26 diciembre–1 enero

Tento sa’ qab’een laa’o naq tootzoloq

Li rajomeb’ li loq’laj hu a’an aatenq’ankil chi chalk rik’in li Kristo, ut re naq taakanaaq chi jalb’il wi’chik aach’ool chirix lix evangelio. Kim, Taaqehin—Choq’ reheb’ li komon ut li junkab’al naru tatxtenq’a chixtawb’aleb’ ru li loq’laj hu, ut chixtawb’al sa’eb’ a’an li musiq’ejil metz’ew li taak’anjelaq aawe laa’at ut re aajunkab’al. Chi jo’kan, sa’eb’ laa tzoleb’aal sa’ li Iglees, tatruuq chixwotzb’al aana’leb’ ut chixwaklesinkileb’ xch’ool laa wech aj tzolonel rik’in li xyalb’aleb’ xq’e chixtaaqenkil li Kristo.

Tz’iib’a li nakak’oxla

“Kʼaʼru nekesik’?” Li Jesus kixpatz’ reheb’ lix tzolom chirix laj Jwan aj Kub’sihom Ha’ (Jwan 1:38). Naru nakapatz’ aawib’ li na’leb’ ajwi’ a’in—xb’aan naq taataw aana’leb’ sa’ li Ak’ Chaq’rab’ chiru li chihab’ a’in a’ yaal li k’a’ru nakasik’. “Chexsik’oq, ut teetaw” kixyeechi’i li Kolonel (Mateo 7:7). Chi jo’kan, oksiheb’ li patz’om li neke’chal sa’ aak’a’uxl naq yookat chi tzolok, ut chirix a’an k’e aach’ool chixsik’b’al lix sumenkil. Sa’ li Ak’ Chaq’rab’ taawil resil li ninqi musiq’ejil na’leb’ ke’xk’ul lix tzolom li Jesukristo. Jo’ jun xtzolom li Kolonel ut aj paab’anel, naru ajwi’ nakak’ul li xnimal ru musiq’ejil na’leb’ wi nakak’ul aab’oqb’al xb’aan li Kolonel chiru chixjunil li hu a’in, “Kim, taaqehin” (Lukas 18:22).

Li na’leb’ re xtzolb’aleb’ li loq’laj hu aajunes

Re tzolok chi yaal rik’in li Kolonel, tento tink’ulub’a li b’oqb’ilin wi’ xb’aan a’an, “Kim, taaqehin.”

Lix b’oqom li Kolonel, “Kim, taaqehin,” a’an choq’ qe chiqajunil—maak’a’ naxye ma toja’ xoo’ok sa’ xb’ehil li wank choq’ tzolom, malaj ma xoob’eek chiru chalen chaq xtiklajik li qayu’am. A’in li b’oqom kixk’e re li saaj winq b’ihom li yoo chaq chixyalb’al xq’e chixpaab’ankil chixjunileb’ li chaq’rab’ (chi’ilmanq Mateo 19:16–22; Lukas 18:18–23). Li kixtzol li saaj winq—ut li tento taqatzol laa’o—a’an naq li wank choq’ tzolom naraj naxye xq’axtesinkil chixjunil li qaam chiru li qaChoxahil Yuwa’ ut li Jesukristo. Noko’usa chi wank choq’ tzolom naq naqak’e reetal k’a’ru namaak’a’o’ qe, naq naqajal qib’, ut naq naqasik’ xtaaqenkil chi anchal qach’ool.

Li tzolok rik’in li Kolonel natikla naq naqayal qaq’e chixtawb’al ru li k’a’ru kixk’ut. Qayehaq, chan ru naq naniman aana’leb’ chirix li tuulano’k naq nakak’oxla li na’leb’ a’in?

• Lix k’utum li Kolonel (chi’ilmanq Mateo 18:1–5; Lukas 18:9–14)

• Jun li eetalil chirix lix yu’am (chi’ilmanq Jwan 13:1–15)

Wi taawaj tzolok chik, b’aanu a’in rik’in jalan chik na’leb’ sa’ li evangelio, jo’ li rahok, malaj li kuyuk.

Tento sa’ inb’een laa’in naq tintzoloq.

Li Elder David A. Bednar kixye: “Ink’a’ raj taqoyb’eni naq li Iglees, jo’ jun ch’uut, tixk’ut chiqu chi moko tixye qe chixjunil li tento taqanaw ut taqab’aanu re ok choq’ tzolom tiikeb’ xch’ool ut re kuyuk chi anchal qa’chool toj sa’ roso’jik. Teneb’anb’il b’an sa’ qab’een laa’o naq taqatzol li aajel ru xtzolb’al, naq toowanq chi tiik qach’ool jo’ naqanaw naq tento xb’aanunkil, ut too’ok jo’ li ani naraj li Qaawa’. Ut li qochoch a’an li tz’aqal na’ajej re tzolok, re wank chi tiik qach’ool, ut re ok jo’ li ani naraj li Qaawa’ ” (“Kawresinb’il re xk’ulb’al chixjunil li k’a’ru na’ajman,” Jolomil ch’utub’aj-ib’ re abril 2019).

K’a’ru naraj naxye naq tento sa’ aab’een laa’at naq tattzoloq? Re xsumenkil li patz’om a’in, il li raatin li Elder Bednar, ut jo’kan ajwi’ eb’ li raqal a’in sa’eb’ li loq’laj hu: Jwan 7:17; 1 Tesalonicenses 5:21; Santiago 1:5–6, 22; 2:17; 1 Nefi 10:17–19; 2 Nefi 4:15; Alma 32:27; ut Tzol’leb’ ut Sumwank 18:18; 58:26–28; 88:118. K’a’ru nakaweek’a chi musiq’anb’il naq taab’aanu re naq tatwanq chi mas wi’chik jo’ aj b’aanunel sa’ xtzolb’al li evangelio?

Tento tinnaw li yaal injunes.

Maare wankeb’ ani nakanaw ru li chanchan maajo’q’e neke’sach xpaab’aal, maak’a’ naxye k’a’ru neke’xk’ul sa’ xyu’ameb’. Maare neke’xk’e chak’oxlaheb’ li oob’ tuq’ixq li wankeb’ xna’leb’ sa’ li jaljookil ru aatin re li Kolonel (chi’ilmanq Mateo 25:1–13). Li k’a’ru maare ink’a’ nakawil a’an naq yalb’ileb’ xq’e chixkawob’resinkil lix nawomeb’ xch’ool chirix li yaal.

Chan ru naq naqak’ul ut naqach’olani lix nawom qach’ool? Tz’iib’a li na’leb’ li nachal aawik’in naq nakak’oxlaheb’ li raqal a’in sa’eb’ li loq’laj hu: Lukas 11:9–13; Jwan 5:39; 7:14–17; Hechos 17:10–12; 1 Korintios 2:9–11; ut Alma 5:45–46. (Chi’ilmanq ajwi’ Temas del Evangelio, “Testimonio,” topics.ChurchofJesusChrist.org.)

Li junjunq qe tento tixtaw xjunes rib’ xnawom xch’ool.

K’a’ru tento tinb’aanu naq wankeb’ inpatz’om?

Naq nakasik’ li musiq’ejil na’leb’, te’ok li patz’om sa’ laa k’a’uxl. Li na’leb’ a’in naru nakatxtenq’a chixsumenkileb’ li patz’om re naq taakawob’resimanq laa paab’aal ut lix nawom aach’ool:

• Sik’ aana’leb’ rik’in li Dios. Chixjunil li yaal rik’in li Dios na’el chaq, ut a’an naxk’utb’esi li yaal rik’in li Santil Musiq’ej, eb’ li loq’laj hu, ut rik’ineb’ lix profeet ut eb’ lix apostol.

• Chatk’anjelaq rik’in paab’aal. Wi ink’a’ sumenb’il sa’ junpaat aapatz’om, chiwanq aapaab’aal naq li Qaawa’ tixk’utb’esi lix sumenkil naq nawulak tz’aqal xkutankil. Sa’ li kutan a’in, maakanab’ xyu’aminkil li yaal li ak nakanaw.

• Rajlal chiwanq sa’ aach’ool li junelik q’e kutan. K’e aach’ool chirilb’al li k’a’aq re ru jo’ na’ilok li Qaawa’, moko jo’ ta na’ilok li ruchich’och’. Ileb’ laa patz’om chi wank sa’ aach’ool lix k’uub’anb’il na’leb’ li qaChoxahil Yuwa’ choq’ re li qakolb’al.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Mateo 13:1–23.Re xtenq’ankil laa junkab’al chixkawresinkil rib’ chi tzolok sa’ li Ak’ Chaq’rab’ chiru li chihab’ a’in, naru taawil li jaljookil ru aatin chirix laj awinel. Maare laa junkab’al tixyal xsahil li elk re xsik’b’al li jalanq paay chi ch’och’ li nayeeman sa’ li jaljookil ru aatin chirix laj awinel. Chan ru naru naqab’aanu naq li qaam chanchanaq “li chaab’il ch’och’ ” jo’ kixye li Jesus? (Mateo 13:8).

Galatas 5:22–23; Filipenses 4:8.Li Awa’b’ej Russell M. Nelson xatxb’oq “chixb’aanunkil naq laa junkab’al a’anaq jun na’ajej re paab’aal” ut “xtuqub’ankil, naq a’anaq jun na’ajej re tzolok chirix li evangelio.” Reheb’ li te’xb’aanu chi jo’kan, a’an kixyeechi’i “Lee kok’al te’raj raj xtzolb’al ut xyu’aminkileb’ lix k’utum li Kolonel, ut taak’osq lix wankil laj tza sa’ lee yu’am ut sa’ lee rochoch. Nimaq xwankil li jalaak teek’ul sa’ lee junkab’al” (“Li ok choq’ jun aj Santil Paab’anel sa’ Roso’jikeb’ li Kutan jwal chaab’il,” Jolomil ch’utub’aj-ib’ re octubre 2018).

Sa’ xtiklajik li ak’ chihab’, us naq taa’uxq jun ch’utub’aj-ib’ re rilb’al chan ru naq li junkab’alej a’anaq “jun na’ajej re paab’aal” ut “jun na’ajej re tzolok chirix li evangelio.” K’a’ru nachal sa’ eek’a’uxl naq nekeril ru Galatas 5:22–23 ut Filipenses 4:8? Naru teek’e lee meta sa’ junesal ut jo’ junkab’al re xtzolb’al li Ak’ Chaq’rab’ chiru li chihab’ chal re. K’a’ru naru naqab’aanu re naq taanaq sa’ qach’ool li qameta?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Tzolin chi b’eek sa’ saqen,” B’ichleb’aal choq’ reheb’ li Kok’al, 197.

Xkawresinkil aawib’ chi tzolok

Chasik’ li tzol’leb’. Jun tzol’leb’ a’an jun li yaal li wan chi junelik, ut ink’a’ najalman. Li Awa’b’ej Boyd K. Packer kixye naq “li yaalil tzol’leb’, naq tawb’il ru, naxjal li k’a’uxlej ut li b’aanuhomej” (“Los niños pequeños,” Liahona, enero 1987, 17). Naq laa’at ut laa junkab’al neketzoleb’ li loq’laj hu, sik’omaqeb’ li na’leb’ li texxtenq’a chi wank chi mas wi’chik jo’ li Kolonel.

Xsaqenkil li ruchich’och’, xb’aan laj Brent Borup