26 diciembre–1 enero

Tento sa’ qab’een laa’o naq tootzoloq

Naq nakawileb’ li raqal re li loq’laj hu sa’ li tusleb’ aatin a’in, tz’iiba’ li musiq’anb’il na’leb’ nakak’ul. Taak’e reetal naq sa’ li junjunq chi tusleb’ aatin re li tzoleb’aal hu a’in wan li kok’ k’anjel choq’ reheb’ li kok’al toj ka’ch’ineb’ xyu’am ut choq’ reheb’ li kok’al ak ninqeb’, a’b’an naru taachap a’ yaal b’ar wan re li kok’ k’anjel choq’ re laa tzoleb’aal.

Xkanab’ankileb’ chi wotzok

Sa’ xtiklajik li tzolok, k’eheb’ xhoonal li kok’al re te’xwotz li yookeb’ chixtzolb’al chirix li evangelio. Sa’ li xamaan a’in, maare taab’oqeb’ chixwotzb’aleb’ li seraq’ mas neke’wulak chiruheb’ chirix li Jesukristo.

Xk’utb’al li tzol’leb’: Kok’al toj ka’ch’ineb’ xyu’am

Li Jesukristo naraj naq tintaaqe a’an.

Laa’at ut eb’ li kok’al teeril ru naab’aleb’ li seraq’ chirix lix yu’am li Jesukristo chiru li chihab’ a’in. Tenq’aheb’ li kok’al chixtawb’al ru naq yooko chixtzolb’aleb’ li seraq’ a’an re naq tooruuq chixtaaqenkil chi us lix b’aanuhom li Jesukristo.

Kok’ k’anjel naru chi b’aanumank

• Ye reheb’ li kok’al naq sa’ Mateo 4:18–22, li Kolonel naxye qe, “Kim, taaqehin.” B’aanu junaq li b’atz’unk b’ar wi’ junaq reheb’ li kok’al tixb’aanu junaq li eek’asink-ib’, toja’ naq tixye reheb’ xkomoneb’ li kok’al: “Kim, taaqehin.” Ye reheb’ li kok’al naq te’xb’aanu ajwi’ li eek’asink-ib’ a’an.

• K’ut xjalam-uucheb’ li kristiaan li yookeb’ chixtaaqenkil li Kolonel chi jalan jalanq, chiru lix k’anjel sa’ ruchich’och’ ut sa’ ajwi’ li kutan a’in. Naru nakataweb’ li jalam-uuch sa’ li Hu reheb’ li Jalam-uuch re li Evangelio malaj sa’eb’ li hu puktesinb’il xb’aan li Iglees. Naru ajwi’ taak’ut li video “Ilumina el Mundo” (ChurchofJesusChrist.org). Kanab’eb’ li kok’al chixyeeb’al chan ru naq eb’ li kristiaan yookeb’ chixtaaqenkil li Kolonel.

• Tenq’aheb’ li kok’al chixk’oxlankil k’a’ru yookeb’ chixb’aanunkil re xtaaqenkil li Kolonel. Xb’ichankil “Tinsik’ li Qaawa’ sa’ lin ka’ch’inal,” (B’ichleb’aal choq’ reheb’ li Kok’al, 67) naru naxk’e xna’leb’eb’. Kanab’eb’ chixyiib’ankileb’ rib’ sa’ jalam-uuch chixb’aanunkileb’ li k’a’aq re ru a’an.

Eb’ li kok’al naru te’xtaw xnawomeb’ xch’ool chirix xyaalalileb’ li loq’laj hu.

Tz’aqal yaaleb’ li loq’laj hu.

Eb’ li kok’al naru neke’xk’ul jun xnawomeb’ xch’ool naq tz’aqal yaaleb’ li loq’laj hu, us ta naq maji’ neke’ru chirilb’aleb’ xsa’. Naq yooqat chixtzolb’aleb’ li loq’laj hu rik’ineb’ li kok’al chiru li chihab’ a’in, naru nakatenq’aheb’ chixnawb’al xjuneseb’ rib’ naq tz’aqal yaaleb’ li loq’laj hu.

Kok’ k’anjel naru chi b’aanumank

• Ye reheb’ li kok’al naq te’xye k’a’ruheb’ li maatan mas neke’wulak chiruheb’ li ak xk’ulumeb’ sa’ xkutankil lix yo’lajikeb’ malaj sa’ junaq chik hoonal. K’am junaq li loq’laj hu chi lanlo rix sa’ li hu re maatan, kanab’ naq jun li ch’ina al tixte, ut ch’olob’ xyaalal naq li loq’laj hu a’an jun maatan naxk’e qe li qaChoxahil Yuwa’.

• K’uteb’ chiru li kok’al junjunq li hu re li seraq’ yal yoob’anb’il, ut patz’ reheb’ b’ar wan li seraq’ mas neke’wulak chiruheb’. K’uteb’ li loq’laj hu chiruheb’ ut ch’olob’ xyaalal naq chi sa’eb’ li loq’laj hu wan li raatin li Dios choq’ qe. Neke’aatinak chirixeb’ li kristiaan li tz’aqal ke’wan ut chirix li k’a’aq re ru tz’aqal ke’uxman.

• Wotzeb’ li esil sa’ 2 Timoteo 3:15 ut Moroni 10:3–5, ut tenq’aheb’ li kok’al chixka’sutinkil junjunqaq li raqal. Tenq’aheb’ chixtawb’al ru naq a’aneb’ naru neke’xnaw xjuneseb’ rib’ naq tz’aqal yaaleb’ li loq’laj hu.

• Muq junaq xjalam-uuch li Kolonel, ut k’eheb’ li kok’ tenq’ reheb’ li kok’al re naq te’xtaw. Tenq’aheb’ li kok’al chixtawb’al ru chan ru naq xtz’ilb’aleb’ rix li loq’laj hu nokoxtenq’a chixnawb’al ru li Jesukristo. Kanab’eb’ li kok’al naq chi junjunqal te’xmuq li jalam-uuch ut te’xk’e li kok’ tenq’ reheb’ xkomon chik li kok’al.

• B’ichahomaq jun b’ich chirix xtzolb’al li evangelio, maare “Tintzol, tink’oxla, tintijoq” (B’ichleb’aal choq’ reheb’ li Kok’al, 66), ut tenq’aheb’ li kok’al chixk’oxlankil li eek’asink-ib’ naxk’am rib’ rik’in li raatinul li b’ich. Wotz rik’ineb’ li kok’al jun malaj wiib’ reheb’ li raqal mas nawulak chawu sa’eb’ li loq’laj hu, ut ye reheb’ chan ru naq xanaw naq tz’aqal yaaleb’ li loq’laj hu. Wi wankeb’ li raqal malaj li seraq’ reheb’ li loq’laj hu neke’wulak chiruheb’ li kok’al, kanab’eb’ chixwotzb’al.

Xk’utb’al li tzol’leb’: Kok’al ak ninqeb’

Li Jesukristo naraj naq tintzoloq chirix a’an ut naq tintaaqe.

K’oxla chan ru naq wulajenaqat chixnawb’al ru li Jesukristo. K’a’ru naru nakab’aanu re xtenq’ankileb’ li kok’al chi tzolok chirix a’an ut chixtaaqenkil?

Kok’ k’anjel naru chi b’aanumank

• Ye reheb’ li kok’al naq te’aatinaq chirix junaq li ramiiw ut naq te’xseraq’i chan ru naq xe’wulak jo’ ramiiweb’ rib’. Ilomaq ut aatinanqex chirix Jwan 5:39 ut Jwan 14:15 re xtawb’al chan ru naru naqeek’a naq nach’ wanko rik’in li Jesus. Patz’ reheb’ li kok’al naq te’xwotz resil naq xe’reek’a naq nach’ wankeb’ rik’in a’an.

• K’am laa tzoleb’aal xb’eeninkil li na’ajej re li ch’utleb’aal kab’l. Patz’ reheb’ li kok’al naq te’xtaqsi li ruq’ naq te’ril k’a’ruhaq li najultikan reheb’ chan ru naru te’xtaaqe li Kolonel (jo’ li kub’sib’aal ha’ malaj junaq li jalam-uuch).

• B’ichahomaq jun li b’ich chirix li Jesukristo, maare “Kim, taaqehin” (Eb’ li B’ich, 66). Patz’ reheb’ li kok’al naq te’xye chan ru naq xe’xtaaqe lix b’aanuhom li Kolonel sa’ xyu’ameb’.

Naru nintzoleb’ li loq’laj hu injunes wib’.

Naq nakawileb’ li loq’laj hu rik’ineb’ li kok’al ut nakak’e lix patz’omeb’, naru taatoch’eb’ xch’ool re te’xnaw naq naru te’tzoloq sa’eb’ li loq’laj hu ut te’xtaw li muqmuukil nawom nim xloq’al.

Kok’ k’anjel naru chi b’aanumank

• Ilomaq Jwan 5:39 ut Hechos 17:10–11, ut patz’ reheb’ li kok’al k’a’ru li neke’xtzol chirix xtzolb’aleb’ li loq’laj hu.

• Sik’ ru junjunqeb’ li raqal ninqeb’ xwankil sa’ li Ak’ Chaq’rab’, tz’iib’aheb’ chiru kok’ hu, ut muqeb’ li kok’ hu. K’uub’eb’ li kok’ tenq’ li te’k’amoq reheb’ li kok’al sa’ jun “xsik’b’al li muqmuukil maatan” sa’ li tzoleb’aal malaj sa’ xna’aj li ch’utleb’aal kab’l re te’xtaw li raqal reheb’ li loq’laj hu. Naq te’xtaw li junjunq chi raqal, aatinanqex chirix li naraj naxye ut k’a’ut naq a’an jun li maatan mas nim xloq’al.

• Wotz junjunqeb’ li raqal reheb’ li loq’laj hu li jwal nakara ut ch’olob’ k’a’ut naq mas chaab’il xyaalaleb’ choq’ aawe. Jo’ tzoleb’aal, tz’iib’ahomaqeb’ resil jun siir li raqal ninqeb’ xwankil re li loq’laj hu li neke’xtaw li kok’al sa’ li Ak’ Chaq’rab’ chiru li chihab’ a’in—maare sa’ kab’l malaj sa’ li Tzoleb’aal reheb’ li Kok’al.

• Ch’olob’ chiruheb’ li kok’al naq wan naq ch’a’aj rilb’aleb’ ru li loq’laj hu. Patz’ reheb’ li kok’al naq te’xwotz xna’leb’eb’ chirib’ileb’ rib’ chirix xtzolb’aleb’ li loq’laj hu. Patz’ ajwi’ reheb’ naq te’xwotz lix chaab’il k’ulumeb’ rik’ineb’ li loq’laj hu.

• Tenq’aheb’ li kok’al chixyiib’ankil jun li ajleb’aal kutan re naq te’ruuq chixjuch’b’al reetalil li kutan naq neke’ril ruheb’ li loq’laj hu. Eb’ li ajleb’aal kutan a’in naru neke’xjultika reheb’ rilb’al ruheb’ li loq’laj hu wulaj wulaj.

Tento naq taawanq lix nawom inch’ool.

Tento naq eb’ li kok’al nakatzoleb’ te’xtaw lix nawom xch’ooleb’ chirix li qaChoxahil Yuwa’ ut li Jesukristo. K’a’ru naru nakab’aanu laa’at re xwaklesinkileb’ xch’ool chixtzolb’al li yaal xjuneseb’ rib’?

Kok’ k’anjel naru chi b’aanumank

• Wotz li seraq’ chirixeb’ li lajeeb’ chi tuq’ixq (chi’ilmanq Mateo 25:1–13; chi’ilmanq ajwi’ Ch’ol 47: Li lajeeb’ chi tuq’ixq,” sa’ Eb’ li Esilal sa’ li Ak’ Chaq’rab’, 118–120, malaj li video sa’ ChurchofJesusChrist.org). Patz’ reheb’ li kok’al: K’a’ru xjuntaq’eetil lix nawom qach’ool rik’ineb’ li saqen? K’a’ut naq aajel ru naq tento taawanq lix nawom qach’ool?

• Aatinanqex chirix li naru taqab’aanu re xkawob’resinkil lix nawom qach’ool. Re xtawb’al chik li na’leb’, ye reheb’ li kok’al naq te’ril Jwan 7:17 ut Moroni 10:3–5. Patz’ reheb’ naq te’xwotz li k’a’ru neke’xnaw naq yaal.

• Patz’ reheb’ li kok’al naq tate’xtenq’a chixtz’iib’ankil chiru kok’ kaaxukuut junjunq li kok’ na’leb’ li neke’xkawob’resi lix nawom qach’ool (chi’ilmanq Temas del Evangelio, “Testimonio,” topics.ChurchofJesusChrist.org). Kanab’eb’ li kok’al chiroksinkileb’ li kok’ kaaxukuut re xkab’lankil jun k’a’aq re ru nareetali li xnawom ch’oolej.

Xb’oqb’aleb’ chi tzolok sa’ kab’l

Chan ru naru nakawaklesiheb’ xch’ool li kok’al ut eb’ lix na’ xyuwa’ chixtzolb’al li Ak’ Chaq’rab’ sa’ kab’l? Naru raj taapatz’ reheb’ li kok’al naq te’xk’uula sa’ xk’a’uxleb’ jun li raqal reheb’ li loq’laj hu li ak xex’aatinak wi’ sa’ li tzoleb’aal (naru xjachb’al ru li raqal chi kok’ raqal), ut naq te’xwotz li raqal rik’in lix junkab’aleb’.

Xkawresinkil qib’ jo’ aj k’utunel

Jaleb’ li kok’ k’anjel a’ yaal lix chihab’eb’ li kok’al nakatzoleb’. Eb’ li kok’al toj ka’ch’ineb’ neke’raj ru li xch’olob’ankil chi us ut neke’tzolok rik’in k’iila paay xjalanil li k’utuk. Naq eb’ li kok’al yookeb’ chi k’iik, mas neke’ru wi’chik chi tenq’ank ut naru naq moko ch’a’ajaq ta chiruheb’ xwotzb’al li neke’xk’oxla. K’eheb’ lix hoonal re wotzok, xyeeb’al lix nawomeb’ xch’ool, ut tz’aqonk. Tenq’aheb’ wi na’ajman ru. (Chi’ilmanq Li k’utuk jo’ li Kolonel, 25–26.)