Chalqex chixnimankil, xb’aan laj Dana Mario Wood

9–15 enero

Mateo 2; Lukas 2

Xoochalk chixloq’oninkil

Eb’ li kok’al nakatzoleb’ a’aneb’ ralal xk’ajol li qaChoxahil Yuwa’. Patz’ re a’an naq tatxtenq’a chixk’utb’aleb’ li loq’laj hu chiruheb’. A’an naru tatxb’eresi sa’ li na’leb’ taak’ut, ut naru tatxmusiq’a rik’in li taab’aanu re xtenq’ankileb’ li ralal xk’ajol.

Xkanab’ankileb’ chi wotzok

Patz’ reheb’ li kok’al naq te’xye k’a’ru neke’xnaw chirix lix yo’lajik li Kristo. B’ar wan reheb’ li raqal li mas nawulak chiruheb’?

Xk’utb’al li tzol’leb’: Kok’al toj ka’ch’ineb’ xyu’am

Lukas 2:1–14

Kiyo’la li Jesus.

Li Jesus kixkanab’ chaq li rochoch rik’in li qaChoxahil Yuwa’ re naq taayo’laaq sa’ ruchich’och’ ut re naq a’anaq laj Kolol qe. Chan ru taajultika chiruheb’ li kok’al li seraq’ chirix lix yo’lajik li Kristo?

Kok’ k’anjel naru chi b’aanumank

• Naq yookex chirilb’al ru resil lix yo’lajik li Kristo, patz’ reheb’ li kok’al naq te’xk’utb’esi li seraq’, malaj oksi li hu re li kok’ k’anjel re li xamaan a’in. (Chi’ilmanq ajwi’ “Ch’ol 5: Nayo’la li Jesukristo,” Eb’ li Esilal sa’ li Ak’ Chaq’rab’, 13–15, malaj li video sa’ ChurchofJesusChrist.org.)

• Wi wan aawe jun reetalil lix yo’lajik li Jesus, k’am chaq ut kanab’eb’ li kok’al chixk’eeb’aleb’ lix cha’alil sa’ lix na’aj naq yookat chixseraq’inkil lix yo’lajik li Jesukristo. Naru ajwi’ nakak’ut xjalam-uuch li loq’laj muheb’aal (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). K’ut chawuq’ li jalan jalanq chi kristiaan re lix yo’lajik li Jesus, ut patz’ reheb’ li kok’al naq te’xwotz li neke’xnaw chirix li junjunq chi kristiaan.

• B’ichahomaqeb’ li b’ich li mas neke’wulak chiruheb’ li kok’al chirix lix yo’lajik li Jesus. Naq nekeb’aanu a’in, sik’ li hoonal taawotz wi’ lix nawom aach’ool chirix li Kolonel. Patz’ reheb’ li kok’al naq te’xye k’a’ut naq neke’xra li Jesus.

Mateo 2:1–12

Naru tink’eheb’ li chaab’il maatan re li Jesus.

Eb’ laj q’e ke’xk’e re li Jesus li maatan re li oor, li pom, ut li miir. Chan ru taawoksi li seraq’ a’in re xk’utb’al chiruheb’ li kok’al naq a’aneb’ naru ajwi’ neke’xk’e li maatan re li Jesus—maare li rahok, li k’anjelak chiru ras riitz’ineb’, ut li ab’ink chiru?

Kok’ k’anjel naru chi b’aanumank

• K’ut xjalam-uucheb’ laj q’e naq yookat chixseraq’inkil li natawman sa’ Mateo 2:1–12. Naru nakak’ut li jalam-uuch Los magos ofrendan presentes (ChurchofJesusChrist.org).

• Lan rix jo’ jun maatan li jalam-uuch malaj k’a’ruhaq nareetaliheb’ li maatan li naru naqak’e re li Jesus. Kanab’eb’ li kok’al chatenq’ankil chixteeb’aleb’ li maatan, ut tz’ilomaq rix chan ru naq naqak’eheb’ li maatan a’an re li Kolonel.

• Tenq’aheb’ li junjunq chi kok’al chixyiib’ankil jun li jalam-uuch malaj chixtz’iib’ankil resilaleb’ li maatan li naru neke’xk’e re li Jesus, maare “li wank jo’ jun chaab’il aamiiw” malaj “li tijok.” Patz’ reheb’ li kok’al naq te’xwotz li xe’xtz’iib’a ut naq te’xsik’ ru jun reheb’ li “maatan” li te’xk’e re li Jesus anajwan.

Lukas 2:40–52

Li Jesus kiwan chaq ajwi’ jo’ jun ch’ina al, jo’ laa’in.

Li tzolok chirix lix ka’ch’inal li Kolonel naru naxtenq’aheb’ li kok’al chixtawb’aleb’ rib’ rik’in a’an. Patz’ reheb’ li kok’al k’a’ru neke’ru chixtzolb’al sa’eb’ li raqal a’an chirix li wank jo’ li Jesus anajwan.

Kok’ k’anjel naru chi b’aanumank

• B’oq jun li saaj re li teep chirula’aninkil li tzoleb’aal ut chixwotzb’al li seraq’ naq li Jesus kik’utuk sa’ li santil ochoch naq toj mas saaj chaq.

• Chi rub’elaj li tzolok, patz’ re jun li ch’ina al naq tixk’am lix jalam-uuch naq toj k’uula’al chaq re xk’utb’al. Patz’ reheb’ chan ru lix k’iijikeb’. Seraq’i reheb’ chan ru naq li Jesus kik’i (chi’ilmanq Lukas 2:40, 52). B’icha rik’ineb’ li kok’al “Joʼ chʼina al li Jesus kiwan” (B’ichleb’aal choq’ reheb’ li Kok’al, 34) malaj junaq chik li b’ich chirix li Kolonel.

• Yaab’asi Lukas 2:52, ut ch’olob’ k’a’ru naraj naxye “rik’in xna’leb’ ” ut “rik’in xteram.” Naru nakapatz’ reheb’ li kok’al naq te’reek’asi rib’ re xk’utb’al li naraj naxye li k’iik rik’in na’leb’ ut sa’ chaab’ilal chiru li Dios ut chiruheb’ li winq. Naru neke’xk’utb’esi rilb’al ru jun li hu malaj xtenq’ankil ani li wan xmajelal.

Xk’utb’al li tzol’leb’: Kok’al ak ninqeb’

Lukas 2:1–21; Mateo 2:1–12

Eb’ li profeet sa’ najter kutan ke’xye resil lix yo’lajik li Kolonel.

Eb’ li profeet ut laj paab’anel ke’royb’eni chaq lix yo’lajik li Kolonel chiru k’iila cient chihab’. Li xtawb’al ru li na’leb’ a’an naru naxtenq’aheb’ li kok’al chixk’ulb’al jun xrahomeb’ jwal cham wi’chik chirix lix yu’am ut lix k’anjel li Kolonel.

Kok’ k’anjel naru chi b’aanumank

• Patz’ reheb’ li kok’al naq te’aatinaq chirix li neke’royb’eni, maare xkutankil lix yo’lajikeb’ malaj jun ninq’e. Patz’ reheb’ li kok’al naq te’ril ru Helaman 14:2–5 re xtawb’al k’a’ru ke’royb’eni chaq li profeet.

• Ilomaq junjunq reheb’ li profeetil aatin chirix lix yo’lajik li Kolonel (chi’ilmanq Isaias 7:14; 9:6; 1 Nefi 11:18; Helaman 14:5). Tenq’aheb’ li kok’al chixk’eeb’al rajlil li k’a’ru ch’olob’anb’il sa’eb’ li profeetil aatin a’an, ut chixtawb’al lix tz’aqob’resinkileb’ ru sa’ Lukas 2:1–21 ut Mateo 2:1–2.

• Patz’ reheb’ li kok’al naq te’xyiib’ xjalam-uuch li kik’ulman sa’ Mateo 2:1–12 malaj Lukas 2:1–21, ut naq te’xye k’a’ut naq neke’xb’antioxi naq kiyo’la li Jesus.

Laj Simeon naxloq’oni li ch’ina al Jesus, xb’aan laj Greg K. Olsen

Lukas 2:40, 52

Li Jesus kik’i “rik’in xna’leb’ ut rik’in xteram, sa’ chaab’ilal chiru Dios ut chiruheb’ li winq.”

Jo’ li Jesus, eb’ li kok’al wan lix k’anjeleb’ aajel ru li tento te’xkawresi wi’ rib’. K’a’ru naru neke’xtzol rik’in li k’a’ru kixb’aanu li Jesus?

Kok’ k’anjel naru chi b’aanumank

• Naq taayaab’asi Lukas 2:40, 52, ye reheb’ li kok’al naq te’xk’e reetal k’a’ru kixb’aanu li Jesus. Patz’ reheb’ li kok’al naq te’xye chan ru lix k’iijikeb’ chalen naq toj kok’eb’ chaq. Wotz li xak’ul laa’at rik’in xtzolb’al li evangelio chi b’ayatq. Ch’olob’ xyaalal li Kolonel.

• B’aanuheb’ kok’ k’anjel li neke’xk’utb’esi li ch’ol aatin sa’ Lukas 2:40, 52. Maare taab’is xterameb’ li junjunq chi kok’al (“li Jesus yoo chi k’iik … rik’in xteram”) malaj taapatz’ reheb’ naq te’xwotz li raqal mas nawulak chiruheb’ sa’ li loq’laj hu (“yoo chi kawuuk, nujenaq chi chaab’il na’leb’ ”). Tenq’aheb’ li kok’al chixk’eeb’al reetal chan ru naq yookeb’ chi k’iik, toja’ naq te’xwotz a’an rik’ineb’ lix junkab’al.

• Chirix rilb’al Lukas 2:40, 52, patz’ reheb’ li kok’al naq te’xq’ehi chan raj ru li Jesus naq wan chaq re lix chihab’eb’ a’an. Chan ta wi’ ru naq kiwan chiru lix na’? Chiruheb’ li ras riitz’in?

Lukas 2:41–52

Naru tintaaqe lix b’aanuhom li Jesukristo.

Us ta toj saaj chaq, li Jesus kixk’ut li evangelio sa’ li santil ochoch. Jo’ ajwi’ a’an, wan naab’al li k’a’ru naru te’xk’ut li kok’al sa’ laa tzoleb’aal chiruheb’ li wankeb’ sa’ xsutameb’.

Kok’ k’anjel naru chi b’aanumank

• Patz’ re jun li ch’ina al naq taawulaq chi kawresinb’il re xwotzb’al chi k’osb’il ru li seraq’ natawman sa’ Lukas 2:41–52. Re xtenq’ankileb’ li kok’al chixtawb’al ru li seraq’, k’ut li k’a’ru naraj naxye “xk’anjel lin Yuwa’ ” (raqal 49). Naru taaye reheb’ li kok’al k’a’ru nakab’aanu laa’at malaj neke’xb’aanu laa na’ aayuwa’ sa’ lix trab’aajeb’. K’a’ru lix trab’aaj malaj lix “k’anjel” laj Jose, lix yuwa’ li Jesus sa’ ruchich’och’? (chi’ilmanq Mateo 13:55). K’a’ru lix k’anjel lix Choxahil Yuwa’? (chi’ilmanq Lukas 2:46–49; chi’ilmanq ajwi’ Moises 1:39).

• Rik’ineb’ li kok’al, il Lukas 2:46–49 ut patz’, “Chan ru kixb’aanu chaq li Jesus lix k’anjel lix yuwa’?” Tenq’aheb’ li kok’al chixtz’iib’ankil malaj chixyiib’ankil xjalam-uuch sa’ li pizarron chan ru naq a’aneb’ ajwi’ naru neke’xb’aanu lix k’anjel li qaChoxahil Yuwa’.

• Re xtenq’ankileb’ li kok’al re naq te’xnaw chi tz’aqal, naq jo’ li ch’ina saaj Jesus, naru neke’xk’ut li evangelio, tenq’aheb’ chixyalb’al xk’utb’al jun li na’leb’ chirib’ileb’ rib’ re li hu Choq’ re Xkawilaleb’ li Saaj.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xk’ut chiruheb’ lix junkab’al k’a’ru xe’xtzol chirix lix yo’lajik li Kristo.

Xkawresinkil qib’ jo’ aj k’utunel

Eb’ li kok’al aj ajeb’ ru ut neke’tzolok chi k’iila paay ru. Eb’ li kok’al neke’xyal xsahil li tzolok rik’in jalan jalanq numsihom. Oksiheb’ kok’ k’anjel li te’tenq’anq reheb’ chireek’asinkileb’ rib’, chiroksinkileb’ chixjunil lix seeb’aleb’, ut chixyalb’al ak’il k’a’aq re ru. (Chi’ilmanq Li k’utuk jo’ li Kolonel, 25–26.)