Laa’at jun aj k’utunel choq’ reheb’ li kok’al

B’oqb’ilat xb’aan li Dios chixtzolb’aleb’ li ralal xk’ajol jo’ li Kolonel. Xaqab’anb’ilat sa’ li b’oqok a’in rik’in lix wankil lix santil tijonelil. Us ta maare moko wanjenaqat ta chi k’utuk, wi nakatwan chi tiik, wi nakattijok wulaj wulaj, ut wi nakatzoleb’ li loq’laj hu, laa Choxahil Yuwa’ tixk’e aawe li rilom ut lix wankil li Santil Musiq’ej (chi’ilmanq 2 Nefi 33:1).

Eb’ li k’eeb’ileb’ chatzol a’aneb’ ralal xk’ajol li Dios, ut a’an naxnaw k’a’ru taak’anjelaq reheb’ ut chan ru us xtzolb’aleb’. Naq nakasik’ rik’in tijok lix wankil li Santil Musiq’ej, a’an tixk’am aab’e naq yookat chixkawresinkil aawib’ ut naq yookat chi k’utuk. A’an tixk’utb’esi chawu k’a’ru tento taaye ut k’a’ru tento taab’aanu (chi’ilmanq 2 Nefi 32:5).

Maak’oxla naq eb’ li kok’al ink’a’ neke’ru chixtawb’al ru chi us li evangelio. Sa’ chixjunil li k’a’ru wan sa’eb’ lix yu’am, eb’ li kok’al a’an junelik yookeb’ chixxokb’al li na’leb’, chixxk’uub’ankil ut chixtz’aqob’resinkil ru li neke’xk’oxla, ut chixwotzb’al li k’a’ru neke’xtaw. A’in nayaalo’ rik’in li evangelio, xb’aan naq eb’ li kok’al wankeb’ xch’ool ut wankeb’ li rajom re xtzolb’al lix yaalalil a’an. Lix paab’aaleb’ chirix li musiq’ejil k’a’aq re ru a’an kaw ut saq ru, ut yalaq hoonal a’an jun hoonal re tzolok. Wankeb’ xch’ool chixb’aanunkil li k’a’ru xe’xtzol, us ta maji’ tz’aqal ru lix tawomeb’ ru. Jo’ka’in naq chiqajunilo tento raj taqak’ul li evangelio. Jo’ kixk’ut li Kolonel, “Relik chi yaal ninye eere, ani ink’a’ tixk’ul lix nimajwal awa’b’ejihom li Dios jo’ junaq ch’ina al, ink’a’ taa’ok chi sa’ ” (Lukas 18:17).

Laa b’oqb’al chi k’utuk a’an jun li loq’laj k’anjel, ut naru naq taaweek’a naq q’axal nim li k’anjel choq’ aawe. A’ut chijultiko’q aawe naq a’an li Dios li xb’oqok aawe, ut a’an tatxtenq’a. A’in lix k’anjel li Qaawa’, ut naq laa’at nakatk’anjelak chiru “chi anchal aach’ool, aametz’ew, aak’a’uxl, ut aakawilal” (Tzol’leb’ ut Sumwank 4:2), a’an tixnimob’resi laa na’leb’, laa maatan, ut laa seeb’al, ut li k’anjel li nakab’aanu taarosob’tesi lix yu’ameb’ li kok’al nakatzoleb’.