Li na’leb’ re xchaab’ilob’resinkil li tzolok aajunes

A’in junjunq li na’leb’ re xchaab’ilob’resinkil chan ru naq nakatzol li raatin li Dios sa’eb’ li loq’laj hu.

Xsik’b’aleb’ li na’leb’ chirix li Jesukristo

Nak’utman sa’ li loq’laj hu naq chixjunil li k’a’aq re ru wan naxch’olob’ xyaalal li Kristo (chi’ilmanq 2 Nefi 11:4; Moises 6:63), jo’kan naq maare taajuch’eb’ li raqal li neke’xch’olob’ xyaalal li Kolonel, ut li neke’xk’ut chan ru xtaaqenkil.

Xsik’b’aleb’ li aatin ut ch’ol aatin li neke’musiq’ank aawe

Maare wan naq taataw naq junjunq li aatin sa’eb’ li loq’laj hu neke’xtoch’ aach’ool, chanchan tz’iib’anb’il choq’ aawe laa’at. Maare taaweek’a naq neke’aatinak chawix ut neke’reek’asi aach’ool. K’oxla xk’eeb’al reetalileb’ sa’eb’ laa loq’laj hu, malaj taatz’iib’a resileb’ sa’ jun chik li hu re tzolok.

Xsik’b’aleb’ li na’leb’ chirix li evangelio

Wan naq eb’ li na’leb’ chirix li evangelio (wan naq tzol’leb’ nayeeman reheb’) wankeb’ chi yeeb’il, malaj wankeb’ chi k’utb’il sa’ jun li seraq’ malaj jun jaljookil ru aatin. Patz’ aawib’, “K’a’ru li junelikil na’leb’ li yoo chi k’utmank sa’eb’ li raqal a’in?”

Rab’inkil li Musiq’ej

K’e reetal li yookat chixk’oxlankil ut chireek’ankil, us ta maare jalan rik’in li aatin li yookat chirilb’al. Wan naq li k’a’ru nakak’ul a’an ajwi’ li taaraj laa Choxahil Yuwa’ naq taatzol.

Xjuntaq’eetankileb’ li loq’laj hu aawik’in

K’oxla chan ru naq li k’a’ru yeeb’il resil malaj k’utb’il nak’anjelak sa’ laa yu’am. Jo’ jun eetalil, naru taapatz’ aawib’, “K’a’ru xink’ul laa’in li chanchan ajwi’ li yookin chirilb’al?” malaj “Chan ru naru tinb’aanu jo’ xb’aanu li kristiaan a’in sa’eb’ li loq’laj hu?”

Roksinkileb’ li patz’om naq yookat chi tzolok

Naq nakatzoleb’ li loq’laj hu, naru nachal li patz’om sa’ laa k’a’uxl. Maare taawanq li patz’om chirix li k’a’ru yookat chirilb’al, malaj chirix li k’a’ru yoo chi k’ulmank sa’ laa yu’am. K’oxlaheb’ li patz’om a’in, ut sik’ lix sumenkileb’ naq yookat chixtzolb’aleb’ li loq’laj hu.

Roksinkileb’ li k’anjeleb’aal re tzolok

Re xtawb’al chik li na’leb’ chirixeb’ li raqal li nakawil, naru taawoksiheb’ li aatin toj rub’el li junjunq chi perel, li K’utul Raqal reheb’ li Loq’laj Hu, ut xkomoneb’ chik li k’anjeleb’aal.

Xk’oxlankil li k’a’ru yoo chi k’ulmank sa’eb’ li loq’laj hu

Naru taataw li chaab’il na’leb’ chirix jun raqal sa’eb’ li loq’laj hu wi taak’oxla k’a’ru yoo chi k’ulmank sa’ li raqal a’an malaj b’ar yoo chi k’ulmank. Xnawb’al b’ar ke’chal chaq ut k’a’ru ke’xpaab’ jun tenamit yeeb’il resil xb’aan jun profeet naru tatxtenq’a chixtawb’al k’a’ru aj-e li raatin li profeet a’an.

Xtz’iib’ankil li k’a’ru nakak’oxla ut nakaweek’a

K’iila paay chan ru naq naru taatz’iib’a li nakak’oxla naq yookat chi tzolok. Naru taak’e reetalil jun aatin malaj jun ch’uut chi aatin, ut taatz’iib’a li k’a’ru nakak’oxla chiruheb’ laa loq’laj hu. Naru ajwi’ taatz’iib’a sa’ jalan chik li hu li k’a’ru nakak’oxla, nakaweek’a, ut li na’leb’ nakak’ul.

Xtzolb’aleb’ li raatineb’ li profeet ut apostol re roso’jikeb’ li kutan

Il ru li k’a’ru xe’xye li profeet ut li apostol sa’eb’ li kutan a’in chirixeb’ li na’leb’ nakataw sa’eb’ li loq’laj hu (chi’ilmanq conference.ChurchofJesusChrist.org ut li Liahona).

Xwotzb’al li xatzol

Li aatinak chirix li na’leb’ xak’ul naq yookat chi tzolok aajunes nak’anjelak re xtzolb’aleb’ laa komon, a’ut jo’kan ajwi’ naxkawob’resi aana’leb’ chirix li k’a’ru xawil ru.

Xyu’aminkil li k’a’ru nakatzol

Li xtzolb’aleb’ li loq’laj hu ink’a’ ka’ajwi’ nokoxmusiq’a—tento ajwi’ naq tooreek’asi chixjalb’al chan ru nokowan. Ab’i li k’a’ru naxye li Musiq’ej naq yookat chi tzolok, ut k’e aach’ool chixb’aanunkil li k’a’ru naxye.

Li Elder David A. Bednar kixye: “Ink’a’ raj taqoyb’eni naq li Iglees, jo’ jun ch’uut, tixk’ut chiqu chi moko tixye qe chixjunil li tento taqanaw ut taqab’aanu re ok choq’ tzolom tiikeb’ xch’ool ut re kuyuk chi anchal qa’chool toj sa’ roso’jik [chi’ilmanq Tzol’leb’ ut Sumwank 121:29]. Teneb’anb’il b’an sa’ qab’een laa’o naq taqatzol li aajel ru xtzolb’al, naq toowanq chi tiik qach’ool jo’ naqanaw naq tento xb’aanunkil, ut too’ok jo’ li ani naraj li Qaawa’. Ut li qochoch a’an li tz’aqal na’ajej re tzolok, re wank chi tiik qach’ool, ut re ok jo’ li ani naraj li Qaawa’ ” (“Kawresinb’il re xk’ulb’al chixjunil li k’a’ru na’ajman,” Jolomil ch’utub’aj-ib’ re abril 2019).