Chalqex chixnimankil, xb’aan laj Dana Mario Wood

9–15 enero

Mateo 2; Lukas 2

Xoochalk chixloq’oninkil

Naq taawil Mateo 2 ut Lukas 2, k’e reetal li musiq’anb’il na’leb’ nakak’ul. Li na’leb’ re tzolok sa’ li hu a’in naru nakatxtenq’a chixk’eeb’al reetal li xninqal ru na’leb’ aajeleb’ ru sa’eb’ li ch’ol a’in.

Tz’iib’a li nakak’oxla

Chalen chaq xkutankil lix yo’lajik, kik’eeman reetal naq li Jesus maawa’ jo’eb’ li xkomon li kok’al. Moko ka’aj ta wi’ xb’aan li ak’ chahim sa’ choxa malaj li sahil ch’oolejil xyehomeb’ li anjel naq chaq’al ru lix ka’ch’inal li Jesus. Wan ajwi’ li na’leb’ naq naab’al paay chi aj paab’anel—jalan jalanq xtenamitileb’, jalan jalanq xk’anjeleb’ , ut jalan jalanq li ke’chal wi’ chaq—sa’ junpaat ke’reek’a naq te’raj jilok rik’in. Chi maji’aq naxye li raatin, “kim, taaqehin,” ak yookeb’ chi chalk (Lukas 18:22). A’b’an moko chixjunileb’ ta ke’chal rik’in. Ke’wan naab’aleb’ li ink’a’ ke’raj rab’inkil ut kiwan ajwi’ jun aj b’eresinel tenamit kiraj kamsink re. A’b’anan li kristiaan tuulaneb’, tiikeb’, ut wankeb’ rajom re xtawb’al li yaal ke’xk’e reetal ani a’an—li Mesias yeechi’inb’il. Lix anchalileb’ xch’ool naxk’e x’anchalil li qach’ool laa’o, xb’aan naq li “chaab’il esilal,” ut “xnimal sahil ch’oolej” li ke’xk’am chaq kiwan choq’ reheb’ “chixjunil li tenamit,” ut li “Kolonel, a’an li Kristo, li Qaawa’ ” kiyo’la sa’ li kutan a’an choq’ qe chiqajunil (chi’ilmanq Lukas 2:10–11).

Li na’leb re xtzolb’aleb’ li loq’laj hu aajunes

Lukas 2:1–7

Li Jesukristo kiyo’la sa’ tuulanil.

Us ta li Jesukristo kiwan rik’in xloq’al li Dios Yuwa’b’ej “naq toj maji’ kiwank li ruchich’och’ ” (Jwan 17:5), a’an kiwan xch’ool chi yo’laak sa’ tuulanil ut chi wank sa’ qayanq laa’o arin sa’ li ruchich’och’. Naq taawil Lukas 2:1–7, k’e reetal k’a’ru nakatzol chirix a’an sa’ li seraq’ chirix lix yo’lajik. K’e aach’ool chixk’eeb’al reetaleb’ li na’leb’ sa’ li esilal a’in li maji’ nakak’e reetal. Chan ru najala li nakaweek’a chirix a’an rik’in xk’oxlankil li na’leb’ a’in?

Chi’ilmanq ajwi’ “El Niño Jesús” (video), ChurchofJesusChrist.org.

Mateo 2:1–12; Lukas 2:8–38

Wankeb’ naab’al aj yehol nawom chirix lix yo’lajik li Kristo.

Chirix lix yo’lajik ut lix ka’ch’inal li Kristo ke’wan chaq naab’aleb’ aj yehol nawom ut eb’ aj tij li ke’chal sa’ jalan jalanq na’ajej. Naq nakatzoleb’ li seraq’ chirix, k’a’ru nakatzol chirix xloq’oninkil ut xch’olob’ankil xyaalal li Kristo?

Xch’olob’ankil xyaalal li Kristo	K’a’ru nintzol chirix li loq’onink ut li wank jo’ jun aj yehol nawom chirix li Kristo?
Xch’olob’ankil xyaalal li Kristo Eb’ laj ilol xul (Lukas 2:8–20)	K’a’ru nintzol chirix li loq’onink ut li wank jo’ jun aj yehol nawom chirix li Kristo?
Xch’olob’ankil xyaalal li Kristo Laj Simeon (Lukas 2:25–35)	K’a’ru nintzol chirix li loq’onink ut li wank jo’ jun aj yehol nawom chirix li Kristo?
Xch’olob’ankil xyaalal li Kristo Li xAna (Lukas 2:36–38)	K’a’ru nintzol chirix li loq’onink ut li wank jo’ jun aj yehol nawom chirix li Kristo?
Xch’olob’ankil xyaalal li Kristo Eb’ laj q’e (Mateo 2:1–12)	K’a’ru nintzol chirix li loq’onink ut li wank jo’ jun aj yehol nawom chirix li Kristo?

Chi’ilmanq ajwi’ 1 Nefi 11:13–23; 3 Nefi 1:5–21; “Se anuncia a los pastores el nacimiento de Cristo” ut “El niño Jesús es presentado en el templo” (eb’ li video), ChurchofJesusChrist.org.

Mateo 2:13–23

Eb’ li na’b’ej yuwa’b’ej naru neke’xk’ul li na’leb’ chi k’utb’esinb’il re xkolb’al rix lix junkab’aleb’.

Laj Jose maajun wa raj kiru chixb’aanunkil li patz’b’il chiru—a’an xkolb’al rix li Jesus sa’ xka’ch’inal—chi ink’a’ tenq’anb’il chaq sa’ choxa. Jo’eb’ laj q’e, kixk’ul jun na’leb’ chi k’utb’esinb’il, naq chalk re jun li rahilal. Naq nakawil resil li kixk’ul laj Jose sa’ Mateo 2:13–23, k’oxlaheb’ li rahilal re tz’ejwalej ut re musiq’ej li naqanumsi sa’ li qakutankil. K’oxla li xak’ul naq xaweek’a naq li Dios yoo chixk’amb’al aab’e re xkolb’al aawix ut re xkolb’al rixeb’ laa komon. K’oxla maare xwotzb’al li k’a’ru xak’ul rik’in xkomoneb’ chik li kristiaan. K’a’ru naru taab’aanu re toj taak’ul xk’amb’al aab’e?

Jo’kan ajwi’, naru rilb’al li video “El espíritu de la primera Navidad” (ChurchofJesusChrist.org) re rilb’al k’a’ru kireek’a laj Jose naq kikana sa’ xb’een a’an li k’anjel re rilb’al li Ralal li Dios.

Lukas 2:40–52

Jo’ ch’ajom, li Jesus k’eek’o xch’ool chixb’aanunkil li rajom lix Yuwa’.

Jo’ saaj winq, li Kolonel kixk’ut li evangelio rik’in nimla wankilal, toj reetal naq eb’ laj tzolonel sa’ li santil ochoch ke’sach xch’ool “xb’aan lix seeb’al xk’a’uxl ut lix sumehom” (Lukas 2:47). K’a’ru nakatzol sa’eb’ li raqal a’in chirix li Kolonel jo’ saaj winq? Chan ru naq eb’ li saaj komon li nawb’ileb’ ru aab’an yookeb’ chixk’eeb’aleb’ xch’ool chixb’aanunkil “lix k’anjel lix Yuwa’ ”? (Lukas 2:49). Chan ru naq eb’ li ch’ajom ut eb’ li kok’al xate’xtenq’a chixtawb’al ru li evangelio? K’a’ chik ru nakatzol rik’in li kixb’aanu li Jesus sa’ xka’ch’inal, sa’ Lukas 2:52 ut sa’ Mateo 3:24–25 jo’ jaltesinb’il ru xb’aan laj Jose Smith?

“Ma inkʼaʼ nekenaw naq tento tinwanq saʼ rochoch lin Yuwaʼ?” (Lukas 2:49).

K’a’ru li Santil Hu jaltesinb’il ru xb’aan laj Jose Smith?

Rik’in naq ke’isiman chaq sa’ li Santil Hu “k’iila na’leb’ saqen ru ut loq’eb’ ” chiru xnumikeb’ li chihab’ (1 Nefi 13:28; chi’ilmanq ajwi’ Moises 1:41), li Qaawa’ kixtaqla laj Jose Smith chixjaltesinkil ru li Santil Hu rik’in li Musiq’ej, ut a’an li Santil Hu chi jaltesinb’il ru xb’aan laj Jose Smith (JJS) nayeeman re. Wankeb’ naab’al li aatin jaltesinb’il ru xb’aan li profeet li wankeb’ sa’ xraqik li loq’laj hu reheb’ laj Santil Paab’anel sa’ Roso’jikeb’ li Kutan. Li hu re Mateo 24, chi jaltesinb’il ru xb’aan laj Jose Smith, a’an ajwi’ Jose Smith—Mateo, naru natawman sa’ li Q’ol Nim Xtz’aq. Re xnawb’al xkomon, chi’ilmanq li raqalil re Temas del Evangelio “Biblia, Inerrancia de la” (topics.ChurchofJesusChrist.org).

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Lukas 2.B’oqeb’ li komon sa’ li junkab’al re te’xsik’ ru jun kristiaan yeeb’il resil sa’ Lukas 2 re te’ril junjunq raqal chirix li xb’aanu li kristiaan a’an rik’in li Kolonel, ut re te’xwotz jun na’leb’ xe’xtzol li naxnimob’resi lix paab’aal chirix li Jesukristo. B’ichahomaq sa’ komonil “Lix b’ich li xMaria” malaj “B’ich re Ralankil” (B’ichleb’aal choq’ reheb’ li Kok’al, 28–29, 32–33). K’a’ru naqatzol rik’ineb’ li b’ich a’in chirix lix yo’lajik li Kolonel?

K’oxla chan ru naq eb’ li jalam-uuch te’ruuq chixchaab’ilob’resinkil lee seraq’ chirix lix yo’lajik li Kristo. (Chi’ilmanq Hu reheb’ li Jalam-uuch re li Evangelio malaj history.ChurchofJesusChrist.org/exhibit/birth-of-Christ.)

Mateo 2:1–12.K’a’ru naqatzol rik’ineb’ laj q’e chirix xsik’b’al ut xtawb’al li Kolonel?

Lukas 2:41–49.K’a’ru “lix k’anjel li Yuwa’b’ej”? (Lukas 2:49; chi’ilmanq Moises 1:39; Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 1.2, ChurchofJesusChrist.org). K’a’ru naqatzol chirix li seraq’ wan sa’ Lukas 2:41–49? Naru taatz’iib’a junjunq li na’leb’ chan ru naq eb’ li komon sa’ laa junkab’al te’ruuq chi tz’aqonk sa’ lix k’anjel li Yuwa’b’ej, ut taak’eheb’ sa’ jun sek’. Chiru li xamaan jun chik, naq yooqeb’ chixsik’b’al chan ru xb’aanunkil lix k’anjel lix Choxahil Yuwa’, naru te’risi jun li na’leb’ sa’ li sek’. K’uub’ jo’q’e teewotz li k’a’ru xek’ul.

Lukas 2:52.K’a’ru naqatzol sa’ Lukas 2:52 chirix li Jesus naq kiniman sa’ lix yu’am? K’a’ruheb’ li meta sa’ junesal malaj sa’ junkab’alej re k’iik “rik’in qana’leb’, rik’in qateram ut sa’ chaab’ilal rik’in li Dios ut chiruheb’ li winq”?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Sa’ Choxa Xlemtz’un Taq’a,” B’ichleb’aal choq’ reheb’ li Kok’al, 24.

Xkawresinkil aawib’ chi tzolok

Oksiheb’ li tenq’ sa’eb’ li loq’laj hu. Re xtawb’al naab’al aana’leb’ naq taatzoleb’ li loq’laj hu, oksiheb’ li tenq’ jo’ li K’utul Raqal reheb’ li Loq’laj Hu, ut jalan jalanqeb’ chik tenq’ li neke’tawman sa’ ChurchofJesusChrist.org.

Laj Kolol re li ruchich’och’ kiyo’la sa’ tuulanil.