16–22 enero

Jwan 1

Xqataw li Mesias

Naq nakawil ut nakak’oxla Jwan 1, tz’iib’a li musiq’anb’il na’leb’ nakak’ul. K’a’ru li esilal nakataw li mas taak’anjelaq choq’ aawe ut choq’ re laa junkab’al? K’a’ru tatruuq chixwotzb’al sa’ laa tzoleb’aal sa’ li Iglees?

Tz’iib’a li nakak’oxla

Ma xak’oxla jun sutaq ma xanaw raj naq li Jesus aj Nazaret a’an Ralal li Dios wi ta xatwan chi yo’yo naq yoo a’an chi k’anjelak sa’ li ruchich’och’? Chiru naab’al chihab’, eb’ laj Israelita li tiikeb’ chi paab’ank, jo’ laj Andres, laj Pedro, laj Felipe, ut laj Natanael, yookeb’ chaq chiroyb’eninkil ut chixtz’aamankil naq taachalq li Mesias li yeechi’inb’il. Naq ke’ril a’an, chan ru naq ke’xnaw naq a’an li yookeb’ chixsik’b’al? Jo’ chanru ajwi’ naq laa’o noko’ok chixnawb’al ru li Kolonel—rik’in xk’ulub’ankil qajunes li b’oqom, “kimqex ut toxeeril” (Jwan 1:39) re teenaw chejunjunqal. Naqil resil sa’eb’ li loq’laj hu. Naqab’i lix tzol’leb’. Naqak’e reetal chan ru lix yu’am. Naqeek’a lix Musiq’. Ut naq yooko chixb’aanunkil, naqak’e reetal, jo’ kixb’aanu laj Natanael, naq li Kolonel naxnaw qu ut nokoxra, ut naraj qakawresinkil re taqak’ul “xkomon chik xninqal ru na’leb’ ” (Jwan 1:50).

Li na’leb’ re xtzolb’aleb’ li loq’laj hu aajunes

Ani laj Jwan?

Laj Jwan a’an chaq jun xtzolom laj Jwan aj Kub’sihom Ha’, ut moqon a’an ki’ok chixtaaqenkil li Jesukristo, ut kiwan choq’ jun reheb’ lix Kab’laju chi Apostol. Kixtz’iib’a lix hu laj Jwan, junjunq chik li kok’ taqlanb’il hu, ut li hu Apokalipsis. Sa’ lix hu laj Jwan, naxye naq a’an li tzolom li “raaro xb’aan li Jesus” malaj li “rech tzolonelil” (Jwan 13:23; 20:3). Q’axal anchal xch’ool laj Jwan chixjultikankil li evangelio jo’kan naq kixtz’aama naq a’an chikanaaq sa’ li ruchich’och’ toj reetal li xkab’ xk’ulunik li Kolonel re taaruuq chixk’amb’aleb’ chaq li aamej rik’in li Kristo (chi’ilmanq Tzol’leb’ ut Sumwank 7:1–6).

Chi’ilmanq ajwi’ K’utul Raqal reheb’ li Loq’laj Hu, “Jwan, ralal laj Sebedeo.”

Jwan 1:1–5

Li Jesukristo “sa’ xtiklajik … wan chaq rik’in li Dios.”

Laj Jwan kixtikib’ lix hu rik’in xyeeb’al resil li k’anjel kixb’aanu li Kristo naq maji’ nayo’la: “Sa’ xtiklajik … li Aatin [li Jesukristo] wan chaq rik’in li Dios.” K’a’ru nakatzol sa’eb’ li raqal 1–5 chirix li Kolonel ut lix k’anjel? Naru taataw chik xkomon aana’leb’ sa’ JJS Jwan 1:1–5 (li wan sa’ xraqik li roxichal chi loq’laj hu). Naq nakatikib’ tzolok chirix lix yu’am li Kolonel, k’a’ut naq aajel ru xnawb’al chirix lix k’anjel naq maji’ nayo’la?

Chi’ilmanq ajwi’ Temas del Evangelio, “Jesucristo elegido para ser el Salvador,” topics.ChurchofJesusChrist.org.

Jwan 1:1–18

Li Jesukristo a’an li “tz’aqal saqen,” li Ralal li Dios.

Laj Jwan kimusiq’aak chixsik’b’al li Kolonel sa’ xk’ab’a’ lix ch’olob’ahom laj Jwan aj Kub’sihom Ha’, li kixch’olob’ naq a’an “taqlanb’il chaq chixyeeb’al ani … li tz’aqal saqenk” (Jwan 1:8–9). Jo’kan ajwi’ laj Jwan kixch’olob’ xnimal lix nawom xch’ool chirix lix yu’am ut lix k’anjel li Kolonel.

Us raj tana’ xtz’iib’ankil chi tzoltzo li yaal kixk’ut laj Jwan sa’ xtiklajik lix ch’olob’ahom chirix li Kristo (eb’ li raqal 1–18; chi’ilmanq ajwi’ li jaltesinb’il ru xb’aan laj Jose Smith, JJS, Jwan 1:1–19 [sa’ xraqik li roxichal chi loq’laj hu]). K’a’ut naq laj Jwan kixtikib’ lix hu rik’ineb’ li na’leb’ a’in? K’oxla maare xtz’iib’ankil aach’olob’ahom chirix li Jesukristo—k’a’ raj ru taawaj laa’at xwotzb’al? K’a’ru li xak’ul laa’at li xatxtenq’a chixnawb’al ru ut chixtaaqenkil li Kolonel? Ani taaruuq chi osob’tesiik rik’in rab’inkil laa ch’olob’ahom?

Jwan 1:11–13

Li Jesukristo naxk’e “qe wank choq’ ” ralal xk’ajol li Dios.

Us ta chiqajunilo wanko choq’ ralal ut xrab’in li Dios Yuwa’b’ej sa’ li musiq’ej, naq nokomaakob’ nokonajto’ malaj nokokana chi jachb’il qu rik’in a’an. Li Jesukristo naxk’e qab’e re sutq’iik rik’in a’an b’antiox re lix mayej. Tz’il rix k’a’ru naxk’ut Jwan 1:11–13 chirix li wulak jo’ ralal ut xrab’in li Dios. K’e reetal ajwi’ li k’a’ru neke’xk’ut li raqal a’in chirix xk’ulb’aleb’ li seeb’al a’an: Romanos 8:14–18; Mosiah 5:7–9; Tzol’leb’ ut Sumwank 25:1. K’a’ru naraj naxye choq’ aawe “k’eeb’il aawe wulak choq’ ” ralal malaj xrab’in li Dios?

Jwan 1:18

Li Yuwa’b’ej naxch’olob’ li yaal chirix li Ralal.

Jwan 1:18 naxye naq maajun rilom ru li Dios. A’b’anan, lix jaltesinkil ru li Santil Hu xb’aan laj Jose Smith re li raqal a’an naxye naq “maajun winq x’ilok re li Dios jun sutaq, ka’ajwi’ naq a’an xch’olob’ xyaalal li K’ajolb’ej” (chi’ilmanq JJS, Jwan 1:19). K’oxla xnumsinkil b’ar wi’ xawab’i naq li Dios Yuwa’b’ej naxk’e xnawom chirix li Ralal: Mateo 3:17; 17:5; 3 Nefi 11:6–7; Jose Smith—Resilal 1:17.

K’a’ut naq a’an jun osob’tesink naq wankeb’ li seraq’ a’an? K’a’ru neke’xk’ut chawu chirix lix wanjik li Jesukristo rik’in lix Yuwa’?

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq naqatzoleb’ li loq’laj hu, taqak’ul li musiq’anb’il na’leb’ choq’ re li qayu’am.

Jwan 1:4–10.Chan ru naq taatenq’aheb’ li komon sa’ laa junkab’al chixtawb’al ru li k’a’ru neke’ril chirix li saqen sa’eb’ li raqal a’in? Maare taakanab’eb’ li komon sa’ laa junkab’al chixk’utb’al chixjunjunqaleb’ jun saqen naq q’ojyin sa’ kab’l, ut taawotz chan ru naq li Kolonel wan choq’ saqen sa’ xyu’ameb’. Chirix a’an, naq teeyaab’asi Jwan 1:4–10, eb’ li komon sa’ li junkab’al maare te’wanq chik xna’leb’ chirix li raatin laj Jwan chirix li Jesukristo, lix Saqenkil li ruchich’och’.

Jwan 1:35–36.K’a’ut naq laj Jwan aj Kub’sihom Ha’ kixk’ab’a’i li Jesus “lix Karneer li Dios”? K’a’ru naqatzol chirix li k’ab’a’ej a’an sa’ li raatin li Elder Jeffrey R. Holland, “K’ehomaq reetal lix Karneer li Dios” malaj li raatin li Elder Gerrit W. Gong “Li Chaab’il aj Ilol Karneer, lix Karneer li Dios”? (Jolomil ch’utub’aj-ib’ re abril 2019)

Jwan 1:35–46.K’a’ru kik’ulman rik’in lix ch’olob’ahom laj Jwan? K’a’ru neke’xtzol li komon sa’ laa junkab’al rik’ineb’ li ani yeeb’ileb’ resil sa’eb’ li raqal a’in, chirix xwotzb’al li evangelio? Chi’ilmanq li video “Invitar a otros a venir y ver” (ChurchofJesusChrist.org).

Jwan 1:45–51.K’a’ru kixb’aanu laj Natanael li kitenq’ank re chixk’ulb’al xnawom xch’ool chirix li Kolonel? B’oqeb’ li komon sa’ laa junkab’al naq te’xye chan ru xe’xk’ul li xnawom xch’ooleb’.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Laa’at lin saqen,” Eb’ li B’ich, 47.

Xkawresinkil qib’ jo’ aj k’utunel

Xk’utb’al li k’anjeleb’aal. B’oqeb’ li komon sa’ li junkab’al naq te’xtaw li k’a’aq re ru taatenq’anq reheb’ chixtawb’al ru li na’leb’ li natawman sa’eb’ li loq’laj hu li yookex chirilb’al jo’ junkab’al. Qayehaq, maare te’roksi jun li kandeel choq’ reetalil lix Saqenkil li Kristo (chi’ilmanq Jwan 1:4).

Li Jehova kixyo’ob’tesi li ruchich’och’, xb’aan laj Walter Rane