Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am

Eb’ li kok’al toj ka’ch’ineb’ xyu’am wankeb’ xch’ool ut ratawom chixtzolb’al li evangelio wi nak’utman chiruheb’ jo’ chanru naru te’xtaw ru. Wi nakatzoleb’ li kok’al toj ka’ch’ineb’ xyu’am, k’e reetal li kok’ k’anjel a’in li naru naxtenq’aheb’ li kok’al chi tzolok.

• B’ichank. Eb’ li b’ich sa’ li B’ichleb’aal choq’ reheb’ li Kok’al neke’xk’ut li tzol’leb’ rik’in wankilal. Oksi li tusleb’aal na’leb’ li natawman sa’ xraqik li B’ichleb’aal choq’ reheb’ li Kok’al re xtawb’aleb’ li b’ich li neke’aatinak chirix li na’leb’ re li evangelio li yookat chixk’utb’al. Tenq’aheb’ li kok’al chixjuntaq’eetankil li esil sa’ li b’ich rik’in lix yu’ameb’ a’an. Jo’ jun eetalil, naru tatpatz’oq chirix junaq li aatin re li b’ich. Rochb’een b’ichank, eb’ li kok’al neke’ru chireek’asinkil rib’ naq yookeb’ chi b’ichank, malaj naru neke’rab’i xyaab’ li b’ich naq yookeb’ chixb’aanunkil li k’a’aq chik re ru. Re xtawb’al xkomon chik li na’leb’, chi’ilmanq “Roksinkileb’ li b’ich re xk’utb’al li tzol’leb’ ” ut “Xtenq’ankileb’ li kok’al chixtzolb’aleb’ ut chixjultikankileb’ li b’ich sa’ li Tzoleb’aal reheb’ li Kok’al ut sa’ Eb’ li B’ich” li wan sa’ xraqik li hu a’in.

• Rab’inkil malaj xk’utb’al jun seraq’. Eb’ li kok’al neke’wulak chiruheb’ li seraq’—chirixeb’ li loq’laj hu, chirix laa yu’am, chirix li resilal li Iglees malaj laa junkab’al, malaj li seraq’ sa’eb’ li hu puktesinb’il xb’aan li Iglees. Sik’ chan ru te’ruuq chi tz’aqonk sa’ xk’utb’al li seraq’. Naru neke’xchap li k’anjeleb’aal malaj li jalam-uuch, neke’xyiib’ xjalam-uuch li yookeb’ chirab’inkil, neke’xk’utb’esi li na’uxman sa’ li seraq’, malaj neke’tenq’an chixwotzb’al li seraq’. Tenq’aheb’ li kok’al chixtawb’al ru li na’leb’ chirix li evangelio sa’eb’ li seraq’ nakawotz rik’ineb’.

• Xyaab’asinkil jun raqal sa’ li loq’laj hu. Eb’ li kok’al maare ink’a’ neke’xnaw chi us ilok ru hu, a’ut naru taatenq’aheb’ chi tz’aqonk sa’ li tzolok rik’ineb’ li loq’laj hu. Maare taa’ajmanq ru naq teeril yal jun raqalaq, jun ch’uut chi aatin, malaj yal jun aatin. Naq taayaab’asi junaq li raqal sa’eb’ li loq’laj hu, naru taab’oqeb’ li kok’al chi xaqliik malaj chixtaqsinkil li ruq’ naq neke’rab’i junaq li aatin malaj raqal li taawaj wi’ aatinak. Te’ruuq ajwi’ chixtz’olb’al sa’ xk’a’uxleb’ jun ch’ina jachal reheb’ li loq’laj hu wi te’xye jarub’aq sut. Naq neke’rab’i li raatin li Dios, te’reek’a li Musiq’ej.

• Wank chi aj aj-u. Xb’aan naq eb’ li kok’al toj ka’ch’ineb’ xyu’am mas aj ajeb’ ru, k’uub’ chan ru naru taakanab’eb’ chi eek’ank—b’eek, pisk’ok, wutzlaak, ut xkomon chik li eek’asink-ib’ li naxk’am rib’ rik’in li na’leb’ malaj seraq’ yookat chixk’utb’al. Li eek’asink-ib’ a’an naru ajwi’ naq chaab’ilaq naq yookex chi b’ichank sa’ komonil.

• Rilb’al jun jalam-uuch malaj jun video. Naq nakak’ut chiruheb’ li kok’al jun jalam-uuch malaj jun video chirix jun na’leb’ sa’ li evangelio malaj jun seraq’, oksiheb’ li patz’om li te’tenq’anq reheb’ chi tzolok rik’in li k’a’ru yookeb’ chirilb’al. Naru taapatz’, “K’a’ru yoo chi k’ulmank sa’ li jalam-uuch malaj sa’ li video a’in? K’a’ru naxk’e chaweek’a?” Naru taataweb’ li jalam-uuch ut eb’ li video sa’ li aplicacion Biblioteca del Evangelio, sa’ GospelMedia.ChurchofJesusChrist.org, ut sa’ children.ChurchofJesusChrist.org.

• Xtenq’ankileb’ ut xwaklesinkileb’ xch’ool li kok’al chixwotzb’al xna’leb’eb’. Eb’ li kok’al toj ka’ch’ineb’ xyu’am maare maak’a’ xk’ihal li k’a’ru raj te’xwotz jo’eb’ li ak ninqeb’, a’b’an wi nakak’ameb’ xb’e, naru neke’xwotz li reek’ahomeb’ ut li neke’xk’ul chirix li yookeb’ chixtzolb’al.

• Yiib’ank. Eb’ li kok’al naru neke’xyiib’ k’a’aq re ru, neke’xyiib’ xjalam-uuch, malaj neke’xb’on reetalil li seraq’ malaj li na’leb’ li yookeb’ chixtzolb’al. Waklesiheb’ xch’ool chixk’amb’al li k’a’ru neke’xyiib’ sa’ li rochoch ut chixwotzb’al rik’ineb’ li komon sa’ lix junkab’aleb’ re xtenq’ankileb’ li kok’al chixjultikankil li neke’xtzol.

• Roksinkileb’ li k’anjeleb’aal. Jun ch’ina k’anjeleb’aal naru chixtenq’ankileb’ laa kok’al chixtawb’al ru jun na’leb’ chirix li evangelio li ch’a’aj xtawb’al ru. Naq nakawoksiheb’ li k’anjeleb’aal, k’oxla chan ru naq te’ruuq chi tz’aqonk li kok’al. Eb’ a’an mas wi’chik naq te’tzoloq rik’in xb’aanunkil chiru yal rilb’al.

• Xb’aanunkil li yeeb’il sa’ li seraq’. Naq eb’ li kok’al neke’xb’aanu li k’a’ru naru neke’xk’ul sa’ lix yu’ameb’, mas wi’chik naq te’ruuq chixtawb’al ru chan ru naq jun na’leb’ re li evangelio nak’anjelak sa’ xyu’ameb’.

• Xb’aanunkil k’iila sut eb’ li kok’ k’anjel. Wan naq taa’ajmanq ru naq eb’ li kok’al te’rab’i k’iila sut jun li na’leb’ re te’ruuq chixtawb’al ru. Matk’oxlak wi yookat chiroksinkil chi kok’ aj xsa’ junaq seraq’ malaj junaq k’anjel, us ta sa’ ajwi’ li tzolok a’an. Naru taawotz jun esilal sa’ li loq’laj hu k’iila sut chi jalan jalanq re ru—rik’in rilb’al sa’eb’ li loq’laj hu, rik’in xyeeb’al rik’in tz’aqal aawaatin, rik’in xk’utb’al jun li video, rik’in xkanab’ankileb’ li kok’al chatenq’ankil sa’ xyeeb’al li seraq’, rik’in xb’aanunkil li k’a’ru na’uxman sa’ li seraq’, ut xkomoneb’ chik li na’leb’. Wi nab’aanuman junaq li ch’ina k’anjel sa’ li tzolok ut nab’aanuman wi’chik sa’ li kab’l, li ka’sutink a’an tixtenq’aheb’ li kok’al chi tzolok ut chi jultikank.

• Aatinak rik’ineb’ li kristiaan. Eb’ li kok’al yookeb’ chixk’iresinkil lix seeb’aleb’ re aatinak ut chi kok’ aj xsa’ neke’xyal xsahil li tzolok ut b’atz’unk rik’ineb’ li rochb’eeneb’. Sik’ li hoonal re naq te’ruuq chi wotzok, te’xjali rib’, ut te’xtenq’a rib’ naq yookeb’ chi tzolok.

• Tz’aqonk sa’ k’iila kok’ k’anjel. Eb’ li kok’al toj ka’ch’ineb’ xyu’am yal b’ab’ay lix seeb’aleb’ re ab’ink ut jalan jalanq naq neke’tzolok. Oksi k’iila paay chi kok’ k’anjel ut k’eheb’ reetal li eetalil naq eb’ li kok’al neke’raj ru jun lix jalb’al li tzolok. Maare aajelaq ru xjalinkil chi kok’ aj xsa’ li kok’ k’anjel re wank chi ch’anch’o ut li re eek’asink-ib’.

Xkomon laa k’anjel jo’ aj k’utunel reheb’ li kok’al toj ka’ch’ineb’ xyu’am—moko ka’ajwi’ ta xk’utb’aleb’ li na’leb’ re li evangelio—a’an aj b’an wi’ xtenq’ankileb’ li kok’al chixtzolb’al chan ru li tz’aqonk chi ch’olch’o ru sa’ jun li tzolok sa’ li Iglees. Maare aajelaq ru naq te’xtzol chan ru xk’eeb’aleb’ xhoonal chirib’ileb’ rib’, wotzok, roxloq’inkileb’ li komon, ut wan chik xkomon. Wankeb’ laj k’utunel li neke’xyiib’ li jalam-uuch wankeb’ wi’ junjunq li kok’ k’anjel re naq eb’ li kok’al te’tz’aqonq sa’ li tzolok rik’in junaq na’leb’ (maare li tijok, xchapb’al junaq li jalam-uuch, malaj xjek’inkileb’ li hu). Li kok’ k’anjel a’an naru naq jalan jalanqaq rajlal xamaan. A’an naxtenq’aheb’ li kok’al chixk’eeb’aleb’ xhoonal li jun siir chik ut chixtzolb’al li wank sa’ jun li tzoleb’aal.

Eb’ li kok’al—mas wi’chik li toj kok’eb’—neke’tzolok chi us wi neke’xnaw chan ru naq taa’uxmanq li tzolok. Xb’aan naq eb’ li kok’al toj ka’ch’ineb’ xyu’am yal b’ab’ay xseeb’aleb’ chi ab’ink, ut ch’a’aj chiruheb’ rab’inkil chixjunil jun k’utuk, us naq wi sa’ li k’anjel wanq junaq lix jalajik rik’in li k’anjel jun chik. Maare li tzolok naru naxk’am junjunqaq li hilank re xb’onb’al junaq li jalam-uuch, xb’ichankil junaq li b’ich, malaj xkomon chik.