na’bej ut alalb’ej yookeb’ chixtzolb’al li loq’laj hu

Li na’leb’ re xchaab’ilob’resinkil li tzolok sa’ junkab’al

Lix tzolb’al li loq’laj hu rajlal sa’ junkab’al a’an jun chaab’il na’leb’ re xtenq’ankil laa junkab’al chireek’ankil li Santil Musiq’ej ut chixtzolb’al li evangelio. Maak’a’ naxye jo’ nimal ut jo’ najtil nekextzolok jo’ junkab’al, a’ut aajel ru naq teeb’aanu rajlal. Naq taaxaqab’ naq aajel ru xtzolb’aleb’ li loq’laj hu sa’ laa junkab’al, taatenq’a laa junkab’al chi nach’ok rik’in li qaChoxahil Yuwa’ ut li Jesukristo, ut chixk’ojob’ankil lix nawomeb’ xch’ool sa’ xb’een li raatin li Dios. Wi na’ajman, chex’aatinaq chirixeb’ li patz’om a’in:

• Chan ru naru nekewaklesi eech’ool jo’ junkab’al chixtzolb’al li loq’laj hu sa’ junesal?

• K’a’ru naru nekeb’aanu sa’ lee junkab’al re xtenq’ankil eerib’ cherib’il eerib’ chixwotzb’al li k’a’ru yookeb’ chixtzolb’al?

• Chan ru naru teek’e xwankileb’ li na’leb’ li yookex chixtzolb’al sa’ li Ak’ Chaq’rab’ sa’ lee yu’am re wulaj wulaj?

Chijultiko’q aawe naq li ochoch a’an li na’ajej q’axal chaab’il re taatzolmanq li evangelio. Naru taatzol ut taak’ut li evangelio sa’ laa wochoch jo’ ink’a’ naru xb’aanunkil sa’ jun tzoleb’aal re li Iglees. K’e aach’ool chixk’oxlankil chan ru xtenq’ankileb’ li wankeb’ sa’ laa junkab’al chi tzolok rik’ineb’ li loq’laj hu. K’oxla roksinkil junjunq reheb’ li na’leb’ a’in re xchaab’ilob’resinkil li tzolok nekeb’aanu jo’ junkab’al.

jun junkab’al ut eb’ aj k’amol b’e sa’ li Iglees neke’b’ichan sa’ komonil sa’ li ochoch

Roksinkileb’ li b’ich

B’ichahomaqeb’ li b’ich li neke’xka’jultikaheb’ li na’leb’ k’utb’ileb’ sa’eb’ li loq’laj hu. Wankeb’ li b’ich naru xb’ichankil sa’ li tusleb’ aatin rajlal xamaan. Naru taapatz’ re laa junkab’al naq te’xch’olob’ li raatinul li b’ich. Rochb’een b’ichank, laa junkab’al neke’ru chireek’asinkil rib’ naq yookeb’ chi b’ichank, malaj naru neke’rab’i xyaab’ li b’ich naq yookeb’ chixb’aanunkil li k’a’aq chik re ru. Re xtawb’al xkomon chik li na’leb’, chi’ilmanq “Chan ru roksinkileb’ li loq’laj b’ich sa’ xtzolb’al li evangelio” sa’ li hu a’in.

Xwotzb’aleb’ li raqal sa’ li loq’laj hu

Kanab’eb’ li komon sa’ li junkab’al chixwotzb’aleb’ li raqal sa’ li loq’laj hu li xwulak chiruheb’ naq yookeb’ chi tzolok xjuneseb’.

Roksinkil tz’aqal aawaatin

Patz’ reheb’ li komon sa’ li junkab’al naq te’xye rik’in tz’aqal raatineb’ li k’a’ru xe’xtzol sa’eb’ li loq’laj hu li yookex chixtzolb’al.

Xyu’aminkileb’ li loq’laj hu

Chirix rilb’al jun raqal sa’eb’ li loq’laj hu, patz’ reheb’ li komon sa’ li junkab’al chan ru naq nak’anjelak li aatin a’an sa’ xyu’ameb’.

Roksinkil jun li patz’om

B’oqeb’ li komon sa’ li junkab’al chixyeeb’al jun xpatz’omeb’ chirix li evangelio, ut sik’eb’ li raqal li te’tenq’anq chixsumenkil li patz’om.

Xk’utb’al jun raqal reheb’ li loq’laj hu

Sik’ ru jun raqal li xwulak chawu, ut k’ut chi tz’iib’anb’il b’ar wi’ eb’ li komon sa’ li junkab’al te’ril chi kok’ aj xsa’. Kanab’eb’ chixjunileb’ laa komon chixsik’b’al jun raqal reheb’ li loq’laj hu re xk’utb’al.

jun na’b’ej ut eb’ lix kok’al neke’xtzol li loq’laj hu

Xtz’iib’ankil xtusulaleb’ li raqal

Jo’ junkab’al, sik’omaq ru junjunq raqal li teeraj aatinak wi’ chiru li xamaan.

Xtzolb’al raatinuleb’ li loq’laj hu

Sik’ ru jun raqal sa’eb’ li loq’laj hu li nawulak chiru laa junkab’al, ut b’oqeb’ li komon sa’ li junkab’al naq te’xtzol sa’ xk’a’uxl rik’in xyeeb’al wulaj wulaj, malaj rik’in xb’aanunkil jun b’atz’unk re tzolok.

Xk’utb’al li k’a’aq re ru

Taw k’a’aq re ru li naxk’ut xyaalalil li na’leb’ re li evangelio sa’eb’ li raqal yookex chixtzolb’al jo’ junkab’al. Kanab’eb’ li komon sa’ li junkab’al chixyeeb’al chan ru naq li k’a’ru xak’ut naxk’ut xyaalal li k’utb’il sa’eb’ li raqal.

Xsik’b’al ru jun na’leb’

Kanab’eb’ chixjunqaleb’ li komon sa’ li junkab’al chixsik’b’al ru jun na’leb’ li teetzol sa’ junkab’al. Oksi li K’utul Raqal reheb’ li Loq’laj Hu re xtawb’aleb’ li raqal sa’eb’ li loq’laj hu li neke’aatinak chirix li na’leb’ a’an.

Xyiib’ankil jun jalam-uuch

Ilomaq ru jo’ junkab’al junjunq raqal, ut kanab’eb’ laa komon chixyiib’ankil jun jalam-uuch chirix li k’a’ru xeril ru. Naru tex’aatinaq sa’ komonil chirix lix jalam-uuch li junjunq.

Xk’utb’esinkil li yeeb’il

Chirix rilb’al jun seraq’, naru taab’oqeb’ laa komon chixk’utb’esinkil li seraq’inb’il. Chirix a’an, naru teeye chan ru naq li seraq’ wan choq’ reetalil li k’a’ru yoo chixk’ulb’al li junjunq, jo’ ajwi’ li junkab’al.

Li Awa’b’ej Russell M. Nelson kixye, “Ninyeechi’i naq sa’ xyalb’al eeq’e chi anchal eemetz’ew chixchaab’ilob’resinkil eerochoch jo’ jun na’ajej re xtzolb’al li evangelio, rik’in xnumikeb’ li kutan, lee hilob’aal kutan te’ok choq’ sahil kutan eere. Lee kok’al te’raj raj xtzolb’al ut xyu’aminkileb’ lix k’utum li Kolonel, ut taak’osq lix wankil laj tza sa’ lee yu’am ut sa’ lee rochoch. Nimaq xwankil li jalaak teek’ul sa’ lee junkab’al” (“Li ok choq’ jun aj Santil Paab’anel sa’ Roso’jikeb’ li Kutan jwal chaab’il,” Jolomil ch’utub’aj-ib’ re octubre 2018).