reheb’ li Loq’laj Hu, “Fariseo,” “Saduceo (Saduseey).”

Mateo 3:11, 13–17; Markos 1:9–11; Lukas 3:15–16, 21–22

Li Jesukristo kikub’e xha’ re “xtz’aqob’resinkil ru chixjunil li tiikilal.”

Naq xkub’e aaha’, xab’aanu jo’ chanru li Kolonel. Juntaq’eeta li k’a’ru nakatzol sa’eb’ li seraq’ a’in chirix lix kub’iha’ li Kolonel rik’in li k’a’ru xk’ulman sa’ laa kub’iha’.

Lix kub’iha’ li Kolonel	Lin kub’iha’
Lix kub’iha’ li Kolonel Ani kikub’sink xha’ li Jesus, ut k’a’ru li wankilal kiwan rik’in?	Lin kub’iha’ Ani xkub’sink aaha’ laa’at, ut k’a’ru li wankilal xwan rik’in?
Lix kub’iha’ li Kolonel B’ar kikub’e xha’ li Jesus?	Lin kub’iha’ B’ar xkub’e aaha’ laa’at?
Lix kub’iha’ li Kolonel Chan ru naq kikub’e xha’ li Jesus?	Lin kub’iha’ Chan ru naq xkub’e aaha’ laa’at?
Lix kub’iha’ li Kolonel K’a’ut naq kikub’e xha’ li Jesus?	Lin kub’iha’ K’a’ut naq xkub’e aaha’ laa’at?
Lix kub’iha’ li Kolonel Chan ru naq li qaChoxahil Yuwa’ kixk’ut naq sa xch’ool rik’in li Jesus?	Lin kub’iha’ Chan ru naq li qaChoxahil Yuwa’ xk’ut naq sa xch’ool naq xkub’e aaha’? Chan ru naq a’an xk’ut chawu chalen sa’ li kutan a’an naq sa xch’ool aawik’in?

(Chi’ilmanq ajwi’ 2 Nefi 31; Mosiah 18:8–11; Tzol’leb’ ut Sumwank 20:37, 68–74; “El bautismo de Jesus” (video), ChurchofJesusChrist.org.

Mateo 3:16–17; Markos 1:9–11; Lukas 3:21–22

Eb’ li komon sa’ li Roxichal li Dios jalan jalanqeb’.

Sa’ li Santil Hu, wan k’iila na’leb’ li neke’xk’ut naq eb’ li komon sa’ li Roxichal li Dios jalan jalanqeb’. Li seraq’ chirix lix kub’iha’ li Kolonel a’an jun reheb’ li eetalil. Naq nakawileb’ li seraq’, tz’il rix li nakatzol chirix li Roxichal li Dios. K’a’ut naq jwal aajel ru li tzol’leb’ a’in choq’ aawe?

Chi’ilmanq ajwi’ Genesis 1:26; Mateo 17:1–5; Jwan 17:1–3; Hechos 7:55–56; Tzol’leb’ ut Sumwank 130:22.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Mateo 3.Laj Jwan aj Kub’sihom Ha’ kiwan li Tijonelil re Aaron rik’in. K’a’ru naqatzol rik’in li eetalil re laj Jwan chirix li rajom li Tijonelil re Aaron? K’a’ru li osob’tesink naqak’ul b’antiox re li Tijonelil re Aaron? Wi wan jun li ch’ajom sa’ laa junkab’al, naru nakak’e aahoonal re xtenq’ankil chixtawb’al ru chan ru naru chiroksinkil li Tijonelil re Aaron re rosob’tesinkil jalan chik li kristiaan. (Chi’ilmanq ajwi’ Tzol’leb’ ut Sumwank 13:1; 20:46–60.)

Naq nakub’e li qaha’, nach’aje’ li qamaak

Mateo 3:11–17; Markos 1:9–11; Lukas 3:21–22.Eb’ li komon re laa junkab’al, ma rilomeb’ junaq li kristiaan chi kub’eek xha’ malaj chi k’ojob’aak jo’ komon re li iglees? K’a’ru xe’reek’a naq xe’ril? Naru nakak’ut chiruheb’ a’an k’a’ru nareetali li kub’iha’ ut li k’ojob’aak. Chan ru naq li kub’iha’ ut li k’ojob’aak a’an chanchan li yo’laak wi’chik? K’a’ut naq nasub’e chixjunil li qajunxaqalil naq nakub’e qaha’? K’a’ut naq naqatiqib’ qib’ chi saq naq nakub’e qaha’? K’a’ut naq nayeeman naq li maatan re li Santil Musiq’ej a’an jun “kub’iha’ rik’in xam”? (Tzol’leb’ ut Sumwank 20:41; chi’ilmanq ajwi’ K’utul Raqal reheb’ li Loq’laj Hu, “Kub’iha’, Kub’sink Ha’,” “Santil Musiq’ej”).

Mateo 3:17; Markos 1:11; Lukas 3:22.Jo’q’e xqeek’a naq li Dios xsaho’ sa’ xch’ool qik’in? K’a’ru naru taqab’aanu jo’ junkab’al re taasaho’q xch’ool li Dios?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Li kub’iha’,” B’ichleb’aal choq’ reheb’ li Kok’al, 54–55.

Xkawresinkil aawib’ chi tzolok

Patz’ aatenq’ankil rik’in li Qaawa’. K’eeb’ileb’ li loq’laj hu chi k’utb’esinb’il, ut re xtawb’aleb’ ru chi us, naqaj ru li na’leb’ chi k’utb’esinb’il chiqu. Li Qaawa’ kixye, “Chextz’aamanq ut k’eek’ooq eere; chexsik’oq ut teetaw; chexb’oqoq chire kab’l ut tehe’q cheru” (Mateo 7:7).

Laj Jwan aj Kub’sihom Ha’ kixkub’si xha’ li Jesus, xb’aan laj Greg K. Olsen