2–8 enero

Mateo 1; Lukas 1

“Chi’uxq we jo’ laa waatin”

Tikib’ li tzolok rik’in rilb’al Mateo 1 ut Lukas 1. Kim, Taaqehin—Choq’ reheb’ li komon ut li junkab’al naru nakatxtenq’a chixtawb’aleb’ ru li ch’ol a’an, ut li tusleb’ aatin a’in naru naxk’e aana’leb’ re li k’utuk. Wi nakatzoleb’ li kok’al toj ka’ch’ineb’ xyu’am ut nakawaj xkomon aatenq’ankil, sik’ sa’ “Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” li natawman sa’ xtiklajik li hu a’in.

Xkanab’ankileb’ chi wotzok

Ye reheb’ li kok’al naq te’chunlaaq sa’ jun sirso, ut patz’ re jun naq tixwotz jun na’leb’ toje’ xtzol sa’ li loq’laj hu. Toja’ naq a’an tixtolk’osi jun b’olotz re, malaj tixk’ut chi ruq’ junaq chik li ch’ina al, re naq tixwotz xna’leb’.

Xk’utb’al li tzol’leb’: Kok’al toj ka’ch’ineb’ xyu’am

Mateo 1:18–25; Lukas 1:26–38

Eb’ li anjel ke’xyaab’asi resil lix yo’lajik li Jesus.

Chi junjunqal, li xMaria ut laj Jose ki’ula’aniik xb’aan jun li anjel li kixyaab’asi resil lix yo’lajik li Jesukristo. Li ke’xk’ul a’an naru tixtenq’aheb’ li kok’al chixtawb’al ru naq jwal nim xwankil lix yo’lajik li Kristo.

Kok’ k’anjel naru chi b’aanumank

• Patz’ re xna’ xyuwa’ jun reheb’ li kok’al naq te’wulaq sa’ li tzoleb’aal chi tiqb’ileb’ jo’ xMaria ut laj Jose. Patz’ reheb’ naq te’xwotz li esil sa’ Mateo 1:18–25 ut Lukas 1:26–38.

• Seraq’i lix k’utunikeb’ li anjel chiru li xMaria ut laj Jose, jo’ tz’iib’anb’il resil sa’eb’ li raqal a’in. (Chi’ilmanq ajwi’ “Ch’ol 2: Li xMaria ut li anjel” ut “Ch’ol 4: Laj Jose ut li anjel” sa’ Eb’ li Esilal sa’ li Ak’ Chaq’rab’, 8–9, 12, malaj eb’ li video sa’ ChurchofJesusChrist.org.) Naru taak’ut li jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Patz’ reheb’ li kok’al naq te’xka’suti li seraq’ a’an aawik’in.

• Patz’ reheb’ li kok’al naq te’xyiib’ xjalam-uuch li seraq’ wankeb’ sa’ Mateo 1:18–25 ut Lukas 1:26–38.

Xchalik laj Gabriel rik’in xMaria, xb’aan laj John Scott

Lukas 1:5–25, 57–63

Lin Choxahil Yuwa’ naxsumeheb’ lin tij.

Laj Sakarias ut li xElisabet yookeb’ chi tijok chiru naab’al chihab’ re te’wanq xkok’al. Li qaChoxahil Yuwa’ kixsume lix tijeb’ naq kixtaqla jun ralaleb’, laj Jwan aj Kub’sihom Ha’ xk’ab’a’. Chan ru taawoksi li seraq’ a’an re xk’utb’al chiruheb’ li kok’al naq li qaChoxahil Yuwa’ naxsume li qatij?

Kok’ k’anjel naru chi b’aanumank

• Sa’ laa waatin, seraq’i li kik’ulman sa’ Lukas 1:5–25, 57–63. Maare wiib’ oxib’ sut taaseraq’i. Sik’eb’ ru li kok’al li te’wanq jo’ laj Sakarias, li xElisabet, ut li anjel, toja’ naq te’xb’aanu li kik’ulman sa’ li seraq’. Ka’suti li aatin kixye li anjel re laj Sakarias: “X’ab’iman laa tij” (Lukas 1:13). Seraq’i junaq aanumsihom naq li qaChoxahil Yuwa’ kixsume laa tij.

• Oksi “At inYuwa’, tuqtuuqin” (B’ichleb’aal choq’ reheb’ li Kok’al, 10) malaj jalan chik li b’ich li tixk’ut chiruheb’ li kok’al chan ru li tijok. Naq eb’ li kok’al neke’xb’ichaheb’ li aatin “tijok,” “tijon,” malaj “tij,” kanab’eb’ chixxulub’ankil lix jolomeb’ ut chixq’alunkileb’ lix tel.

• Patz’ re li junjunq chi kok’al naq tixb’aanu li eek’asink-ib’ li tixk’utb’esi k’a’ru naru tixpatz’ sa’ li tij. Kanab’eb’ li jun siir chik chi kok’al naq te’xq’ehi k’a’ru neke’xk’utb’esi li eek’asink-ib’ a’an. Naru te’xtaweb’ li na’leb’ sa’ li hu re li kok’ k’anjel re li xamaan a’in.

Lukas 1:30–35

Li Jesukristo a’an li Ralal li Dios.

Li Jesukristo a’an li Ralal li qaChoxahil Yuwa’ ut li xMaria. Chan ru taatenq’aheb’ li kok’al chi tzolok chirix li Kristo?

Kok’ k’anjel naru chi b’aanumank

• Ye reheb’ li kok’al naq li anjel kixye re li xMaria naq lix k’uula’al tixk’ab’a’in li Ralal li Dios (chi’ilmanq Lukas 1:35). Tenq’aheb’ li kok’al chixka’sutinkil li ch’ol aatin “Li Jesukristo a’an li Ralal li Dios.” Tenq’aheb’ li kok’al chixtawb’al ru aniheb’ lix na’ xyuwa’ li Jesus rik’in xkanab’ankileb’ chixyiib’ankileb’ lix na’ xyuwa’eb’ a’an sa’ jalam-uuch. Naq yooqeb’ chixb’aanunkil, ye reheb’ naq kiwan ajwi’ xna’ xyuwa’ li Jesus—xMaria ut li qaChoxahil Yuwa’. Jo’kan ajwi’, kipatz’e’ re laj Jose naq tixkol rix ut tixk’aak’ale li Jesus naq wanq sa’ xb’een li ruchich’och’.

• K’e lix nawom aach’ool naq b’antiox re naq li Jesus a’an li Ralal li Dios, kiru chi kamk sa’ xk’ab’a’eb’ li qamaak ut chi q’ajk sa’ li yu’am. K’uteb’ li jalam-uuch re lix kamik li Jesus chiru li krus ut lix waklijik chi yo’yo (chi’ilmanq Hu reheb’ li Jalam-uuch re li Evangelio, 57, 59).

Xk’utb’al li tzol’leb’: Kok’al ak ninqeb’

Mateo 1:18–25; Lukas 1:5–37

Rik’in li Dios, maak’a’ ch’a’aj.

Lix yo’lajikeb’ li Jesus ut laj Jwan aj Kub’sihom Ha’ ke’uxman ka’ajwi’ rik’in lix wankilal li Dios. Li tzolok chirixeb’ li sachb’a-ch’oolej a’an naru tixkawob’resi lix paab’aaleb’ li kok’al naq li Dios wan lix wankilal re xb’aanunkil li sachb’a-ch’oolej sa’eb’ lix yu’am.

Kok’ k’anjel naru chi b’aanumank

• Naq nekeril Mateo 1:18–25 ut Lukas 1:5–37, patz’ reheb’ li kok’al, “K’a’ raj ru teeye wi ta laa’ex li xMaria?” malaj “K’a’ raj ru teereek’a wi ta laa’ex laj Sakarias?”

• Seraq’i li nayeeman sa’ Mateo 1:18–25 ut Lukas 1:5–37 re naq te’xtaw ru. Patz’ reheb’ li kok’al naq te’xtaqsi li ruq’ naq neke’rab’i k’a’ru li ink’a’ raj taaruuq chi uxmank chi maak’a’ lix wankilal li Dios. K’a’ru chik xkomon li seraq’ naru neke’xwotz li kok’al b’ar wi’ li Dios kixb’aanu li chanchan raj naq ink’a’ naru chi uxmank?

• Tenq’aheb’ li kok’al chixtzolb’al sa’ xk’a’uxleb’ Lukas 1:37. Re xb’aanunkil a’in, naru taatz’iib’a li raqal sa’ li pizarron ut taapatz’ reheb’ li kok’al naq te’xyaab’asi k’iila sut. Rajlal sut naq neke’xyaab’asi, taasach jun reheb’ li aatin.

Mateo 1:21–25; Lukas 1:30–35, 46–47

Li Jesukristo a’an li Ralal li Dios.

Li Jesukristo a’an li Ralal li qaChoxahil Yuwa’ ut li xMaria. Chan ru taatenq’aheb’ li kok’al chixtawb’al ru li na’leb’ a’in?

Kok’ k’anjel naru chi b’aanumank

• Patz’ reheb’ li kok’al naq te’ril Lukas 1:30–35 ut te’xsik’ xsumenkileb’ li patz’om a’in: “Ani lix na’ li Jesus?” ut “Ani lix Yuwa’ li Jesus?” Tenq’aheb’ chixtawb’al ru naq ka’ajwi’ li Jesukristo kiwan jun lix ruchich’och’il na’, xMaria, ut jun lix choxahil yuwa’, li qaChoxahil Yuwa’ (chi’ilmanq ajwi’ 1 Nefi 11:18–21).

• Naq yooqat chirilb’aleb’ ru li raqal a’in, patz’ reheb’ li kok’al naq te’xsik’ k’ab’a’ej malaj xjolomil k’ab’a’ej re li Jesukristo. K’a’ru xyaalalileb’ li k’ab’a’ej a’an, ut k’a’ru neke’xk’ut chiqu chirix li Jesus?

• Wotz lix nawom aach’ool chirix li Jesukristo, ut waklesi xch’ooleb’ li kok’al chixb’aanunkil ajwi’ a’an.

Lukas 1:5–25, 57–66

Lin Choxahil Yuwa’ narab’iheb’ ut naxsumeheb’ lin tij.

Li Dios junelik naxsumeheb’ li tij, us ta ink’a’ junelik jo’ chanru naqoyb’eni laa’o. Chan ru taawoksi li seraq’ chirix laj Sakarias ut xElisabet re xk’utb’al chiruheb’ li kok’al li na’leb’ a’an?

Kok’ k’anjel naru chi b’aanumank

• Patz’ reheb’ li kok’al k’a’ raj ru te’xye re ani li kixpatz’ junaq li rosob’tesinkil, a’b’an toj maji’ naxk’ul. Kanab’eb’ chixk’oxlankil li patz’om, naq neke’ril ru sa’ komonil Lukas 1:5–25, 57–66. (Chi’ilmanq ajwi’ “Ch’ol 1: Li xElisabet ut laj Sakarias” ut “Ch’ol 3: Nayo’la laj Jwan aj Kub’sihom Ha’,” sa’ Eb’ li Esilal sa’ li Ak’ Chaq’rab’, 6–7, 10–11, malaj eb’ li video sa’ ChurchofJesusChrist.org.) K’a’ raj ru te’xye laj Sakarias ut xElisabet re ani nareek’a naq maji’ sumenb’il lix tij?

• Chi rub’elaj li tzolok, b’oqeb’ wiib’ oxib’ li kok’al chixwotzb’al xnumsihomeb’ naq li qaChoxahil Yuwa’ kixsumeheb’ lix tij. Wotz aanumsihom naq xaweek’a naq eb’ laa tij xe’sumeek jo’ chanru ink’a’ aawoyb’enihom.

• Patz’ reheb’li kok’al naq te’xyiib’ xjalam-uuch naq li qaChoxahil Yuwa’ xsume jun li tij—li reheb’ ajwi’ a’an. Kanab’eb’ chixwotzb’aleb’ lix jalam-uuch chirib’ileb’ rib’.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz rik’ineb’ lix junkab’al li jalam-uuch xe’xyiib’ sa’ li tzoleb’aal. Waklesiheb’ xch’ool chixpatz’b’al reheb’ lix komon naq te’xwotz chan ru naq li Dios kixsumeheb’ lix tij.

Xkawresinkil qib’ jo’ aj k’utunel

Tenq’aheb’ li kok’al toj ka’ch’ineb’ xyu’am chi tzolok sa’eb’ li loq’laj hu. Re xtenq’ankileb’ li kok’al toj ka’ch’ineb’ xyu’am chi tzolok sa’eb’ li loq’laj hu, k’e aach’ool chixch’olob’ankil jun ajwi’ li raqal reheb’ li loq’laj hu malaj jun ajwi’ li ch’ol aatin. Naru nakakanab’eb’ li kok’al chi xaqliik malaj chixtaqsinkil li ruq’ naq te’rab’i li aatin a’an malaj li ch’ol aatin. (Chi’ilmanq Li k’utuk jo’ li Kolonel, 21.)