Xtzolb’aleb’ li kok’al

Wi wankeb’ kok’al sa’ laa junkab’al, a’in junjunq li na’leb’ naru xb’aanunkil re xtenq’ankileb’:

• B’ichank. Eb’ li B’ich ut li B’ichleb’aal choq’ reheb’ li Kok’al neke’xk’ut li tzol’leb’ rik’in wankilal. Oksi li tusleb’aal na’leb’ li natawman sa’ xraqik li B’ichleb’aal choq’ reheb’ li Kok’al re xtawb’aleb’ li b’ich li neke’aatinak chirix li na’leb’ re li evangelio li yookat chixk’utb’al. Tenq’aheb’ li kok’al chixjuntaq’eetankil li esil sa’ li b’ich rik’in lix yu’ameb’ a’an. Chi’ilmanq ajwi’ “Chan ru roksinkileb’ li loq’laj b’ich sa’ xtzolb’al li evangelio” sa’ li hu a’in.)

• Rab’inkil malaj xk’utb’al jun seraq’. Eb’ li kok’al neke’wulak chiruheb’ li seraq’—chirixeb’ li loq’laj hu, chirix laa yu’am, chirix li resilal li Iglees malaj laa junkab’al, malaj li seraq’ sa’eb’ lix huhil li Iglees. Sik’ chan ru te’ruuq chi tz’aqonk sa’ xk’utb’al li seraq’. Naru neke’xchap li k’anjeleb’aal malaj li jalam-uuch, neke’xyiib’ xjalam-uuch li yookeb’ chirab’inkil, neke’xk’utb’esi li na’uxman sa’ li seraq’, malaj neke’tenq’an chixwotzb’al li seraq’. Tenq’aheb’ laa kok’al chixtawb’aleb’ ru li na’leb’ chirix li evangelio sa’eb’ li seraq’ nakawotz rik’ineb’.

• Xyaab’asinkil jun raqal sa’eb’ li loq’laj hu. Eb’ li kok’al maare ink’a’ neke’xnaw chi us ilok ru hu, a’ut naru taatenq’aheb’ chi tz’aqonk sa’ li tzolok rik’ineb’ li loq’laj hu. Maare taa’ajmanq ru naq teeril yal jun raqalaq, jun ch’uut chi aatin, malaj yal jun aatin. Li kok’al naru ajwi’ neke’xtzol sa’ xch’ooleb’ jun ch’ina jachal reheb’ li loq’laj hu wi te’xye jarub’aq sut. Naq neke’rab’i li raatin li Dios, te’reek’a li Musiq’ej.

• Rilb’al jun jalam-uuch malaj jun video. Naq nakak’ut chiruheb’ laa kok’al jun jalam-uuch malaj jun video chirix jun na’leb’ sa’ li evangelio malaj jun seraq’ sa’eb’ li loq’laj hu, oksiheb’ li patz’om li taatenq’anq reheb’ chi tzolok rik’in li k’a’ru yookeb’ chirilb’al. Jo’ jun eetalil, naru taapatz’, ”K’a’ru yoo chi k’ulmank sa’ li jalam-uuch a’in, malaj sa’ li video a’in? K’a’ru laa week’ahom rik’in li xawil?” Sa’ li aplicacion Recursos del Evangelio, sa’ MediaLibrary.ChurchofJesusChrist.org , ut sa’ children.ChurchofJesusChrist.org naru xtawb’aleb’ li jalam-uuch ut eb’ li video.

• Yiib’ank. Eb’ li kok’al naru neke’xyiib’ k’a’aq re ru, neke’xyiib’ xjalam-uuch, malaj neke’xb’on reetalil li seraq’ malaj li na’leb’ li yookeb’ chixtzolb’al.

• Roksinkileb’ li k’anjeleb’aal re k’utuk. Jun ch’ina k’anjeleb’aal naru naxtenq’aheb’ laa kok’al chixtawb’al ru jun na’leb’ chirix li evangelio li ch’a’aj xtawb’al ru. Naq nakawoksiheb’ li k’anjeleb’aal, k’oxla chan ru naq te’ruuq chi tz’aqonk li kok’al. Eb’ a’an mas wi’chik naq te’tzoloq rik’in xb’aanunkil k’a’ruhaq chiru yal rilb’al.

• Xb’aanunkil li yeeb’il sa’ li seraq’. Naq eb’ li kok’al neke’xb’aanu li k’a’ru naru neke’xk’ul sa’ lix yu’ameb’, mas wi’chik naq te’ruuq chixtawb’al ru chan ru naq jun na’leb’ re li evangelio nak’anjelak sa’ xyu’ameb’.

• Xb’aanunkil k’iila sut eb’ li kok’ k’anjel. Wan naq taa’ajmanq ru naq eb’ li kok’al te’rab’i k’iila sut jun li na’leb’ re te’ruuq chixtawb’al ru. Matk’oxlak wi yookat chiroksinkil chi kok’ aj xsa’ junaq seraq’ malaj junaq ch’ina k’anjel. Naru taawotz jun esilal sa’ li loq’laj hu k’iila sut chi jaljo ru—rik’in rilb’al sa’eb’ li loq’laj hu, rik’in xyeeb’al ka’ajwi’ rik’in aawaatin, rik’in xk’utb’al jun li video, rik’in xpatz’b’al reheb’ li kok’al naq tate’xtenq’a chixwotzb’al li seraq’, rik’in xb’aanunkil li k’a’ru na’uxman sa’ li seraq’, ut xkomoneb’ chik li na’leb’.

jun junkab’al narileb’ li loq’laj hu