16–22 enero

Jwan 1

Xqataw li Mesias

Naq nakawil Jwan 1, tz’iib’a li musiq’anb’il na’leb’ nakak’ul. Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naru nakatxtenq’a chixtzolb’al li ch’ol a’in. Eb’ li reetalileb’ kok’ k’anjel a’in naru neke’xk’e aana’leb’ chirix xtenq’ankileb’ li kok’al chixtzolb’aleb’ li na’leb’ wankeb’ sa’ Jwan 1. Eb’ li kok’ k’anjel choq’ reheb’ li kok’al ak ninqeb’ naru neke’jalman, wi na’ajman ru, choq’ reheb’ li kok’al toj ka’ch’ineb’ xyu’am.

Xkanab’ankileb’ chi wotzok

Re xtenq’ankileb’ li kok’al chixwotzb’al li neke’xnaw chirix li Jesus, k’ut chiruheb’ lix jalam-uuch a’an b’ar wi’ yoo chixb’aanunkil junjunq lix k’anjel jo’ yeeb’il resil sa’ Jwan 1 (maare xyo’ob’tesinkil li ruchich’och’ malaj xk’utb’al li evangelio). Patz’ reheb’ li kok’al naq te’xch’olob’ k’a’ru yoo chi k’ulmank sa’ li jalam-uuch.

Xk’utb’al li tzol’leb’: Kok’al toj ka’ch’ineb’ xyu’am

Jwan 1:1–2

Kiwan chaq li Jesus rik’in li qaChoxahil Yuwa’ naq maji’ nayo’la.

Laj Jwan kixk’ut naq li Jesukristo kiwan chaq rik’in li Dios naq maji’ nachal chi wank sa’ ruchich’och’. Laa’o ajwi’ koowan rik’in li Dios naq maji’ nokoyo’la (chi’ilmanq Li Junkab’al: Jun Jek’inb’il Aatin choq’ re li Ruchich’och’,” ChurchofJesusChrist.org). Chan ru taak’ut li na’leb’ a’in chiruheb’ li kok’al?

Kok’ k’anjel naru chi b’aanumank

• Ch’olob’ naq “li Aatin” li natawman sa’ Jwan 1:1 a’an ajwi’ li Jesus. Yaab’asi li raqal, ut patz’ reheb’ li kok’al naq te’xye “Jesus” rajlal sut naq taayaab’asi “li Aatin.” K’ut li jalam-uuch “La vida preterrenal” (ChurchofJesusChrist.org; chi’ilmanq ajwi’ Mirad a vuestros pequeñitos [2008], 15). Ch’olob’ naq li Jesukristo kiwan chaq rik’in li qaChoxahil Yuwa’ naq maji’ nachal sa’ ruchich’och’.

• Re xtzolb’aleb’ li kok’al chirix li qayu’am rik’in li Dios naq maji’ nokochal sa’ ruchich’och’, oksi “Xtikib’ankil: Lix k’uub’anb’il na’leb’ li qaChoxahil Yuwa’ ” (sa’ Eb’ li Esilal sa’ li Ak’ Chaq’rab’, 1–5, malaj li video sa’ ChurchofJesusChrist.org), malaj li K’utul Raqal reheb’ li Loq’laj Hu, “Yu’am naq maji’ nokoyo’la.”

• B’oq jun li yuwa’b’ej malaj jun li na’b’ej chixk’amb’al chaq junaq li k’uula’al sa’ li tzoleb’aal. Patz’ reheb’ li kok’al b’ar xwan chaq xmusiq’ li k’uula’al naq maji’ nayo’la. Jultika reheb’ li kok’al naq k’uula’aleb’ chaq junxil, ut ch’olob’ xyaalal naq ke’wan ajwi’ sa’ choxa rik’in li qaChoxahil Yuwa’ jo’ musiq’ejil alalb’ej naq maji’ neke’yo’la.

Jwan 1:3

Li Jesus kixyo’ob’tesi chixjunil li k’a’aq re ru.

Li xnawb’al ru lix k’anjel li Kristo jo’ aj Yo’ob’tesinel naru naxtenq’aheb’ li kok’al chixnimob’resinkil li roxloq’eb’ choq’ re a’an.

Kok’ k’anjel naru chi b’aanumank

• Yaab’asi Jwan 1:3 reheb’ li kok’al, ut k’ut li jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Tenq’aheb’ li kok’al chixkanab’ankil sa’ xk’a’uxleb’ li ch’ol aatin “chixjunileb’ li k’a’aq re ru sa’ xk’ab’a’ li [Jesukristo] ke’yo’ob’tesiman.”

• K’ut chiru jun reheb’ li kok’al xjalam-uuch jun xyo’ob’tesihom li Qaawa’. Kanab’ li ch’ina al a’an chixch’olob’ankil li jalam-uuch chiruheb’ li rech kok’alil, ut patz’ reheb’ naq te’xq’ehi k’a’ru naxch’olob’.

• Patz’ re chixjunileb’ li kok’al naq te’xye jun xyo’ob’tesihom li Jesukristo. Tenq’aheb’ li kok’al chixk’oxlankil chan ru naru neke’roxloq’i li ruchich’och’ ut xkomon chik lix yo’ob’tesihom li Qaawa’.

Li Jesukristo kixyoʼobʼtesi li ruchichʼochʼ ut chixjunil li kʼaʼru wan chi sa’.

Jwan 1:35–51

Naru ninb’oqeb’ lin komon chi chalk rik’in li Jesukristo ut tzolok chirix a’an.

Sa’ Jwan 1 wan li seraq’ chirixeb’ li tzolom li ke’xb’oqeb’ li kristiaan “chi chalk ut chirilb’al” naq li Jesus a’an li Ralal li Dios. Eb’ li kok’al toj ka’ch’ineb’ xyu’am naru ajwi’ neke’xb’aanu a’an.

Kok’ k’anjel naru chi b’aanumank

• Ch’olob’ chan ru naq laj Andres kixnaw chirix li Jesus, ut chan ru naq laj Andres ajwi’ kixtzol laj Pedro (chi’ilmanq Jwan 1:35–42). Wotz chan ru naq xattzolok chirix li Iglees, malaj b’oq jun li ak’ komon chixwotzb’al chan ru naq kitzolok chirix li Iglees.

• Wotz li seraq’ naq laj Felipe kixb’oq laj Natanael “chi chalk ut chirilb’al” (Jwan 1:43–51). Muq jun li jalam-uuch re li Jesus sa’ jun li kaxon ut kanab’ jun li ch’ina al “chi chalk ut chirilb’al,” toja’ naq a’an tixye reheb’ lix komoneb’ li kok’al k’a’ru li xril.

• Kanab’eb’ li kok’al chixb’onb’al li perel re kok’ k’anjel re li xamaan a’in, ut waklesiheb’ xch’ool chiroksinkil re xb’oqb’al jun kristiaan chi tzolok chirix li Jesus.

• Patz’ re jun li ch’ina al naq taa’aatinaq chirix jun li hoonal naq xwotz k’a’ruhaq, maare jun li b’atz’uul malaj jun li maatan, rik’in anihaq chik. Chan ru naru taqawotz li evangelio? Seraq’i resil jun li ch’ina al li xwotz li evangelio rik’in jun li ramiiw.

Xk’utb’al li tzol’leb’: Kok’al ak ninqeb’

Jwan 1:1–5

Li Jesukristo kiwan chaq rik’in li Dios naq maji’ nayo’la.

Naq maji’ nayo’la, li Jesukristo kiwan chaq lix k’anjel jwal aajel ru sa’ lix k’uub’anb’il na’leb’ li qaChoxahil Yuwa’. Naq nakawil Jwan 1:1–5, k’a’ru naxsachb’esi aach’ool chirix lix k’anjel li Kristo naq maji’ nayo’la?

Kok’ k’anjel naru chi b’aanumank

• Patz’ reheb’ li kok’al k’a’ru neke’xnaw chirix li kixb’aanu chaq li Jesus naq maji’ nayo’la. Patz’ reheb’ naq te’xsik’ lix sumenkil sa’ Jwan 1:1–5. Maare us raj xsik’b’al sa’ Lix Jaltesinkil ru li Santil Hu xb’aan laj Jose Smith, Jwan 1:1–5.

• K’ut junjunq li raqal re “Xtikib’ankil: Lix k’uub’anb’il na’leb’ li qaChoxahil Yuwa’,” (sa’ Eb’ li Esilal sa’ li Ak’ Chaq’rab’, 1–5, malaj li video sa’ ChurchofJesusChrist.org). Patz’ reheb’ li kok’al k’a’ru neke’xtzol chirix li Jesukristo.

• B’oqeb’ junjunq li kok’al chi wulak sa’ li tzoleb’aal chi kawresinb’ileb’ re xk’utb’al malaj xch’olob’ankil k’a’ruhaq xyo’ob’tesihomeb’. K’uteb’ li jalam-uuch re junjunq lix yo’ob’tesihom li Qaawa’ ut oksi Jwan 1:3 re xch’olob’ankil naq li Jesus kixyo’ob’tesi li ruchich’och’ ut chixjunil li wan sa’ xb’een.

Jwan 1:4–9

Li Jesukristo a’an lin saqen.

Li reetalil li saqen naru naxtenq’aheb’ li kok’al chixtawb’al ru li Kolonel ut lix evangelio. Chan ru naru taawaklesiheb’ xmusiq’ li kok’al chixsik’b’al lix saqen li Kolonel naq li ruchich’och’ chanchan naq mas q’ojyin ru?

Kok’ k’anjel naru chi b’aanumank

• Patz’ reheb’ li kok’al naq te’ril Salmos 27:1; Jwan 1:4–9; Mosiah 16:9; ut Tzol’leb’ ut Sumwank 39:1–2, ut naq te’xtaw li ch’ol aatin li neke’xk’am rib’ sa’eb’ li raqal a’an. Chan ru naq li Jesukristo chanchan jun li saqen?

• K’ut xjalam-uuch li Kolonel ut li k’a’ re ru li naxk’e li saqen, jo’ jun li pook. Chan ru naq li Jesukristo chanchaneb’ li k’a’aq re ru a’an? Chan ru naq naru naqawotz lix saqen rik’ineb’ li qas qiitz’in? B’ichahomaq “Laa’at lin saqen” (Eb’ li B’ich, 47), malaj jalan chik li b’ich chirix lix saqen li evangelio.

• Patz’ reheb’ li kok’al k’a’ru neke’xb’aanu naq neke’wan sa’ li aak’ab’ ut neke’reek’a xxiweb’. Ch’olob’ xyaalal naq junelik naru neke’xsik’ li Kolonel naq wankeb’ xxiw.

Jwan 1:35–51

Jo’ aj taaqehom re li Jesukristo, naru ninb’oqeb’ li was wiitz’in chixtaaqenkil.

K’e reetal chan ru taawoksiheb’ li eetalil sa’ Jwan 1:35–51 re xwaklesinkileb’ xch’ool li kok’al chixb’oqb’aleb’ li ras riitz’in chi tzolok chirix li Kolonel.

Kok’ k’anjel naru chi b’aanumank

• Tenq’aheb’ li kok’al chixsik’b’al sa’ Jwan 1:35–51 li k’a’ru ke’xye li kristiaan re xb’oqb’aleb’ li ras riitz’in chi tzolok chirix li Kolonel. Kanab’eb’ chixyalb’al xyeeb’al li k’a’ raj ru te’xye re xb’oqb’al jun li ramiiweb’ chi tzolok chirix li Jesus.

• Patz’ reheb’ li kok’al naq te’roksi li perel re kok’ k’anjel re li xamaan a’in re xyiib’ankil junaq li b’oqom li naru te’roksi re xb’oqb’al jun li ramiiweb’ malaj jun xkomoneb’ chi tzolok chirix li Jesukristo.

• K’e xhoonaleb’ li kok’al chi aatinak chiru li tzoleb’aal chirix jun k’a’aq re ru mas nawulak chiruheb’. Tenq’aheb’ li kok’al chirilb’al chan ru naq xwotzb’al li evangelio naru naq chanchanaq ajwi’ xwotzb’al li k’a’ru mas nawulak chiqu.

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixb’oqb’aleb’ anihaq li mas neke’xra chixtzolb’aleb’ xkomon xna’leb’ chirix li Jesukristo.

Xkawresinkil qib’ jo’ aj k’utunel

Oksiheb’ jalam-uuch. Tenq’aheb’ li kok’al chirilb’al sa’ xk’a’uxleb’ li na’leb’ neke’xtzol sa’ li loq’laj hu. Naru nakab’aanu a’in rik’in li jalam-uuch, li video, li b’atz’uul, malaj li eek’asink-ib’.