Chan ru roksinkileb’ li loq’laj b’ich sa’ xtzolb’al li evangelio

Li b’ichank k’a’jo’ naq taarosob’tesi laa junkab’al. Li na’leb’ a’in naru texxtenq’a chiroksinkileb’ li loq’laj b’ich naq neketzol ut nekeyu’ami li evangelio.

• Xtzolb’al li na’leb’ re li evangelio. K’ehomaq reetal li yaal li k’utb’il sa’eb’ li b’ich nekeb’icha malaj nekerab’i. A’in maare texxtenq’a chi aatinak chirix li yaal a’an chiru li kutan. B’ichahomaq malaj ab’ihomaqeb’ li b’ich li neke’k’utuk chirix li Jesukristo ut lix evangelio. K’ehomaq reetal chan ru naq li Santil Musiq’ej naxch’olob’ xyaalal li Kolonel ut li raatin.

• Xk’eeb’al reetal lix wankilal li b’ichank. Xb’ichankil malaj rab’inkileb’ li b’ich naru toorosob’tesi sa’ li qach’a’ajkilal. Xb’ichankil jun b’ich naru tixtuqla xch’ool li ch’ina al naq wark re, tixk’e xsahil xch’ool li junkab’al sa’ komonil, tixwaklesi xch’ool li ani yaj, malaj tixk’ojob’ xch’ool li ani yoo xk’a’uxl.

• Xwotzb’al li numsihom. Aatinanqex chirix lee numsihom sa’ junesal ut sa’ junkab’al li naxk’am rib’ rik’in li raatinuleb’ li b’ich. Naru ajwi’ tex’aatinaq chirixeb’ li seraq’ sa’ li loq’laj hu.

• Xk’eeb’al chi tz’aqonk chixjunil laa junkab’al. Laa junkab’al naru tixtaw xkomon chik xna’leb’ sa’eb’ li b’ich wi nekextz’aqon chejunilex. Re naq te’tz’aqonq chixjunil, naru xpatz’b’al re li asb’ej naq tixtenq’aheb’ li riitz’ineb’ chixtzolb’al jun ak’ b’ich, malaj naru xpatz’b’al reheb’ li kok’al naq te’xtenq’a li junkab’al chixtzolb’al jun b’ich xe’xtzol sa’ li Tzoleb’aal reheb’ li Kok’al. Naru ajwi’ naq taawanq xhoonal chixjunil re xb’eresinkil li b’ich.

• Yiib’ank. Naab’al paay ru xtzolb’aleb’ li loq’laj b’ich jo’ junkab’al. Naru teereek’asi eerib’ re xk’utb’esinkil li raatinul li b’ich. Malaj naru naq chi junjunqal teereek’asi eerib’ re xk’utb’esinkil li raatinul jun li b’ich, ut chixjunileb’ chik te’xq’ehi k’a’ru li b’ich. Maare taawulaq cheru b’ichank sa’ junpaat malaj chi timil, ut chi kaw malaj q’un xyaab’ eekux. Sa’ li aplicacion Biblioteca del Evangelio wan ajwi’ li chapb’il b’ich ut video li naru texxtenq’a chixtzolb’aleb’ li b’ich. Naru ajwi’ teech’utub’ naab’aleb’ li b’ich re teerab’iheb’.

Re xtawb’al xkomon chik li na’leb’, chi’ilmanq “Roksinkileb’ li b’ich re xk’utb’al li tzol’leb’,” ut “Xtenq’ankileb’ li kok’al chixtzolb’aleb’ ut chixjultikankileb’ li b’ich sa’ li Tzoleb’aal reheb’ li Kok’al ut sa’ Eb’ li B’ich,” li wan sa’ “Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak” sa’ Kim, Taaqehin—Choq’ re li Tzoleb’aal reheb’ li Kok’al.